ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಕಥಾಝರ್ - 74. ಮೊಡ್ಕೊರ್ ಜನೆಲ್
ರೋನ್ ರೋಚ್ ಕಾಸ್ಸಿಯಾ: ಕೊಂಕ್ಣೆಂತ್ ಮನರಂಜನಾಚ್ಯಾ ಕಾಣ್ಯಾಂಚ್ಯಾ ಪ್ರಕಾರಾಂ ಪಯ್ಕಿಂತ್ ಮೆಲ್ಲ್ಯಾಂಚ್ಯೊ ಕಾಣ್ಯೊ ಸಯ್ತ್ ಏಕ್ ಪ್ರಕಾರ್. ಭೋವ್ ಥೊಡ್ಯಾಂನಿ ಅಸಲ್ಯೊ ಅಪುರ್ಭಾಯೆಚ್ಯೊ ಕಾಣ್ಯೊ ಬರವ್ನ್ ವಾಚ್ಪ್ಯಾಂಚೆಂ ರಗಾತ್ ಘೆಟೆ ಕೆಲಾಂ. ತಾಂತ್ಲೊ ಮಾಲ್ಘಡೊ ಕಾಣ್ಯೆಗಾರ್ ರೋನ್ ರೋಚ್ ಎಕ್ಲೊ. ಮೆಟಾಂ ಮೆಟಾಂಕ್ ವಾಚ್ಪ್ಯಾಂಕ್ ಫುಡೆಂ ಕಿತೆಂ ಜಾಯ್ತ್ಗಾಯ್ ಮ್ಹಳ್ಳೆ ಅತ್ರೆಗ್ ಉಭ್ಜಾವ್ನ್, ಹಿ ಕಾಣಿ ವಾಚ್ತಾಂ ವಾಚ್ಪ್ಯಾಚ್ಯಾ ಆಂಗಾಚಿ ಲೋಂವ್ ಉಭಿ ರಾವೊಂಕ್ಯೀ ಪುರೊ. ದಾಯ್ಜ್ ಸಾಹಿತಿಕ್ ಸ್ಪರ್ಧೊ 2007 ಹಾಂತುಂ 2000 ರುಪ್ಯಾಂಚೆಂ ತಿಸ್ರೆಂ ಇನಾಮ್ ಲಾಭ್ಲ್ಲಿ ಕಾಣಿ ಹಿ.
ರೋನ್ ರೋಚ್
ಹರ್ಶೆಂಯಿ ರಾತಿಂ... ದೀಪು ಘರಾ ಬಾಗ್ಲಾರ್ ಪಾವ್ತಾಸ್ತಾನಾ ಘರ್ಚೆಂ ದಾರ್ ಧಾಂಪುನ್ಂಚ್ ಆಸ್ತಾಲೆಂ. ತ್ಯಾ ವೆಳಾ... ತೊ ದಾರ್ ಬಡಯ್ತಾಲೊ ಆನಿ ತೆಂ... ಖಿಳ್ ಕಾಡುನ್ ದಾರ್ ಉಗ್ತೆಂ ಕರ್ತಾಲೆಂ. ಪುಣ್ ಆಜ್...
ದೀಪುನ್ ದಾರಾಚೆರ್ ಠೊಕೆ ಮಾರಿಜೆ ತರ್... ಕರ್ರ್ರ್ರ್... ಆವಾಜಾನ್ ಬಾಗ್ಲಾಕ್ ಇಡೆಂ ಸುಟ್ಲೆಂ!... ‘ಅರೆ ರಾಣಿನ್ ಖಿಳ್ ಘಾಲುಂಕ್ನಾಂ?...’
ಎಕಾಚ್ಚಾಣೆಂ ಮತಿಂ ಉದೆಲ್ಲ್ಯಾ ದುಬಾವಿ ಚಿಂತ್ನಾಂ ಬರಾಬರ್ ತೊ ಎಕ್ ಮೇಟ್ ಮುಕಾರ್ ಗೆಲೊ. ಆಜ್ ತೊ ಹರ್ಶೆಂಚೆ ಪ್ರಾಸ್ ವೆಗಿಂಚ್ ಘರಾ ಪಾಟಿಂ ಆಯಿಲ್ಲೊ. ಹರ್ಶೆಂ ತೊ ಘರಾ ರಿಗ್ತಾಸ್ತಾನಾ ವೊರಾಂ ರಾತಿಚಿಂ ಬಾರಾ ಉತರ್ತಾಲಿಂ. ಗಡಂಗ್ವಾಲ್ಯಾನ್ ದಾರ್ ಧಾಂಪ್ಚೆ ಪರ್ಯಾಂತ್ ತಾಂಚೆ ಹಾಂಚೆ ಪಿಯೊವ್ನ್ ಆಸ್ಚೊ ತೊ, ಗಡಂಗಾಚೆಂ ದಾರ್ ಧಾಂಪ್ಲ್ಯಾ ಉಪ್ರಾಂತ್ಚ್ ಘರ್ಚಿ ವಾಟ್ ಧರ್ತಾಲೊ. ತಾಚೆಂ ಕಾಜಾರ್ ಜಾಲ್ಯಾ ಹ್ಯಾ ದೋನ್ ಮ್ಹಯ್ನ್ಯಾಂನಿ ಸುರ್ವಿಲೆ ದೋನ್ ಹಪ್ತೆ ಸೊಡ್ನ್ ಅಶೆಂಚ್ ಚಲುನ್ ಆಯಿಲ್ಲೆಂ. ಪುಣ್ ಆಜ್ ವೆಗ್ಗಿಂಚ್... ಸಾಡೆ ಧಾ ವೊರಾರ್ಚ್ ತೊ ಘರ್ಚ್ಯಾ ದಾರಾರ್ ಪಾವ್ಲ್ಲೊ.
ಇಡೆಂ ಸುಟ್ಲ್ಲೆಂ ತೆಂ ಬಾಗಿಲ್ ಹಾಳ್ವಾಯೆನ್ ಲೊಟಿಲಾಗ್ಲೊ ಆನಿ ಆಮಾಸೆ ರಾತಿಚ್ಯಾ ಭಾಯ್ಲ್ಯಾ ಕಾಳೊಕಾ ಥಾವ್ನ್ ಭಿತರ್ ಮಿಣ್ಮಿಣಿ ಜಳ್ಚ್ಯಾ ಲಾಂಪ್ಯಾಂವ್ಚ್ಯಾ ಮಂದ್ ಪ್ರಕಾಸಾಂತ್ ಮಾಜ್ರಾಮೇಟ್ ಮುಕಾರ್ ದವರಿಜೆ ತರ್...
ಮುಕ್ಲೆಂ ದೃಶ್ಯ್ ಪಳೆವ್ನ್ ತೊ ಎಕ್ಪಾವ್ಟಿಂ ಉಡೊನ್ ಪಡ್ಲೊ. ತಾಚೆ ದೊಳೆ ರುಂದಾಲೆ! ಥಂಯ್ಸರ್... ಪಿಂದ್ಲೆಲಿ ಬಾಜು... ಆನಿ ತಾಂತ್ಲ್ಯಾನ್ ಉಗ್ತೆಂ ದಿಸ್ಚೆಂ... ರಾಣಿಚೆಂ ಪುಡ್ಪುಡಿತ್ ಹರ್ದೆಂ...!
ಪಳೆತಾ... ಪಳೆತಾಂ... ತಾಚೆಂ ಕಾಳಿಜ್ ದಡ್ದೊಡೊಂಕ್ ಲಾಗ್ಲೆಂ. ರಾಣಿ ಮುಕ್ಲ್ಯಾ ವೊಣೊದಿಕ್ ವೊಣ್ಕೊನ್ ಬಸ್ಲ್ಲೆಂ. ತಾಚಿ ತಿ ಪಿಂದ್ಲೆಲಿ ಬಾಜು ಆನಿ ಪೆಂಕ್ಟಾ ಪರ್ಯಾಂತ್ ವಯ್ರ್ ಸರೊನ್ ಆಸ್ಲ್ಲ್ಯಾ ಘಾಗ್ರ್ಯಾ ಬರಾಬರ್... ತೆಂ ವಿಣ್ಗೆಂಶೆಂ ದಿಸ್ತಾಲೆಂ...
‘ಬಲಾತ್ಕಾರ್...?! ಅತ್ಯಾಚಾರ್.. ಯಾ ... ಖುನ್?!’ ಕಠಿಣ್ ಭ್ಯೆಂ ವಿಸ್ತಾರಾಂವ್ಚಿಂ ಚಿಂತ್ನಾಂ ತಾಕಾ ಧೊಸುಂಕ್ ಲಾಗ್ಲಿಂ. ತ್ಯಾಚ್ ಖಿಣಾ ಚುರುಕ್ ಜಾಲ್ಲೊ ತೊ ಕಾಂಪ್ಚ್ಯಾ ಪಾಂಯಾಂನಿ... ತಾಚೆಸರ್ಶಿಂ ಪಾವ್ಲೊ. ಪಿಂರ್ಗೊಂವ್ಣೆ ಬರಾಬರ್ ತಗ್ಸಲ್ಯಾ ತಾಳ್ಯಾನ್ ಪುಸ್ಪುಸ್ಚೆಂ ತಾಕಾ ಸಾರ್ಕೆಂ ಆಯ್ಕಾಲೆಂ!...
“ಆತಾಂ ಕಿತೆಂ ಪಳೆಯ್ತಾಯ್...?!... ಮದ್ಯಾನೆ ರಾತಿಂ ಉಪ್ರಾಂತ್ ಮಾತ್ಯಾರ್ ವೊತುನ್ ಘರಾ ಯೇಂವ್ಕ್ ಜಾಯ್ ನ್ಹಯ್ ತುಕಾ...”
’ಆತಾಂ... ಯೆ’ ರಾಗಾನ್ ಕಿಂಕ್ರಾಟ್ಲೆಂ ತೆಂ. “ಯೆ ಆನಿ ಜೇವ್ ಸೆಜಾರ್ಚ್ಯಾ ಬೊಕ್ಲಾನ್ ಉಸ್ಟೆಂ ಕೆಲ್ಲ್ಯಾ ಮೊಡ್ಕೆಂತ್ಲೆಂ... ಆನಿ ಖಾ ಸೆಜಾರ್ಚ್ಯಾನ್ ಉಸ್ಟೆಂ ಕರುನ್ ದವರ್ಲೆಲ್ಯಾ ಮ್ಹಜ್ಯಾ ಕುಡಿಕ್!”
“ರಾ...ಣಿ... ಕಿ..ಕಿತೆಂ ಮ್ಹಣ್ತಾಯ್ ತುಂ.” ಗಾಗೆಲೊ ತೊ... ಸಗ್ಳೊಚ್ ದೆದೆಸ್ಪೊರ್ ಜಾವ್ನ್.
ಹರ್ಶೆಂ ವಿಪ್ರೀತ್ ಅಮಾಲಾ ವರ್ವಿಂ ತೊ ಗಾಗೆತಾಲೊ ತರ್ ಆಜ್... ಆಪ್ಣಾವರ್ವಿಂ ಆಟಾಪುಂಕ್ ತಶೆಂ ಸೊಸುಂಕ್ ಜಾಯ್ನಾತ್ಲಿ ಪರಿಗತ್ ಪಳೆವ್ನ್ ತೊ ಗಾಗೆಲ್ಲೊ!
“ಆನಿ ಕಿತೆಂ ಮ್ಹಣ್ಚೆಂ” ಪರತ್ ರಾಣಿಚೊ ತಾಳೊ...” ಆಮಿ ಘರ್ ಮ್ಹಣ್ ಆಪೊಂವ್ಚ್ಯಾ ಹ್ಯಾ ಲ್ಹಾನ್ ಕುಡಾಚೆಂ... ತೆಂ ಮೊಡ್ಕೊರ್ ಜನೆಲ್ ಸಾರ್ಕೆಂ ಕರ್.... ತಾಂತ್ಲ್ಯಾನ್ ಕೊಣಿ ತರೀ ಭಿತರ್ ತಿಳ್ತಿತ್... ಸೆಜಾರ್ಚೊ ಬೊಕುಲ್ ಚೊರ್ಯಾಂ ರಿಗುನ್ ಆಮ್ಚೆಂ ಜೆವ್ಣಾ ಕುಂಡ್ಲೆಂ ಉಸ್ಟೆಂ ಕರಿತ್ ಮ್ಹಣ್ ತುಕಾ ಸಾಂಗೊನ್ ಸಾಂಗೊನ್ ಪುರೊ ಜಾಲೆಂ ಆನಿ ದೀಪು... ಆಜ್...ಆಜ್...” ಭರೊನ್ ಯೆಂವ್ಚ್ಯಾ ಗದ್ಗದಿತ್ ತಾಳ್ಯಾನ್ ಮುಕಾರ್ ಉಲೊಂವ್ಕ್ ತೆಂ ಕಷ್ಟಾಲೆಂ...
“ಆಜ್ ತುಕಾ ಹಾಂವ್ ಉಸ್ಟ್ಯಾಚಿಂ ಜಾಲಿಂ! ತುಜ್ಯಾ ತ್ಯಾ ಮೊಡ್ಕೊರ್ ಜನೆಲಾವರ್ವಿಂ ಆನಿ ತುಜ್ಯಾ ತ್ಯಾ ಪಿಯೊಣ್ಯಾಚ್ಯಾ ಹೊರ್ಬೊಸಾವರ್ವಿಂ ತುಕಾ ಹಾಂವ್ ಉಸ್ಟ್ಯಾಚಿಂ ಜಾಲಿಂ””... ಕ್ರೋಧ್ ಮಿಶ್ರಿತ್ ತಾಳ್ಯಾನ್ ಪರತ್ ತೆಂ ಬೊಬಾಟ್ಲೆಂ ದೆದೆಸ್ಪೊರಾನ್. “ಆನಿ ಆತಾಂ ಹೆಂ ಉಸ್ಟೆಂ ತುಂ ಜೇವ್...!”
ಹೆಂ ಆಯ್ಕಾತಾಂ ಆಯ್ಕಾತಾಂ ಕಾಳ್ಜಾಕ್ ಭಾಲಿ ತೊಪ್ಲ್ಲೆಪರಿಂ ಸಗ್ಳೊಚ್ ದೆದೆಸ್ಪೊರ್ ಜಾಲ್ಲೊ ದೀಪು... ಯಾಂತ್ರಿಕ್ ರಿತಿನ್ ವಿಚಾರಿಲಾಗ್ಲೊ... “ತುವೆಂ ಬಾಗ್ಲಾಕ್ ಖಿಳ್ ಘಾಲುಂಕ್ ನಾತ್ಲಿವೆ”....?!
ಹ್ಯಾ ಸವಾಲಾಕ್ ರಾಣಿ ಎಕಾಚ್ಛಾಣೆಂ ರಾಗಾನ್ ನಾಗಿಣ್ ಜಾಲೆಂ...” ತುಜ್ಯಾ ತ್ಯಾ ಮೊಡ್ಕೊರ್ ಜನೆಲಾಂತ್ಲ್ಯಾನ್ ಭಿತರ್ ರಿಗ್ಲ್ಲ್ಯಾ ಬೊಕ್ಲಾಕ್ ಭಾಯ್ರ್ ಧಾಂವ್ಡಾಂವ್ಕ್ ಬಾಗಿಲ್ ಉಗ್ತೆಂ ಕರಿಜೆ ತರ್... ತೊ ದೋನ್ ಪಾಂಯಾಚೊ ಬೊಕುಲ್ ಭಿತರ್ ರಿಗ್ಲ್ಲೊ. ತುಮಿ ದಾದ್ಲೆ ಅಶೆಚ್ ದುಬಾವಿ. ಘರಾ ಆಸ್ಚ್ಯಾ ಸ್ತ್ರೀಯೆಚೆರ್ ದುಬಾವ್ತಾತ್ ಶಿವಾಯ್ ಘರಾ ಭಿತರ್ ಚೊರುಂಕ್ ಆಯ್ಲೆಲ್ಯಾ ಚೊರಾಚೆರ್ ನ್ಹಯ್.
“ತಶೆಂ ನ್ಹಯ್ ರಾಣಿ”’ಹ್ಯಾ ವೆಳಾ ಕಿತೆಂ ಉಲಯ್ಲ್ಯಾರೀ ತಾಕಾ ಕಠಿಣ್ ರಾಗ್ ಯೆತಾ ಮ್ಹಣ್ ಸಮ್ಜಾಲ್ಲೊ ತೊ ತಾಕಾ ಮೊಗಾನ್ ಭುಜಯ್ಲಾಗ್ಲೊ.
“ತಶೆಂ ನ್ಹಯ್ ಅಶೆಂ... ಮಾತ್ತಿ ಘಾಲ್ ತುಮ್ಕಾಂ” ಪುರ್ಪುಲೆಂ ತೆಂ ಮದೆಂಚ್. ಪುಣ್ ದೀಪುನ್ ಸೊಡ್ಲೆಂ ನಾ.
“ರಾಣಿ” ಪರತ್ ಮ್ಹಣಾಲೊ ತೊ ಹುಸ್ಕೊ ಭರ್ಲ್ಲ್ಯಾ ಮಯ್ಪಾಸಿ ತಾಳ್ಯಾನ್. “ತುಜೆ ತೆ ಹಾಲ್ ಹವಾಲ್ ಕಷ್ಟ್-ದೂಕ್ ಚಿಂತಾಸ್ತಾನಾ ಮ್ಹಾಕಾ...”
“ಕಷ್ಟ್-ದೂಕ್...?” ಎಕಾಚ್ಛಾಣೆಂ ರಾಗಾನ್ ಗರ್ಜಾಲೆಂ ತೆಂ ಮದೆಂಚ್. “ಹರ್ಶೆಂ ತುವೆಂ ಮದ್ಯಾನೆ ರಾತಿಂ ಬೆಬ್ದೊ ಜಾವ್ನ್ ಯೇವ್ನ್ ದಿಂವ್ಚೆಯೀ ತೆಂಚ್... ಮ್ಹಜಿ ಕೂಡ್ ಸವ್ಕಾಸಾಯೆನ್ ಸುಖಾಕ್ ಆಯ್ತಿ ಜಾತಾ ಮ್ಹಳ್ಳೆಂ ತೆಂ ತುಕಾ ಪಡೊನ್ ವಚೊಂಕ್ನಾ. ತುಂ ಮಾತ್ಯಾರ್ ವೊತುನ್ ಯೆತಾಯ್ ಆನಿ ಮ್ಹಜೆರ್ ದುಕ್ರಾಪರಿಂ ಪಡ್ತಾಯ್,ಲೊಳ್ತಾಯ್ ಆನಿ ಮನ್ಜಾತಿ ಭಾಶೆನ್ ಮ್ಹಜ್ಯಾ ಕುಡಿಚೆ ಸಾತ್ ಸುಕ್ರಾರ್ ಕರ್ತಾಯ್! ಉಪ್ರಾಂತ್ ಹಾಂವ್ ಸುಖಾಕ್ ಆಯ್ತಿಂ ಜಾತಾ ಮ್ಹಣ್ತಾನಾ ಜಾಲೆಂ... ತುಂ ನಿವ್ತಾಯ್ ಆನಿ ನಿದ್ತಾಯ್.! ಆನಿ ಆಜ್ ತಾಚೆ ಹಾತಿಂ ಭೊಗ್ಲ್ಲೆ ಕಷ್ಟ್ಯಿ ತೆಚ್. ತಾಣೆಂ ದಿಲ್ಲ್ಯಾ ಆನಿ ತುವೆಂ ದೀವ್ನ್ ಆಸ್ಚ್ಯಾ ಕಷ್ಟಾಂ-ಕರಂದಾಯೆಕ್ ಕಾಂಯ್ ಫರಕ್ ನಾ. ಫರಕ್ ಇತ್ಲೊಚ್... ತುಂ ಖಾತಾಯ್ ಹಕ್ಕಾನ್. ತಾಣೆಂ ಖೆಲೆಂ ಬಲತ್ಕಾರಾನ್.!”
ರಾಣಿಚಿಂ ಹಿಂ ಕಾಳ್ಜಾಕ್ ಮಾರ್ಚಿ ಕಠಿಣ್ ಉತ್ರಾಂ ಪರತ್ ಪರತ್ ಆಯ್ಕಾತಾನಾ ದೀಪು ಸಗ್ಳೊಚ್ ರಾಗಾನ್ ಕಡ್ಕಡೊಂಕ್ ಲಾಗ್ಲೊ ಆನಿ ಎಕಾಚ್ಫಾಣೆ ಗರ್ಜಾಲೊ... “ಕೋಣ್ ತೊ ಬೆವಾರ್ಶಿ”?
ದೀಪು ಥಾವ್ನ್ ಅಸಲೊಚ್ ಕ್ರೋಧ್ ಆಶೆವ್ನ್ ಆಸ್ಲ್ಲೆಂ ರಾಣಿ ಘಡ್ಯೆನ್ ಚುರುಕ್ ಜಾಲೆಂ. “ಆತಾಂ ಬೊಬಾಟುನ್ ಕಿತೆಂ ಫಾಯ್ದೊ? ಹರ್ಶೆಂ ರಾತಿಂ ನಾಕ್ಭರ್ ಪಿಯೆವ್ನ್ ಯೇವ್ನ್ ತುಂ ತುಜ್ಯಾ ಕಾಮಾತುರಾಯೆಚ್ಯಾ ಬಳಾನ್ ಮ್ಹಜ್ಯಾ ಕುಡಿರ್ ಲೊಳ್ತಾನಾ ತೊ ತ್ಯಾ ಮೊಡ್ಕೊರ್ ಜನೆಲಾಂತ್ಲ್ಯಾನ್ ಭಿತರ್ ತಿಳ್ತಾಲೊ!.”
ಆನಿ ಹಾಂವ್ ತೊ ಕೋಣ್ ಮ್ಹಣ್ ಕಳಾನಾಸ್ತಾನಾ, ರಾತಿಂ ಮಾತ್ಯಾರ್ ದೆಂವ್ಚಾರ್ ಘೆವುನ್ ಯೇವ್ನ್ ಫಾಂತ್ಯಾರ್ ಉಟೊನ್ ಕಾಮಾಕ್ ವೆಚಾ ತುಕಾ ಕಶೆಂ, ಕೆದಾಳಾ ಸಾಂಗ್ಚೆಂ ಮ್ಹಣ್ ಕಳಾನಾಸ್ತಾನಾ ಸದಾಂ ಮತಿಂತ್ ಭ್ಯೆಂ ಘೆವ್ನ್ ತಕ್ಲಿ ವಿರಾರ್ ಕರುನ್ ಆಸ್ಲ್ಲಿಂ. ತ್ಯಾ ಖಾತಿರ್ಚ್ ಹಾಂವ್ ಸಾಂಗುನ್ ಆಸ್ಲ್ಲಿಂ ತೆಂ ಮೊಡ್ಕೊರ್ ಜನೆಲ್ ರಿಪೇರಿ ಕರ್... ಬಿಲ್ ಬಾಂದಿನಾಸ್ತಾನಾ ನಪಂಯ್ಚ್ ಜಾಲ್ಲ್ಯಾ ವೀಜ್ ಸಕ್ತೆಚಿ ವಿಲೆವಾರಿ ಕರ್ ಮ್ಹಣ್. ವೀಜ್ ದಿವೊ ಆಸ್ಲ್ಲೊ ತರ್ ಬಾಗ್ಲಾ ಭಾಯ್ರ್ ಆಸ್ಚ್ಯಾ ತ್ಯಾ ದಿವ್ಯಾಚ್ಯಾ ಉಜ್ವಾಡಾಕ್ ತೊ ಭಿತರ್ ತಿಳ್ತೊ ನಾ. ರಿಗ್ತೊಯಿ ನಾ. ಪುಣ್ ತುಂ ತುಜ್ಯಾ ಪಿಯೊಣ್ಯಾನ್ ಖಂಯ್ ಆಯ್ಕಾಲೊಯ್. ಆನಿ ಆಜ್... ಆಜ್ ತೆ ಬೊಕುಲ್ ಭಿತರ್ ರಿಗ್ಲೆಚ್ ಆನಿ ಸಗ್ಳೆಂ ಉಸ್ಟೆಂ ಕರ್ನ್ ಗೆಲೆ! ಚಾರ್ ಪಾಂಯಾಚ್ಯಾ ಬೊಕ್ಲಾನ್ ಜೆವ್ಣಾಚೆಂ ಕುಂಡ್ಲೆಂ ಉಸ್ಟೆಂ ಕೆಲೆಂ ತರ್... ದೋನ್ ಪಾಂಯಾಚ್ಯಾ ಬೊಕ್ಲಾನ್ ತುಜ್ಯಾ ರಾಣಿಕ್ ಉಸ್ಟೆಂ ಕೆಲೆಂ!” ರಡ್ತಾ ರಡ್ತಾಂ ಎಕಾಚ್ಛಾಣೆಂ ತೆಂ ಕಿಂಕ್ರಾಟ್ಲೆಂ “ಆತಾಂ ಯೆ ಆನಿ ಖಾ ಉಸ್ಟೆಂ! ಖಾ... ಬೊಕ್ಲಾನ್ ಉಸ್ಟೆಂ ಕೆಲ್ಲ್ಯಾ ಮೊಡ್ಕೆಂತ್ಲೆಂ... ಆನಿ... ಖಾ... ಪರ್ಕ್ಯಾನ್ ಉಷ್ಟೆಂ ಕರ್ನ್ ದವರ್ಲ್ಲ್ಯಾ ತುಜ್ಯಾ ರಾಣಿಚ್ಯಾ ಕುಡಿಕ್... ಯೆ... ದೊನಿ ಉಗ್ತಿಂಚ್ ಆಸಾತ್!”
ರಾಣಿಚೆಂ ಹೆಂ ರಾಗಿಶ್ಟ್ ವರ್ತನ್ ಪಳೆಯ್ತಾನಾ ತಾಕಾ ತೆಂ ದೆದೆಸ್ಪೊರಾನ್ ಸಗ್ಳೆಂಚ್ ಪಿಶೆಂ ಜಾಲಾಶೆಂ ಭೊಗ್ಲೆಂ. ಆತಾಂ ರಾಣಿಕ್ ಆಪ್ಣಾಚೊ ಮೋಗ್, ಹುಸ್ಕೊ ಭುಜ್ವಣ್ ಗರ್ಜೆಚಿ ಮ್ಹಣ್ ತಾಕಾ ಖಿಣಾನ್ ಕಳಿತ್ ಜಾಲೆಂ. “ನಾಂ ರಾಣಿ... ತುಂ ಉಸ್ಟೆಂ ಜಾಂವ್ಕ್ ನಾಂಯ್.”
ಮೊವಾಳಾಯೆನ್ ಪುಸ್ಪುಸ್ಲೊ ತೊ ರಾಣಿಚ್ಯಾ ಕಾನಾಂತ್. ಆನಿ ತಾಚೆ ದುಖಾಂನಿ ಭರ್ಲ್ಲೆ ಗಾಲ್ ಆಪ್ಲ್ಯಾ ಕಾಂಪ್ಚ್ಯಾ ಹಾತಾಂನಿ ಬೋವ್ ಮೊಗಾನ್ ಪೊಶೆಲಾಗ್ಲೊ.
ಆಪ್ಲ್ಯಾ ದೋನ್ ಮ್ಹಯ್ನ್ಯಾಂಚ್ಯಾ ಲಗ್ನಾ ಜಿವಿತಾಂತ್ ದೀಪು ಥಾವ್ನ್ ಎದೊಳ್ ಭೊಗುಂಕ್ ಮೆಳನಾತ್ಲ್ಲೊ ಮೊವಾಳ್ ಮೋಗ್... ಆಜ್ ಪಯ್ಲೆ ಪಾವ್ಟಿಂ ಭೊಗುಂಕ್ ಮೆಳ್ತಾನಾ ರಾಣಿಚಿ ಮತ್ ಜಾಗ್ರುತ್ ಜಾಲಿ. ತ್ಯಾ ಮೊವಾಳ್ ಸ್ಪರ್ಶಾಕ್ ಪುಳಕಿತ್ ಜಾಲ್ಲೆಂ ತೆಂ ಸರ್ವ್ ವಿಸ್ರುನ್ ಹಾಳ್ವಾಯೆನ್ ದೀಪುಚ್ಯಾ ಮೊಗಾ ಲ್ಹಾರಾಂಕ್ ಸ್ಪಂದಿತ್ ಜಾಂವ್ಕ್ ಲಾಗ್ಲೆಂ.
“ದೀಪು” ಮೊಗಾ ಉಮಾಳ್ಯಾಂನಿ ಉಗ್ತ್ಯಾ ಹರ್ದ್ಯಾಚೆರ್ ತಾಕಾ ಬಳಾನ್ ಆರಾವ್ನ್ ಪುಸ್ಪುಸ್ಲೆಂ ತೆಂ. “ಆಜ್ ತುಂ ಪಿಯೆವ್ನ್ ಯೇವ್ನಾಂಯ್?!”
“ಪಿಯೆಲಾಂ... ಪುಣ್ ಮೀತ್ ಮಿರ್ವೊನ್ ಪಿಯೆಂವ್ಕ್ ನಾ.” ರಾಣಿಚ್ಯಾ ಉಬಾರ್ ಸ್ತನಾಂ ಮದೆಂ ಪುಸ್ಪುಸ್ಲೊ ದೀಪು. “ಖರೆಂಚ್ ಸಾಂಗ್ತಾಂ ರಾಣಿ ತುಜೊ ಹಾಂವ್ ಚಡ್ ಮೋಗ್ ಕರ್ತಾಂ. ತುವೆಂ ಸಾಂಗ್ಲ್ಲೊ ಹರ್ಯೆಕ್ ವಿಷಯ್ ಮ್ಹಜೆ ಮತಿಂ ಆಸಾ... ಮೊಡ್ಕೊರ್ ಜನೆಲ್... ವೀಜ್ ಸಕತ್... ಹೆಂ ಸಗ್ಳೆಂ ಸಾರ್ಕೆಂ ಕರುಂಕ್ ಹಾಂವ್ ಹರ್ ಪ್ರಯತ್ನ್ ಕರುನ್ಚ್ ಆಸಾಂ.”
ತ್ಯಾ ದೆಕುನ್ಚ್ ಹಾಂವ್ ಫುಂಕ್ಯಾಕ್ ಮೆಳ್ಚ್ಯಾ ಸೊರ್ಯಾಕ್ ರಾಕೊನ್ ರಾವ್ತಾಲೊಂ. ಹ್ಯಾ ಸೊರ್ಯಾಕ್ ಘಾಲ್ಚ್ಯಾ ಪಯ್ಶಾಂಚ್ಯಾ ಉರೊವ್ಣೆಕ್ ಹರ್ ಪ್ರಯತ್ನ್ ಕರುನ್ ಆಸ್ಲ್ಲೊಂ. ಪುಣ್ ಹ್ಯಾ ಪ್ರಯತ್ನಾಂತ್... ರಾಕೊವ್ಣಿ ಆಸ್ತಾ. ಮ್ಹಾಕಾ ಫುಂಕ್ಯಾಕ್ ಸೊರೊ ದಿಂವ್ಚ್ಯಾ ವ್ಯಕ್ತಿನ್ ಮಿತ್ ಮಿರ್ವೊನ್ ಪಿಯೊಂವ್ಚೆ ಪರ್ಯಾಂತ್ ಹಾಂವೆ ರಾಕಾಜೆ ಪಡ್ತಾ. ಪುಣ್ ಎಕ್ ಪಾವ್ಟಿಂ ತೊ ದೀತ್ ತರ್ ಮಾಗಿರ್ ತಾಣೆಂ ದಿಂವ್ಚ್ಯಾಕ್ ಮೀತ್ ಆಸಾನಾ. ಹಾಚೊ ಪರಿಣಾಮ್ ಮಿತಿನ್ ಪಿಯೆಜೆ ಮ್ಹಣ್ ಮನ್ ಆಸ್ತಾಲೆಂ ತರೀ ಮ್ಹಜಿ ಮೀತ್ ಚುಕ್ತಾಲಿ!
ಪುಣ್ ಆಜ್...
ಮ್ಹಯ್ನ್ಯಾಚೊ ಆಕ್ರೆಚೊ ದೀಸ್ ಜಾಲ್ಲ್ಯಾನ್ ಹಾತಿಂ ಪಯ್ಶ್ಯಾಚೊ ಬರ್ಗಾಲ್ ಆಸ್ಲ್ಲೆ ಸಗ್ಳೆ ಲೆಕಾಚೆಂ ಪಿಯೆವ್ನ್ ಪಾಟಿಂ ವೆತಾಲೆ. ಆನಿ ಹಾಂವ್ಯಿ ಫುಂಕ್ಯಾಚ್ಯಾ ಆಮಾಲಾಕ್ ರಾಕಾನಾಸ್ತಾನಾ ಲೆಕಾಚೆಂ ಪಿಯೆವ್ನ್ ಪಾಟಿಂ ಆಯಿಲ್ಲೊಂ. ಪುಣ್ ರಾಣಿ... ಭರೊನ್ ಯೆಂವ್ಚ್ಯಾ ತಾಳ್ಯಾನ್ ತೊ ಉಲೊಂವ್ಕ್ ಕಷ್ಟಾಲೊ.
“ರಾಣಿ ಹಾಂಗಾ ಪಾವ್ತಾನಾ ವೇಳ್ ಉತರ್ನ್ ಜಾಲ್ಲೊ ಆನಿ... ದೀಪುಚಿಂ ದುಕಾಂ ರಾಣಿಚೆಂ ಉಗ್ತೆಂ ಹರ್ದೆಂ ಭಿಜಯ್ತಾನಾ ಫಾರಿಕ್ಪಣಾಚ್ಯಾ ಕ್ರೋಧಾ ಬರಾಬರ್ ಉದ್ವೇಗಾನ್ ದೆಂವ್ಲ್ಲಿಂ ರಾಣಿಚಿಂ ದುಕಾಂ ದೀಪು ಥಂಯ್ ಹಳ್ತಾರ್ ಫಾರಿಕ್ಪಣಾಚೆಂ ಕೀಟ್ ಜಲ್ಮಾಂವ್ಕ್ ಸಕ್ಲಿಂ! ಆನಿ ತೆಂ ಕೀಟ್... ಜಳ್ಚೆಂ ಕೇಂಡ್ ಜಾವ್ನ್ ಬದ್ಲುನ್ ಯೆತಾಸ್ತಾನಾ ಹಳ್ತಾರ್ ತಾಚೆ ವೋಂಟ್ ವೆಗ್ಳೆ ಜಾಲೆ “ರಾಣಿ ಸಾಂಗ್ ಆತಾಂ ಕೋಣ್ ತೊ ಫಟಿಂಗ್...?”
ಚಿಂತ್ನಾಂನಿ ಮಿಸ್ಳೊನ್ ಆಸ್ಲ್ಲ್ಯಾ ರಾಣಿಕ್ ಹೆಂ ಸವಾಲ್ ಆಯ್ಕಾತಾನಾ ಎಕಾಚ್ಛಾಣೆಂ ರಾಗ್ ಜಳೊನ್ ಕ್ರೋಧ್ ಭರುನ್ ತಾಚ್ಯಾ ವೋಂಟಾ ಥಾವ್ನ್ ಉತ್ರಾಂ ಉಸಾಳ್ಳಿಂ “ಸೈಮನ್... ತುಜ್ಯಾ ಧನಿಯಾಚೊ ಭಾಚೊ... ಫಟಿಂಗ್ ಸೈಮನ್””
‘ಸೈಮನ್?!’ ಎಕಾಚ್ಛಾಣೆಂ
ದೀಪುಚ್ಯಾ ಕಾನಾಂಕ್ ಹುನ್ ಶಿಶೆಂ ವೊತ್ಲ್ಲೆಪರಿಂ ಜಾಲೆಂ! ಶಿರಾಂಶಿರಾಂನಿ ಉಜೊ ಧಾಂವ್ಲೆಲ್ಯಾ ಅನುಭವಾನ್
ಸಗ್ಳೊಚ್ ಕ್ರೋಧಾನ್ ಚಡ್ಪಡ್ಚೊ ತೊ ಆಪ್ಲ್ಯಾ ಕಾನಾಂಕ್
ಪಾತ್ಯೆನಾಂ ಜಾಲೊ!! ತರೀ ರಾಣಿಚ್ಯಾ ವೊಂಟಾಂಕ್ ತಾಣೆಂ ಪಾತ್ಯೆಜೆಚ್ ಆಸ್ಲ್ಲೆಂ.
‘ಆಪುಣ್ ಡ್ರೈವರ್ ಜಾವ್ನ್ ಕಾಮ್ ಕರ್ಚ್ಯಾ ಧನಿಯಾಚ್ಯಾ ಘರಾ ಆಪ್ಣಾಕ್ ಚಡ್
ಲಾಗ್ಶಿಲೊ... ಹರ್ಯೆಕಾ ಸಂಗ್ತಿಂತ್ ಚಡ್ ಸಳಾವಳೆನ್ ಆಸುನ್ ಜಾಂವ್ ಘುಟಾಚಿ ಯಾ ಅನ್ವಾರ್ ಆಕಾಂತಾಚಿ ಯಾ
ಸುಖ್ ಆನಂದಾಚಿ ಸರ್ವ್ ಸಂಗ್ತಿಂ ಎಕಾಮೆಕಾ ವಾಂಟುನ್ ಘೆಂವ್ಚೊ ಧನಿಯಾಚೊ ಭಾಚೊ
ಸೈಮನ್...!
ಆನಿ ಆಜ್ ತ್ಯಾಚ್ ಸೈಮನಾನ್... ಮುಕಾರ್ ಚಿಂತುಂಕ್ ತಾಕಾ ಜಾಲೆಂ ನಾ! ರಾಣಿಚ್ಯಾ ಪೆಂಕ್ಟಾಕ್ ಆರಾವ್ನ್ ಆಸ್ಲ್ಲೆ ತಾಚೆ ತೆ ಲೊಂಕ್ಡಾ ಸಾರ್ಕೆ ಹಾತ್ ಕ್ರೋಧಾನ್ ರಾಣಿಕ್ ದುಕೊಂವ್ಕ್ ಲಾಗ್ಲೆ ಆನಿ ತಾಚೆ ರಾಗಾನ್ ಕಾಂಪ್ಚೆ ವೋಂಟ್ ತಾಚೆ ನಿಯಂತ್ರಣಾಭಾಯ್ರ್ ಪುಸ್ಪುಸೊಂಕ್ ಲಾಗ್ಲೆ... “ಬೆವಾರ್ಶ್ಯಾನ್ ಜಿವಂತ್ ಉರುಂಕ್ ನಜೊ. ತಾಕಾ ಚಾಚಾವ್ನ್ ಚಾಚಾವ್ನ್ ಕುಡ್ಕೆ ಕುಡ್ಕೆ ಕರ್ತಲೊಂ... ತಾ...”
ಹೆಂ ಆಯ್ಕಾಲ್ಲೆಂಚ್ ರಾಣಿನ್ ಎಕಾಚ್ಛಾಣೆ ತಾಕಾ ಬಳಾನ್ ಲೊಟುನ್ ಆಪ್ಲ್ಯಾ ಕುಡಿ ಥಾವ್ನ್ ವೆಗ್ಳೆಂ ಕೆಲೆಂ ಆನಿ “ಕಿತೆಂ ಮ್ಹಣ್ತಾಂಯ್ ತುಂ?!” ಬೊಬಾಟ್ಲೆಂ ರಾಣಿ. ಪುಣ್ ದುಸ್ರ್ಯೆ ಘಡ್ಯೆ ತೆಂ ಆಪ್ಲ್ಯಾ ಆಮ್ಸೊರಿ ಕರ್ತುಬಾಕ್ ಚುರ್ಚುರ್ಲೆಂ. ಘಡ್ಯೆನ್ ಪರತ್ ದೀಪುಕ್ ಆರಾವ್ನ್ ಕೇಸ್ ಪೊಶೆವ್ನ್ ಮ್ಹಣಾಲಾಗ್ಲೆಂ “ಕಸಲಿ ಪಿಶಿ ಆಲೊಚನ್ ತುಜಿ... ತುಂ ತಾಕಾ ಮಾರ್ ಆನಿ ಜಯ್ಲಾಕ್ ವಚ್ ಉಪ್ರಾಂತ್ ಹಾಂವ್ ವಾಟೆರ್” ಉತ್ರಾಂ ಬರಾಬರ್ ತಾಣೆ ಮೊಗಾ ಉಮಾಳ್ಯಾಂನಿ ಕಾಂಪ್ಚೆ ಆಪ್ಲೆ ವೋಂಟ್ ದೀಪುಚಾ ವೊಂಟಾಚೆರ್ ದಾಂಬುನ್ ಪರತ್ ಮ್ಹಣಾಲಾಗ್ಲೆಂ...
“ದೀಪು ಮ್ಹಾಕಾ ತುಂ ಜಾಯ್... ತುಜೆಶಿವಾಯ್ ಮ್ಹಾಕಾ ಜಿಯೆಂವ್ಕ್ ನಾಕಾ.... ಮ್ಹಾಕಾ ತುಂ ಜಾಯ್... ಜಾಯ್”... ಉದ್ವೇಗಾನ್ ದೀಪುಕ್ ಆರಾವ್ನ್ ಧರ್ಲೆಲಿ ವೇಂಗ್ ಚಡ್ ಆನಿ ಚಡ್ ಬಳಾದಿಕ್ ಕರುನ್ ಮೊಗಾನ್ ತೆಂ ಪಿಂರ್ಗೊಂಕ್ ಲಾಗ್ಲೆಂ.
ರಾಣಿಚ್ಯಾ ಶಿರಾಂಶಿರಾಂನಿ ಭರೊನ್ ಯೆಂವ್ಚ್ಯಾ ಉದ್ವೇಗಾಚ್ಯಾ ಉಮಾಳ್ಯಾಂನಿ ತಾಚ್ಯಾ ವೆಂಗೆಂತ್ಲೆಂ ಬಳ್ ಚಡುನ್ ಯೆತಾಸ್ತಾನಾ ತಾಚ್ಯಾ ಉಬಾರ್ ಉಗ್ತ್ಯಾ ಹರ್ದ್ಯಾರ್ ಚಿಡ್ಕೊನ್ ಆಸ್ಲ್ಲೊ ದೀಪು ಆಪ್ಲ್ಯಾ ಮತಿಂತ್ ರೂಪಿತ್ ಜಾವ್ನ್ ಆಸ್ಚ್ಯಾ ಫಾರಿಕ್ಪಣಾಚ್ಯಾ ಯೋಜನೆಕ್ ಲಾಗೊನ್ಗೀ ಯಾ ರಾಣಿ ಸೈಮನಾವರ್ವಿಂ ಉಸ್ಟ್ಯಾಚೆಂ ಜಾಲಾಂ ಮ್ಹಳ್ಳೆಂ ಆಪ್ಣಾವರ್ವಿಂ ಜಿರಂವ್ಕ್ ಸಕಾನಾತ್ಲ್ಲ್ಯಾ ಕಾಂಟಾಳ್ಯಾನ್ಗೀ ಕೊಣ್ಣಾ... ಸುಖಾ ಲ್ಹಾರಾಂನಿ ಉಪ್ಯೆಂವ್ಚ್ಯಾ ರಾಣಿಕ್ ಸಾಂಗಾತ್ ದೀಂವ್ಕ್ ದೀಪುಕ್ ಕಷ್ಟಾಂಚೆಂ ಜಾಲೆಂ.
ಚಿಮ್ಣೆ ತೆಲಾಚ್ಯಾ ಅಭಾವಾನ್ ಲಾಂಪ್ಯಾಂವ್ ಪಾಲ್ವಾಲೊ. ತಾಣಿಂ ಘರ್ ಮ್ಹಣ್ ವೊಲಾಯಿಲ್ಲೆಂ ತೆಂ ಕೂಡ್ ಸಗ್ಳೆಂ ದಾಟ್ ಕಾಳೊಕಾಂತ್ ಬುಡ್ಲೆಂ.
ಉದ್ರೇಕಿತ್ ಆವೇಶಾನ್
ದೀಪುಚೆರ್ ಎಕಾ ಥರಾಚೊ ಜುಲುಮ್ ಆಧಾರುನ್ ತಾಚ್ಯಾ ಕುಡಿ ಥಾವ್ನ್
ಸುಖ್ ಆಪ್ಣಾಂವ್ಕ್ ಪ್ರಯತ್ನ್ ಕರ್ಚ್ಯಾ ರಾಣಿ ಥಂಯ್ ಎಕ್
ಪಾವ್ಟಿಂ ತೊ ಮಾಲ್ವಾತಾಲೊ ತರ್... ದುಸ್ರೆ ಘಡ್ಯೆ ಫಾರಿಕ್ಪಣಾಚ್ಯಾ ಯೋಜನೆಂತ್ ತೊ
ಮಿಸ್ಳೊನ್ ಆಸ್ತಾಲೊ... ಅಶೆಂ...
ದೋನ್ ದೊಣಿಚೆರ್ ಪಾಂಯ್ ದವರ್ಲ್ಲೆಪರಿಂ ಜಾಲ್ಲ್ಯಾ
ದೀಪುಕ್ ಹ್ಯಾ ಸನ್ನಿವೇಶಾಂತ್ ರಾಣಿಕ್ ಸಹಕರ್ಸುಂಕ್ ತೊ
ಸಲ್ವೊನ್ ಆಸ್ಲ್ಲೊ. ಕಿತ್ಲೆಂ ಪ್ರಯತನ್ ಕೆಲೆಂ ತರೀ ತಾಚಿ ಕೂಡ್...
ಬಳಾನ್ ಚಡ್ಬಡೊನ್ ಆಸ್ಚ್ಯಾ ರಾಣಿಚ್ಯಾ ಭೊಗ್ಣಾಂಕ್ ಸ್ಪಂದಿತ್ ಜಾಯ್ನಾತ್ಲ್ಲಿ.
ಮೆಡಿಕಲ್ ವಿದ್ಯಾರ್ಥಿ ಸೈಮನ್ ಆಪ್ಲಿ ಭಯ್ಣ್ ಲಿಂಡಾ ಆನಿ ಭಾವೊಜಿ ಶಿಬು ಜೊಸೆಫ್ ಹಾಂಚೆ ವಟ್ಟುಕ್ ರಾವ್ತಾಲೊ. ತಿಂ ವ್ಯಾಪಾರ್ ವಯ್ವಾಟ್ ತಶೆಂ ಸಮಾಜ್ ಸೆವೆಚ್ಯಾ ಕಾಮಾಂನಿ ರಾತ್ ದೀಸ್ ಮಗ್ನ್ ಜಾವ್ನ್ ಆಸ್ತಾನಾ ಹಾಚಿಂ ಅನ್ನಾಡ್ಪಣಾಂ, ಡ್ರಗ್ಸ್, ಅಮಾಲ್ ಪಿಯೊವ್ಣೆಂ ತಸಲ್ಯೊ ವಾಯ್ಟ್ ಸವಯೊ ತಾಂಚ್ಯಾ ಗುಮನಾಕ್ ಯೇನಾತ್ಲ್ಯೊ. ಅಸಲ್ಯಾ ಸಂಗ್ತಿಂನಿ ಸಬಾರ್ ಪಾವ್ಟಿಂ ದೀಪುನ್ಚ್ ತಾಕಾ ರಾಕೊನ್ ವ್ಹೆಲ್ಲೆಂಯೀ ಆಸಾ.
ಪುಣ್ ಆಜ್ ತ್ಯಾಚ್ ಸೈಮನಾನ್ ತಾಕಾ ಘಾತ್ ಕೆಲ್ಲೊ. ತಾಚೆವರ್ವಿಂ ಭೊಗ್ಸುಂಕ್ ಜಾಯ್ನಾತ್ಲೊ ತಸಲೊ ವಿಶ್ವಾಸ್ಘಾತ್ ಕೆಲ್ಲೊ! ‘ಬೋವ್ಶಾ ತಾಚಿಂ ಸರ್ವ್ ಅನ್ನಾಡ್ಪಣಾಂ ಹಾಂವೆ ಲಿಪೊವ್ನ್ ವ್ಹರ್ನ್ ತಾಕಾ ರಾಕ್ಲ್ಲ್ಯಾನ್ ತಾಚ್ಯಾ ವಾಯ್ಟ್ ಸವಯಾಂಕ್ ಪಾಟಿಂಬೊ ದಿಲ್ಲೆಪರಿಂ ಜಾಲೆಂ ಕೊಣ್ಣಾ’... ಚುರ್ಚುಲೊ ದೀಪು.
ಅಶೆಂ ದೀಪು ಕ್ರೋಧಾಚ್ಯಾ ನಾನಾಂತ್ಯಾ ಚಿಂತ್ನಾಂನಿ ದೆದೆಸ್ಪೊರ್ ಜಾವ್ನ್ ಫಾರಿಕ್ಪಣಾಚ್ಯಾ ಯೆವ್ಜಣೆಂತ್ ಮಗ್ನ್ ಜಾವ್ನ್ ಆಸ್ತಾನಾ ಹೆಂ ಕಾಂಯ್ಚ್ ನೆಣಾಸ್ಲೆಂ ರಾಣಿ ಉನ್ಮಾದಾನ್ ತಾಕಾ ಆರಾವ್ನ್ ತಾಚ್ಯಾ ಆಂಗಾರ್ ಲೊಳುನ್ ಆಪ್ಲೆ ವಿಶ್ವೆ, ವೋಂಟ್, ಹಾತ್ ದೀಪುಚೆರ್ ಚರವ್ನ್ ತಾಕಾ ಜಾಗೊಂವ್ಕ್ ಪ್ರಯತ್ನ್ ಕರುನ್ ಆಸ್ಲ್ಲೆಂ!.
ಪುಣ್ ಆಪ್ಲ್ಯಾ ವಿವಿದ್ ಚಿಂತ್ನಾಂ ವರ್ವಿಂ ಜಾಗೊ ಜಾಂವ್ಕ್ ಕಷ್ಟುನ್ ಆಸ್ಲ್ಲೊ ದೀಪು ರಾಣಿಕ್ ಫಾವೊತಿ ಪ್ರತಿಕ್ರಿಯಾ ದೀಂವ್ಕ್ ಸಕಾನಾತ್ಲೆಲ್ಯಾವೆಳಾ ನಿಮಾಣೆಂ ರಾಣಿನ್ ಆಪ್ಲಿ ಸಲ್ವೊಣಿ ಮಾನುನ್ ಘೆತ್ಲಿ.
‘ಬೋವ್ಶಾ ಆಮಾಲಾರ್ ಆಸ್ಲ್ಯಾರ್ ಮಾತ್ರ್ ಹಾಚೆಂ ದಾದ್ಲೆಂಪಣ್ ಜಿವಾಳ್ತಾ ಕೊಣಾ’� ನಿರಾಶೆಚ್ಯಾ ಭೊಗ್ಣಾಂನಿ ತೆಂ ಆಪ್ಲ್ಯಾ ಮೊಗಾ ಆವೇಶಾಕ್ ಹಳ್ತಾರ್ ವಿರಾಮ್ ಹಾಡಿಲಾಗ್ಲೆಂ.
ಥೊಡ್ಯಾ ವೆಳಾ ಆದಿಂ ಸೈಮನಾಚ್ಯಾ ಕಾಮುಕೀ ಹಾತಾಂ ವಿರೋಧ್ ಝಗ್ಡಾಲ್ಲಿ ಆನಿ ಆತಾಂ ದೀಪುಚ್ಯಾ ಕುಡಿಚೆರ್ ಕೆಲ್ಯಾ ಲಾಂಬ್ ಪ್ರಯತ್ನಾಂ ನಿಮ್ತಿಂ ಕಠಿಣ್ ಥಕ್ಲ್ಲಿ ರಾಣಿಚಿ ಕೂಡ್ ವಿಶೆವ್ ಆಶೆಲಿ. ದೀಪುಕ್ ಆರಾವ್ನ್ ಆಸ್ಲ್ಲಿ ತಾಚಿ ತಿ ಘಾಮೆಲ್ಲಿ ಕೂಡ್ ಥೊಡ್ಯಾಚ್ ಸೆಕುಂದಾಂನಿ ನಿದೆಥಂಯ್ ಪ್ರೇರಿತ್ ಜಾಲಿ.
ಹ್ಯಾ ಆಯಿನ್ನ್ ವೆಳಾ ರಾಣಿ ಕೆದಾಳಾ ನಿವ್ತಾ ಕೆದಾಳಾ ನಿದ್ತಾ ಆನಿ ಅಪುಣ್ ಕೆದಾಳಾ ಹಾಂಗಾ ಥಾವ್ನ್ ಸುಟ್ತಾಂ ಮ್ಹಣ್ ರಾಕೊನ್ ಆಸ್ಲ್ಲೊ ದೀಪು ಖಿಣಾನ್ ಚುರುಕ್ ಜಾಲೊ. ಆನಿ ಆಪ್ಣಾಕ್ ಆರಾವ್ನ್ ಘೊರೆವ್ನ್ ಆಸ್ಲ್ಲ್ಯಾ ರಾಣಿಕ್ ಜಾಗ್ ಜಾಯ್ನಾಶೆಂ ಬೋವ್ ಚತ್ರಾಯೆನ್ ಆಪ್ಣಾ ಥಾವ್ನ್ ವಿಂಗಡ್ ಕರುನ್ ತಾಕಾ ದೆಗೆನ್ ನಿದಾಯ್ತಾ ಮ್ಹಣ್ತಾನಾ...
ತ್ಯಾ ಮೊಡ್ಕೊರ್ ಜನೆಲಾಲಾಗಿಂ ಬೋವ್ ಲ್ಹಾನ್ ಎಕ್ ಆವಾಜ್ ತಾಕಾ ಆಯ್ಕಾಲೊ.
ತ್ಯಾ ದಾಟ್ ಕಾಳೊಕಾಂತ್ ತಾಚಿ ಆತುರಾಯೆಚಿ ದೀಷ್ಟ್ ತ್ಯಾ ಕುಶಿನ್ ಪರ್ತಾತಾನಾ ತಾಚ್ಯಾ ಕಪಾಲಾರ್ ಮಿರಿಯೊ ಉದೆಲ್ಯೊ.
ಥಂಯ್ಸರ್... ಎಕ್ ಜೊಡಿ ದೊಳೆ... ಭಿತರ್ ತಿಳುನ್ ಆಸ್ಲ್ಲೆ!
ಕಾಳೊಕಾಂತ್ ಉಜಳುನ್ ಆಸ್ಚ್ಯಾ ತ್ಯಾ ದೊಳ್ಯಾಂಚೆರ್ ದೀಷ್ಟ್ ಖಂಚಯ್ತಾನಾ ತೊ ಆಂದಾಜ್ ಕರಿಲಾಗ್ಲೊ. ತೆ ಜೊಡಿ ದೊಳೆ ಮಾಜ್ರಾಚೆ... ಖಂಡಿತ್ ಜಾವ್ನ್ ತ್ಯಾಚ್ ಬೊಕ್ಲಾಚೆ... ವೊಡೊಲ್ ಉಸ್ಟೆಂ ಘಾಲ್ನ್ ಗೆಲ್ಲ್ಯಾ ಬೊಕ್ಲಾಚೆ.
ಎಕ್ ಪಾವ್ಟಿಂ ಚೋರ್ನ್ ಖೆಲ್ಲ್ಯಾಕ್ ಉಪ್ರಾಂತ್ ತಿಚ್ ರೂಚ್. ಪರತ್ ಪರತ್ ಚೋರ್ನ್ ಖಾಂವ್ಚಿಚ್ ವೊಡ್ಣಿ. ತಸಲ್ಯಾಂಕ್ ಆಯಿನ್ನ್ ವೆಳಾರ್ ಬೂದ್ ಶಿಕಯ್ನಾ ತರ್ ಮುಕಾರ್ ತವಳ್ ತವಳ್ ತೊ ಚೊರುಂಕ್ ಯೆತೊಲೊ... ಎಕ್ಚ್ ಪಾವ್ಟಿಂ ತಾಚೆ ಮತಿಂತ್ ಸೈಮನಾಚೆಂ ಮುಖಮಳ್ ಉದೆಲೆಂ.
ಆನಿ ವೇಳ್ ಕಾಡ್ಚೊ ನ್ಹಯ್... ಆಮ್ಸರ್ಲೊ ತೊ... ಪರತ್ ತಾಣೆಂ ಚೋರ್ನ್ ಖಾಂವ್ಚೆ ಫುಡೆಂ ತಾಚಿ ವಿಲೆವಾರಿ ಜಾಯ್ಜೆ. ಫಾರಿಕ್ಪಣಾಚ್ಯಾ ಚಿಂತ್ನಾಂ ಬರಾಬರ್ ಚುರುಕ್ ತೊ ಜಾಲೊ. ಖಿಣಾನ್ ತ್ಯಾ ಕಾಳೊಕಾಂತ್ ರಾಂದ್ಣಿಲಾಗಿಂ ಆಸ್ಚ್ಯಾ ಸುರಿಯೆ ಖಾತಿರ್ ಸಾಸ್ಪಾಲಾಗ್ಲೊ.
ತಾಂಗೆರ್ ಆಸ್ಚಿ ಎಕ್ಚ್ ಸುರಿ. ಮಾಸ್ ಮಾಸ್ಳೆಕೀ ತಿಚ್. ಪಿಯಾವ್ ಮಿರ್ಸಾಂಗೆಕೀ ತಿಚ್. ತಾಣೆಂ ತಿ ಸುರಿ ಸೊದುನ್ ವಸ್ತುರ್ ಉಮ್ಕಾಳಾಂವ್ಚಿ ದೊರಿ ಕಾತರ್ಲಿ. ತೊ ಭುರ್ಗೊ ಆಸ್ತಾನಾ ಗಾದ್ಯಾಕ್ ಯೆಂವ್ಚ್ಯಾ ರಾನ್ ದುಕ್ರಾಂಕ್ ಧರುಂಕ್ ತಾಚ್ಯಾ ಬಾಪಯ್ ಸಂಗಿಂ ಮೆಳುನ್ ಘಾಲ್ಚ್ಯಾ ಪಾಸಾಚೊ ಉಗ್ಡಾಸ್ ಮತಿಂ ಹಾಡುನ್ ತಾಣೆಂ ಪಾಸ್ ಘುಂತ್ಲೊ. ಉಪ್ರಾಂತ್ ಜನೆಲಾಲಾಗಿಂ ತಿಳ್ಚ್ಯಾ ತ್ಯಾ ಬೊಕ್ಲಾಚ್ಯಾ ಗೊಮ್ಟೆಕ್ ಶಿರ್ಕಾಶೆಂ ತೊ ಪಾಸ್ ಮಾಂಡುನ್ ದವರ್ಲೊ.
ತ್ಯಾ ಚಾರ್ ಪಾಂಯಾಚ್ಯಾ ಬೊಕ್ಲಾಚಿ ವಿಲೆವಾರಿ ಸಂಪಿ. ಆತಾಂ ತಾಚೆ ಮತಿಂತ್ ದೋನ್ ಪಾಂಯಾಚ್ಯಾ ಬೊಕ್ಲಾವಿಶಿಂ ಚಿಂತ್ನಾಂ ಧೊಸುಂಕ್ ಲಾಗ್ಲಿಂ.
ಸೈಮನಾನ್ ರಾಣಿಚೆರ್ ಬಲತ್ಕಾರ್ ಕೆಲಾ ಮ್ಹಣ್ ಆಯ್ಕಾಲ್ಯಾ ಉಪ್ರಾಂತ್ ತಾಕಾ ಕಠಿಣ್ ಉಬ್ದೇಸ್ ಭೊಗುಂಕ್ ಲಾಗ್ಲ್ಲೆ. ಆಪ್ಣಾಸಂಗಿಂ ಸಳಾವಳೆನ್ ಆಸ್ಚ್ಯಾ ಆಪ್ಲ್ಯಾ ಇಷ್ಟಾನ್ಂಚ್ ಆಪ್ಲ್ಯಾ ಬಾಯ್ಲೆಚೆರ್ ಅತ್ಯಾಚಾರ್ ಚಲಯಿಲ್ಲೊ. ತೆಂ ತಾಕಾ ಗಿಳುಂಕ್ ಜಾಯ್ನಾತ್ಲಿಂ ಉಂಡಿ ಜಾಲ್ಲಿ. ರಾಣಿಚೆರ್ ಎಕಾ ಥರಾಚಿ ಜಿಗುಪ್ಸಾ ಕಿರ್ಲಾಲಿ. ಎಕಾಥರಾಚೊ ಸ್ವಾರ್ಥಿ ಜಾಲ್ಲೊ ತೊ.
‘ಸೈಮನಾನ್ ರಾಣಿಕ್ ಎಕ್ಪಾವ್ಟಿಂ ಭೊಗ್ಲಾಂ ತರ್
ಮುಕಾರಿ ತೊಚ್ ತಾಕಾ ಭೊಗುಂದಿ’’... ರಾಣಿವಿಶಿಂ ವಾಯ್ಟ್ ಚಿಂತಿಲಾಗ್ಲೊ
ದೀಪು!
ಪುಣ್ ತಾಚೆಂ ಅಂತಸ್ಕರ್ನ್ ತಾಕಾ ಜಾಗವ್ನ್ ಆಸ್ಲ್ಲೆಂ. ಖಳ್ಮಿತ್ನಾಸ್ತಾಂ ತುಜೊ ನಿತಳ್ ನಿಸ್ಕಳ್
ಮೋಗ್ ಕರುನ್ ತುಜೆರ್ ವಿಶ್ವಾಸ್ ದವರುನ್ ಆಸ್ಲ್ಲ್ಯಾ ರಾಣಿಕ್ ಜಿಣಿಭರ್ ಶಿಕ್ಷಾ
ದೀಂವ್ಕ್ ತಾಣೆ ಕಸಲೊ ಗುನ್ಯಾಂವ್ ಕೆಲಾ?!
‘ತೆಂ ಕಿತೆಂಯೀ ಜಾಂವ್’ ತೊ ತಾಕಾಚ್ ಸಮರ್ಥನ್ ಕರಿಲಾಗ್ಲೊ. ಹಾಂಗಾಸರ್ ಆಸಾ ವಿಂಚೊವ್ಣ್. ಸೈಮನಾನ್ ರಾಣಿಚೆರ್ ಕೆಲ್ಲ್ಯಾ ಬಲತ್ಕಾರಾ ಖಾತಿರ್ ರಾಣಿಕ್ ತಾಚ್ಯಾಚ್ ಗೊಮ್ಟೆಕ್ ಬಾಂದಿಜೆ. ನಾ ತರ್... ರಾಣಿ ಮ್ಹಜ್ಯಾ ಜಿವಿತಾಂತ್ ಉರಾಜೆ ತರ್ ಸೈಮನಾಚಿ ಗೊಮ್ಟಿ...
ತಿತ್ಲ್ಯಾರ್ ಎಕ್ ಭಿರಾಂಕುಳ್ ಕಿಂಕ್ರಾಟ್ ಕುಡಾಂತ್ ಉಟ್ಲಿ ಆನಿ ತಾಚಿಂ ಚಿಂತ್ನಾಂ ಘಡ್ಯೆನ್ ತುಟ್ಲಿಂ. ಖಿಣಾನ್ ತಾಚಿ ದೀಷ್ಟ್ ಜಗ್ಲಾಣ್ಯಾಪರಿಂ ಆವಾಜ್ ಆಯಿಲ್ಯಾ ತ್ಯಾ ಮೊಡ್ಕೊರ್ ಜನೆಲಾ ಥಂಯ್ ಗೆಲಿ. ಥಂಯ್ಸರ್ ತಾಣೆಂ ಮಾಂಡ್ಲ್ಲೊ ಪಾಸ್ ಬೊಕ್ಲಾಚ್ಯಾ ಗೊಮ್ಟೆಕ್ ಆಂರ್ದಾಲ್ಲೊ. ಕಿಂಕ್ರಾಟೆಂ ಸವೆಂ ಬೊಕುಲ್ ಜೀವನ್ಮರಣ್ ಉರ್ಡೊವ್ಣೆಂತ್ ಆಸ್ಲ್ಲೊ. ಹೆಂ ದೃಶ್ಯ್ ಪಳೆಯ್ತಾಂ ಪಳೆಯ್ತಾಂ ದೀಪುಚೆ ಮತಿಂತ್ ಪರತ್ ಸೈಮನಾಚೆಂ ಮುಕಾಮಳ್ ತ್ಯಾ ದೃಶ್ಯಾಂತ್ ಮಿಸ್ಳುನ್ ಗೆಲೆಂ!
ಉಪ್ರಾಂತ್ ಬಾಗಿಲ್ ಉಗ್ತೆಂ ಕರುನ್ ಧಾಂಪ್ಚೊ ಬಾರೀಕ್ ಅವಾಜ್ ತ್ಯಾ ಕುಡಾಂತ್ ಉದೆಲೊ ಆನಿ ಧಾಂಪ್ಲ್ಲ್ಯಾ ತ್ಯಾ ಬಾಗ್ಲಾಕ್ ಪಾಟ್ ಕರುನ್ ದೀಪು ಆಪ್ಲಿ ವಿಂಚೊವ್ಣ್ ಕರ್ಚೆ ಖಾತಿರ್ ರಸ್ತ್ಯಾಕ್ ದೆಂವ್ಲೊ ಆನಿ ತ್ಯಾ ದಾಟ್ ಕಾಳೊಕಾಂತ್ ಮಾಯಾಗ್ ಜಾಲೊ.
*********
ಆದ್ಲೆ ರಾತಿಂ ಬೊಕ್ಲಾಚ್ಯಾ ಕಿಂಕ್ರಾಟೆ ಮದೆಂ ಘರಾ ಥಾವ್ನ್ ಭಾಯ್ರ್ ಪಡ್ಲ್ಲೊ ದೀಪು ಫಾಂತ್ಯಾರ್ ಲಾಗ್ಶಿಲ್ಯಾ ಪಳ್ಳೆಂತ್ ಭಾಂಗ್ ಜಾತಾನಾ ಪರತ್ ಪಾಟಿಂ ಆಪ್ಲ್ಯಾ ಘರ್ಚಿಂ ಮೆಟಾಂ ಚಡಲಾಗ್ಲೊ. ಆಮ್ಸೊರಿಂ ಭಿತರ್ ರಿಗ್ಲ್ಲೊಚ್ ಫಾಂತ್ಯಾಚ್ಯಾ ಪಳ್ಳೆ ಭಾಂಗಾಕ್ ರಾಣಿಂ ಉಟ್ತಾ ತೆಂ ಉಗ್ಡಾಸಾಕ್ ಹಾಡುನ್ ತೆಂ ಉಟ್ಚೆ ಆದಿಂ ಆಪ್ಣೆಂ ನಿದೊನ್ ಆಸಾಜೆ ಮ್ಹಳ್ಳ್ಯಾ ನಿರ್ಧಾರಾನ್ ಸಾಸ್ಪೊನ್ ವೆವೆಗ್ಗಿಂ ವಚೊನ್ ರಾಣಿ ದೆಗೆನ್ ಆಡ್ ಪಡ್ಲೊ. ಹರ್ಶೆಂ ಪಳ್ಳೆಚೊ ಭಾಂಗ್ ಸುರು ಜಾತಾನಾ ಉಟ್ಚೆಂ ರಾಣಿ ಆಜ್ ಭಾಂಗ್ ಸಂಪ್ಲ್ಯಾರೀ ಉಟ್ಲೆಂ ನಾ.
ಆದ್ಲೆ ರಾತಿಂ ಸೈಮನಾಚ್ಯಾ ಬಲತ್ಕಾರಾ ವಿರೋದ್ ಝಜೊನ್, ಉಪ್ರಾಂತ್ ಆಪ್ಣಾ ಥಾವ್ನ್ ಸುಖ್ ಆಪ್ಣಾಂವ್ಕ್ ಝಗಡ್ಲ್ಲಿ ಪುರಾಸಣ್ ಆಸ್ತೆಲಿ ಮ್ಹಣ್ ದೀಪುನ್ ಚಿಂತ್ಲೆಂ.
ತಾಚಿ ವಿಂಚೊವ್ಣ್ ಸಂಪ್ಲ್ಲಿ!
ಹ್ಯಾ ವಿಂಚೊವ್ಣೆಂತ್ ರಾಣಿಕ್ ಜೊಡ್ಚೆ ಖಾತಿರ್ ತಾಣೆಂ ಕೆಲ್ಯಾ ಕಾಮಾಚಿ ಪುರಾಸಣ್ ತಾಕಾ ಕಠಿಣ್ ಧೊಸ್ತ್ತಾನಾ ತಾಣೆಂ ಆಪ್ಲೆ ಹಾತ್ ಉಶೆಂ ಕೆಲೆ ಆನಿ ದೊಳೆ ಧಾಂಪ್ಲೆ. ಪುಣ್...
ದೊಳ್ಯಾಂಕ್ ಧಾಂಕಾಣ್ ಘಾಲುಂಕ್ ತೊ ಭಿಯೆಲೊ... ದೊಳೆ ಧಾಂಪ್ಲೆ ಮ್ಹಣ್ತಾನಾ ಭಿರಾಂಕುಳ್ ದೃಶ್ಯ್ ಮತಿಂತ್ ಉದೆವ್ನ್ ತಾಚೆಂ ಕಾಳಿಜ್ ಕಠಿಣ್ ದಡ್ದ್ಡಡ್ತಾಲೆಂ ಆನಿ ಹ್ಯಾ ವರ್ವಿ ಸಕಾಳ್ ಪರ್ಯಾಂತ್ಯಿ ತೊ ದೊಳ್ಯಾಂಸಂಗಿ ಝಗಡ್ನ್ಂಚ್ ರಾವ್ಲೊ. ನಿಮಾಣೆಂ ಪುರ್ತೆಂ ಸಕಾಳ್ ಜಾತಾನಾ ತೊ ಉಟ್ಲೊ ಆನಿ ತಾಣೆಂ ಎದೊಳ್ಚ್ ನಿರ್ಧಾರ್ ಕೆಲ್ಲೆ ಫರ್ಮಾಣೆಂ ತಾಕಾ ಆಜ್ ಧನಿಯಾಚ್ಯಾ ಘರಾ ಕಾಮಾಕ್ ವೆಚೆ ಆದಿಂ ರುಕಾಚೊ ಆಚಾರಿ ರಾಘವಾಚಾರಿಕ್ ಮೆಳೊಂಕ್ ಆಸ್ಲ್ಲೆಂ.
ರಾಣಿಚೆ ಆಶೆ ಫರ್ಮಾಣೆ ರಾಘವಾಚಾರಿ ಕರ್ನಾಂ ಮೊಡ್ಕೊರ್ ಜನೆಲ್ ಸಾರ್ಕೆಂ ಕರಯ್ಜೆ. ಉಪ್ರಾಂತ್ ವೀಜ್ ದಿವ್ಯಾಚೆಂ ಬಾಕಿ ಆಸ್ಲ್ಲೆಂ ಬಿಲ್ ಫಾರಿಕ್ ಕರುನ್ ವೀಜ್ ದಿವೊ ಪರತ್ ಪೆಟಯ್ಜೆ. ಆಯ್ಚೆ ಉಪ್ರಾಂತ್ ಆಪ್ಣೆಂ ಆಮಾಲ್ ಪಿಯೊವ್ಣೆಂ ಬಂದ್ ಕರುನ್... ನವೆಂ ಜಿವಿತ್ ಸುರು ಕರುಂಕ್ ಜಾಯ್!
ಸುಖ್ ಸಂತೊಸಾಚೆಂ ನವೆಂ ಜಿವಿತ್... ಆನಿ ಹ್ಯಾ ಜಿವಿತಾಂತ್... ತೊ ಆನಿ ರಾಣಿ... ರಾಣಿ ಆನಿ ತೊ.!
ನಾ... ಚಾರ್ ಪಾಂಯಾಚೊ ಬೊಕುಲ್.... ನಾ ದೋನ್ ಪಾಂಯಾಚೊ ಬೊಕುಲ್!
ದೀಪು ರಾಘವಾಚಾರಿಚೆಂ ಘರ್ಚೆಂ ಮೇಟ್ ಚಡ್ತಾನಾಂಚ್ ರಾಘವಾಚಾರಿನ್ ಸಾಂಗೊಂಕ್ ಆರಂಭ್ ಕೆಲ್ಲಿ ಹುನ್ ಹುನ್ ಖಬಾರ್ ಆಯ್ಕಾತಾನಾ ತೊ ಶೆರ್ಮೆಲೊ. ಆಕಾಂತಾ ಬರಾಬರ್ ಧನಿಯಾಚ್ಯಾ ಘರಾ ಧಾಂವೊಂಕ್ ಆಮ್ಸೊರ್ಚೆಂ ನಟನ್ ಕರಿಲಾಗ್ಲೊ!
ಥಂಯ್ ಥಾವ್ನ್ ಧನಿಯಾಚ್ಯಾ ಬೊಂಗ್ಲ್ಯಾಕ್ ವಚೊಂಕ್ ಮೇಟ್ ಕಾಡ್ಚೆ ಫುಡೆಂ ಆದ್ಲೆ ರಾತಿಂ ಸೈಮನಾಚ್ಯಾ ಮೆಜಾವಯ್ಲೆ ಹಾತ್ ದಿಲ್ಲ್ಯಾ ನೊಟಾಂತ್ಲೆ ದೋನ್ ನೋಟ್ ರಾಘವಾಚಾರಿಚ್ಯಾ ಹಾತಿಂ ಚೆಪುನ್ ಆಜ್ಚ್ ಆಪ್ಲೆಂ ಮೊಡ್ಕೊರ್ ಜನೆಲ್ ಸಾರ್ಕೆಂ ಕರಿಜೆ ಮ್ಹಣ್ ಫರ್ಮಾವ್ನ್ ಬೊಂಗ್ಲ್ಯಾ ಕುಶಿನ್ ಮೆಟಾಂ ಘಾಲಿ ಲಾಗ್ಲೊ!.
********
ರಸ್ತ್ಯಾರ್ ರಾಂದಯ್ ವಿಕ್ತೆಲ್ಯಾಚಿ ಆರಾಬಾಯ್ ತಾಚೆ ಕಾನಿಂ ಆಪ್ಟಾತಾನಾ ತೆಂ ಉಟೊನ್ ಬಸ್ಲೆಂ!
ತಾಕಾ ಎಕ್ಪಾವ್ಟಿಂ ಖಂಯ್ಚ್ಯಾಗೀ ಸಂಸಾರಾ ಥಾವ್ನ್ ಖಂಯ್ಚ್ಯಾಗೀ ಸಂಸಾರಾಕ್ ಉಡಯಿಲ್ಲೆಪರಿಂ ಜಾಲೆಂ. ತೆಂ ಆಪ್ಲಿ ಮತ್ ವಾಸ್ತವಾಕ್ ಹಾಡಿತ್ತ್ ಆಸ್ತಾನಾ ಯಾಂತ್ರಿಕ್ ರಿತಿನ್ ತಾಚಿ ದೀಷ್ಟ್ ಮೊಡ್ಕೊರ್ ಜನೆಲಾಸರ್ಶಿಂ ಪರ್ತಾಲಿ. ತೆಂ ಆವಾಕ್ಕ್ ಜಾಲೆಂ!
ಥಂಯ್ಸರ್... ಆದ್ಲೆ ರಾತಿಂ ಕುಂಡ್ಲೆಂ ಉಸ್ಟೆಂ ಕೆಲ್ಲೊ ಕಾಳೊ ಬೊಕುಲ್ ನಿರ್ಜೀವ್ ಜಾವ್ನ್ ಉಮ್ಕೊಳುನ್ ಆಸ್ಲ್ಲೊ!
ಹೆಂ ಪಳೆವ್ನ್ ಆನಿ ಮುಕಾರ್ ಚೋರ್ನ್ ಖಾಂವ್ಚ್ಯಾ ಬೊಕ್ಲಾಚಿ ಖಂತ್ ನಾ ಮ್ಹಣ್ ತಾಕಾ ಸಂತೊಸ್ ಜಾಲೊ. ಥೊಡ್ಯಾ ವೆಳಾನ್ ರಾಘವಾಚಾರಿ ಮೊಡ್ಕೊರ್ ಜನೆಲ್ ರಿಪೇರಿ ಕರುಂಕ್ ನವೆಂ ಪೊಳೆಂ ಘೆವ್ನ್ ಘರಾ ಬಾಗ್ಲಾರ್ ಪ್ರತ್ಯಕ್ಷ್ ಜಾತಾನಾ ತ್ಯಾ ಸಂತೊಸಾಕ್ ಮೇರ್ ನಾ ಜಾಲಿ.
ಎದೊಳ್ ಹಾಂಗಾಸರ್ ನಾತ್ಲ್ಲೆಂ ಖಾಶೆಲೆಂಪಣ್ ಆತಾಂ ಜೊಡ್ಲೆಂ. ತಶೆಂಚ್ ಆನಿ ಮುಕಾರ್ ಜನೆಲಾ ಥಾವ್ನ್ ತಿಳುಂಕ್ ಕೊಣಾಯ್ಕೀ ಅವ್ಕಾಸ್ ನಾ ಮ್ಹಳ್ಳ್ಯಾ ದಾದೊಸ್ಕಾಯೆಚ್ಯಾ ಚಿಂತ್ನಾ ಬರಾಬರ್ ತೆಂ ಮತಿಂತ್ಚ್ ಉಲ್ಲಾಸಾಚಿಂ ಉಡ್ಕಾಣಾಂ ಘಾಲಿಲಾಗ್ಲೆಂ.
ಸುಮಾರ್ ಇಕ್ರಾ ವೊರಾರ್ಶೆಂ ರಾಘವಾಚಾರಿ ಮೊಡ್ಕೊರ್ ಜನೆಲ್ ಸಾರ್ಕೆಂ ಕರುನ್ ಪಾಟಿಂ ವಚುಂಕ್ ಆಯ್ತೊ ಜಾತಾನಾ ಆಚಾರಿನ್ ತಾಚೆಲಾಗಿಂ ಸಾಂಗ್ಲೆಲಿ ಪಾತ್ಯೆಂವ್ಕ್ ಕಷ್ಟ್ ಮಾರ್ಚಿ ಖಬರ್ ಆಯ್ಕುನ್ ತೆಂ ಸಗ್ಳೆಂಚ್ ವಿಜ್ಮಿತ್ ಜಾಲೆಂ.
ಮುಕ್ಲೆಂ ದಾರ್ ಆನಿ ಆಜ್
ಸಾರ್ಕೆಂ ಜಾಲ್ಲೆಂ ಜನೆಲ್ ಭದ್ರ್ ಕರುನ್ ತ್ಯಾ ಮಂದ್ ಕಾಳೊಕಾಂತ್ ಉಮಾಳುನ್ ಯೆಂವ್ಚೊ ಉಲ್ಲಾಸ್ ತಡ್ವುಂಕ್
ಸಕಾನಾಸ್ತಾನಾ ಜಿಕ್ಣೆಚ್ಯಾ ಮನೋಭಾವಾನ್ ಗಾಣಾಂ ಗಾವುನ್
ನಾಚಾಲಾಗ್ಲೆಂ. ರಾಘವಾ ಚಾರಿನ್ ತಾಕಾ ಸಾಂಗ್ಲ್ಲೆಂ ಇತ್ಲೆಂಚ್-
ಸೈಮನ್ ಆಪ್ಲ್ಯಾ ಕುಡಾಂತ್ ಗಳ್ಪಾಸ್ ಘೆವುನ್ ಮೆಲಾ...!
********
About us | Feedback | Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
