ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 17
ಸಾಗೊರಾಚ್ಯಾ ವಾಟೆಚ್ಯೊ ಝರಿ
ಬೂಕ್: ಸಾಗೊರಾಚ್ಯಾ ವಾಟೆಚ್ಯೊ ಝರಿ
ಸಂ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಪ್ರಸ್ತಾವನ್: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 146
ಮೋಲ್: ರು. 200
ಪ್ರಕಾಶಕ್: ಆಶಾವಾದಿ ಪ್ರಕಾಶನ್.
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್
ತಾರಿಕ್: 15 ಸಪ್ತೆಂಬರ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ವಲ್ಲಿ ಕ್ವಾಡ್ರಸ್
ವಿಮರ್ಶೆ/ಸಮೀಕ್ಶಾ ಲೇಖನ್ - ಮೆಲ್ವಿನ್ ಜೆ. ವಾಸ್, ಕೆಲರಾಯ್
ವ್ಹಾಳ್ಯಾಚ್ಯಾ ಭವಿಶ್ಯಾ ತೆವ್ಶಿಂ ಏಕ್ ನದರ್
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಹ್ಯಾ ಜಮ್ಯಾಂಚಾ ಮಾತಾಳ್ಯಾ ಥಾವ್ನ್ಂಚ್ ಹೆಂ ಸಮೀಕ್ಶೆಚೆಂ ಲೇಖನ್ ಆರಂಭ್ ಕರ್ಚೆಂ ತರ್, ಸಾಗೊರ್ ಆನಿ ಝರ್ ಹಾಚ್ಯಾ ಮಧೆಂ ಆಸ್ಚಾ ವಾಟೆರ್ ಭೋವ್ಶಾ ಸಗ್ಳೊ ಸಂಸಾರ್ಚ್ ಅಟಾಪುನ್ ಆಸಾ. ಹಿ ವಾಟ್ ಹ್ಯಾ ಸಂಸಾರಾಕ್ ದೆಖ್ಚಿ ಆನಿ ತುಕ್ಚಿ; ಹಿ ವಾಟ್ ಸಂಸಾರಾಕ್ ಆಯ್ಕೊಂವ್ಚಿ ಆನಿ ವೊರಾಂವ್ಚಿ: ಹಿ ವಾಟ್ ಹ್ಯಾ ಸಂಸಾರಾಕ್ ಭೊಗ್ಚಿ ಆನಿ ಪಾರ್ಕುಂಚಿ; ಹಿ ವಾಟ್ ಹ್ಯಾ ಸಂಸಾರಾಕ್ ರಸ್ಚಿ ಆನಿ ವಾಗಂವ್ಚಿ;
ಸಾಗೊರ್ ಆನಿ ಝರಿ ಮಧ್ಲ್ಯಾ ವಾಟೆರ್ ಇತ್ಲೆಂ ಸಗ್ಳೆಂ ಆಟಾಪುನ್ ಆಸ್ತಾಂ ಕಿತೆಂ ಝರಿಚಿ ದಿಶಾ ಫಕತ್ತ್ ಸಾಗೊರಾಕ್ ವೆಂಗ್ಚಿ ಯಾ ಸಾಗೊರಾಂತ್ ಏಕ್ ಜಾಂವ್ಚಿ? ಅಶೆಂ ಜಾಲ್ಯಾರ್ ತಾಚೊ ತೊ ವ್ಹಾಳೊ? ಯಾ ತಾಚಿ ವಾಟ್? ದಿಶಾ ಸಾಗೊರಾಚಿ ವ್ಹಯ್ ತರ್ಯ್ ಹಾಂಗಾಸರ್ ಪರೋಕ್ಷ್ಪಣಿಂ ತಾಚೊ ತೊ ವ್ಹಾಳ್ಚೊ ವ್ಹಾಳೊ ಚಡ್ಚ್ ಮಹತ್ವಾಚೊ ಪಾತ್ರ್ ಘೆತಾ.
’ಕವಿತಾಝರ್’ ಅಂಕಣ್ ವಾ ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಕವಿತಾಜಮೊ ಹ್ಯಾ ಝರಿಂಕ್ ಏಕ್ ವಾಟ್ ಜಾಂವ್ಕ್ ಸಕ್ತಾ ಪುಣ್ ದಿಶಾ ನ್ಹಂಯ್. ದಿಶಾ ತಾಣಿಂ ವೆಂಗುಂಕ್ ವೆಚೊ ಸಾಗೊರ್. ಅಶೆಂ ಮ್ಹಣ್ತಾನಾ ಹ್ಯಾ ಝರಿಂಕ್ ಆಶೆವ್ನ್ ವೆಚಾ ತಾಂಚ್ಯಾ ದಿಶೆಚೊ ವ್ಹಾಳೊ ಕಸಲೊ ಮ್ಹಳ್ಳೆಂ ವಿಚಾರ್ ವಿಮರ್ಶಾ ಕರ್ಚೆಂ ಹಾಂಗಾ ಹಾಂವ್ ಚಡ್ ಗರ್ಜ್ ಮ್ಹಣ್ ಚಿಂತಾಂ.
ಹ್ಯಾ ಝರಿಂನಿ ಚಲ್ಚಿ ವಾಟ್ ಆಮ್ಚೊ ಸಂಸಾರ್ ಯಾ ಸಂಕೀರ್ಣ್ ಅರ್ಥಾನ್ ಆಮ್ಚಿ ಸಮಾಜ್ ಮ್ಹಣೊನ್ ಲೆಖ್ಲೆಂ ಜಾಲ್ಯಾರ್ ವ್ಹಾಳ್ಯಾಕ್ ತ್ಯಾಚ್ ಸಂಕೀರ್ಣ್ ಅರ್ಥಾನ್ ವಿಚಾರ್ ಮ್ಹಣೊನ್ ಸಮ್ಜಯಾಂ. ಅಶೆಂ ಮ್ಹಣ್ತಾನಾ ಹಾಂಗಾಸರ್ ಹ್ಯಾ ಜಮ್ಯಾಂತ್ ಆಟಾಪ್ಲೆಲ್ಯಾ ಶೆಂಭೊರ್ ಕವಿಂಚಾ ಶೆಂಭೊರ್ ಕವಿತಾಂಚಾ ವಿಚಾರಾಂ ವಯ್ರ್ ವಿಮರ್ಶ್ಯಾತ್ಮಕ್ ನದರ್ ಮಾರುನ್ ಹರ್ಯೆಕಾ ಕವಿತಾಚಾ ಗರ್ಭಾಂತ್ ಆಟಾಪ್ಲೆಲ್ಯಾ ವಿಚಾರಾಂಕ್ ಸವಿಸ್ತಾರ್ ರಿತಿರ್ ಲೇಖನಾಧ್ವಾರಿಂ ಪ್ರಸ್ತುತ್ ಕರ್ಚೆಂ ಕೊಂಕ್ಣೆಕ್ ತಿತ್ಲ್ಯಾ ಮಹತ್ವಾಚೆಂ ಮ್ಹಣೊನ್ ಹಾಂವ್ ಚಿಂತಿನಾ.
ಹ್ಯಾಚ್ ಖಾತಿರ್ ಹ್ಯಾ ಕವಿತಾ ಜಮ್ಯಾಂತ್ ವ್ಹಾಳ್ಲ್ಲ್ಯಾ ಸರ್ವ್ ಕವಿತೆಂಚಾ ವಿಚಾರಾಂ ವಯ್ರ್ ಹಾಂಗಾಸರ್ ವಿಚಾರ್ ತರ್ಕ್ ಚಲ್ತೆಲೆಂ ಶಿವಾಯ್ ಖಾಸ್ಗಿ ಜಾವ್ನ್ ಖಂಯ್ಚಾಯ್ ವಿಚಾರಾಂಚಾ ವ್ಹಡ್ಪಣಾಂ ವಯ್ರ್ ಆನಿ ಲ್ಹಾನ್ಪಣಾ ವಯ್ರ್ ವಿಚಾರ್ ತರ್ಕ್ ಚಲ್ಚೆಂನಾ. ಮ್ಹಜ್ಯಾ ಹ್ಯಾ ನಿರ್ಧಾರಾಕ್ ಎಕಾ ತಾಳ್ಯಾನ್ ಸಗ್ಳ್ಯಾಂನಿ ಮಾಂದುನ್ ಘೆಂವ್ಕ್ ಜಾಯ್ ಮ್ಹಣೊನ್ಯ್ ನಾ. ಹಾಂಗಾಸರ್ ಹಾಂವ್ ಖಂಯ್ಚಾಯ್ ಕವಿಕ್ ಯಾ ಕವಯತ್ರಿಕ್ ಲ್ಹಾನ್ ಯಾ ವ್ಹಡ್ ವಾ ತರ್ನ್ಯಾ ವಾ ಪರ್ನ್ಯಾ ದಿಶ್ಟಿನ್ ಪಳೆಯ್ನಾ. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಆವಯ್ಚಾ ಗರ್ಭಾಂತ್ ಕಿರ್ಲೊಂಚಾ ಭಿಂಯಾಳ್ಯಾ ವಯ್ರ್ ತೆಂ ಭಿಂ ವೊಂಪ್ಲ್ಲ್ಯಾಕ್ ಆನಿ ತಾಕಾ ಜೀವ್ ದಿಲ್ಲ್ಯಾಕ್ ದೊಗಾಂಯ್ಕ್ಯ್ ಸಮಾಸಮ್ ತ್ಯಾ ಕಿರ್ಲಾಲ್ಲ್ಯಾ ಭಿಂಯಾ ವಯ್ರ್ ನೈತಿಕ್ ಹಕ್ಕ್ ಆಸ್ಲ್ಯಾರ್ಯ್ ತಾತ್ವಿಕ್ಪಣಿಂ ಯಾ ವಸ್ತವಿಕ್ಪಣಿಂ ತೆಂ ಭಿಂ ಕಿರ್ಲಾಲ್ಲೆಂ ಭಿಂ ತಾಣೆಂ ಕಿರ್ಲ್ಯಾಲ್ಲ್ಯಾ ಘಡಿಯೆ ಥಾವ್ನ್ ಸ್ವತಂತ್ರ್. ತಾಚ್ಯಾ ವಯ್ರ್ ಕೊಣಾಕ್ಯ್ ಹಕ್ಕ್ ನಾ. ಜರೀ ತ್ಯಾ ನೋವ್ ಮಯ್ನ್ಯಾಚಾ ಆವ್ದೆಂತ್ ತೆಂ ಭಿಂ ಸಂಪೂರ್ಣ್ ನಿಸ್ಸಹಾಯಕ್ ಜಾವ್ನ್ ಆಸ್ಲ್ಯಾರ್ಯೀ!
ಸಾಹಿತ್ಯಾಕ್ಯ್ ಹ್ಯಾ ಸಮಾಜೆಂತ್ ಎಕ್ಲ್ಯಾ ಥಾವ್ನ್ ಜಲ್ಮ್ ಘೆಂವ್ಕ್ ಆಸಾ ಮ್ಹಣ್ತಾನಾ ತೆಂಯ್ ಹ್ಯಾ ಸಮಾಜೆಂತ್ ಸ್ವತಂತ್ರ್. ಪುಣ್ ಥೊಡ್ಯಾ ರಿಯಾಯ್ತಿಕ್ ಬಗ್ಲೆಕ್ ಘೆವ್ನ್! ಹಾಂಗಾಸರ್ ಸಾಹಿತ್ಯ್ ವಾಚ್ಪ್ಯಾಚಾ ಕಾನಾಂಕ್ ಪಡ್ತಾ ವರೇಗ್ ಆನಿ ದೊಳ್ಯಾಂನಿ ವಾಚ್ತಾ ವರೇಗ್ ತೆಂ ಪ್ರಭುದ್ದ್ ಜಾಯ್ನಾಂ. ಖಂಯ್ಚರೀ ತೆಂ ವಾಚ್ಲೆಂ ಜಾಲ್ಯಾರ್ ಯಾ ಆಯ್ಕಾಲೆಂ ಜಾಲ್ಯಾರ್ ತೆಂ ಪ್ರಭುದ್ದ್ ಜಾವ್ನ್ ಅಪ್ಲೇಸ್ತಕಿಂ ಸ್ವತಂತ್ರ್ ಜಾತಾ. ಹ್ಯಾ ಉಪ್ರಾಂತ್ ಜಾಂವ್ ತೆಂ ತರ್ನೆಂ ವಾ ಪರ್ನೆಂ ಕಾಂಯ್ ಫರಕ್ ಪಡಾನಾ. ಹ್ಯಾ ವಿಶಿಂ ಆಮ್ಚಿ ಬರವ್ಪ್ಯಾಂಚಿ ಚಿಂತ್ಪಾ ಸಕತ್ ಖಂಡಿತ್ ಪಯ್ಲೆಂ ವ್ಹಾಳೊಂಕ್ ಜಾಯ್ ಉಪ್ರಾಂತ್ ಜಾಂವ್ ತೆಂ ತರ್ನೆಂ ವಾ ಪರ್ನೆಂ. ಕಾಂಯ್ ಫರಕ್ ಪಡಾನಾ. ಹ್ಯಾ ವಿಶಿಂ ಆಮ್ಚಿ ಬರವ್ಪ್ಯಾಂಚಿ ಚಿಂತ್ಪಾ ಸಕತ್ ಖಂಡಿತ್ ಪಯ್ಲೆಂ ವ್ಹಾಳೊಂಕ್ ಜಾಯ್ ಉಪ್ರಾಂತ್ ಆಮಿ ಬರಂವ್ಕ್ ಜಾಯ್. ತೆದ್ನಾಂ ತ್ಯಾ ಬರ್ಪಾಂಕ್ ಆನಿ ತಾಚ್ಯಾ ವಿಚಾರಾಂತ್ ಪರಿಪಿಕಾಯ್ ಝಳ್ಕಾತಾ. ಆಪ್ಣಾಂವ್ಚೆಂ ತಂತ್ರ್ ಆನಿ ಶೈಲಿ ತೆಂ ಉಪ್ರಾಂತ್ ಆಪ್ಲ್ಯಾ ಅನ್ಭೋಗಾಂತ್ ಯೆತಾ. ಹೆಂ ಬದ್ಲಿ ಜಾಂವ್ಕ್ಯ್ ಸಕ್ತಾ.
ಹ್ಯಾ ಕವಿತಾಜಮ್ಯಾಂತ್ ಧಾರ್ಮಿಕ್, ಸಾಮಾಜಿಕ್, ನೈತಿಕ್, ರಾಜಕೀಯ್, ವಾಸ್ತವಿಕ್ ವಿಚಾರಾಂಚಿಂ ಕವಿತಾ ಆಟಾಪ್ಲ್ಯಾಂತ್ ಆಸ್ತಾಂ, ಹ್ಯಾ ಝರಿಂನಿ ತಾಂಚ್ಯಾ ವಿಚಾರಾಂಕ್ ವ್ಹಾಳಯಿಲ್ಲಿ ರೀತ್ ತಾಂಕಾಂ ತಾಂಚಾ ಸಾಗೊರಾಚ್ಯಾ ದಿಶಾ ತೆವ್ಶಿಂ ಪಾವಯ್ತಾ? ಹೆಂ ಸವಾಲ್ ಖಂಡಿತ್ ಉಭ್ಜಾತಾ.
ಹಾಂಗಾಸರ್ ಸಭಾರ್ ಕವಿ ಆನಿ ಕವಯತ್ರಿಂಚೊ ತಾಂಚ್ಯೊ ಫುಡ್ಲದ್ ಕವಿತಾ ಪ್ರಗಟ್ ಜಾಲ್ಯಾತ್ ತೆಂಯ್ ಸತ್. ಪುಣ್ ಹ್ಯಾ ಸತಾಕ್ ಸಾಂಗಾತ್ ದಿತಾನಾ ದುಸ್ರ್ಯಾ ಸತಾಕ್ ನೆಗಾರ್ ಕರ್ಚೆಂ ನೆಣಾರ್ಪಣ್ ಹಾಂವ್ ತರೀ ಕಶೆಂ ಕರುಂ?
ಕೊಂಕ್ಣಿ ಸಂಸ್ಕೃತಿ, ಕೊಂಕ್ಣಿ ಭಾಶಾ ಯಾ ಕೊಂಕ್ಣಿ ವಾವ್ರಾವಯ್ರ್ ಕವಿತಾಂಚಿ ಝರ್ ವ್ಹಾಳ್ಳ್ಯಾ ತಿ ಸಂತೊಸಾಚಿ ಗಜಾಲ್ ವ್ಹಯ್ ತರೀ ಕೊಂಕಣಿಕ್ ಲಾಚಾರ್ಪಣಿಂ ಪ್ರಸ್ತುತ್ ಕೆಲ್ಲೆ ವಿಚಾರ್ ಫಳಾಧಿಕ್ ಜಾತೆಲೆ ಮ್ಹಳ್ಳೊ ಭರ್ವಸೊ ವಾಸ್ತವಿಕ್ ಥಳಾರ್ ರಾವೊನ್ ವೊರಾವ್ನ್ ಪಳೆತಾನಾ ಝಳ್ಕಾನಾ. ಕೊಂಕ್ಣೆಕ್ ಕೊಣ್ಯ್ ಮಾಂಯ್ ಮ್ಹಣೊಂದಿ ಆವಯ್ ಮ್ಹಣೊಂದಿ ಪುಣ್ ತಿಕಾ ಸೆವೆಚಿ ಗರ್ಜ್ ಆಸಾ? ತಿಚಿ ಸೆವಾ ಕರುಂಕ್ ಕೊಂಕ್ಣಿ ತಿತ್ಲಿಯ್ ಲಾಚಾರ್ ಜಾಂವ್ಕ್ ನಾ ಹಾಂ! ಪುಣ್ ತಿಕಾ ವಾವ್ರ್ ಕರ್ಚಾ ವಾವ್ರಾಡ್ಯಾಂಚಿ ಗರ್ಜ್ ಆಸಾ.
ಆವಯ್ ಮ್ಹಣ್ತಾನಾ ತಿ ಆಪ್ಣಾಚಿ ಜಾಂವ್ ಯಾ ಕೊಂಕ್ಣಿ - ಸಂಬಂಧ್ ಎಕ್ಚ್! ತ್ಯಾ ಸಂಬಂಧಾಚೊ ಅರ್ಥ್ ಎಕ್ಚ್! ಅಶೆಂ ಆಸ್ತಾನಾ ಆಪ್ಲ್ಯಾ ಖಾಸ್ಗಿ ಸುಖಾಕ್ ಲಬ್ಧಾಲ್ಲೊ ಮನಿಸ್ ಲಾಚಾರ್ಪಣಿಂ ಆಪ್ಲ್ಯಾ ಆವಯ್ ಖಾತಿರ್ ದುಃಖಾಂ ಗಳಂವ್ಚೆಂ ಪೊಕೊಳ್ಪಣಾಕ್ ಉಕ್ಲುನ್ ಧರ್ತಾ ಶಿವಾಯ್ ತ್ಯಾ ಆವಯ್ನ್ ಖಂಯ್ಚಾಯ್ ರಿತಿಚೊ ಖಾಸ್ಗಿ ಸಾಂಗಾತ್ ದಿಂವ್ಚೆಂ ಪ್ರಯತ್ನ್ ಕರಿನಾಸ್ತಾನಾ ವಿಳಾಪ್ ಸೊಡ್ಚೆಂ ಎಕಾ ಕುಶಿನ್ ವಿಚಾರಾಂಚಾ ಉಣ್ಯಾಪಣಾಕ್ ದಾಖಯ್ತಾ ತರ್ ದುಸ್ರ್ಯಾ ಕುಶಿನ್ ಪಾರಂಪರಿಕ್ ವಾಟೆರ್ಚ್ ವೆಂಗ್ಲ್ಲೆಂ ದಿಸ್ತಾ. ಹಾಂಗಾಸರ್ ಹಾಂವ್ ಸಂಪೂರ್ಣ್ ಮ್ಹಣೊನ್ ಸಾಂಗಾನಾ ಕಿತ್ಯಾಕ್ ಮ್ಹಳ್ಯಾರ್ ಹ್ಯಾಚ್ ವಿಚಾರಾಂಚಾ ಕವಿತೆಂನಿ ಥಂಯ್ ಹಾಂಗಾ ನವ್ಯಾ ತಂತ್ರ್ ಗಿನ್ಯಾನಾಕ್ ಆಪ್ಣಾಯಿಲ್ಲೆಂ ಆನಿ ಬದ್ಲಿಲ್ಲ್ಯಾ ಶೈಲೆಚೆಂ ವರ್ಣನ್ಯ್ ದಿಸೊನ್ ಯೆತಾ. ಹೆಂ ನಿಜಾಯ್ಕ್ಯ್ ಮಾಂದುನ್ ಘೆಂವ್ಚೆ ತಸಲೆಂ.
ಧಾರ್ಮಿಕ್ ವಿಚಾರಾಂ ಮಧೆಂ ಉಟೊನ್ ಆಯಿಲ್ಲಿಂ ಥೊಡಿಂ ಕವಿತಾ ಧಾರ್ಮಿಕ್ ಪೊಕೊಳ್ಪಣಾ ವಿರೋಧ್ ಬಂಡಾಯ್ ಯಾ ಕ್ರಾಂತಿ ಉಟಂವ್ಚಾಂತ್ ಯಶಸ್ವಿ ಜಾಲ್ಯಾಂತ್ ತರ್ಯ್ ವ್ಹಾಳಯಿಲ್ಲ್ಯಾ ವಿಚಾರಾಂಚಾ ತಂತ್ರ್ ಗಿನ್ಯಾನಾಂತ್ ಜಾಂವ್ ವಾ ಶೈಲೆಂತ್ ಜಾಂವ್ ಕಾಂಯ್ ಬದ್ಲಾವಣ್ ದಿಸೊನ್ ಯೇನಾ. ಸಂಸಾರಿ ವಾಸ್ತವೀಕತಾವಯ್ರ್ ದೆವಾಕ್ ಗುನ್ಯಾಂವ್ಕಾರ್ ಕರ್ಚೆಂ ಲಾಚಾರ್ಪಣ್ಗೀ ಮ್ಹಣೊನ್ ಕಳಾನಾ. ಆಶಾಡಾಚಿಂ ದಾಟ್ ಮೊಡಾಂ ಉದೆವ್ನ್ ಯೆತಾನಾ ಮನ್ಶ್ಯಾಕ್ಯ್ ಕಳ್ತಾ ಶಿರಾಂಧಾರಿಚೊ ಪಾವ್ಸ್ ವೊತ್ತಾ ಮ್ಹಣೊನ್ ಆನಿ ರಾನಾಂತ್ಲ್ಯಾ ಮೊರಾಕ್ಯ್ ಸಮ್ಜಾತಾ ಪಾವ್ಸ್ ಪಡ್ಚೊ ಆಸಾ ಮ್ಹಣೊನ್. ಹೆಂ ಪ್ರಕೃತೆಚೆಂ ನಿಯಮ್. ಜಾಲ್ಯಾರ್ಯ್ ಮನಿಸ್ ಮಾತ್ರ್ ಆದಿಂ ಥಾವ್ನ್ ಹ್ಯಾ ನಿಯಮಾಕ್ ಆಡ್ ರಾವ್ಚೆಂ ಪ್ರಯತ್ನ್ ಕರ್ತಾ ಆನಿ ಗುನ್ಯಾಂವ್ಕಾರ್ ದೆವಾಕ್ ಕರ್ತಾ.
ನೈತಿಕ್ ಮೊಲಾಂಚಾ ಕವಿತೆಚಾ ವಿಚಾರಾಂನಿ ನೈತಿಕ್ ಮೊಲಾಂಚೆಂ ಮೋಲ್ ಧಾಖಂವ್ಚೆಂ ಖೂಬ್ ಪ್ರೇತನ್ ಕೆಲಾಂ ಆಸ್ತಾಂ ತಾಂಚಾ ವ್ಹಾಳ್ಯಾಂತ್ ಕಾಂಯ್ ಪಾರಂಪರಿಕ್ಪಣ್ ದಿಸೊನ್ ಆಯ್ಲ್ಯಾರ್ಯ್ ತ್ಯಾಚ್ ಪಾರಂಪರಿಕ್ಪಣಾಕ್ ಸಾಂಡ್ಲ್ಲೆ ವಿಚಾರ್ಯ್ ದಿಸ್ತಾತ್.
ಸ್ತ್ರೀವಾದಿ ವಿಚಾರಾಂನಿ ಭರ್ವಸೊ ಉಟೊನ್ ಯೆಂವ್ಚೊ ಝಳ್ಕಾತಾ ತರೀ ವ್ಹಾಳ್ಯಾಂತ್ ಆನಿ ಶೈಲೆಂತ್ ಬದ್ಲಾವಣ್ ಆನಿ ನವೆಂಸಾಂವ್ ಚಡ್ ಗರ್ಜೆಚೆಂ. ಸಾಮಾಜಿಕ್ ವಿಚಾರಾಂಚಾ ಕವಿತೆಂಕ್ ಘೆತ್ಲೆಂ ತರ್ ಎಕಾ ಕುಡಿನ್ ಸಮಾಜೆಚಾ ಕ್ರಾಂತೆಚೆ ವಿಚಾರ್ ಜಹ್ಳ್ಕತಾತ್ ತೆಂಚ್ ದುಸ್ರ್ಯಾ ಕುಶಿನ್ ಬದ್ಲಾಲ್ಲ್ಯಾ ಸಮಾಜೆಚಾ ವಿಚಾರಾಂಚೆ ವಿಳಾಪ್ಯ್ ದಿಸ್ತಾತ್.
ಸಮಾಜ್ ಮ್ಹಳ್ಳಿ ತಿ ರಾವೊನ್ ಆಸ್ಲ್ಲ್ಯಾ ಉದ್ಕಾಪರಿಂ ನ್ಹಂಯ್. ವಾಳಾ ಥಾವ್ನ್ ವೆಳಾಕ್ ಹ್ಯಾ ಸಮಾಜೆಂತ್ ಬದ್ಲಾವಣ್ ಜಾಲ್ಯಾ. ಹ್ಯಾ ಸಮಾಜೆಂತ್ ಸುಧಾರಣ್ ಜಾಲಾಂ. ಮನಿಸ್ ಖುದ್ದ್ ಅಪ್ಲೊ ವಿಕಾಸ್ ಜಾಂವ್ಚಾ ತೆವ್ಶಿಂ ಚಿಂತಾನಾ ತಾಚ್ಯಾ ಚಿಂತ್ನಾಂಕ್ ಪರೋಕ್ಶ್ ಜಾವ್ನ್ ಸಮಾಜ್ಯ್ ವಿಕಾಸ್ ಜಾತಾ. ಕಿತ್ಯಾಕ್ ಮ್ಹಳ್ಯಾರ್ ಹರ್ಯೆಕಾ ಕ್ರಿಯಾಕ್ ಏಕ್ ಪ್ರತಿಕ್ರಿಯಾ ಖಂಡಿತ್ ಆಸಾ ಆನಿ ಪ್ರತಿಕ್ರಿಯಾಕ್ ನವ್ಯಾನ್ ಏಕ್ ಪರೋಕ್ಶ್ ಪ್ರತಿಕ್ರಿಯಾ ಆಸಾ. ಅಶೆಂ ಮ್ಹಣ್ತಾನಾ ಏಕ್ ಸಮಾಜ್ ಎಕಾ ಕ್ರಿಯೆಚೆ ಸಭಾರ್ ಪ್ರತ್ಯಕ್ಶ್ ಆನಿ
ಪರೋಕ್ಶ್ ಪ್ರತಿಕ್ರಿಯಾಂಕ್ ಎಕಾ ವೆಳಾರ್ ಸೊಸ್ತಾತ್. ಅಶೆಂ ಆಸ್ತಾನಾ ತೆಂ ವಾಸ್ತವಿಕ್ ಜಾತಾ. ಆನಿ ವಾಸ್ತವ್ ಮನ್ಶಾ ಸಮಾಜೆಂತ್ ಜಲ್ಮಾತಾ ಜಾಲ್ಯಾರ್ಯ್ ಮನ್ಶಾಕ್ ತೊ ಸಾಂಗಾತ್ ದೀಂವ್ಕ್ ಸಕಾನಾ ಬಗಾರ್ ಮನ್ಶಾನ್ ತಾಚ್ಯೆ ಸಾಂಗಾತಾ ಜಿಯೆಂವ್ಕ್ ಪಡ್ತಾ.
ಮನಿಸ್ ಆಶಾವಾದಿ ಆಸೊಂ ಯಾ ನಾ ಆಸೊಂ ಪುಣ್ ಆಶಾ ಕರ್ಚೆಂ ಮಾತ್ರ್ ಮನ್ಶಾ ಸಂಯ್ಬ್. ಹ್ಯಾಚ್ ಆಶೆಕ್ ಲಾಗೊನ್ ತೊ ಗಾಂವಾ ಥಾವ್ನ್ ಶ್ಹೆರಾಕ್ ಧಾಂವ್ತಾ! ಗೊಟ್ಯಾ ಥಾವ್ನ್ ಗುಡ್ಯಾಕ್! ಆನಿ ರಾನಾಂ ಥಾವ್ನ್ ರೆಂವೆಕ್! ಅಶೆಂ ಆಯಿಲ್ಲೊ ಮನಿಸ್ ಆಪ್ಲ್ಯಾಚ್ ಖುಶೇನ್ ಯೆತಾ ಆನಿ ಆಪ್ಲ್ಯಾಚ್ ಖುಶೇನ್ ಪಾಟಿಂ ವಚೊಂಕ್ಯ್ ಸಕ್ತಾ. ಪುಣ್ ಆಶಾ ಮ್ಹಳ್ಳೆಂ ತಾಚೆಂ ಸ್ವಾರ್ಥ್ಪಣ್ ಸತಾಕ್ ವಳ್ಕೊಂಕ್ ಆವ್ಕಾಸ್ ದೀನಾ. ಅಶೆಂ ಆಸ್ತಾನಾ ತೊ ವೆಚಿಕ್ ಪುತಾಪರಿಂ ಗಳ್ಗಳ್ಯಾಂ ರಡ್ತಾ ಶಿವಾಯ್ ಪಾಟಿಂ ವಚಾನಾ. ಹೆಂ ಸಿಂತಿಮೆಂತಾಕ್ ಜಾಗಂವ್ಚೆಂ ಪ್ರೇತನ್ ಯಾ ಆಪ್ಲ್ಯಾ ಲಾಚಾರ್ಪಣಾಕ್ ಪಾತ್ಳಾಂವ್ಚೆಂ ಪ್ರೇತನ್ ಜಾಂವ್ಕ್ಯ್ ಪುರೊ. ಪುಣ್ ಅಸಲ್ಯಾ ಅಸ್ಕತ್ ವಿಚಾರಾಂಚಾ ಸಾಹಿತ್ಯಾ ವರ್ವಿಂ ತ್ಯಾ ಸಾಹಿತಿಂನಿ ಸಮಾಜೆಕ್ ದಿಂವ್ಚೆಂ ಲಿಸಾಂವ್ ಕಿತೆಂ?
ರಾಜಕೀಯ್ ವಿಚಾರಾಂಚಾ ಕವಿತೆಂನಿ ಸಮಾಜೆಚಾ ವ್ಯವಸ್ಥೆ ವಯ್ರ್ ಉಭೊ ಕೆಲ್ಲೊ ಬಂಡಾಯ್ ಸಾರ್ಕೊಚ್ ಝಳ್ಕಾತಾ. ತಶೆಂಚ್ ಮನ್ಶಾಚಾ ನೈತಿಕ್ ಜವಾಬ್ಧಾರೆ ವಯ್ರ್. ಹಿ ನೈತಿಕ್ ಜವಾಬ್ಧಾರಿ ಮನಿಸ್ ಕಿತ್ಲೊ ಸಮ್ಜೊನ್ ಘೆತಾ ಆನಿ ತ್ಯಾವಿಶಿಂ ಸುಧಾರಣ್ ಹಾಡುಂಕ್ ಪಾವ್ತಾ ಮ್ಹಳ್ಳೊ ವಿಶಯ್ ಉಪ್ರಾಂತ್ಲೊ ಜಾಲ್ಯಾರ್ಯ್ ಲಿಸಾಂವ್ ದಾಕವ್ನ್ ದಿಂವ್ಚೆಂ ಪ್ರೇತನ್ ಕಾಂಯ್ ಸುಫಳ್ ಕಶೆಂ ದಿಸ್ತಾ.
ಪ್ರಸ್ತುತ್ ಸಮಾಜೆಂತ್ ನಿರ್ಶಾಚ್ ಯಾಂತ್ರಿಕೃತ್ ಜೀವನಾಕ್ ವೆಂಗ್ಲ್ಲ್ಯಾ ಮನ್ಶಾಕ್ ಸಾಂಗಾತ್ ದಿತಾನಾ ಹಾಂಗಾಸರ್ಯ್ ಹ್ಯಾ ಕವಿತಾ ಜಮ್ಯಾಂತ್ ನಿರಾಶಾ ಭರ್ಪೂರ್ ಝಳ್ಕಾತಾ. ಥಂಯ್ ಹಾಂಗಾ ಹಿ ನಿರಾಶಾ, ನಿರಾಶೆಚೊ ಉಲೊ ಜಾವ್ನ್ ಉರ್ಲ್ಯಾರ್ ಥಂಯ್ ಹಾಂಗಾ ನಿರಾಸ್ವಾದಕ್ಯ್ ವೆಂಗ್ಲ್ಯಾ. ಭೋವ್ಶಾ ಸಮಾಜೆಕ್ ಆನಿ ತಾಂತ್ಲ್ಯಾ ಜಿವಿತಾಕ್ ಆಮಿ ಖಂಯ್ಚಾ ನದ್ರೆನ್ ಪಳೆತಾಂವ್ ಮ್ಹಳ್ಳ್ಯಾಚಿ ರುಜ್ವಾತ್ ಹಿ. ಆಮಿ ಜಿಯೆಂವ್ಚಿ ಸಮಾಜ್ ಏಕ್ ವಾಸ್ತವಿಕ್ ಸಮಾಜ್! ಹ್ಯಾ ಸಮಾಜೆಕ್ ಮನಿಸ್ ಆಪ್ಣಾಕ್ಚ್ ಹೊಂದ್ವೊನ್ ಘೆವ್ನ್ ಜಿಯೆತಾ. ಅಶೆಂ ಆಸ್ತಾಂ ತಾಣೆಂ ಹೊಂದೊನ್ ಚಲ್ಚೆ ವಿಚಾರ್ ಚಡ್ ಪ್ರಾಮುಖ್ಯ್ ಘೆತಾತ್ ತಾಚ್ಯಾ ಆಶಾವಾದಾಕ್ ಆನಿ ನಿರಾಸ್ವಾದಾಕ್.
ವಾಸ್ತವಾಂತ್ ಜಿತ್ಲಿ ಚಡ್ ಆಶಾ ತಿತ್ಲಿ ಚಡ್ ಮಾತ್ರ್ ನಿರಾಶಾ ಆಸಾ. ಕಿತ್ಯಾಕ್ ಮ್ಹಳ್ಯಾರ್ ವಾಸ್ತವಿಕ್ ಫಕತ್ ಪ್ರಸ್ತುತ್ ಯಾ ವರ್ತ್ಮಾನ್ ಮಾತ್ರ್ ಸಾಂಗಾತ್ ದೀನಾ ಬಗಾರ್ ಭೂತ್ಕಾಳ್, ವರ್ತ್ಮಾನ್ ಆನಿ ಭವಿಶ್ಯತ್ ಎಕಾಚ್ ಮಾಪಾನ್ ಸಾಂಗಾತ್ ದಿತಾತ್. ಹೊ ಸಾಂಗಾತ್ ಮನ್ಶಾ ಸಂಬಂಧಾಂತ್ ಮಾತ್ರ್ ಥೊಡೊ ಬದ್ಲಾತಾ. ಕಾಲ್ಚಿ ’ಆಶಾ’ ಮ್ಹಳ್ಳ್ಯಾ ಕ್ರಿಯೆಚಿ ಪ್ರತಿಕ್ರಿಯಾ ಜಾವ್ನ್ ವರ್ತ್ಮಾನಾಚೆಂ ಸುಖ್ ವಾ ದೂಃಖ್ ಜಾಲ್ಯಾರ್, ವರ್ತ್ಮಾನಾಚಾ ಹ್ಯಾ ಪ್ರತಿಕ್ರಿಯಾ ಜಾವ್ನ್ ವರ್ತ್ಮಾನಾಚೆಂ ಸುಖ್ ವಾ ದೂಖ್ ಜಾಲ್ಯಾರ್, ವರ್ತ್ಮಾನಾಚಾ ಹ್ಯಾ ಪ್ರತಿಕ್ರಿಯಾ ವಯ್ರ್ ಭವಿಶ್ಯತಾಚೆಂ ಜೀವನ್ ರುತಾಂ ಜಾತಾ. ಹ್ಯಾಚ್ ಖಾತಿರ್
’ಭವಿಷ್ಯತಾಕ್ ತುಂ ಕಿತೆಂ ಜಾಂವ್ಕ್ ಪಾವ್ತಾಯ್ ತೆಂ ಆಯ್ಚಾ ವರ್ತ್ಮಾನಾಚೊ ಪ್ರಭಾವ್. ಆನಿ ಆಯ್ಚಾ ವರ್ತ್ಮಾನಾಂತ್ ತುಂ ಕಿತೆಂ ಜಾವ್ನ್ ಆಸಾಯ್ ತೆಂ ಕಾಲ್ಚಾ ತುಜ್ಯಾಚ್ ಭೂತ್ಕಾಳಾಚಾ ಕ್ರಿಯಾಚಿ ಪ್ರತಿಕ್ರಿಯಾ"
ಅಶೆಂ ಆಸ್ತಾನಾ ಮನಿಸ್ ತಾತ್ವಿಕ್ ಚಿಂತ್ಪಾಕ್ ದೆಂವಾನಾಸ್ತಾಂ ಫಕತ್ತ್ ವರ್ತ್ಮಾನಾಕ್ ಮಾತ್ರ್ ದೆಖ್ತಾ. ಜರ್ತರ್ ವರ್ತ್ಮಾನಾಂತ್ ನಿರಾಸ್ ಆಸಾ ಜಾಲ್ಯಾರ್ ತಿ ತಾಚ್ಯಾಚ್ ಕ್ರಿಯೆಚಿ ಪ್ರತಿಕ್ರಿಯಾ. ಹಾಚೆ ಥಾವ್ನ್ ಚುಕಾರಿ ಮಾರುಂಕ್ ಸಾಧ್ಯ್ ನಾ. ರಡ್ಚೆಂ ಆನಿ ವಿಳಾಪ್ ಕರ್ಚೆಂ ತೆಂ ಮನ್ಶಾ ಸಂಯ್ಬ್. ಹ್ಯಾ ಸಂಯ್ಬಾಚಾ ಹ್ಯಾ ಆವ್ಗುಣಾಂಕ್ ಭರ್ವಶ್ಯಾಚೊ ಫುಡಾರ್ ನಾ.
ಎಕೇಕ್ ಕವಿತೆಚಾ ವಿಚಾರಾಂತ್ ಖಾಸ್ಗಿ ಜಿವಿತಾಚೆ ವಿಚಾರ್ ಝಳ್ಕತಾತ್. ಖಾಸ್ಗಿ ವಿಚಾರಾಂಕ್ ಯಾ ಖಾಸ್ಗಿ ಸಂಬಂಧಾಕ್ ಸಾಹಿತ್ಯಾಂತ್ ವ್ಹಾಳಂವ್ಚೆ ಖಂಡಿತ್ ಚೂಕ್ ನ್ಹಂಯ್. ಕಾರಾಣ್, ಹಾಂಗಾಸರ್ ಸಾಹಿತಿ ಏಕ್ ಮನಿಸ್ ಜಾವ್ನ್ ತೊ ಸಮಾಜೆಚೊ ಏಕ್ ಖಂಡಿತ್ ವಾಂಟೊ ಮ್ಹಳ್ಳ್ಯಾಂತ್ ದುಭಾವ್ ನಾ. ಜರೀ ಸಾಹಿತ್ಯಾಂತ್ ವಾಪಾರ್ಚೊ ವಿಚಾರ್ ಅಪ್ಣಾಕ್ ಖಾಸ್ಗಿ ಜಾವ್ನ್ ಸಂಬಂಧ್ ಜೊಡುನ್ಯ್ ಸಮಾಜೆ ಮುಕಾರ್ ತೊ ಖಾಸ್ಗಿ ನ್ಹಂಯ್ ಮ್ಹಣೊನ್ ಆನಿ ಸಗ್ಳ್ಯಾ ಸಮಾಜೆಕ್ ತೊ ಸಂಬಂಧ್ ಜೊಡುಂಕ್ ಪಾವ್ತಾ ಮ್ಹಣೊನ್ ಸಾಹಿತಿ ಜರ್ ವಾದ್ ಮಾಂಡುಂಕ್ ಆನಿ ಯಶಸ್ವಿ ಥರಾನ್ ತ್ಯಾ ವಾದಾಕ್ ರುಜು ಕರುಂಕ್ ಸಕ್ತಾತ್ ಜಾಲ್ಯಾರ್ ಅಸಲ್ಯಾ ವಿಚಾರಾಂಚೆಂ ಸಾಹಿತ್ಯ್ಯ್ ಖಂಡಿತ್ ಖರೆಂ ಸಾಹಿತ್ಯ್.
ಹೆಂ ಸಾಹಿತ್ಯ್ಕಾರಾಂನಿ ವೊರಾವ್ನ್ ಪಳೆಂವ್ಚೆಂ. ಕಾಲ್ಪನಿಕ್ ವಿಚಾರಾಂಚಿಂ ಕವಿತಾ ಹ್ಯಾ ಜಮ್ಯಾಂತ್ ಝಳ್ಕಾನಾಂತ್ ಜಾಲ್ಯಾರ್ಯ್ ಬೊಟಾಂನಿ ಮೆಜ್ಚಾ ತಿತ್ಲಿಂ ಕವಿತಾ ಕಾಲ್ಪನಿಕ್ ಇಮಾಜೆಂಚಾ ಭಳಾಕ್ ಎಕಾ ಹಾತಿಂ ಆನಿ ಅಸ್ಥಿತ್ವ್ವಾದಾಕ್ ಎಕಾ ಹಾತಿಂ ಧರುನ್ ಸಮಾಜೆಚಾ ವಾಸ್ತವಿಕ್ ವಿಚಾರಾಂಕ್ ಧಾಖಂವ್ಕ್ ಪ್ರಯತ್ನ್ ಕರ್ತಾತ್. ಹೊ ಪ್ರಯೋಗ್ ಕೊಂಕ್ಣೆಕ್ ಕಾಂಯ್ ನವೊ ನ್ಹಂಯ್ ತರ್ಯ್ ಕವಿತಾ ಸಾಹಿತ್ಯಾಂತ್ ಹಿ ಏಕ್ ಉಂಚ್ಲಿ ಕಲಾ ಮ್ಹಣೊನ್ ಹಾಂವ್ ಮಾಂಧ್ತಾಂ.
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಜಮ್ಯಾಂತ್ ಹ್ಯಾ ಶೆಂಭೊರ್ ಝರಿಂನಿ ವ್ಹಾಳಯಿಲ್ಲ್ಯಾ ವಿಚಾರಾಂನಿ ತಶೆಂ ತಾಂಚಾ ಸಾಮಾಜಿಕ್ ಅಭಿರುಚಿ ಮಧೆಂ ಉಣೆಂಪಣ್ ಆನಿ ದಾದೊಸ್ಪಣ್ ಖಂಡಿತ್ ಝಳ್ಕಾತಾ ಜಾಲ್ಯಾರ್ಯ್ ಆಪ್ಲ್ಯಾ ಸಾಹಿತ್ಯಾಕ್ ವೊರಾವ್ನ್ ಆನಿ ಜಿರವ್ನ್ ಪಳೆತಾನಾ ಮುಖ್ಲ್ಯಾ ತಾಂಚಾ ಕವಿತಾ ವಾಂಟ್ಯಾಂತ್ ಬದ್ಲಾವಣ್ ಖಂಡಿತ್ ದಿಸೊನ್ ಯೆತೆಲಿ. ಅಶಿ ಮ್ಹಜಿ ಪಾತ್ಯೆಣಿ.
’ಕಾಳೊಕಾಂತ್ಲಿಂ ಕಾಂತಾರಾಂ’ ಕವಿತಾ ಜಮ್ಯಾಂತ್ಲ್ಯಾ ತರ್ನ್ಯಾ ಕವಿ ಆನಿ ಕವಯತ್ರಿಂಕ್ ಹಾವೆಂ ಹಿಚ್ ಪಾತ್ಯೆಣಿ ಭಾಸಾಯಿಲ್ಲಿ. ಸಾಹಿತ್ಯಾಚಾ ವಿಮರ್ಶಾಂತ್ ಹಾಂವ್ ಕಿತ್ಲೆಂ ಸಾಹಿತ್ಯಾಚಾ ಫುಡಾರಾವಿಶಿಂ ಚಿಂತಾಂಗೀ ತಿತ್ಲೆಂಚ್ ತ್ಯಾ ಫುಡಾರಾಚಾ ಸಾಹಿತಿಂವಿಶಿಂ ಚಿಂತಾಂ. ದೊನ್ಯ್ ಕುಶಿಂನಿ ಮ್ಹಜೊ ಧ್ಯೇಯ್ ಏಕ್ಚ್. ಕೊಂಕಣಿಚೆಂ ಬರೆಂಪಣ್. ವೇಳ್ ಪಾಶಾರ್ ಕರ್ಚಿ ಹಿ ಮ್ಹಜಿ ವಾಟ್ ನ್ಹಂಯ್. ವೇಳ್ ಪಾಶಾರ್ ಕರುಂಕ್ ಮ್ಹಜ್ಯಾ ಘರಾ ಸಮ್ಕಾರ್ ಅರ್ಭಿ ದರ್ಯೊ ಮಸ್ತಿ ಕರುಂಕ್ ಮ್ಹಾಕಾ ಆಪಯ್ತಾ ಜಾಲ್ಯಾರ್ಯ್ ಘರಾಚ್ಯಾ ಚ್ಯಾರ್ಯ್ ಕುಶಿಂನಿ ಖಾಜುರಾಂಚೆಂ, ಅಂಜೂರಾಚೆಂ ತೋಟ್ ಆನಿ ಹ್ಯಾ ತೊಟಾಂತ್ ಗಾಂವಾ ಥಾವ್ನ್ ಪರ್ಗಾಂವಾಕ್ ಪಾವ್ಲ್ಲೆ ಸೊಭಿತ್ ಕೀತ್ ಪಾಸಾಯೊ ಮಾರುಂಕ್ ಮ್ಹಾಕಾ ಆಪಯ್ತಾತ್. ಹೊ ಮ್ಹಜೊ ಪಾಶಾಂವ್ ವ್ಹಯ್ ತರೀ ಹೆಂ ಮ್ಹಜೆಂ ಮಿಸಾಂವ್ ನ್ಹಂಯ್.
’ಸಮಾಜೆಂತ್ ಹಾವೆಂ ಜಿಯೆಂವ್ಚೆಂ ಮ್ಹಜೆಂ ಜಿವಿತ್ ಮ್ಹಾಕಾ ಖಾಸ್ಗಿ ಜಿವಿತ್ ಜಾಂವ್ಕ್ ಸಕ್ತಾ ಪುಣ್ ಸಮಾಜೆಕ್ ತೆಂ ಖಾಸ್ಗಿ ಜಾಂವ್ಕ್ ನಜೊ. ಹೊಚ್ಚ್ ಮ್ಹಜೊ ಆಶಯ್’.
’ಸಾಗೊರಾಚ್ಯಾ ವಾಟೆಚ್ಯೊ ಝರಿ’ ಜಮ್ಯಾಂತ್ಲ್ಯಾ ಸರ್ವ್ ಕವಿಂನಿ ಹ್ಯಾ ವಿಮರ್ಶಾಕ್ ತಾಂಚ್ಯಾ ಜಾಣ್ವಾಯೆಂತ್ ವೊರಾವ್ನ್ ಪಳೆಂವ್ಚೆಂ. ತಾಂತುಂ ಕೊಣಾಕ್ ಕಿತ್ಲೆಂ ಸಂಬಂಧ್ ಜೊಡ್ತಾ ಆನಿ ಹ್ಯಾ ವರ್ವಿಂ ತಾಂಚೊ ಸಾಹಿತಿಕ್ ಫುಡಾರ್ ಯಾ ಭವಿಶ್ಯ್ ಕೊಂಕಣಿ ಸಾಹಿತ್ಯಾಂತ್ ತಾಂಚಾ ವ್ಹಾಳ್ಯಾಕ್ ಸಾಗೊರ ತೆವ್ಶಿಂ ಪಾವೊಂಕ್ ಕಿತ್ಲೆಂ ಸುಲಭ್ ಕರ್ತಾ ತೆಂ ತಾಂಚೆರ್ ಹೊಂದ್ವೊನ್ ಆಸಾ.
ಹಾಂಗಾಸರ್ ಏಕ್ ವಿಶಯ್ ಹಾಂವ್ ಖಂಡಿತ್ ಉಲ್ಲೇಕ್ ಕರುಂಕ್ ಆಶೆತಾಂ ಆನಿ ತಿ ಗರ್ಜ್ ಮ್ಹಣೊನ್ ಚಿಂತಾಂ ಕಿ - ಹ್ಯಾ ಜಮ್ಯಾಂತ್ಲ್ಯಾ ಖಂಯ್ಚಾಯ್ ಫುಡ್ಲದ್ ಕವಿತೆಚಾ ಕವಿನ್ ಹ್ಯಾ ವಿಮರ್ಶ್ಯಾ ಥಾವ್ನ್ ಭಿಲ್ಕುಲ್ ಅಧೀರ್ ಜಾಂವ್ಚೆಂ ನ್ಹಂಯ್. ಆನಿ ಆಪ್ಲ್ಯಾ ಧಾರಿಕ್ ಹೊ ಏಕ್ ಸಾಣೊ ಮ್ಹಣೊನ್ ಚಿಂತುನ್ ಸಾಣ್ಯಾಕ್ ಧರ್ಚೆಂ ಫುಡಾರಾಚೆಂ ಕೊಂಕ್ಣೆಚೆಂ ಭಳ್ವಂತ್ ಹಾತೆರ್ ಜಾಂವ್ಚೆಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
