ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ವಿಲ್ಸನ್ ಕಟೀಲ್
ವಿಲ್ಸನ್ ಕಟೀಲ್ ಲಿಖ್ಣೆ ನಾಂವಾರ್ ದಿಸಾನ್ ದೀಸ್ ಲೊಕಾಮೊಗಾಳ್ ಜಾವ್ನ್ ಯೆಂವ್ಚೊ ವಿಲ್ಸನ್ ಸಿಕ್ವೇರಾ ಕೊಂಕ್ಣೆಚೊ ಫುಡಾರಾಚೊ ಏಕ್ ಪ್ರಭುದ್ದ್ ಸಾಹಿತಿ, ಚಿಂತ್ಪಿ, ಕವಿ, ವಿಮರ್ಶಕ್, ಕಾಣ್ಯೆಗಾರ್ ಜಾಂವ್ಚಿಂ ಲಕ್ಶಣಾಂ ಮ್ಹಾಕಾ ದಿಸೊನ್ ಯೆತಾತ್. ಕೊಂಕ್ಣಿ ಸಾಹಿತ್ಯಾಚೆಂ ಮಟ್ಟ್ ಜರ್ ಚಡಾಜಯ್, ತರ್ ಅಸಲೆಂ ಸಾಹಿತ್ಯ್ ಭೋವ್ ಗರ್ಜೆಚೆಂ ಮ್ಹಳ್ಳಿ ಆಮ್ಚಿ ಅಭಿಪ್ರಾಯ್. ಹ್ಯಾ ಅಂಕಣಾಚೆರ್ ತುಮ್ಚೆ ಉಗ್ತ್ಯಾಮನಾಚೆ ವಿಚಾರ್ ಆಮಿ ಅಶೆತಾಂವ್.
ಕವಿಂಕ್ ಖಂಯ್ ಪುರ್ಲಾ?
ದುರ್ಭಾಗ್ಪಣ್ ಆಮ್ಚೆಂ; ಕೊಂಕ್ಣಿ ಶೆತ್ ಕೊಸುನ್ ಕಾವ್ಯಾಚೆಂ ಭಾಂಗ್ರಾ ಬೆಳೆಂ ಫುಲೊಂವ್ಕ್ ಸಕತ್ ಆಸ್ಚೆ ಕವಿ ಆಜ್ ಮೊನೆ ಜಾಲ್ಯಾತ್. ಮಾವ್ರಿಸ್ ಡೆಸಾ ಶಾಂತಿಪುರ, ಫ಼್ರೆಡ್ ಕುಮಾರ್ ಕುಚ್ಚಿಕಾಡು, ಜೊಸ್ಸಿ ಪಿಂಟೊ ಕಿನ್ನಿಗೊಳಿ ತಸಲೆ ಮೊವಾಳ್ ಉತ್ರಾಂಚ್ಯಾ ಕವಿಂಚ್ಯೊ ಕುಮೆರ್ಯೊ ಪಣ್ಗಿಲ್ ಪಡ್ಲ್ಯಾತ್. ದೆಕುನ್ ಹ್ಯಾ ದಿಸಾಂನಿ ಕೊಂಕ್ಣೆಂತ್ ಜಾಯ್ತೆಂ ಪಾರ್ತೆನಿಯಂ ಬೆಳೆಂ ಲೆಕಾವರ್ತೆಂ ವಿಸ್ತಾರುನ್ಂಚ್ ಆಸಾ. ಹಾಂಚ್ಯಾ ಮೊನೆಪಣಾಚೊ ಫಾಯ್ದೊ ಜೊಡುನ್ ಕಾಸಾಚಿಯ್ ಕಾವ್ಯಾಚಿ ಶೆಳ್ ನಾಸ್ತಾಂ ಆಪುಣ್ ವ್ಹಡ್ ಕವಿ ಮ್ಹಳ್ಳ್ಯಾ ಭ್ರಮಿದೆಂತ್ ಪಡೊನ್ ಜಾಯ್ತೆ ಬರ್ಪಿ ಬರಯ್ತೆ ಆಸಾತ್. ಅಶೆಂ ಕಾವ್ಯಾಚ್ಯಾ ತಡಿರ್ ಆಪ್ಟಲ್ಲಿಂ ಥೊಡಿಂ ಕರ್ಲಾಂ ವಿಂಚ್ಚಿ ತರ್...
ಎಕ್ಲ್ಯೆ ಗುರ್ವಾರ್ ಸ್ತ್ರೀಯೆಚೊ ರಾಗ್ ವ್ಯಕ್ತ್ ಕರುಂಕ್ ಎಕ್ಲೊ ಅಶಿಂ ಉತ್ರಾಂ ವಾಪಾರ್ತಾ:
"ತೀನ್ ಕಾಸಾಂಚೊ ಮಾಪ್ಳಿ ತೊ
ಘಡಾಯ್ ದಾಕವ್ನ್ ಗೆಲೊ
ಮ್ಹಜೆಲಾಗಿಂ ಕಾಜಾರ್ ಜಾತಾಂ ಮ್ಹಣ್ತಲೊ
ರಾಂಡೆ ಪೂತ್ ಖಂಯ್ ಗೆಲೊ"
ಆನಿಯೆಕ್ಲೊ ರೊಸಾಚಿ ವರ್ದಿ ವಾಚ್ತಾ:
"ದಾಯ್ಜಾಂ ವೊವ್ಳಿಂ ಸೆಜಾರಾಂ ಈಶ್ಟ್ ಸರ್ವ್ ಮಾಟ್ವಾಂತ್ ಜಮ್ಲ್ಲಿಂ
ಆಟ್ ವರಾಂಚೆರ್ ಮಾಗ್ಣ್ಯಾ ವಿದಿ ತಿರ್ಸಾಲ್ಲಿ
ಬೆಸಾಂವಾ ಖಾತಿರ್ ವ್ಹಕಲ್ ಹಾತ್ ಜೊಡುನ್ ರಾವ್ಲ್ಲಿ,
ಬೆಸಾಂವಾ ಉಪ್ರಾಂತ್ ದೆಡ್ಯಾ ದೆಡಿಯಾಂ ಸಂಗಿ ರೊಸಾಕ್ ಬಸ್ಲ್ಲಿ."
ಅಜ್ಯಾಪ್ ಪಾವಾನಾಕಾತ್ ಹಿಯೀ ಏಕ್ ಕವಿತಾ.
ಆನಿಯೆಕ್ಲಿ ಕವಿಯಿತ್ರಿ ಆಪ್ಲ್ಯೆ ಕವಿತೆಂತ್ ಮ್ಹಾತಾರೆಕ್ ಜಿವೆಶಿಂ ಮಾರುಂಕ್ ವಯಾಗ್ರಾ ವಾಪಾರ್ತಾ:
"ಪ್ರಾಯೆಸ್ತ್ ಮ್ಹಾತಾರೆಕ್ ಜಾಗೊ ನಾ
ತರ್ನ್ಯಾಂ ಮಧೆಂ ಆವ್ಕಾಸ್ ನಾ
ದೆಕುನ್ ವಯಾಗ್ರಾಚಿ ಏಕ್ ಗುಳಿ ದೀವ್ನ್
ತಾಣಿ ಮ್ಹಾಕಾ ಸರ್ಗಾಕ್ ಧಾಡ್ಲಿ"
ಆನಿಯೆಕ್ಲೊ ಕೊಂಕ್ಣೆಂತ್ಲೊ ವ್ಹಡ್ ಕವಿ ಮ್ಹಣ್ ನಾಂವ್ ವೆಲ್ಲ್ಯಾಚೆಂ ಚುಟುಕ್(?):
"ಅಂತಾರಾಶ್ಟ್ರೀಯ್ ಹಂತಾರ್ ಕ್ರಿಕೆಟ್ ಖೆಳ್ಗಾಡಿ ತೊ ಬರೊ
ತಾಚ್ಯಾ ಶತಕಾನಿಮ್ತಿಂ ಪಂಗಡ್ ಆದ್ಲಿ ಟೆಸ್ಟ್ ಸೀರೀಸ್ ಜಿಕ್ಲೊ
ದೆಶಾಕ್ ಪಾಟಿಂ ಯೆತಾನಾ ತಾಕಾ ಅರ್ಪಿಲೊ ಫುಲಾಂ ತುರೊ
ಹೆ ಪಾವ್ಟಿಂ ತಾಚಿಂ ರನ್ನಾಂ ಉಣೆ ಉಣೆ ಆನಿ ಜೀರೊ
ಲೊಕಾಕ್ ನಿರಾಸ್, ಲೋಕ್ ಉಚಾಂಬಳ್ ಜಾವ್ನ್ ಭಿಗಡ್ಲೊ
ವಿಮಾನ್ ಥಳಾರ್ ಲೋಕ್ ಪುರ್ಪುರ್ಲೊ ಪಿಯೆವ್ನ್ ಸೊರೊ"
ವಯ್ರ್ ಕಾಣ್ಸಿಲ್ಲ್ಯಾ ವೊಳಿನಿಂ ಚಿಮ್ಟಿಭರ್ ಕಾವ್ಯೆಂ ಕೊಣ್ ತರಿ ದಾಕವ್ನ್ ದೀತ್ ತರ್ ಹಾಂವ್ ತಾಂಚ್ಯಾ ಪಾಂಯಾಂಕ್ಚ್ ಪಡ್ತಾಂ.
ಹ್ಯೊ ವೊಳಿ ಕಾಂಯ್ ಆಜ್ಕಾಲ್ ಬರಂವ್ಕ್ ಧರ್ಲ್ಲ್ಯಾಂಚೊ ನ್ಹಂಯ್. ಧಾಕ್ಡ್ಯಾಂಥಾವ್ನ್ ಬರಯ್ತೆ ಆಸ್ಲ್ಲ್ಯಾಂಚ್ಯೊ. ಕೇಸ್ ಪಿಕ್ಲ್ಲ್ಯಾ ಮಾಲ್ಘಡ್ಯಾಂಚ್ಯೊ. ಚಾರ್ ಗಾಂವ್ ಭಂವ್ಲ್ಲ್ಯಾಂಚ್ಯೊ. ಎಕ್-ದೋನ್ ಕವಿತಾ ಜಮೆ ಪರ್ಗಟ್ ಕೆಲ್ಲ್ಯಾಂಚ್ಯೊ. ಕೇಂದ್ರ ಅಕಾಡೆಮಿ ಪುರಸ್ಕಾರ್ ಜೊಡ್ಲ್ಲ್ಯಾಂಚ್ಯೊ. ಕೊಂಕ್ಣಿ ವೆದಿರ್ ಭಿರಾಂಕುಳ್ ಮಾನ್ ಜೊಡ್ತೆಲ್ಯಾಂಚ್ಯೊ.
ಅರೆ ಮಾನೆಸ್ತಾನೊಂ ಕಾವ್ಯೆಂ ಮ್ಹಳ್ಯಾರ್ ತುಮಿ ಕಿತೆಂ ಮ್ಹಣ್ ಚಿಂತ್ಲಾಂ? ಕಾವ್ಯೆಂ ಮ್ಹಳ್ಯಾರ್ ಭಿತರ್ಲಿ ಲಾಸ್. ಉತ್ರಾಂ ಪಾಕ್ಳ್ಯೊ ತರ್ ಪರ್ಮಳ್ ಆಸಾಜೆ. ಉತ್ರಾಂ ಕೆಂಡಾಂ ತರ್ ಧಾವ್ ಅಸಾಜೆ. ಹ್ಯಾ ಭುಂಯ್ತ್ ಮಾತ್ಯೆಕ್ ಸಯ್ತಿ ಪರ್ಮಳ್ ಆಸಾ; ರಾವ್ಲ್ಲ್ಯಾ ಉದ್ಕಾಕ್ ಸಯ್ತಿ ಊಬ್ ಆಸಾ. ಪೂಣ್ ಹ್ಯಾ ವೊಳಿನಿಂ ಕಿತೆಂ ಆಸಾ.. ಫಕತ್ತ್ ಕೊಂಕ್ಣಿ ಶೆಳೆಂಪಣ್.
ವಿಪರ್ಯಾಸ್ ಮ್ಹಳ್ಯಾರ್ ಅಸಲ್ಯೊ ಉತಳ್ ಕವಿತಾ ಕವಿತೆಚ್ಯಾ ಬರ್ಯಾ ಬರ್ಯಾ ಅಂಕಣಾಂನಿ ಫಾಯ್ಸ್ ಜಾತಾತ್. ತುಮ್ಚಿ ಕವಿತಾ ಫಾಯ್ಸ್ ಕರುಂಕ್ ಯೋಗ್ಯ್ ನ್ಹಂಯ್ ಮ್ಹಣ್ಚೆತಿತ್ಲಿ ಘಟಾಯ್ ಸಂಪಾದಕಾಂಕ್ ನಾ.. ದೆಕುನ್ಚ್ ಕೊಂಕ್ಣಿ ಸಾಯ್ಟಿನಿಂ ಅಸಲ್ಯಾ ಎಕಾ ಕವಿಚಿಂ 75 ಕವಿತಾ ಶಿಂಪ್ಡೊನ್ ಅಸಾತ್! ಉಪ್ರಾಂತ್ ಕಿತೆಂ ಜಾತಾ... ತೀಸ್-ಚಾಳೀಸ್ ಕವಿತಾ ಫಾಯ್ಸ್ ಜಾಲ್ಲ್ಯೊಚ್ ಹಾಂಕಾಂ ಬೂಕ್ ಕಾಡ್ಚಿ ತಾಳ್ಣಿಂ ಯೆತಾ. ಆಪ್ಣಾಕ್ ಕೆನ್ನಾಂಯ್ ಹೊಗಳ್ಸಿತೆಲ್ಯಾಂ ಥಾವ್ನ್ ಪ್ರಸ್ತಾವನ್ ಬರಂವ್ಕ್ ಲಾಯ್ತಾ. ಆನಿ ಅಸೊ ಬೂಕ್ ಭಾಯ್ರ್ ಯೆತಾ.. ಕೊಂಕ್ಣಿ ಕಾವ್ಯಾಚೊ ಭಂಗೊಸ್ತಳ್ ಜಾತಾ.
ಕಾವ್ಯೆಂ ಮ್ಹಳ್ಯಾರ್ ಜಿಬೆಚಿ ಖೊರೊಜ್ ಕಾಡ್ಚಿ ಬಾಜಾರಿ ಸ್ತ್ರೀಯೆಚಿ ಬೊಬಾಟ್ ನ್ಹಂಯ್... ವಾ ಪಾದ್ರಿಚೊ ಶೆರ್ಮಾಂವ್ ಯಿ ನ್ಹಂಯ್.. ಬಗಾರ್ ಅಂತಸ್ಕರ್ನಾಚೆಂ ಉಲವ್ಣೆಂ. ಆಪ್ಲ್ಯಾಚ್ ಅಂತಸ್ಕರ್ನಾಚಿ ಭೆಟ್ ಜಾಯ್ಜೆ ಜಾಲ್ಯಾರ್ ಜಾಯ್ತೆ ಆಟೆವಿಟೆ ಸೊಸಿಜಯ್ ಪಡ್ತಾತ್. ಉಪ್ರಾಂತ್ ತರಿ ಉಲವ್ಣೆಂ ಕಾಂಯ್ ಸಲೀಸ್ ನಾ. ಎಕೇಕಾ ಸಬ್ದಾಕ್ ಅರ್ಥ್, ಆವಾಜ್ ಅಶೆಂ ತಾಚೆಚ್ ಮ್ಹಳ್ಳೆ ಗೂಣ್ ಅಸಾತ್; ಹರ್ಯೆಕಾ ಸಬ್ದಾಕ್ಯಿ ತಾಚಿಚ್ ಮ್ಹಳ್ಳಿ ಜೀಣ್ ಆಸಾ.
"ವಿಗ್ಯಾನ್ ಜಾಂಕಾಂ ಜೆ ಕೋಣ್ ನೆಣಾಂತ್; ಕಾವ್ಯೆಂ ಜಾಂಕಾಂ ಜೆ ಕೋಣ್ ಜಣಾಂತ್" ಅಶೆಂ ಮ್ಹಣ್ತಾ ಜೋಸೆಫ್ ರೂಕ್ಸ್.
"ಆಪುಟ್ (ಕೃತಕ್ ನ್ಹಂಯ್ ಆಸ್ಚೆಂ) ಕಾವ್ಯೆಂ ಸಮ್ಜಂವ್ಚೆ ಆದಿಂಚ್ ಉಲಂವ್ಕ್ ಸಕ್ತಾ" ಅಶೆಂ ಮ್ಹಣ್ತಾ ಟಿ.ಎಸ್. ಎಲಿಯಟ್.
ಲಿಯೊನಾರ್ಡ್ ಕೊಹೆನ್ ಹಾಚ್ಯಾ ಪರ್ಮಾಣೆ: ಕಾವ್ಯೆಂ ಜಿಣಿಯೆಚಿ ಸಾಕ್ಸ್. ಜರ್ ತುಜಿ ಜೀಣ್ ಬರಿಚ್ ಲಾಸೊನ್ ಆಸಾ ತರ್ ಕಾವ್ಯೆಂ ಫಕತ್ ಗೊಬೊರ್!
"ಉತ್ರಾಂಚ್ಯಾ ಆವ್ರಾ ಪ್ರಾಸ್
ಥೆಂಬೊ ಆರ್ಥ್ ಊಂಚ್"
ಲಂಕೆಶಾಚ್ಯಾ ’ನೀಲು’ ಕಾವ್ಯಾ ಸಾಗೊರಾಂತ್ಲೊ ಏಕ್ ಥೆಂಬೊ ಹೊ.
ಕಾವ್ಯೆಂ ಅಸ್ತಾ ಫಕತ್ ಉತ್ರಾಂನಿ ನ್ಹಂಯ್ ಬಗಾರ್ ಉತ್ರಾಂ ಮಧ್ಲ್ಯಾ ಸಂಬಂಧಾಂತ್.
ಹ್ಯಾ ಸರ್ವ್ ಅನಾಹುತಾಂಕ್ ಕಾರಾಣ್ ವಿಮರ್ಶಾಕಾಚಿ ಗಯ್ರಿ ಹಾಜ್ರಿ. ಕೊಂಕ್ಣೆಂತ್ ಏಕ್ಯಿ ಖಡಕ್ಕ್ ವಿಮರ್ಶಕ್ ನಾ. ದೆಕುನ್ಂಚ್ ಪ್ರಭಾವ್ಭರಿತ್ ಸಾಹಿತ್ಯಿ ಬೋವ್ ಉಣೆಂ. ಕೊಂಕ್ಣಿ ಕಾವ್ಯಾಚೊ ಫುಡಾರ್ ಬರೊ ಜಾಯ್ಜೆ ತರ್ ಮಾಲ್ಘಡ್ಯಾ ಕವಿನಿಂ ಪಯ್ಲೆಂ ಆಪ್ಲಿ ಜವಾಬ್ದಾರಿ ಪಾಳಿಜೆ. ಪಾಳ್ಚೆ ಆದಿಂ ಆಪ್ಲಿ ಜವಾಬ್ದಾರಿ ಕಿತೆಂ ಮ್ಹಣ್ ಸಮ್ಜಜೆ. ಆತಾಂ ಬರಂವ್ಕ್ ಸುರ್ವಾತುಂಚ್ಯಾ ನವ್ಯಾಂಚೆ ದಿಶ್ಟೆಂತ್ ತುಮಿ ಮ್ಹಾನ್ ಕವಿ. ತುಮಿಂಚ್ ಅಸಲೆಂ ಪಾತಳ್ ಉತ್ರಾಂಚಿಂ ಉತಳ್ ಕವಿತಾ ಬರವ್ನ್ ಬೂಕ್ ಕಾಡ್ಶ್ಯಾತ್ ತರ್ ತಿಂ ತುಮ್ಚೆಪ್ರಾಸ್ ಪಾಸ್ಟ್ ಲಿಕ್ತೆಲಿಂ. ದೆಕುನ್ ಸರ್ವಾಂನಿ ಆಪ್ಲೆಂ ಸಾಹಿತ್ ಹೆರ್ ಭಾಶೆಂಚ್ಯಾ ಸಾಹಿತ್ಯಾಸವೆಂ ತುಲನ್ ಕರುನ್ ಅತ್ಮ್ಯಾ ವಿಮರ್ಸೊ ಕರ್ಚೊ ಬರೊ. ಕಿತ್ಯಾಕ್ ಮ್ಹಳ್ಯಾರ್ ಹೆರಾನಿಂ ವಿಮರ್ಸೊ ಕೆಲ್ಯಾರ್ ತುಮ್ಕಾಂ ರಾಗ್ ಯೆತಾ. ಕೊಂಕ್ಣೆಚ್ಯಾ ಅತ್ಮೀಕ್ ಭಲಾಯ್ಕೆಕ್ ಯಿ ಹೆಂ ಬೋವ್ ಬರೆಂ.
ಆಖೆರ್ ಕರ್ಚ್ಯಾ ಆದಿಂ ಚಾಫ್ರಾಚ್ಯಾ ಕವಿತೆಚೊ ಎಕ್ ಕುಡ್ಕೊ ಮಾತ್ಸೊ ಬದ್ಲುನ್ ಅಸೊ ಲಿಕ್ತಾಂ.... ಕಾಂಯ್ ಮೆಲ್ಲೊ ಕವಿ ಜಿವಂತ್ ಉಟತ್ ಮ್ಹಳ್ಳ್ಯಾ ಪಾತ್ಯೆಣೆನ್.
"ಹ್ಯಾ ಪಾರ್ತೇನಿಯಂ ರಾನಾ ಮಧೆಂ
ಉತಳ್ ಉತ್ರಾಂ ಪಾನಾಂ ಮಧೆಂ
ವೆದಿರ್ ವಿಕ್ಚ್ಯಾ ಮಾನಾ ಮಧೆಂ
ಖಂಯ್ ಪುರ್ಲಾ ಕವಿಕ್...
ಸಾಂಗಾ
ಖಂಯ್ ಪುರ್ಲಾ ಕವಿಕ್?"
ವಿಮರ್ಸೊ: ಹೊ ವಿಮರ್ಸೊ ಕೊಣಾಯ್ಚೆರ್ ವಯಕ್ತಿಕ್ ಧ್ವೇಶಾನ್ ಜಾಂವ್ ರಾಗಾನ್ ಜಾಂವ್ ಬರಯಿಲ್ಲೊ ನ್ಹಂಯ್. ಕೊಂಕ್ಣಿ ಸಾಹಿತ್ಯಾಚ್ಯಾ ವ್ಹಾಡಾವಳೆಚ್ಯಾ ನದ್ರೆನ್ ಲಿಖ್ಲಾ. ಹಾಚೆರ್ ವಾ ಕೊಂಕ್ಣಿ ಕವಿತಾ/ವಿಮರ್ಶ್ಯಾಂಚೆರ್ ಕೊಣೆಂಯ್ ಅಪ್ಲಿ ಅಭಿಪ್ರಾಯ್ ಉಚಾರ್ಯೆತಾ, ಪುಣ್ ದಯಕರುನ್ ಖಂಚ್ಯಾಯ್ ರಿತಿನ್ ವೆಕ್ತಿಚೆರ್ ಕೇದ್ ಉಡಂವ್ಚಿಂ, ವಾ ಹಲ್ಕ್ ಕರ್ಚ್ಯಾ ಇರಾದ್ಯಾಚಿಂ ವಾ ಅಪುಣ್ ಬುಧ್ವಂತ್ ಮ್ಹಣ್ ಶೆಂಕಾರೆಂ ಫುಲಂವ್ಚ್ಯಾ ಇರಾದ್ಯಾಚಿಂ ಬರ್ಪಾಂ ಆಮಿಂ ಪರ್ಗಟ್ ಕರ್ಚಿಂ ನಾಂವ್. ಅನ್ಯೇಕ್ ಪ್ರಮುಖ್ - ಮಹಾನ್ ಸಾಹಿತಿ ವಾ ನವೆ, ಸರ್ವಾಂಕ್ ಎಕಾಚ್ಚ್ ರಿತಿಚೊ ಮಾನ್ ಮೆಳ್ತಲೊ. - ಸಂ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications