"ತುಂ ಬರೊ ಮನಿಸ್ ಮ್ಹಣ್ ಸಂಸಾರಾಂತ್ ರುಜು ಕರುಂಕ್ ಸಕ್ಚೊನಾಂಯ್, ಕಿತ್ಯಾಕ್ ತೊ ಲೇಖ್-ಪಾಕಾಚೊ ಬೂಕ್ ಸರ್ಗಾರ್"
ದಾಯ್ಜ್ - ನವೆಂ ರೂಪ್, ನವಿ ಸುರ್ವಾತ್
ವರಸ್ : 2005
ಮಯ್ನೊ : ಮಾಯ್
ದೇವ್ ಬರೊ ದೀಸ್ ದೀಂವ್ ತುಮ್ಕಾಂ ಸಮೇಸ್ತಾಂಕ್,
ವಯ್ಲೊ ಆಂಕ್ಡೊ ’ಇಕ್ರಾವೊ’ ಮ್ಹಣ್ ಸಾಂಗ್ತಾ ತರ್ಯ್ ಆಧ್ಲ್ಯಾ ವರ್ಸಾಚಾ ಹೆಚ್ಚ್ ಮಯ್ನ್ಯಾಂಚ್ ’ದಾಯ್ಜ್’ ಉದೆವ್ನ್ ಆಯಿಲ್ಲೆಂ ಆನಿಂ ಆಜ್ ಎಕಾ ವರ್ಸಾಚೊ ಪಾಂವ್ಡೊ ಉತ್ರೊನ್ ದುಸ್ರ್ಯಾ ವರ್ಸಾಕ್ ಪಾಂಯ್ ತೆಂಕ್ಚಾ ವಗ್ತಾಂ, ’ದಾಯ್ಜ್’ ನವೆಂ ರೂಪ್ ಘೆವ್ನ್ ತುಮ್ಚೆಮುಖಾರ್ ಆಸ್ಚೆಂ ತುಮ್ಕಾಂ ಖೂಬ್ ರುಚ್ತೆಲೆಂ ಮ್ಹಳ್ಳಿ ಆಮ್ಚಿ ಪಾತ್ಯೆಣಿ ಜಾವ್ನಾಸಾ.
’ದಾಯ್ಜ್’ ಏಕ್ ಸಾಹಿತಿಕ್ ಸಾಯ್ಟ್ ಜಾವ್ನ್ ಆಸ್ತಾನಾ ಹಾಂತುಂ ರುಪಾಕ್ ಮಾತ್ರ್ ನ್ಹಯ್, ಸಾಹಿತ್ಯಾಕ್ಯ್ ಉಂಚ್ಲೊ ದರ್ಜೊ ದಿಂವ್ಚಿ ಆಮ್ಚಿ ಆಶಾ ಜಾವ್ನಾಸಾ. ದಾಯ್ಜ್ ಕಾಂಯ್ ಏಕ್ ಸಂಚಾಲನ್ ಬಿಲ್ಕುಲ್ ನ್ಹಯ್, ಫಕತ್ತ್ ಕೊಂಕ್ಣಿ ಸಾಹಿತ್ಯಾಚಿ ಅಭಿರುಚ್ ಆಸ್ಚಾಂಚೊ ಜಮೊ. ಹಾಂಗಾಸರ್ ಕೊಂಕ್ಣಿ ಸಾಹಿತ್ಯಾಚಾ ಅಧ್ಯಯನಾಕ್ ಲಗ್ತಿ ಜಾಂವ್ಚಾ ಚಟುವಟಿಕಾಂಕ್ ಪಯ್ಲೆಂ ಸ್ಥಾನ್ ಮೆಳ್ತೆಲೆಂ. ದಾಯ್ಜ್ ಕಾಂಯ್ ಖಬ್ರಾಳೆಂ ಸಾಯ್ಟ್ ಜಾವ್ನ್ ಆಸ್ಚೆಂನಾ ದೆಕುನ್ ತುಮ್ಕಾಂ ಗಾಂವ್ಚೊ/ಪರ್ಗಾಂವ್ಚೊ ಖಬ್ರೊ ವಾಚುಂಕ್ ಚಡಿತ್ ಜಾವ್ನ್ ಮೆಳ್ಚೆಂನಾ.
’ದಾಯ್ಜ್’ ಸಂಚಾಲನಾಂಕ್, ವೆಕ್ತಿಂಕ್ ಮಿಕ್ವೊನ್ ಆಸ್ಚೆಂ ಸಾಯ್ಟ್ - ಕೊಂಕ್ಣೆಚೆಂ. ಕೊಂಕ್ಣಿ ಸಾಹಿತ್ಯಾಸವೆಂ, ಕೊಂಕ್ಣಿ ಭಾಸೆಕ್, ಕೊಂಕ್ಣಿ ವಾವ್ರಾಕ್ ಆಮಿಂ ಪಯ್ಲೆಂ ಸ್ಥಾನ್ ದಿತಾಂವ್ ದೆಕುನ್ ಸಂಸಾರಾಚಾ ಖಂಚಾಯ್ ಕೊನ್ಶಾಚಾಂನಿ ಹ್ಯಾ ವಯ್ಲ್ಯಾ ಪ್ರಕಾರಾಂನಿ ವಾವ್ರ್ ಕೆಲ್ಲೆ ವಿವರ್ ಆಮ್ಕಾಂ ಧಾಡುನ್ ದಿಲೆ ತರ್ ಆಮಿಂ ತೆ ಸಂತೊಸಾನ್ ಪರ್ಗಟ್ಲೆಲ್ಯಾಂವ್. ಕಾನಡಿ ಲಿಪಿಯೆಂತ್ ಆಸ್ಚಾ ಹ್ಯಾ ಸಾಯ್ಟಾಚೆಂ ವಿಂಚ್ಣಾರ್ ಸಾಹಿತ್ಯ್ ಗಾಂವ್ಚಾ ಲೊಕಾಂಕ್ ಮಾತ್ರ್ ನ್ಹಯ್, ಅಂತರ್ಜಾಳಾಚಿ ವೆವಸ್ಥಾ ನಾತ್ಲ್ಲ್ಯಾಂಕ್ಯ್ ಪಾವಾಜಯ್ ಮ್ಹಳ್ಳ್ಯಾ ಇರಾದ್ಯಾನ್ ದಾಯ್ಜ್ಚಿಂ ವಿಂಚ್ಣಾರ್ ಬರ್ಪಾಂ ಆಮಿಂ ’ದಿವೊ’ ಕೊಂಕ್ಣಿ ಹಾಪ್ತ್ಯಾಳ್ಯಾಚೆರ್ಯ್ ಪರ್ಗಟ್ ಕರ್ತೆಲ್ಯಾಂವ್.
ಕೊಂಕ್ಣಿ ಭಾಸ್ ಜಿವಾಳ್ ದವರ್ಚಾ ದಿಶೆನ್ ಆಯ್ಚಾ ಕಾಳಾರ್ ಜಾಯಿತ್ತೆ ಜಣ್ ಜಾಯ್ತ್ಯಾ ರಿತಿನ್ ವಾವ್ರ್ ಕರುನ್ ಆಸಾತ್, ಅಪಾಪ್ಲ್ಯಾ ರಿತಿಂನಿ, ಆಪಾಪ್ಲ್ಯಾ ವೆಳಾ ಆನಿಂ ತಾಂಕಿಪ್ರಕಾರ್. ಹೆಂ ಕೊಂಕ್ಣೆಕ್ ಖಂಯ್ಚಾಯ್ ರಿತಿನ್ ಉಪ್ಕಾರಾಕ್ ಪಡ್ತಾ ತರ್ ಬರೆಂಚ್. ಕೊಂಕ್ಣೆಚಾ ಸಾಹಿತಿಂಕ್, ಕೊಂಕ್ಣೆಚಾ ಪತ್ರ್ಗಾರಿಕೆಕ್, ಕೊಂಕ್ಣೆಚಾ ಸಂಗೀತ್ಕಾರಾಂಕ್ ಯಾ ಕೊಂಕ್ಣಿ ಕಲಾಕಾರಾಂಕ್ ಆಮಿಂ ಘಟ್ ಕೆಲೆಂ ತರ್ ಕೊಂಕ್ಣಿ ಆವಯ್ಚಿ ಪುಜಾ ಕೆಲ್ಲೆಪರಿಂಚ್ ಮ್ಹಳ್ಳೆಂ ಆಮ್ಚೆಂ ಚಿಂತಾಪ್. ಕಿತ್ಯಾಕ್ ಮ್ಹಳ್ಯಾರ್ ಕೊಂಕ್ಣಿ ಸಂಸ್ಕ್ರತಿಚೆಂ ಪಾಟ್ಥಳ್ ಹೆ ಜಾವ್ನಾಸಾತ್. ಕೊಂಕ್ಣಿ ಸಾಹಿತ್ಯಾಕ್ ಪಯ್ಲೆಂ ಸ್ಥಾನ್ ಆನಿಂ ಮಾನ್ ದಿಂವ್ಚಾ ಇರಾದ್ಯಾನ್, ಕೊಂಕ್ಣಿ ಸಾಹಿತ್ಯಾಕ್ ಜಿವಾಳ್ ದವರ್ಚಾಕ್ ತಶೆಂಚ್ ಕೊಂಕ್ಣಿ ಸಾಹಿತ್ಯಾಂತ್ ನವ್ಯೊ ವಾಟೊ ಸೊಧ್ಚಾಕ್ ಆಮಿಂ ಎಕಾ ವರ್ಸಾಧಿಂ ಸುರು ಕೆಲ್ಲೆಂ ಮಿಸಾಂವ್ ಜಾವ್ನಾಸಾ ’ದಾಯ್ಜ್’. ಆನಿಂ ವೆಳಾಕಾಳಾ ಫರ್ಮಾಣೆಂ ಆಮ್ಚಾ ಮಿಸಾಂವಾಕ್ ನವ್ಯೊ ನವ್ಯೊ ವಾಟೊ ಉದೆತೆಲ್ಯೊ. ’ಕವಿತಾ ಪಾಠ್’, ’ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2004’ ಕಾಂಯ್ ಥೊಡ್ಯೊ ಸುರ್ವಾತಿ.
’ದಾಯ್ಜ್’ ಚೆರ್ ತುಮ್ಕಾಂ ವಾಚುಂಕ್ ಮೆಳ್ತೆಲೆಂ - ಸಕಾಳಿಕ್ ಸಂಗ್ತ್ಯಾಂಕ್ ಆಟಾಪ್ಚೆಂ ಲೇಕನ್ ಸಂಪಾದಕೀಯ್, ದಾಯ್ಜ್ ಪಂಗ್ಡಾನ್ ಕುವೆಯ್ಟಾಂತ್ ಮಾಂಡುನ್ ಹಾಡ್ಚೆಂ ಕವಿತಾಚೆಂ ಅಧ್ಯಯನ್ - ’ಕವಿತಾಪಾಠ್’, ಕೊಂಕ್ಣಿ ಮಟ್ವ್ಯಾ ಕಾಣ್ಯಾಂಚೆಂ ಮಯ್ನ್ಯಾಳೆಂ ಅಂಕಣ್ ’ಕಥಾದಾಯ್ ’, ’ಸನ್ನೇಸಿಚೊ ಸಂಸಾರ್’, ಕವಿತಾಚೆಂ ಅಂಕಣ್ ’ಕವಿತಾದಾಯ್ಜ್’, ಹಾಪ್ತ್ಯಾಳಿಂ ಕವಿತಾ - ಕವಿತಾಝರ್, ಕುಸಾಳಾಂ ದುಖ್ತಾಸರ್ ಹಾಸಂವ್ಚೆಂ ’ಹಾಸ್ ಆನಿಂ ಹಾಸಯ್’ ತಶೆಂಚ್ ’ರುಸ್ತುರುಸಾಂವ್’, ’ತವಳ್ ತವಳ್’ ಆನಿಂ ಸಭಾರ್. ಕೊಂಕ್ಣಿ ಸಾಹಿತಿಂವಿಶಿಂ ಸವಿಸ್ತಾರ್ ಸಮ್ಜೊಣಿ ತಶೆಂಚ್ ಜಾಣ್ವಾಯ್ ಜೊಡ್ಚಿ ಉರ್ಭಾ ಆನಿಂ ಆಸಕ್ತ್ ಆಸ್ಚಾಂಕ್ ತ್ಯೇವಿಶಿಂ ಸವಿಸ್ತಾರ್ ವಿವರ್ ಆಮಿಂ ದಿತೆಲ್ಯಾಂವ್.
ದಾಯ್ಜ್ ಸಾಯ್ಟಾಚೆರ್ ಕೊಂಕ್ಣಿ ಸಾಹಿತಿಂಕ್ ತಶೆಂಚ್ ಕೊಂಕ್ಣಿ ವಾವ್ರಾಡ್ಯಾಂಕ್ ಪಯ್ಲೆಂ ಸ್ಥಾನ್ ಆಸ್ತೆಲೆಂ ದೆಕುನ್ ಕೊಂಕ್ಣಿ ವಾವ್ರ್ ಕೆಲೆಲ್ಯಾಂಚೊ ತಶೆಂಚ್ ಕರ್ತೆಲ್ಯಾಂಚೊ, ತಾಂಚಾ ವಾವ್ರಾಸವೆಂ ಉಲ್ಲೇಕ್ ಆಟಾಪ್ಚೆಂ ಅಂಕಣ್ ’ಕೊಂಕ್ಣಿ ಕಾರ್ಭಾರಿ’ ಆನಿಂ ಹೆರ್ ವೆಕ್ತಿಪರಿಚಯ್ ವ್ಹೊಳಿಯ್ ತುಮ್ಕಾಂ ವಾಚುಂಕ್ ಮೆಳ್ತಲ್ಯೊ.
ಕಾನಡಿ ಲಿಪಿಯೆಂತ್ ಆಸ್ಚಾ ಕೊಂಕ್ಣಿ ಸಾಹಿತ್ಯಾಕ್ ಸಂಭಂಧ್ ಜಾಲ್ಲ್ಯಾ ಸಂಗ್ತ್ಯಾಂಕ್ ಪಾಟಿಂಬೊ ದಿಂವ್ಚಾ ಇರಾದ್ಯಾನ್ ಆಸಾ ಕೆಲ್ಲ್ಯಾ ಹ್ಯಾ ಸಾಯ್ಟಾಚೆರ್ ತುಮ್ಕಾಂ ವಿಂಚ್ಣಾರ್ ಸಾಹಿತ್ಯಾಚೆಂ ಖಜಾನ್ ಮೆಳ್ತೆಲೆಂ. ಆಮಿಂ ಕೊಂಕ್ಣೆ ಮ್ಹಳ್ಳೆಂ ಚಿಂತಾಪ್ ಆಮ್ಚೆಂ ದೆಕುನ್ ಕೊಂಕ್ಣೆಚಾಕೀ ಊಂಚ್ ಹಾಂಗಾಸರ್ ಕೊಣ್ಂಚ್ ಯಾ ಕಿತೆಂಚ್ ಆಸ್ಚೆಂನಾ - ನಾಂ ಗಾಂವಾಚೆ, ನಾಂವಾಚೆ, ಸಂಚಾಲನಾಚೆ ದೊರೆ ಯಾ ಅರ್ಲುಕ್ಯೊ ಬಿರುದಾಂಚೆ ತುರೆ. ಕೊಂಕ್ಣೆಂತ್ಲ್ಯಾ ವಿಂಚ್ಣಾರ್ ಸಾಹಿತ್ಯಾಂಚಿಂ ತಶೆಂ ನವ್ಯಾ ಸಾಹಿತಿಂಚಿಂ ಬರ್ಪಾಂ ಆಮಿಂ ಆಮ್ಚಾ ವೆಳಾಕಾಳಾ ಫರ್ಮಾಣೆಂ ಪರ್ಗಟ್ ಕರ್ತೆಲ್ಯಾಂವ್. ತುಮ್ಚಾ ಸಲ್ಹಾ ಸುಚನಾಂಕ್ ಆಮಿಂ ಉಗ್ತ್ಯಾಮನಾನ್ ಘೆತೆಲ್ಯಾಂವ್.
ಆಮಿಂ ಸುರ್ವಾತೆರ್ಯೀ ಸಾಂಗ್ಲಾಂ ’ಎಕಾ ವಾತಿಥಾವ್ನ್ ಹಜಾರ್ ವಾತಿ ಪೆಟಯ್ಲ್ಯೊ ತರ್ ತ್ಯಾ ವಾತಿಚೆಂ ಆವ್ಕ್ ಝರಾನಾ, ಬಗಾರ್ ಭಂವ್ತೊಣಿಚೊ ಕಾಳೊಕ್ ಧಾಂವ್ತಾ’. ಕೊಂಕ್ಣೆಖಾತಿರ್ ಸಂಸಾರಾಚಾ ಖಂಚಾಯ್ ಕೊನ್ಶಾರ್ ಕಸಲೀಂಯ್ ಕಾಮಾಂ ಜಾತಾತ್ ತರ್, ತಿಂ ಜಾಂವ್ದಿತ್. ತರ್ಯೀ ಪ್ರಗತೆಚೆಂ ಸುಂಕಾಣ್ ಹಾತಿಂ ಘೆವ್ನ್ ಅಂತರ್ಜಾಳಿಂ ಮುಖಾಂತ್ರ್ ಕೊಂಕ್ಣಿ ವಾವ್ರ್ ಕರುನ್ ಆಮ್ಕಾಂ ಪ್ರೇರಣ್ ದಿಲೆಲ್ಯಾ ಸರ್ವ್ ಕೊಂಕ್ಣಿ ತಾರಾಂಚೊ ಉಪ್ಕಾರ್ ಬಾವುಡ್ತಾಂವ್ ಆನಿಂ ಅಶೆಂಚ್ ವಿಶಾಲ್ ಚಿಂತ್ಪಾನ್ ಆನಿಂ ಎಕಾ ಮನಾನ್ ವಾವ್ರ್ ಕರ್ಯಾಂ ಮ್ಹಳ್ಳೊ ಉಲೊ ದಿತಾಂವ್.
ದೇವ್ ಬರೆಂ ಕರುಂ ತುಮ್ಕಾಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
