ಆಂಡ್ರ್ಯೂಚ್ಯಾ ಉಜ್ವಾಡಾಚ್ಯೆ ವೆಂಗೆಂತ್ಲ್ಯಾ ಪ್ರೇಮ್ ಪತ್ರಾಂಚಿ ಆಧ್ಯಾತ್ಮಿಕತಾ
ದೇವ್ ಬೊರೊ ದೀಸ್ ದಿಂವ್ ತುಮ್ಕಾಂ ಸಮೆಸ್ತಾಂಕ್,
ಹಾಂಗಾ ಆಜ್ ಚಲೊನ್ ಆಸ್ಚ್ಯಾ ’ಕೊಂಕಣೆಂತ್ಲ್ಯೊ ಆಧ್ಯಾತ್ಮಿಕ್ ಕವಿತಾ’ ವಯ್ರ್ ರಾಷ್ಟ್ರೀಯ್ ಪರಿಸಂವಾದಾಂತ್ ಹಾಂವ್ ಕ್ಲೆರೆನ್ಸ್ ಫೆರ್ನಾಂಡಿಸ್, ಕವಿ ಆಂಡ್ರ್ಯೂ ಎಲ್ ಡಿ’ಕುನ್ಹಾ ಹಾಚ್ಯಾ ಕವಿತೆಂತ್ ಪ್ರತಿಫಲಿತ್ ಜಾಂವ್ಚ್ಯಾ ಆಧ್ಯಾತ್ಮಿಕ್ ವಿಶಯಾಂ ವಯ್ರ್ ಥೊಡೊ ಉಜ್ವಾಡ್ ಫಾಂಕೊಂವ್ಕ್ ಹಾಂಗಾಸಾರ್ ತುಮ್ಚೆ ಸಮೊರ್ ಉಬೊ ಆಸಾಂ.
ಆದ್ಯಾತ್ಮಿಕ್ ಕವಿತೆಂ ವಯ್ರ್ ಉಲೊಂವ್ಚ್ಯಾ ಪಯ್ಲೆಂ ಆಧ್ಯಾತ್ಮಿಕತಾಂತ್ ಕಿತೆಂ ಆಟಾಪುನ್ ಆಸಾ ತೆಂ ಜಾಣಾಂ ಜಾಂವ್ಚೆಂ ಗರ್ಜೆಚೆಂ. ತ್ಯಾ ದೆಕುನ್ ಹಾವೆಂ ಮ್ಹಜ್ಯಾ ಚಿಂತ್ಪಾ ಪ್ರಕಾರ್ ಆಶೆ ಭಾಗ್ ಕೆಲ್ಯಾ.
1. ಸಾಹಿತ್ಯಾಂತ್ ಆಧ್ಯಾತ್ಮಿಕತಾ
2. ಧರ್ಮ್ ಆನಿ ಆಧ್ಯಾತ್ಮಿಕತಾ ಮದ್ಲೊ ವ್ಯತ್ಯಾಸ್
3. ಕವಿತೆಂಚಿ ಸಕತ್
ಆತಾಂ ಪಯ್ಲೆಂ ಸಾಹಿತ್ಯಾಂತ್ ಆಧ್ಯಾತ್ಮಿಕತಾ ಹಾಚೆ ವಯ್ರ್ ಉಜ್ವಾಡ್ ಘಾಲ್ಚೆಂ ಪ್ರಯತ್ನ್ ಕರ್ತಾಂ.
ಸಾಹಿತ್ಯ್ ಮನ್ಶ್ಯಾಂಚ್ಯಾ ಆಂತರಿಕ್ ಜೀವನಾಚೆಂ ಪ್ರತಿಬಿಂಬ್ ತಶೆಂ ಜಾವ್ನಾಸಾ. ತಾಂತುಂ ವ್ಯಕ್ತ್ ಜಾಂವ್ಚಿ ಆಧ್ಯಾತ್ಮಿಕತಾ ಮನ್ಶಾಚೆಂ ಆಧ್ಯಾತ್ಮಿಕ್ ಪಯ್ಣ್, ಜಿವಿತಾಚೊ ಆರ್ಥ್ ಆನಿ ಸತಾಚ್ಯಾ ಸೊದ್ನೆಕ್ ಆಮ್ಚ್ಯಾ ಮುಕಾರ್ ದವರ್ತಾ. ಆಧ್ಯಾತ್ಮಿಕತೆ ಮುಳ್ಳ್ಯಾರ್ ಕೇವಲ್ ಧರ್ಮ್ ಆನಿ ಧಾರ್ಮಿಕ್ ಕಾರ್ಯಾಂಕ್ ಸಿಮಿತ್ ನ್ಹಯ್. ಬಗಾರ್ ಮನ್ಶಾಚ್ಯಾ ಭಿತರ್ಲ್ಯಾ ಮನಾಂತ್ ಜಾಂವ್ಚೆಂ ಆತ್ಮ್ ಪರಿಶಿಲನ್, ಮಾನವಿಯ್ ಮೌಲ್ಯಾಂಚಿ ಜಾಣ್ವಾಯ್ ಆನಿ ಜಿವಿತಾಂತ್ ಉತ್ತುಂಗಾಕ್ ಪಾಂವ್ಚ್ಯಾ ಶೆವೊಟಾಚೆಂ ಪಯ್ಣ್ ಜಾವ್ನಾಸಾ.
ಕವಿತಾ, ಕಾದಂಬರಿ, ಕಾಣಿಯೊ ಆನಿ ನಾಟಕಾಂ ಮಾರಿಫಾತ್ ಲೇಖಕಾಂನಿ ಮನಿಸ್ ಆನಿ ದೆವಾ ಮದ್ಲ್ಯಾ ಸಂಬಂದಾಕ್ ಭೊವ್ ಬೊರ್ಯಾ ರಿತಿನ್ ಪ್ರಸ್ತುತ್ ಕೆಲಾಂ. ದು:ಖ್, ತ್ಯಾಗ್, ಭಗ್ಸಾಣೆಂ, ಪಶ್ಚಾತ್ತಾಪ್, ಸುಟ್ಕಾ ಹೆ ವಿಶಯ್ ಆಧ್ಯಾತ್ಮಿಕ್ ಸಾಹಿತ್ಯಾಚೆ ಪ್ರಮುಖ್ ಆಂಗ್ ಜಾವ್ನಾಸಾತ್. ಹಾಚೆ ಮುಖಾಂತ್ರ್ ಮನಿಸ್ ಆಪ್ಲ್ಯಾ ಆಸ್ಕತ್ಕಾಯೆಂಕ್ ಸಮ್ಜೊನ್ ಆಪ್ಣಾ ಭಿತರ್ಲೆಂ ಬಳ್ ವ್ಹಳ್ಕೊನ್ ಘೆಂವ್ಕ್ ಸಕ್ತಾ.
ಸಾಹಿತ್ಯಾಂತ್ ಪ್ರಕೃತಿ, ಉಜ್ವಾಡ್, ಕಾಳೊಕ್, ಪಯ್ಣ್, ಮೌನ್ ಆನಿ ಹೆರ್ ಗುರ್ತಾಂ ಮುಖಾಂತ್ರ್ ಆಧ್ಯಾತ್ಮಿಕ್ ಆರ್ಥ್ ವ್ಯಕ್ತ್ ಕರ್ತಾತ್. ಹೆ ಗುರ್ತ್ ವಾಚ್ಪ್ಯಾಕ್ ಆಂತರಿಕ್ ನಿಯಾಳ್ ಕರುಂಕ್ ಲಾಯ್ತಾತ್. ಸಾಂಗಾತಾಚ್ ಆಧ್ಯಾತ್ಮಿಕತಾ ಸಾಮಾಜಿಕ್ ಆನ್ಯಾಯ್, ಹಿಂಸಾ ಆನಿ ಅಸಮಾನತೆಚ್ಯಾ ವಿರುದ್ಧ್ ಆವಾಜ್ ಜಾವ್ನ್ ಸಯ್ತ್ ಸಾಹಿತ್ಯಾಂತ್ ಝಳ್ಕತಾ. ಸಾಹಿತ್ಯಾಂತ್ ಆಸ್ಚಿ ಆಧ್ಯಾತ್ಮಿಕತಾ ವಾಚ್ಪ್ಯಾಚ್ಯಾ ಮನಾಕ್ ಶಾಂತಿ ದಿಂವ್ಚ್ಯಾ ಸಾಂಗಾತಾ ದಯಾಳಾಯ್, ಸಹಾನುಭೂತಿ (Empathy), ಜವಾಭ್ಧಾರಿಚ್ಯಾ ಜೀವನಾಕ್ ಸ್ಫೂರ್ತಿ ದಿತಾ. ಹ್ಯಾ ಮುಖಾಂತ್ರ್ ಆಧ್ಯಾತ್ಮಿಕತೆನ್ ಭರ್ಲಲೆಂ ಸಾಹಿತ್ಯ್ ಮನ್ಶಾಕ್ ಸುಸಂಸ್ಕೃತ್, ದಯಾಳಾಯೆಚೊ ಆನಿ ಆಮೊಲಿಕ್ ವ್ಯಕ್ತಿ ಜಾವ್ನ್ ರೂಪಿತ್ ಕರ್ಚಿ ಜವಾಭ್ದಾರಿ ಘೆತಾ.
ಆಧ್ಯಾತ್ಮಿಕ್ ಸಾಹಿತ್ಯಾಂತ್ ಸಾರ್ವತ್ರಿಕ್ ಆನಿ ಕಾಲಾತೀತ್ ಮುಳ್ಳೆ ದೋನ್ ಶಭ್ದ್ ತ್ಯಾ ಸಾಹಿತ್ಯಾಂತ್ಲೆ ವಿಶಯ್ ಆನಿ ಸಂದೇಶಾಚೆಂ ಶಾಸ್ವತ್ ತಶೆಂಚ್ ಸಂಪೂರ್ಣ್ ಸ್ವಭಾವಾಕ್ ದಾಕೋವ್ನ್ ದಿತಾತ್. ಆಸಲೆಂ ಸಾಹಿತ್ಯ್ ಸಂಸ್ಕೃತಿ, ಧರ್ಮ್, ಭಾಸ್, ಎಕ್ ಕಾಳಾಚ್ಯೊ ಗಡಿ ಮಿಕ್ವೊನ್ ಸಮೇಸ್ತ್ ಮನ್ಶಾಕುಳಾಚ್ಯಾ ಆನ್ಭೊಗಾಂಕ್ ಶೀದಾ ಸ್ಪರ್ಶ್ ಕರ್ತಾ. ಮೋಗ್, ದಯಾಳಾಯ್, ಸತ್, ಭೊಗ್ಸಾಣೆ, ದೂಖ್ ಆನಿ ಜಿವಿತಾಚ್ಯಾ ಆರ್ಥಚಿಂ ಸೊದ್ನಾಂ ಹೆ ವಿಶಯ್ ಹರ್ಯೆಕ್ ಪಿಳ್ಗೆಕ್ ಸಂಬಂದ್ ಜಾಲ್ಲೆ ಜಾವ್ನಾಸಾತ್. ಹೆ ಆಧ್ಯಾತ್ಮಿಕ್ ವಿಚಾರ್ ಮನ್ಶಾ ಜಿವಿತಾಚೆ ಮುಳಾವೆ ಆಂಶ್ ಜಾಲ್ಲ್ಯಾ ವರ್ವಿಂ ತ್ಯಾ ವಿಶಯಾಂಕ್ ಉಜ್ವಾಡಾಕ್ ಹಾಡ್ಚೆಂ ಸಾಹಿತ್ಯ್ ಕೆದ್ನಾಂಚ್ ಆಪ್ಲ್ಯಾ ಪ್ರಾಸಂಗಿಕತಾಕ್ (Relevance) ಹೊಗ್ಡಾವ್ನ್ ಘೆನಾ. ಶತಮಾನಾಚ್ಯಾ ಶತಮಾನಾಂ ಥಾವ್ನ್ ಆಧ್ಯಾತ್ಮಿಕ್ ಬರ್ಪಾಂ ಮನ್ಶಾ ಕುಳಾಕ್ ಮಾರ್ಗದರ್ಶನ್, ಸುಶೆಗ್ ಆನಿ ಪ್ರೇರಣ್ ದಿವ್ನ್ ಆಯ್ಲ್ಯಾಂತ್ ಮಾತ್ರ್ ನ್ಹಯ್ ಆಸ್ತಾಂ ತಾಂತ್ಲೊ ಸಂದೇಶ್ ಶಾಸ್ವತ್ ಆನಿ ಸರ್ವಾಂಕ್ ಆನ್ವಯ್ ಜಾಂವ್ಚ್ಯಾ ಬರಿ ಪರಿಣಾಮ್ ಘಾಲಾ.
ಹ್ಯಾ ಆಧ್ಯಾತ್ಮಿಕ್ ಕವಿತಾ ಶೆತಾಂತ್ ಆಂತರಾಷ್ಟ್ರೀಯ್ ಮಟ್ಟಾರ್ ಪರ್ಶಿಯನ್ ಕವಿ ರುಮಿ, ಲಂಡನ್ಚೊ ವಿಲಿಯಮ್ ಬ್ಲೇಕ್, ಆಮೇರಿಕಾಚಿ ಎಮಿಲಿ ಡಿಕಿನ್ಸನ್, ಆಮೇರಿಕಾಚಿ ಮೇರಿ ಒಲಿವರ್, ಲೇಬನಾನ್ಚೊ ಖಲಿಲ್ ಗಿಬ್ರಾನ್ ಹಾಣಿಂ ನಾಂವ್ ವೆಲಾಂ ತರ್ ಆಮ್ಚ್ಯಾ ಭಾರತಾಂತ್ ರಬಿಂದ್ರನಾಥ್ ಟಾಗೋರ್, ಕಬೀರ್, ಮೀರಾಬಾಯ್, ಸಂತ ತುಕಾರಾಮ್, ಆರೊಬಿಂದೊ ಹಾಣಿಂ ನಾಂವ್ ವೆಲಾಂ.
ಆಧ್ಯಾತ್ಮಿಕ್ ಕವಿತಾ ಧರ್ಮ್ ಆನಿ ಆಧ್ಯಾತ್ಮಿಕತಾಚ್ಯಾ ಭಂವಾರಿಚ್ ಭಂವ್ತಾತ್ ತರ್ ತಾಂಚೆ ಮದ್ಲೊ ವ್ಯತ್ಯಾಸ್ ಕಸಲೊ?
ಧರ್ಮ್ ಎಕ್ ನಿರ್ದಿಷ್ಟ್ ಪಾತ್ಯೆಣಿ, ಆಚರಣ್, ಕಾಯ್ದೆ ಆನಿ ಸಂಪ್ರದಾಯಾಂಚೆಂ ಮಿಲನ್ ಜಾವ್ನಾಸಾ. ಹಾಂತುಂ ಚಡ್ತಿಕ್ ಜಾವ್ನ್ ಎಕ್ ಸಂಘಟಿತ್ ಪದ್ದತ್ ಆಸ್ತಾ. ದೀವ್ಳಾಂ, ಇಗರ್ಜ್ಯೊ, ಮಸ್ಜಿದ್ಯೊ ಆನಿ ಹೆರ್ ಧಾರ್ಮಿಕ್ ಸಂಸ್ಥ್ಯೊ, ಮಾಗ್ಣಿಂ, ರಜಾರಾಂ, ಫೆಸ್ತಾಂ, ಆಮ್ಚೆ ಗ್ರಂಥ್, ಆಮ್ಚೆ ಧಾರ್ಮಿಕ್ ಮುಖೆಲಿ ಧರ್ಮಾಚೆ ಆಂಗ್ ಜಾವ್ನಾಸ್ತಾತ್. ಧರ್ಮ್ ಎಕಾ ವ್ಯಕ್ತಿಕ್ ಸಾಮಾಜಿಕ್ ವ್ಹಳೊಕ್ ಆನಿ ಜೀವನಾಂತ್ ಶಿಸ್ತ್ ದೀಂವ್ಕ್ ಸಕ್ತಾ ತರ್ ಆಧ್ಯಾತ್ಮಿಕತಾ ಎಕಾ ವ್ಯಕ್ತಿ ಭಿತರ್ಲೆಂ ಆತ್ಮ್ ಜ್ಞಾನ್, ಆತ್ಮ್ ಶಾಂತಿ ಆನಿ ಪರಮ್ ಸತಾಚಿಂ ಸೊದ್ನಾಂ ಜಾವ್ನಾಸಾ. ಹೆಂ ಖಂಚಾಯ್ ನಿರ್ದಿಷ್ಟ್ ಧರ್ಮಾಕ್ ಸಿಮೀತ್ ಜಾಯ್ಜೆ ಮ್ಹಣೊನ್ ನಾ. ದೆವಾ ಸಾಂಗಾತಾ ಹ್ಯಾ ಜೀವನಾಚ್ಯಾ ಶೆವೊಟಾ ಸಾಂಗಾತಾ ಎಕಾ ವ್ಯಕ್ತಿಕ್ ಆಸ್ಚೊ ವೈಯುಕ್ತಿಕ್ ಸಂಬಂದ್ಚ್ ಆದ್ಯಾತ್ಮ್ ಆಶೆಂ ಹಾಂವ್ ಭರ್ವಾಸ್ತಾಂ. ಧ್ಯಾನ್, ಆತ್ಮ್ ಪರಿಶಿಲನ್, ಮೋಗ್, ಮಯ್ಪಾಸ್ ಆನಿ ಸೆವೆಚೊ ಮನೋಭಾವ್ ಆಧ್ಯಾತ್ಮಿಕತೆಚೆ ಪ್ರಮುಖ್ ಆಂಶ್ ಆಶೆಂ ಮ್ಹಜಿ ಪಾತ್ಯೆಣಿ. ಮೊಟ್ವ್ಯಾನ್ ಸಾಂಗೊಂ ತರ್ ಧರ್ಮ್ ಆನಿ ಆಧ್ಯಾತ್ಮಿಕಾತಾ ದೊನೀ ಮಾನವ್ ಜೀವನಾಕ್ ಉತ್ತೀಮ್ ಕರುಂಕ್ ಆಸ್ಚೆ ರಸ್ತೆ. ಧರ್ಮ್ ವಾಟ್ ದಾಕಯ್ತಾ ತರ್ ಆಧ್ಯಾತ್ಮಿಕತಾ ತ್ಯಾ ವಾಟೆನ್ ಚಲ್ಚ್ಯಾ ಆನ್ಭೊಗಾಚೊ ರಸ್ತೊ ಆನಿಕೀ ಗುಂಡಾಯ್ ಕರ್ತಾ. ಪುಣ್ ಆಮ್ಚೆಂ ದುರಾದೃಷ್ಟ್ ಮ್ಹಳ್ಳ್ಯಾರ್ ಸಂಸಾರಾಂತ್ಲ್ಯಾ ಭಾಯ್ಲ್ಯಾ ದಾಕೊವ್ಣೆಕ್ ಪಟ್ವೊನ್ ಪಡ್ಲೊ ಶಿವಾಯ್ ಆಧ್ಯಾತ್ಮಿಕ್ ಸಕ್ತೆಕ್ ಸಮ್ಜೊಂಕ್ ಗೆಲ್ಲೊಚ್ ನಾ ವಾ ಗೆಲ್ಲೆ ಭೊವ್ ಉಣೆ.
ಕವಿತೆಂಚಿ ಸಕತ್:
ಸಾಹಿತ್ಯ್ ಎಕ್ ವಿಸ್ತಾರ್ ಕ್ಷೇತ್ರ್ ವ್ಹಯ್ ತರೀ, ತಾಂತ್ಲ್ಯಾ ಕವಿತಾ ಶೆತಾಂತ್ ಜಾಲ್ಲ್ಯಾ ವಾವ್ರಾ ವಯ್ರ್ ದೀಷ್ಟ್ ಮಾರ್ಲ್ಯಾರ್ ಹ್ಯಾ ಶೆತಾಂತ್ ಜಾಂವ್ಕ್ ಜಾಯ್ ಆಸ್ಲ್ಲಿಂ ಕಾಮಾಂ ಜಾಯ್ತಿಂ ಆಸಾತ್. ಕವಿತೆ ಮುಳ್ಯಾರ್ ಕೇವಲ್ ಬರ್ಪಾಚೆಂ ಏಕ್ ವಿಧಾನ್ ನ್ಹಯ್. ಕವಿತಾ ಏಕ್ ಕಾಳ್ಜಾಕ್ ಆಪ್ಟೊಂಚಿ ಆವ್ಯಕ್ತ್ ಸಕತ್. ಥೊಡ್ಯಾಚ್ ತರೀ ಜಾಗ್ರುತ್ಕಾಯೆನ್ ವಿಂಚ್ಲ್ಲ್ಯಾ ಉತ್ರಾಂ ಮಾರಿಫಾತ್ ಕವಿತಾ ಎಕ್ಲ್ಯಾಚ್ಯಾ ಭಗ್ಣಾಂಕ್ ಬಳಿಷ್ಟ್ ರಿತಿನ್ ವಿವರ್ಸುಂಕ್ ಸಕ್ತಾ ಜಿ ಸಾದ್ಯಾ ಭಾಶೆನ್ ವರ್ಣುಂಕ್ ಆಸಾಧ್ಯ್ ತಶೆಂ ಜಾಲಾಂ. ಕವಿತಾ ಘಾಯಾಂಕ್ ಗೂಣ್ ಕರ್ಚಿ, ಭರ್ವಾಶ್ಯಾಕ್ ಜಾಗೊಂವ್ಚಿ ಆನಿ ಮೌನಾಂತ್ ಆವಾಜ್ ದಿಂವ್ಚಿ ವಿಶೇಷ್ ಸಕತ್ ಘೇವ್ನ್ ಆಸಾ. ಕವಿತಾ ಜಿವಿತಾಕ್ ತಾಚ್ಯಾ ನೈಜ್ ರುಪಾಂತ್ ಧರ್ನ್ ಬಸ್ತಾ. ಮೋಗ್ ಆನಿ ನಷ್ಟ್, ಸಂತೊಸ್ ಆನಿ ದೂಖ್, ಪಾತ್ಯೆಣಿ ಅನಿ ದುಭಾವ್ ಹಾಕಾ ಸರ್ವ್ ಬಳಿಷ್ಟ್ ರಿತಿನ್ ಉಗ್ತೆಂ ಕರ್ತಾ. ಕವಿತಾ ಆನ್ಯಾಯಾಕ್ ಸವಾಲಾಂ ವಿಚಾರುಂಕ್ ಸಕ್ತಾ, ಬದ್ಲಾವಣೆಕ್ ಪ್ರೇರಣ್ ದಿತಾ ತಶೆಂಚ್ ಪಿಳ್ಗ್ಯಾಂಚ್ಯಾ ಪಿಳ್ಗ್ಯಾಂ ಥಾವ್ನ್ ಸಂಸ್ಕೃತಿ ಆನಿ ಉಗ್ಡಾಸಾಚೆಂ ಸಂರಕ್ಷಣ್ ಕರ್ತಾ. ಕವಿತಾ ಮಟ್ವೆಂ ಆಸೊಂಕ್ ಪುರೊ ಪುಣ್ ತಾಚೊ ಪ್ರಭಾವ್ ಜೀವನ್ ಪರ್ಯಾಂತ್ ಉರ್ಚೆ ತಸಲೊ ಜಾವ್ನಾಸಾ.
ಕವಿತಾ ಆವ್ಯವಸ್ಥೆಚ್ಯಾ ಘಡಿಯಾಂನಿ ಸ್ಪಷ್ಟತೆಕ್ ಹಾಡ್ತಾ. ದುಖಾಂಚ್ಯಾ ಘಡಿಯಾಂನಿ ಸುಶೇಗ್ ದಿತಾ. ಸಾದ್ಯಾ ದೈನಿಕ್ ಜಿವನಾಂತ್ ಸಯ್ತ್ ಕವಿತಾ, ಸೊಭಾಯ್, ಆಭಿಪ್ರಾಯ್ ಆನಿ ಮನ್ಶಪಣಾಚೊ ಉಗ್ಡಾಸ್ ಹಾಡ್ತಾ. ಹೆಂಚ್ ಕವಿತೆಚೆಂ ನೈಜ್ ಬಳ್. ಉತ್ರಾಂಕ್ ಭಗ್ಣಾಂತಿ ಬದ್ಲುನ್ ಭಗ್ಣಾಂಕ್ ಶಾಸ್ವತ್ ಸತ್ ಜಾವ್ನ್ ಬದ್ಲಿತಾ.
ಹೆಂ ಹಾವೆಂ ಇತ್ಲೆಂ ಸಾಂಗೊಂಕ್ ಮುಖ್ಯ್ ಕಾರಣ್ ಆತಾಂ ಮುಕಾರ್ ಹಾವೆಂ ವಿಂಚುನ್ ಕಾಡ್ಲ್ಲ್ಯಾ ಕವಿತೆಂಚೊ ಘಡ್ಣಾರ್ ಆನಿ ಪೊಸ್ಣಾರ್ ಕವಿ ಆಂಡ್ರ್ಯೂ ಎಲ್. ಡಿ ಕುನ್ಹಾ . ಕಾಂಯ್ 20 ವರ್ಸಾಂ ಪಯ್ಲೆಂ ತಾಚಿ ಬಾಂಯ್, ಬಾಬಾಚ್ಯೊ ವ್ಹೊಳಿ ಕವಿತಾ ವಾಚ್ತಾನಾ ಮ್ಹಾಕಾ Physical ಬಾಂಯ್ ಆನಿ ವ್ಹೊಳಿ ದಿಸ್ಲ್ಯೊ ಶಿವಾಯ್ ತಾಂತ್ಲಿ ಆಧ್ಯಾತ್ಮಿಕಾ ಮ್ಹಾಕಾ ದಿಸೊಂಕ್ ನಾ. ಹಾವೆಂ ಕೆದ್ನಾಂಯ್ ಸಾಂಗ್ಚೆಂ ಆಂಡ್ರ್ಯೂ ಎಕ್ ಖಾಲ್ತೊ ಆಲ್ತಾರ್ ಭುರ್ಗ್ಯಾ ಪರಿ ಮ್ಹಣೊನ್ ಕಿತ್ಯಾಕ್ ಮುಳ್ಳ್ಯಾರ್ ತಾಕಾ ರಾಗ್ ಆನಿ ಮೊಸೊರ್ ಕಿತೆಂ ಮ್ಹಣೊನ್ಚ್ ಕಳಿತ್ ನಾ. ರಾಗಾನ್ ಸಾಂಗೊಂಕ್ ಆಸ್ಲ್ಯಾರಿ ಥಂಯ್ ಮೋಗ್ ಆನಿ ಮಯ್ಪಾಸ್ಚ್ ಝಳ್ಕತಾ. ಹೊ ಹಾವೆಂ ಪಳೆಲ್ಲೊ ಆಂಡ್ರ್ಯೂ. ಮ್ಹಾಕಾ ಕೆದಾಳಾಯ್ ದೂಖ್ ಭಗ್ಲ್ಯಾರ್ ಯ್ಯಾ ಸಮಸ್ಯಾಂಕ್ ಪರಿಹಾರ್ ಮೆಳಾನಾತ್ಲ್ಲ್ಯಾ ವೆಳಾರ್ ಎಕ್ಚ್ ಇಗರ್ಜೆಂತ್ ಎಕ್ಸುರೊ ಬಸೊನ್ ಮಾಗ್ಣೆಂ ಕರ್ತಾಂ ಯ್ಯಾ ಆಂಡ್ರ್ಯೂಕ್ ಫೊನ್ ಕರ್ನ್ ಥೊಡೊ ವೇಳ್ ಉಲಾಯ್ತಾಂ. ಚಡ್ತಿಕ್ ಜಾವ್ನ್ ಮ್ಹಜ್ಯಾ ಸಮಸ್ಯಾಂಕ್ ಪರಿಹಾರ್ ಮೆಳ್ತಾ. ಆತಾಂ ಹೆಂ ಸರ್ವ್ ದೆಗೆಕ್ ದವರ್ನ್ ಆಶಾವಾದಿ ಪ್ರಕಾಶನ್ ಹಾಣಿಂ ಪರ್ಗಟ್ ಕೆಲ್ಲ್ಯಾ ತಾಚ್ಯಾ “ಉಜ್ವಾಡಾಚ್ಯೆ ವೆಂಗೆಂತ್” ಪುಸ್ತಕಾಂತ್ಲಿಂ ಥೊಡಿಂ ಕವಿತಾಂ ವಿಂಚುನ್, ತಾಂತ್ಲಿ ಆಧ್ಯಾತ್ಮಿಕತಾ ಸೊಧ್ತಾನಾ ಮ್ಹಾಕಾ ಮೆಳ್ಲ್ಲೆಂ ಪಯ್ಲೆಂ ಕವಿತಾ ’ಸಂಸಾರ್’. ಕವಿತಾ ಆಶೆಂ ಆಸಾ;
ಸಂಸಾರ್
ಸೊಭಿತ್ ಸಂಸಾರಾಚ್ಯಾ ಭವ್ಯ್ ಕಲ್ಪನಾಂತ್
ಕಾಳ್ಜಾಂತ್ಲ್ಯಾ ರಂಗಾಂನಿ ಉದೆಲ್ಲೆಂ
ಸೊಭಿತ್ ಚಿತ್ರ್ ಪಳೆವ್ನ್
ಸಂತೊಸಾನ್ ಪುಲ್ಲೊ ಕಲಾಕಾರ್
ಅಂತ್ರಳ್, ಭುಂಯ್, ಉಜ್ವಳ್ ಸುರ್ಯೊ
ವ್ಹಾಳ್ಚೆಂ ಉದಕ್, ರೂಕ್ ಝಾಡಾಂ
ಮಾಸ್ಥಿ, ಸುಕ್ಣಿಂ, ಸಾವ್ಜಾಂ ಜಾನ್ವಾರಾಂ
ಮನಿಸ್ ಆನಿ ತಾಚೆಂ ಶಾಂತಿಚೆಂ ಬಿಡಾರ್...
ವ್ಹಾ! ಅಪ್ಲೆಂ ರಚನ್ ಭೋವ್ ಸೊಭಿತ್ ದಿಸ್ಲೆಂ ರಚ್ನಾರಾಕ್!
ದೊನ್ಪಾರಾಂಚ್ಯಾ ವಿಶೆವಾಕ್ ತೊ ಗೆಲೊ...
ಜಾಗ್ ಜಾತಾನಾ ಸಂಸಾರಾಂತ್ ದೆಸ್ವಾಟ್!
ರುಕಾಚ್ಯಾ ಮುಳಾಕ್ ಕುರಾಡ್ ಪಡ್ಲ್ಯಾ
ಸುರ್ಯೊ ಉಜೊ ವೊಂಕುನ್ ಆಸಾ
ಉದಕ್ ಕಾಳೆಂ ಮ್ಹೆಳೆಂ ಜಾಲಾಂ
ಧರ್ಣಿರ್ ರಗತ್ ಶಿಂಪ್ಲಾಂ...
ಮನಿಸ್ ಸಗ್ಳೊ ವಿದ್ರೂಪ್ ಜಾಲಾ
ಸರಾರಾಂ ತೊ ಭಿತರ್ಲ್ಯಾ ಕುಡಾಕ್ ಧಾಂವ್ಲೊ. . .
ನೆಣ್ತೊ ಪೂತ್ ತಾಚೊ ರಂಗಾಂನಿ ಬಿಜ್ಲ್ಲಿಂ ಚಿಕ್ಣಿಂ ಬೊಟಾಂ
ಖುಶೆನ್ ಹಾಲೊವ್ನ್ ಖೆಳ್ಚೊ ದಿಸ್ಲೊ!
ದೆಸ್ವಾಟೆಲ್ಯಾ ಚಿತ್ರಾಕ್ ಪಳೆವ್ನ್
ಆವಯ್ಚ್ಯಾ ಕಾಳ್ಳಾಂತ್ ಉಜೊ ಪೆಟ್ಲೊ
ಕಿತೆಂ ಕೆಲೆಂಯ್ ಪುತಾ ತುವೆಂ?
ಧೆಂಕ್ಣ್ಯಾಕ್ ಥರ್ಥರೊನ್ ರಡ್ಲೊ ಭುರ್ಗೊ
"ಹಾಂವೆಂ ಸಂಸಾರ್ ಕೆಲೊ.."
ಚಿತ್ರ್ ಕಾರ್ ಮೊನೊ ಜಾಲೊ...
ಗುಂಡಾಯೆಥಾವ್ನ್ ಏಕ್ ಉಸ್ವಾಸ್ ಫೆವುನ್
ಭುರ್ಗ್ಯಾಲಾಗಿಂ ಯೇವ್ನ್, ಬಾಗ್ವೊನ್,
ಮೊಗಾ ಮಯ್ಪಾಸಾನ್ ತಾಕಾ ಪೊಟ್ಲುನ್ ಧರುನ್
ಭುರ್ಗ್ಯಾಚ್ಯಾ ಕಾಳ್ಜಾಕ್ ಉಮೆ ದಾಂಬಿಲಾಗ್ಲೊ
ದಯಾಳ್ ಮೊಗಾಳ್ ಬಾಪುಯ್!
ಹೆಂ ಕವಿತಾ ಹಾವೆಂ ವಾಚ್ತಾನಾ ಮೊಜೆಂ ಏಕ್ Favourite ವಾಚಾಪ್.... ಚಡ್ತಿಕ್ ಜಾವ್ನ್ ಪಾಸ್ಖಾಂಚ್ಯಾ ರಾತಿಕ್ ವಾಚ್ತಾತ್ “ ದೆವಾನ್ ಸಂಸಾರ್ ರಚ್ಲೊ “ ಹಾಚೊ ಉಗ್ಡಾಸ್ ಯೆತಾ. ಹಿ ಕವಿತಾ ಸೊಲ್ತಾನಾ ಕವಿ ಆಂಡ್ರ್ಯೂಚಿ ಹಿ ಕವಿತಾ ಪ್ರಕೃತಿ, ರಚ್ನಾರ್ ಆನಿ ಮನ್ಶ್ಯಾಂ ಮಧ್ಲ್ಯಾ ಆಂತರಿಕ್ ಸಂಬಂದಾಕ್ ಆಧ್ಯಾತ್ಮಿಕ್ ದೃಷ್ಟೆನ್ ಭೊವ್ ಸುಂದರ್ ರಿತಿನ್ ಆನಿ ಗುಂಡಾಯೆನ್ ಆನಾವರಣ್ ಕರ್ತಾ. ಕವಿತೆಚ್ಯಾ ಸುರ್ವಾತೆರ್ ಕವಿನ್ ದೆವಾಕ್ ಎಕ್ ಮಹಾನ್ ಚಿತ್ರ್ಕಾರ್ ಮ್ಹಣೊನ್ ಪಿಂತ್ರಾಯ್ಲಾಂ. ತಾಚ್ಯಾ ಕಲ್ಪನಾಂತ್ ಜಲ್ಮ್ ಘೆತ್ಲ್ಲೊ ಹೊ ಭವ್ಯ್ ಆನಿ ಸುಂದರ್ ಸಂಸಾರ್ ವಿವಿಧ್ ರಂಗಾಂತ್, ಉಜ್ವಾಡಾನ್ ಆನಿ ಸದಾಂಚ್ ಜಿವಂತ್ಪಣಾನ್ ಬೊರೊನ್ ಘೆಲಾ. ಮೊಳಾಬ್, ಭುಂಯ್, ಸುರ್ಯೊ, ಉದಾಕ್, ರೂಕ್ ಝಡಾಂ, ಜಾನ್ವಾರಾಂ, ಸುಕ್ಣಿಂ ಆನಿ ಮನಿಸ್ ಹೆಂ ಸರ್ವ್ ದೆವಾಚ್ಯಾ ಸುಂದರ್ ಪರಿಕಲ್ಪನಾಂತ್ ಉದೆಲ್ಲ್ಯೊ ಸಂಪೂರ್ಣ್ ಕಲಾಕೃತಿ ಜಾವ್ನಾಸಾತ್. ಶಾಂತಿ, ಸೌಹರ್ದತಾ ತಶೆಂಚ್ ಸೊಭಿತ್ಪಣ್ ಎಕ್ಚ್ ರಿತಿನ್ ವಾಂಟುನ್ ದಿಲ್ಲ್ಯಾಬರಿ ದಿಸ್ಚ್ಯಾ ಹ್ಯಾ ಪ್ರಕೃತಿಚ್ಯಾ ಸಮತೋಲನಾಕ್ ಭೊಗ್ತಾನಾ ದೆವಾಚ್ಯಾ ಕಾಳ್ಜಾ ಭಿತರ್ಲೊ ಪ್ರತಿಬಿಂಬ್ ತಶೆಂ ದಿಸ್ತಾ. ಪುಣ್ ಆಜ್ ಜಾಲಾಂ ಕಿತೆಂ? ದೆವಾನ್ ರಚ್ಲೆಲ್ಯಾ ಹ್ಯಾ ಸುಂದರ್ ಪ್ರಕೃತೆಂತ್ ಕಿತೆಂ ಘಡೊನ್ ಆಸಾ? ಮನಿಸ್ ಆಪ್ಲ್ಯಾ ಸ್ವಾರ್ಥ್, ಆಂಗಲಾಪ್ ಆನಿ ಹಂಕಾರಾಕ್ ಲಾಗೊನ್ ಹೆಂ ಧೈವಿಕ್ ಸಮತೋಲಾನ್ ನಾಸ್ ಕರ್ತಾನಾ ಹಿ ಸುಂದರ್ ಪ್ರಕೃತಿ ಘಾಯೆತಾ, ತಿ ರುಧಾನ್ ಕರ್ತಾ, ರೂಕ್ ಝಡಾಂ ಕಾತರ್ತಾತ್, ಉದಾಕ್ ಪ್ರದೂಷಿತ್ ಜಾತಾ. ಜಾಂವ್ಚ್ಯಾ ಮತಿಯ್ ಧಂಗ್ಯಾಂ ಲಾಗೊನ್, ರಾಷ್ಟ್ರಾಂ ಮದೆಂ ಜಾಂವ್ಚ್ಯಾ ಲಡಾಯೆ ಲಾಗೊನ್ ಹ್ಯಾ ಭುಂಯ್ಕ್ಚ್ ರಕ್ತಸ್ರಾವ್ ಜಾಲಾ ತಶೆಂ ಭೊಗ್ತಾ. ಹೆಂ ವಿನಾಶ್ ಕೇವಲ್ ಬೌತಿಕ್ ಜಾವ್ನ್ ಉರಾನಾಸ್ತಾನಾ ಮನ್ಶಾಕುಳಾಚ್ಯಾ ಆಧ್ಯಾತ್ಮಿಕ್ ಆದೋಪತನಾಚೊ ಗುರ್ತ್ ಜಾಂವ್ಕ್ ಪಾವ್ತಾ.
ಆಸಲ್ಯಾ ಎಕಾ ಆಂಧ್ಕಾರಾಂ ಮದೆಂ ಆಮಿಂ ಆಸ್ತಾನಾ ಭುರ್ಗ್ಯಾಚೆಂ ನಿರಪ್ರಾದಿ ಆನಿ ನಿಷ್ಕಳಂಕ್ ಮನ್ ದೆವಾಚ್ಯಾ ಧೈವಿಕ್ ಪದ್ವೆಕ್ ಪ್ರತಿನಿದಿತ್ವ್ ಕರ್ತಾ. ತೊ ಭುರ್ಗೊ ಚಿತ್ರ್ ಸೊಡಯ್ತಾ ಆನಿ ಆಪ್ಣೆ ಸಂಸಾರ್ ರಚ್ಲೊ ಮುಣ್ತಾ. ತಾಚಿಂ ಉತ್ರಾಂ ಆಯ್ಕತಾನಾ ದೆವಾಚ್ಯಾ ರಚನಾತ್ಮಕ್ ಶಕ್ತೆಚೆಂ ಬಳ್ ಫ್ರತಿಫಲಿತ್ ಜಾತಾ. ಪುಣ್ ಆವಯ್ಚಿಂ ಸವಾಲಾಂ, ಪರಿಸ್ಥಿತೆಚಿ ಗಂಭಿರತಾ ತ್ಯಾ ಭುರ್ಗ್ಯಾಚ್ಯಾ ಮನಾಂತ್ ದೂಕ್ ಆನಿ ಭ್ಯೆಂ ಉಬ್ಜೊಂವ್ಕ್ ಕಾರಣ್ ಜಾತಾ. ಹೆಂ ಮನ್ಶಾಕುಳಾನ್ ಕೆಲ್ಲ್ಯಾ ಚುಕಿಂಚೆ ವಜನ್ ಮುಕ್ಲ್ಯಾ ಜನಾಂಗಾ ವಯ್ರ್ ಕಸಲೊ ಪರಿಣಾಮ್ ಘಾಲುಂಕ್ ಸಕತ್ ಮುಳ್ಳೊ ಸಂಕೇತ್ ಜಾವ್ನಾಸಾ. ಇತ್ಲೆಂ ಜಾಲ್ಯಾರೀ ದೇವ್ ತ್ಯಾ ಭುರ್ಗ್ಯಾಕ್ ವಾ ಆಮಾಂ ಸರ್ವಾಂಕ್ ಏಕ್ ನ್ಯಾಯದೀಶ್ ಜಾವ್ನ್ ನ್ಹಂಯ್ ಬಗಾರ್ ಮೊಗಾ ಮಯ್ಪಾಸಾನ್ ಭರ್ಲಲೊ ಬಾಪಾಯ್ ಜಾವ್ನ್ ಪೊಟ್ಲುನ್ ದರ್ತಾ. ತ್ಯಾ ವೆಂಗೆಂತ್ ಸಜಾ ನಾ ಬಗಾರ್ ದಯಾಳಾಯ್ ಆಸಾ, ತಿರಸ್ಕಾರ್ ನಾ ಬಗಾರ್ ಪರಿಹಾರ್ ಆಸಾ. ಭುರ್ಗ್ಯಾಚ್ಯಾ ಕಾಳ್ಜಾಕ್ ಊಬ್ ದಿಂವ್ಚ್ಯಾ ತ್ಯಾ ಘಡಿಯೆ ಮಾರಿಫಾತ್ ದೇವ್ ಮನ್ಶ್ಯಾಕುಳಾಕ್ ನವೀಕೃತ್ ಭರ್ವಸೊ, ಜವಾಭ್ದಾರೆಚಿ ಜಾಣ್ವಯ್ ಆನಿ ಮೊಗಾಚಿ ವಾಟ್ ದಾಕಯ್ತಾ. ಆಶೆಂ ಕವಿ ಆಂಡ್ರ್ಯೂನ್ ಲಿಖ್ಲ್ಲೆಂ ಹೆಂ ಸುಂದರ್ ಕವನ್ ವಾಚ್ತಾನಾ “ಹೊ ಸಂಸಾರ್ ಏಕ್ ದೆವಾಚಿ ಸೃಷ್ಟಿ ಪುಣ್ ತಾಚೆಂ ರಕ್ಷಣ್ ಕರ್ಚೆಂ ಮನ್ಶಾಕುಳಾಚಿ ಆದ್ಯಾತ್ಮಿಕ್ ಜವಾಭ್ದಾರಿ ಮುಳ್ಳೊ ಭೊವ್ ಉಂಚ್ಲೊ ಸಂದೇಶ್ ದಿತಾ.
ಹಾವೆಂ ವಿಂಚ್ಲ್ಲಿ ಆಂಡ್ರ್ಯೂಚಿ ದುಸ್ರಿ ಕವಿತಾ; ’ಖಡ್ಡಿ ಸುವಾತೆರ್ ಪಡ್ಲ್ಲೆಂ ಬಿಂ’.... ಕವಿತಾ ಆಶಿ ಆಸಾ....
ಖಡ್ಡಿ ಸುವಾತೆರ್ ಪಡ್ಲ್ಲೆಂ ಬಿಂ
ಫಾತ್ರಾಖಾಂಚಿಂತ್ಲೊ ಶೆಳೊ ವೊಡುನ್
ಪಿಂಪ್ರಿ ಪಾಳಾಂ ಫಾತ್ರಾ ಫುಟಾಂತ್ಲ್ಯಾನ್
ಮೋವ್ ಮೊವಾಳ್ ಮಾತ್ಯೆಚ್ಯಾ ಗರ್ಭಾಂತ್
ಹಳೂಹಳೂ ಸಕಯ್ಲ್ ಗಳೊವ್ನ್
ಪಿಳ್ಗ್ಯಾಪಿಳ್ಗ್ಯಾಂಚೆಂ ತ್ರಾಣ್ ಆರಾವ್ನ್
ವೆಳಾಕಾಳಾಚೆಂ ಗಿನ್ಯಾನ್ ವಾಟಾವ್ನ್
ಖಡ್ಪಾಚ್ಯೊ ಶಿರೊಚ್ ಚಿರುನ್
ತಕ್ಲಿ ಉಕಲ್ಸ್ ಉಬೆಂ ರಾವ್ಲೆಂ
ಖಡ್ಪಿ ಸುವಾತೆರ್ ಪಡ್ಲ್ಲೆಂ ಬಿಂ
ವಿಜಿತ್ಕಾಯೆಚ್ಯಾ ನೆಣ್ತ್ಯಾ ದೊಳ್ಯಾಂನಿ
ವಿಚಿತ್ರಾಂ ದೆಖ್ಚ್ಯಾರ್ ಪಡ್ಲೆಂ!
ಕಿರ್ಣಾಂ ಧಾಂವುನ್ ಆಯ್ಲಿಂ
ಯೆವ್ಕಾರಾಚೆ ಝೆಲೆ ಘಾಲುಂಕ್
ಪೃಥ್ವೆಚ್ಯೊ ಸರ್ವ್ ವ್ಹರ್ತ್ಯೊ ಸಕ್ತ್ಯೊ
ಪರ್ಜಳ್ಚೊ ಸುರ್ಯೊ, ಜಿವಿತಾಚೆಂ ಉದಕ್, ಪುಸ್ಪುಸ್ಚೆಂ ವಾರೆಂ
ಎಕ್ತಾರಾಂತ್ ವೆಂಗುಂಕ್ ರಾಕೊನ್ ರಾವ್ಲ್ಯಾಂತ್
ಮಾಯಾಮೊಗಾಚೊ ಸತ್ಕಾರ್ ಕರುಂಕ್!
ಇಟಾಳ್ ಮಾತ್ಯೆಂತ್ಲ್ಯಾ ಝಾಡಾಂಕ್ ಸಯ್ತ್
ವಾರ್ಯಾನ್ ಘುಂವ್ಡಾಯ್ಲಾಂ ಹೆವ್ಶಿನ್
ಮಾನ್ ಬಾಗಾಂವ್ಕ್ !
ಆಪ್ಲ್ಯಾ ಉಂಡಾಂತ್ ಜೀವ್ ಘೇವ್ನ್
ಸುರ್ಯಾಚಿಂ ಕಿರ್ಣಾಂ ಚಿಂವ್ಚ್ಯಾ ಬಾಳ್ ಝಾಡಾಚ್ಯಾ
ಉಮಾಳ್ಚ್ಯಾ ಮೊಗಾನ್ ಕಡೊನ್ ಮುದೊ ಜಾಲಾಂ
ಕಾಳಿಜ್ ಫಾತ್ರಾಚೆಂ.
ಹ್ಯಾ ಕವಿತೆಂತ್ ಕವಿ ಆಧ್ಯಾತ್ಮಿಕ್ ಆನ್ಭೊಗಾಂಕ್ ಪ್ರಕೃತೆಚ್ಯಾ ಸೂಕ್ಷ್ಮ್ ಸಂಕೇತಾಂ ಮುಖಾಂತ್ರ್ ಆತ್ಯಂತ್ ಮಾರ್ಮಿಕ್ ರಿತಿನ್ ಪ್ರಸ್ತುತ್ ಕರ್ತಾ. ಹಾಂಗಾ ಕವಿ ಫಾತೊರ್, ಮಾತಿ, ಕಿರ್ಣಾಂ, ವಾರೆಂ , ಉದಾಕ್ ಇತ್ಯಾದಿ ನೈಸರ್ಗಿಕ್ ಸಂಗ್ತಿಂಕ್ ಉಪ್ಯೊಗ್ ಕರುನ್ ಆಮ್ಚ್ಯಾ ಆತ್ಮ್ಯಾಚ್ಯಾ ಆಂತರ್ ಪಯ್ಣಾ ವಯ್ರ್ ಉಜ್ವಾಡ್ ಫಾಂಕಯ್ತಾ. ಹಾಂಗಾ ಆಧ್ಯಾತ್ಮಿಕತಾ ಮ್ಹಳ್ಳ್ಯಾರ್ ಕೇವಲ್ ಧಾರ್ಮಿಕ್ ಆಚರಣ್ ನ್ಹಯ್ ಬಗಾರ್ ತೆಂ ಜೀವ್, ಪ್ರಕೃತಿ ಆನಿ ವೆಳಾಚ್ಯಾ ಮದೆಂ ಆಸ್ಚ್ಯಾ ಆಂತರಿಕ್ ಸಂಬಂದಾಂಚಿ ಜಾಣ್ವಯ್ ಜಾವ್ನಾಸಾ. “ ಫಾತ್ರಾಖಾಂಚಿಂತ್ಲೊ ಶೆಳೊ ವೊಡುನ್, ಮಾತ್ಯೆಚ್ಯಾ ಗರ್ಭಾಂತ್ ಹಳೂಹಳೂ ಸಕಯ್ಲ್ ಗಳೊವ್ನ್..." ಹ್ಯೊ ವಳಿ ನಿಷ್ಟುರಾಯೆ ಥಾವ್ನ್ ಮೊವಾಳ್ಪಣಾಕ್ ಬದ್ಲುಂಚ್ಯಾ ಆಧ್ಯಾತ್ಮಿಕ್ ಬದ್ಲಾವಣೆಕ್ ದಾಕೊವ್ನ್ ದಿತಾತ್. ಫಾತ್ರಬರಿ ಘಟ್ ಜಾಲ್ಲೆಂ ಕಾಳಿಜ್ ವೆಳಾಕಾಳಾಚೆಂ ಜ್ಞಾನ್ ಆನಿ ಆನ್ಭೊಗಾಂ ಮುಖಾಂತ್ರ್ ಹಳ್ತಾರ್ ಮೊವಾಳ್ ಜಾಂವ್ಚೆಂ ಹಾಂಗಾ ರೂಪಕ್ ಜಾವ್ನ್ ಪ್ರಸ್ತುತ್ ಕೆಲಾಂ. ಹೆಂ ಮನ್ಶ್ಯಾನ್ ಹಂಕಾರ ಥಾವ್ನ್ ನಮ್ರತೆಕ್, ಅಗ್ಯಾನಾ ಥಾವ್ನ್ ಗಿನ್ಯಾನ್ ಆಪ್ಣೊಂವ್ಚ್ಯಾ ಆಧ್ಯಾತ್ಮಿಕ್ ರಸ್ತ್ಯಾಕ್ ಪ್ರತಿಬಿಂಬ್ ಆಸಾ ಕರ್ತಾ.
ಪಿಳ್ಗ್ಯಾಪಿಳ್ಗ್ಯಾಂಚೆಂ ತ್ರಾಣ್ ಆರಾವ್ನ್, ವೆಳಾಕಾಳಾಚೆಂ ಗಿನ್ಯಾನ್ ವಾಟಾವ್ನ್ ಹ್ಯಾ ವೊಳಿಂನಿ ಜೀವನಾಂತ್ಲ್ಯೊ ಜವಾಭ್ದಾರ್ಯೊ ಆನಿ ಆಮ್ಚ್ಯಾ ಜಿವಿತಾಂತ್ ಶಿಕ್ಲ್ಲಿಂ ಲಿಸಾಂವಾಂ ಆಮ್ಚ್ಯಾ ಆತ್ಮ್ಯಾಕ್ ರೂಪ್ ದಿಂವ್ಚೆಂ ಹಾತೆರ್ ಜಾವ್ನ್ ದಿಸ್ತಾತ್. ದೂಖ್, ಕಷ್ಟ್ ಕಾಡ್ಚೆ ಆನಿ ಜಿವಿತಾಂತ್ ಆಸ್ಚ್ಯೊ ಜಡಾಯೊ ಆಮ್ಚ್ಯಾ ಆತ್ಮ್ಯಾಕ್ ನಿರ್ಬಳ್ ಕರುಂಕ್ ಸಕಾನಾಂತ್ ಬಗಾರ್ ಆಮ್ಚ್ಯಾ ಆತ್ಮ್ಯಾಕ್ ಗುಂಡಾಯ್ ಆನಿ ಧೃಡತಾ ಹಾಡುನ್ ದಿಂವ್ಕ್ ಸಕ್ತಾ ಮ್ಹಳ್ಳೊ ಸಂದೇಶ್ ಕವಿ ಆಮ್ಕಾಂ ದಿತಾ.
ಕಿರ್ಣಾಂ, ಸುರ್ಯೊ, ಉದಾಕ್, ವಾರೆಂ ಹೆಂ ಸರ್ವ್ ಎಕ್ಚ್ ಜಾಗ್ಯಾರ್ ಭೆಟ್ಚೆಂ ಪಿಂತುರ್ ಆಸ್ಲ್ಲ್ಯಾ ಬರಿ ಪ್ರಕೃತಿಂತ್ ಆಧ್ಯಾತ್ಮಿಕ್ ಎಕ್ವೊಟ್ ಕಸೊ ಆಸಾ ತೆಂ ದಾಕೊವ್ನ್ ದಿತಾ. ಮನಿಸ್, ಪ್ರಕೃತಿ ಆನಿ ಸ್ರಷ್ಟೆಚ್ಯೊ ಸರ್ವ್ ಸಕ್ತ್ಯೊ ಎಕ್ಚ್ ಆಧ್ಯಾತ್ಮಿಕ್ ತತ್ವಾನ್ ಚಲ್ಚಿಂ ವಿವಿಧ್ ಆವಿಷ್ಕಾರ್ ಮುಣೊನ್ ಹಾಂಗಾ ಸ್ಪಷ್ಟ್ ಜಾತಾ . "ಮಾಯಾಮೊಗಾಚೊ ಸತ್ಕಾರ್" ಮುಳ್ಳ್ಯಾ ಶಭ್ದಾಚೊ ಉಪ್ಯೋಗ್ ಹ್ಯಾ ಸ್ರಷ್ಟೆಚಿ ಸೊಬಾಯ್ಚ್ ದೆವಾಚ್ಯಾ ಮೊಗಾಕ್ ಎಕ್ ಗೌರವ್ ಆರ್ಪಣ್ ಮುಳ್ಳೆಂ ಭವ್ಯ್ ಚಿಂತಾಪ್ ಹಾಡುನ್ ದಿತಾ.
"ಇಟಾಳ್ ಮಾತ್ಯೆಂತ್ಲ್ಯಾ ಝಾಡಾಂಕ್ ಸಯ್ತ್ ವಾರ್ಯಾನ್ ಘುಂವ್ಡಾಯ್ಲಾಂ ಹೆವ್ಶಿನ್" ಹ್ಯಾ ವೊಳಿಂತ್ ಪ್ರಕೃತಿಚ್ಯಾ ಹರ್ಯೆಕಾ ಆಂಶಾಂಕ್ ಸಂತೊಸಾಚ್ಯಾ ನಾಚಾಂತ್ ಭಾಗಿ ಕೆಲಾಂ ಮುಳ್ಳ್ಯಾಬರಿ ಕವಿನ್ ವರ್ಣಿಲಾಂ. ಹೆಂ ಆಮ್ಕಾಂ ಮಾಹೆತ್ ದಿತಾಕಿ ಆಧ್ಯಾತ್ಮಿಕ್ ಜಾಣ್ವಯ್ / ಚೈತನ್ಯ್ ಹರ್ಯೆಕಾ ಜಿವಿ ಮದೆಂ ರಾಜ್ ಕರುನ್ ಆಸಾ ಮುಣೊನ್. ಆಖ್ರೇಕ್ “ಕಾಳಿಜ್ ಫಾತ್ರಾಚೆಂ ಮುದೊ ಜಾಲಾಂ” ಮುಳ್ಳೆಂ ಭಾವನ್ ಆಧ್ಯಾತ್ಮಿಕ್ ಪರಿವರ್ತನೆಚ್ಯಾ ಉತ್ತುಂಗಾಕ್ ವರುನ್ ಪಾಯ್ತಾ. ಮೊಗಾಚ್ಯಾ ಗರ್ಮೆಂತ್ ಆನಿ ಜ್ಞಾನಾಚ್ಯಾ ಕಿರ್ಣಾಂನಿ ಕಠಿಣ್ ಫಾತ್ರಚೆಂ ಕಾಳಿಜ್ ಕರ್ಗಾತಾ. ಹೆಂ ಆಂತರ್ ಶುದ್ದಿಕರಣ್ ಆನಿ ಆಧ್ಯಾತ್ಮೀಕ್ ವಿಮೋಚನೆಚೆಂ ಸಂಕೇತ್ ಜಾವ್ನಾಸಾ.
ಎಕಾ ಉತ್ರಾನ್ ಸಾಂಗೊಂ ತರ್ ಹಿ ಕವಿತಾ ಪ್ರಕೃತಿ ಸಂಗಿಂ ಮಿಸ್ಳೊಂಚ್ಯಾ ಮುಖಾಂತ್ರ್ ಆಮ್ಚೊ ಆತ್ಮೊ ಆಪ್ಲೆಂ ಮೂಳ್ಭೂತ್ ಸತ್ ಸೊಧುನ್ ಕಾಡ್ಚ್ಯಾ ಆಧ್ಯಾತ್ಮಿಕ್ ಪಯ್ಣಾಕ್ ಮೊಗಾನ್ ಪುಣ್ ಗಂಭಿರಾತೆನ್ ಚಿತ್ರಣ್ ಕರ್ತಾ. ವಾಚ್ಪ್ಯಾಕ್ ದಿಷ್ಟಾವೊ ದವರುಂಕ್, ಮೌನ್ ನಿಯಾಳ್ ಕರುಂಕ್ ಆನಿ ಸ್ರಷ್ಟೆಚಿ ಆಧ್ಯಾತ್ಮಿಕ್ ಉಪಸ್ಥಿತಿ ಭೊಗುಂಕ್ ಹೆಂ ಕವಿತಾ ಪ್ರೇರಣ್ ದಿತಾ.
ಹಾವೆಂ ವಿಂಚ್ಲ್ಲೆಂ ತಾಚೆಂ ತಿಸ್ರೆಂ ಕವಿತಾ ಜಾವ್ನಾಸಾ ’ಉಜ್ಯಾ ತೊಂಡಾಲಾಗಿಂ’. ತಿ ಕವಿತಾ ಆಶಿ ಆಸಾ;
ಉಜ್ಯಾ ತೊಂಡಾಲಾಗಿಂ
ಬಾಳ್ಕಾಂ ದೊಗಾಂ
ಕಾಳಿಜ್ ಪಿಂಜುನ್ ರಡ್ತಾಲಿಂ
ಗಿಳುಂಕ್ ಲಾಗಿಂ ಯೆಂವ್ಚ್ಯಾ ಉಜ್ಯಾಚ್ಯಾ ತೊಂಡಾಲಾಗಿಂ
ಹಾತ್ ಮೊಡ್ಲ್ಲಾ ಬಾಳಾನ್
ಪಾಂಯ್ ಚೆಂಚ್ಲ್ಲ್ಯಾ ಬಾಳಾಕ್ ಪಳೆವ್ನ್
ಆಪ್ಲಿಂ ಪಾಂಯಾಂ ಬೊಟಾಂ ಹಳೂ ಹಾಲಯ್ಲಿಂ
ಆನಿ ರಡ್ಣೆಂ ರಾವಯ್ಲೆಂ
ಪಾಂಯ್ ಮೊಡ್ಲ್ಲಾ ಬಾಳಾನ್
ಹಾತ್ ಮೊಡ್ಲ್ಲಾ ಬಾಳಾಕ್ ಪಳೆವ್ನ್
ಆಪ್ಲಿಂ ಹಾತಾ ಬೊಟಾಂ ಸವ್ಕಾಸ್ ಹಾಲಯ್ಲಿಂ
ಆನಿ ರಡ್ಣೆಂ ರಾವಯ್ಲೆಂ
ಎಕಾ ಖಿಣಾಚ್ಯಾ ಉಜ್ವಾಡಾ ವೆಂಗೆಂತ್
ಎಕಾಮೆಕಾಕ್ ಹಾಸೊ ದೀಂವ್ಕ್
ಝುಜಾಚ್ಯಾ ರಗ್ತಾನ್ ಮಾಖ್ಲ್ಲೆ
ವೋಂಟ್ ತಾಂಣಿ ಹಳೂ ಉಸಯ್ಲೆ
ಬಾಳಾಂಚ್ಯಾ ನೆಣ್ತ್ಯಾ ಪ್ರತಿರೋಧಾಕ್
ಗಿಳುಂಕ್ ಆಯಿಲ್ಲೊ ಝುಜಾ ಉಜೊ
ಎಕೇಕ್ ಮೆಟ್ ಪಾಟಿಂ ಸರ್ಲೊ
ಆನಿ ಲಜೆನ್ ಥಂಡ್ ಪಡ್ಲೊ!
ಹ್ಯಾ ಕವಿತೆಂತ್ ಕವಿನ್ ಮನ್ಶಾಪಣಾಚಿ ದಯಾಳಾಯ್, ನಿಸ್ವಾರ್ಥಿ ತ್ಯಾಗ್ ಆನಿ ಮೌನ್ ಸೇವಾ ರುಪಾರ್ ಆಧ್ಯಾತ್ಮಿಕತೆಚೊ ಉಜ್ವಾಡ್ ಫಾಂಕಯ್ಲಾ. ದು:ಖಿನ್ ರಡೊನ್ ಆಸ್ಚ್ಯಾ ಭುರ್ಗ್ಯಾಂ ಮುಕಾರ್ ರಾವೊನ್, ಆಪ್ಲೆಂ ದೂಖ್ ವಿಸ್ರೊನ್ ಎಕಾಮೆಕಾಚ್ಯಾ ಹಾತ್-ಪಾಂಯಾಂಕ್ ಸ್ಪರ್ಶ್ ದೀವ್ನ್ ಭುಜೊಂವ್ಚ್ಯಾ ವೆಳಾರ್ ಭೊವ್ಚ್ ಕೋಮಲ್ ತಶೆಂಚ್ ಧೈವಿಕ್ಪಣಾನ್ ಭರುಲ್ಲಿ ಸಕತ್ ಥಂಯ್ ಉಬಿ ಆಸಾ ತಶೆಂ ಭಗ್ತಾ. ಹಾಂಗಾ ಉಜೊ ಕೇವಲ್ ಭಾಯ್ಲೊ ಪ್ರಕಾಸ್ ನ್ಹಯ್ ಬಗಾರ್ ಕಾಳ್ಜಾ ಭಿತರ್ಲಿ ಕರುಣಾಯ್, ಹೆರಾಂಚ್ಯಾ ಭಗ್ಣಾಂಕ್ ಸಮ್ಜುನ್ ಘೆಂವ್ಚಿ ಸಕತ್ ವಾ ಸಹಾನುಭೂತಿಚೊ ಉಜ್ವಾಡ್ ಜಾವ್ನಾಸಾ. ಝುಜಾ ಥಳಾರ್ ಉಂಚ್ಲ್ಯಾ ಆಧಿಕಾರಿಂಚ್ಯಾ ಆಜ್ಞಾ ಪಾಳುನ್ ಮನ್ಶಾಪಣ್ ವಿಸ್ರೊನ್ ಭುಂಯ್ ರಗ್ತಾನ್ ಬುಡೊನ್ ತಾಂಬ್ಡಿ ಜಾವ್ನ್ ಮಸ್ಕ್ಪಣ್ ಭರುಲ್ಲ್ಯಾ ವಾತಾವರಣಾಂತ್ ಎಕಾಮೆಕಾ ದಿಂವ್ಚ್ಯೊ ಲ್ಹಾನ್ ಹಾಸೊ ಸಯ್ತ್ ಆತ್ಮ್ಯಾ ಭಿತರ್ ಶಾಂತಿ ಹಾಡುಂಕ್ ಕಾರಣ್ ಜಾತಾ. ಭುರ್ಗ್ಯಾಂಚ್ಯಾ ನೆಣ್ತ್ಯಾ ಪ್ರತಿರೋದಾ ಮುಕಾರ್ ಕ್ರೂರತೆನ್ ಭರುಲ್ಲೊ ಉಜೊ ಸಯ್ತ್ ಲಜೆವ್ನ್ ಥಂಡ್ ಪಡ್ತಾ ಹೆಂ ಮೋಗ್ಚ್ ಆಂತಿಮ್ ಸಕತ್ ಮುಳ್ಳೊ ಆಧ್ಯಾತ್ಮಿಕ್ ಸಂದೇಶ್ ಉಟೊವ್ನ್ ದಿತಾ. ಆಶೆಂ ಹೆಂ ಕವಿತಾ ಆಮ್ಕಾಂ, ದೆವಾಕ್ ಸೊಧುನ್ ಆಮಿಂ ದಿವ್ಳಾಂಕ್, ಇಗರ್ಜಾಂಕ್, ಮಸ್ಜಿದಾಂಕ್ ವಾ ಹೆರ್ ಮಾಗ್ಣ್ಯಾ ಸುವಾತ್ಯಾಂಕ್ಚ್ ವಚಾಜೆ ಮುಣೊನ್ ನಾ ಬಗಾರ್ ದೇವಾಕ್ ಮನ್ಶ್ಯಾಂಚ್ಯಾ ಮೊಗಾಳ್ ಸ್ಪರ್ಶಾಂತ್, ಮನ್ಶಾಪಣಾಚ್ಯಾ ದಯಾಳಾಯೆಂತ್ ಆನಿ ತ್ಯಾಗಾಂತ್ ಆನ್ಭೊಗ್ ಕರ್ಯೆತ್ ಮುಳ್ಳೆಂ ಭೊವ್ ಗುಂಡಾಯೆನ್ ಭರುಲ್ಲೆಂ ಸತ್ ಉಗ್ಡಾಪೆಂ ಕರ್ತಾ.
ಹಾವೆಂ ವಿಂಚ್ಲ್ಲಿ ತಾಚಿ ಚವ್ತಿ ಕವಿತಾ ಜಾವ್ನಾಸಾ ’ಪಾಕಟೆ ಪಾಫುಡ್ಚೊ ರಾಜಾ’. ತಿ ಕವಿತಾ ಆಶಿ ಆಸಾ;
ಪಾಕಟೆ ಪಾಫುಡ್ಚೊ ರಾಜಾ!
ಪಾದ್ರ್ಯಾಬ್ ದಾಟ್ಟು ಅವ್ಚಿತ್ ಘರಾ ಯೆತಾನಾ
ಆಂಗ್ಣಾಂತ್ ಖುಶೆನ್ ಉಡ್ಕಾಣಾಂ ಘಾಲ್ನ್ ಆಸ್ಲ್ಯಾ
ಮ್ಹಜ್ಯಾ ಧವ್ಯಾ ಕೊಂಬ್ಯಾಕ್
ಮ್ಹಜ್ಯಾ ಬಾಬಾನ್ ಧರ್ನ್ ಉಕಲ್ನ್ ವ್ಹೆಲೊ!
ಗೊಮ್ಪಿ ಕಾತರ್ನ್ ಸಳ್ಸಳ್ಯಾ ಉದ್ಕಾಂತ್ ಫಾಲ್ನ್
ಪಾಕಾಂ ವೊಡುಂಕ್ ಲಾಗಿಂ ಆಪಯ್ಲೆಂ ಮ್ಹಾಕಾ
ಮ್ಹಜೆಂ ಕುಸುಂಕುಸುಂ ಆಯ್ಕೊನ್ ವಿಚಾರ್ಲೆಂ
’ರಡ್ತಾಯ್ ಕಿತ್ಯಾಕ್ ರೆ?’
’ಮ್ಹಜೊ ರಾಜಾ!’ ಹಾಂವ್ ವ್ಹಡ್ಲ್ಯಾನ್ ರಡ್ಲೊಂ
ಕೊಂಬ್ಯಾಚೆಂ ಉಗ್ತೆಂ ಆಂಗ್ ಆಪಡ್ನ್!
’ಆಂಗ್ಣಾಂತ್ ಖೆಳ್ಲ್ಲೊ ತುಜೊ ರಾಜಾ
ಮಾಸ್ ಖಾವ್ನ್ ಜಿರ್ಲ್ಯಾ ಉಪ್ರಾಂತ್
ತುಜ್ಯಾ ಜಿವಾಂತ್ ಸುಡ್ಡುಡಿತ್ ಉಡ್ತಲೊ.
ಆಳೆ! ತೊ ಕುಂಡ್ಲ್ಯಾಂತ್ಲ್ಯೊ ಮಾಸ್ಳ್ಯೊಯ್
ಉಪ್ಯೆತಲ್ಯೊ ತುಜ್ಯಾ ರಗ್ತಾಂತ್
ಅಂತ್ಯ್ ಮ್ಹಳ್ಳೆಂ ನಾ ದೆವಾಚ್ಯಾ ರಚ್ನಾಂಕ್’
ಮ್ಹಾಕಾ ಕಿತೆಂಚ್ ಸಮ್ಜಾಲೆಂನಾ, ಉಟ್ಲೊಂ ಹಾಂವ್!
ನಾರ್ಲ್ ಭೆತ್ಲ್ಲ್ಯಾ ಅವಾಜಾಕ್ ಧಾಂವ್ಲೊ ಬಾಬಾಲಾಗಿಂ
ಕಾಂತ್ಳೆಕ್ ಹಾಂವೆಂ ದಾಂತ್ ತೊಪ್ತಾನಾ
’ಪಳೆ, ನಾರ್ಲಾಕ್ ದುಖ್ಲೆಂ’ ಬಾಬಾನ್ ತುಕ್ಲಾಯ್ಲೆಂ.
ಗೋಡ್ ಉದಕ್ ಶಿರಾಂನಿ ವ್ಹಾಳ್ತಾನಾ
ಇಲ್ಲೆಶೆಂ ಕಿತೆಂಗಿ ಸಮ್ಜಾಲ್ಲ್ಯಾ ಪರಿಂ ಜಾಲೆಂ!
ಆತಾಂ ಮ್ಹಾಕಾ ಸಾರ್ಕೆಂ ಸಮ್ಜಾಲಾಂ!
ಸದಾಂ ಸುರ್ಯೋ ಉಜ್ಜಾಡ್ತಾನಾ
ಹರ್ದ್ಯಾಂತ್ ಪಾಕಟೆ ಫಾಪುಡ್ನ್
ಸಾಧ್ ಘಾಲ್ತಾ ಮ್ಹಜೊ ರಾಜಾ?
ಹಿ ಕವಿತಾ ವಾಚ್ತಾನಾ ಹಿಂ ಆಮ್ಚ್ಯಾ ಚಾಲ್ತ್ಯಾ ಜೀವನಾಂತ್ ಘಡ್ಚಿಂ ಘಡಿತಾಂ, ಹಾಂತುಂ ವಿಶೇಷ್ ಕಿತೆಂ ಆಸಾ ಮುಳ್ಳೆಂ ಸವಾಲ್ ಜರೂರ್ ಉದೆತಾ ಆಮ್ಕಾಂ. ಪುಣ್ ಪರ್ತೆಕ್ ಪರ್ತೆಕ್ ಹಿ ಕವಿತಾ ವಾಚುನ್ ತಾಚ್ಯಾ ಗುಂಡಾಯೆಕ್ ಪಾವ್ತಾನಾ ಹ್ಯಾ ಕವಿತೆಂತ್ ಆಧ್ಯಾತ್ಮಿಕತಾ ಮನ್ಶಾಪಣಾಚ್ಯಾ ಆನ್ಭೊಗಾಂ ಮುಖಾಂತ್ರ್ ಭೋವ್ ಸೂಕ್ಷ್ಮ್ ಜಾವ್ನ್ ಉಗ್ಡಾಪಿ ಜಾತಾ. ಪಾಕಟೆ ಪಾಫುಡ್ಚೊ ರಾಜಾ ಮುಳ್ಳ್ಯಾ ರೂಪಕಾ ಮುಖಾಂತ್ರ್ ಜೀವಾಚಿ ಪವಿತ್ರತಾ, ಸ್ರಷ್ಟೆ ಸಾಂಗಾತಾ ಮನ್ಶಾಚೊ ಆಂತರಿಕ್ ಸಂಬಂದ್, ದೇವಾಚ್ಯಾ ರಚ್ನೆಂತ್ ಆಸ್ಚಿ ದಯಾ ತಶೆಂ ನಿರಂತರತಾ ಸ್ಪಷ್ಟ್ ಜಾತಾ. ಭುರ್ಗ್ಯಾಚಿಂ ದು:ಖಾಂ, ಬಾಪಾಯ್ಚಿಂ ಉತ್ರಾಂ, ಪ್ರಕೃತಿಚೊ ಆವಾಜ್ ಹೆಂ ಸರ್ವ್ ಮೆಳೊನ್ ಮರ್ಣಾಂತಿ ಜೀವಚೆಂ ಆಸ್ಥಿತ್ವ್ ನಾಸ್ ಜಾಯ್ನಾ ಮುಳ್ಳೆಂ ಆತ್ಮ್ ಸತ್ ಬೋದನ್ ಕರ್ತಾ. ಕೊಂಬೊ, ಮಾಸ್ಳಿ, ನಾರ್ಲ್ ತಶೆಂಚ್ ಉದಾಕ್ ಹೆಂ ಸರ್ವ್ ಸಂಸಾರಾಚ್ಯಾ ಜಿವಿತಾ ಚಕ್ರಚೆ ಆವಿಭಾಜ್ಯ್ ಆಂಗ್ ಮುಳ್ಳಿ ಸಮ್ಜೊಣಿ ಯೆಂವ್ಕ್ ಕಾರಣ್ ಜಾತಾ. ಹರ್ದ್ಯಾಂತ್ ಪಾಕಟೆ ಫಾಪುಡ್ನ್ ಸಾಧ್ ಘಾಲ್ತಾ ಮ್ಹಜೊ ರಾಜಾ ಮುಳ್ಳಿ ಆಖ್ರೇಚಿ ವೋಳ್ ದೇವ್ ಭಾಯ್ರ್ ನಾ ಬಗಾರ್ ಮನ್ಶಾಚ್ಯಾ ಕಾಳ್ಜಾಂತ್ಚ್ ರಾಜ್ ಕರುನ್ ಆಸಾ ಮುಳ್ಳೊ ಗೂಂಡಾಯೆನ್ ಭರುಲ್ಲೊ ಆಧ್ಯಾತ್ಮಿಕ್ ಸಂದೇಶ್ ವ್ಯಕ್ತ್ ಕರ್ತಾ.
ಹಾವೆಂ ವಿಂಚ್ಲ್ಲಿ ತಾಚಿ ಪಾಂಚ್ವಿ ಕವಿತಾ ಜಾವ್ನಾಸಾ ’ಉಜ್ವಾಡಾಚ್ಯೆ ನಳೆ’. ತಿ ಕವಿತಾ ಆಶಿ ಆಸಾ;
ಉಜ್ವಾಡಾಚ್ಯೆ ನಳೆ
ಜುಬ್ಲೆವಾಚ್ಯಾ ತೆಂಪ್ಲಾಂತ್ ಪಳೆ
ಫುಲೊನ್ ರಾವ್ಲ್ಯಾತ್ ನವೆ ನವೆ ದಿವೆ
ರಂಗಾಳ್ ಉಜ್ವಾಡ್ ಪಳೆವ್ನ್
ಭಾವಾಡ್ತ್ಯಾಂಚ್ಯೆ ಪರ್ಜಳ್ಳ್ಯಾತ್ ದೊಳೆ
ಗಿತಾಂ ಥಾಂಬ್ಲಿಂ, ಮಾಗ್ಣೆಂ ಸಂಪ್ಲೆಂ
ಸಂಭ್ರಮಾಚ್ಯಾ ವಾತಿಂಕ್ ಫುಂಕ್ಲೆಂ
ದಿವೆ ಪಾಲ್ವೊನ್ ಶಾಂತ್ ಜಾಲೆ
’ಮೊಗಾಳ್ ಪುತ್ರಾ ಸವೆಂ’
ಎಕ್ಸುರ್ಯಾ ಅಲ್ತಾರಿ ಮುಖಾರ್ ಪಳೆ!
ಸರ್ಪಡ್ಲ್ಯಾಂತ್ ಸುರ್ಯಾಚಿಂ ಕಿರ್ಣಾಂ
ಭಕ್ತಿಕಾಂನಿ ಸಾಂಡ್ಲೆಲ್ಯಾ ಸಾಂತಾಭಕ್ತಾಂಕ್
ಉಜ್ವಾಡಾನ್ ಮೊಗಾನ್ ಆರಾಯ್ಲಾಂ
ಉಮ್ಯಾಂನಿ ಉಬೆಲ್ಲ್ಯಾ ಇಮಾಜಿಂಕ್
ಚಾಂದ್ನ್ಯಾನ್ ಸುಖಾನ್ ನ್ಹಾಣಯ್ಲಾಂ
ಆಕಾಸಾಚೊ ಕುಡ್ಕೊಚ್ ವೊಡ್ಲಾ ಪಳೆ!
ಜುಬ್ಲೆವಾ ತೆಂಪ್ಲಾಚ್ಯಾ ಆರ್ಸ್ಯಾ ನಳ್ಯಾಂನಿ
ಜಾಣ್ತ್ಯಾ ಪಾಕ್ಯಾಂತ್ಲ್ಯಾನ್ ಹಳೂ ಗಳಯ್ಲಾ-
ಸ್ವಾಧಿಕ್ ಸಾಕ್ರಾಮೆಂತಾ ಆರಾಧಾನಾಕ್.
ಧುಳ್ಯ್ ಪರ್ಜಳ್ತಾ ಪವಿತ್ರ್ ಉಜ್ವಾಡಾಕ್
ಝಂಬಾರಾಂಚೊ ಪ್ರಕಾಸ್ ಉತ್ರೊನ್ ಪಳೆ!
ಊಂಚ್ ಪಾಕ್ಯಾಕ್ ದೀಶ್ಟ್ ಉಬಾರುನ್
ತುಕಾಚ್ ಪಳೆವ್ನ್ ರಾವ್ಲ್ಯಾತ್ ಕುರ್ಪೆನ್
ಅನಂತಾಕ್ ಆರ್ಸೊ ಧರ್ಚೆ ಪವಿತ್ರ್ ನಳೆ
ಉಜ್ವಾಡಾಚೆ ಸೊಭಿತ್ ದೊಳೆ!
ಕೊಂಕ್ರಿಟಿಚೈ ಧಾರುಣ್ ಸಾವ್ಳೆ ಥಾವ್ನ್
ಜತ್ನೇನ್ ಸಾಂಬಾಳ್ ಧರ್ ತಾಂಕಾಂ
ಮೊಡುಂಕ್ ಪಡುಂಕ್ ಸೊಡಿನಾಕಾ
ತೆ ತುಜ್ಯಾಚ್ ಸರ್ಗಾಚೆ ವಾಂಟೆ
ಹ್ಯಾ ಕವಿತೆಂತ್ ಕವಿನ್ ಉಜ್ವಾಡ್, ಭಕ್ತ್ ಆನಿ ಮೌನ್ ಆರಾಧನೆಚ್ಯಾ ರುಪಾರ್ ಆಧ್ಯಾತ್ಮಿಕತೆಚೆಂ ಪಡ್ಬಿಂಬ್ ಭೊವ್ ಸುಂದರ್ ರಿತಿನ್ ದಾಕಯ್ಲಾಂ. ಜುಬ್ಲೆವ್, ಇಗರ್ಜೆಚೆ ದಿವೆ, ರಂಗಾಳ್ ಉಜ್ವಾಡ್ ಆನಿ ಭಾವಾಡ್ತ್ಯಾಂಚ್ಯಾ ದೊಳ್ಯಾಂನಿ ದಿಸ್ಚಿಂ ಉಮಾಳ್ಯಾಂಚಿಂ ಭಗ್ಣಾಂ ದೆವಾಚೆಂ ಹಾಜರ್ಪಣ್ ಸ್ಪಷ್ಟತಾಯೆನ್ ಆನ್ಭೊಗ್ ಕರುಂಕ್ ದಿತಾ ತರ್ ಗಿತಾಂಚಿ ಥಾಂಬ್ಣಿ, ಸಂಪ್ಲ್ಲೆಂ ಮಾಗ್ಣೆಂ, ಸಂಭ್ರಮಾಚ್ಯಾ ವಾತಾವರಣಾಂತ್ ವ್ಹಾಳ್ಚೆಂ ತೆಂ ಶಾಂತೆಚೆಂ ವ್ಹಾರೆಂ ಮನ್ಶಾಚ್ಯಾ ಕಾಳ್ಜಾ ಭಿತರ್ ಪಾವೊಂಕ್ ವಾಟ್ ಕರುನ್ ದಿತಾ. ಆಲ್ತಾರಿ ಮುಕಾರ್ ವ್ಹಾಳೊನ್ ಆಸ್ಚಿಂ ತಿಂ ಸುರ್ಯಾಚಿಂ ಕಿರ್ಣಾಂ, ಭಕ್ತಿಚಿಂ ದು:ಖಾಂ, ಸಾಂತಾಭಕ್ತಾಂಚೆಂ ಮೌನ್ಪಣ್ ಹೆಂ ಸರ್ವ್ ದೆವಾ ಥಂಯ್ ಆಸ್ಚ್ಯಾ ಆತ್ಮೀಕ್ ಸಂಬಂದಾಂಕ್ ಉಗ್ತೆಂ ಕರ್ತಾ. ಮೊಳಾಬ್, ಚಾಂದ್ನ್ಯಾಚೊ ಉಜ್ವಾಡ್, ಪವಿತ್ರ್ ಸಾಕ್ರಾಮೆಂತ್ ಆನಿ ದಿವ್ಯಾಂಚೊ ಉಜ್ವಾಡ್ ಹೆಂ ಸರ್ವ್ ಸಾಂಗಾತಾ ಮೆಳೊನ್ ದೈವಿಕ್ ಎಕ್ವೊಟಾಕ್ ದಾಕೋವ್ನ್ ದಿತಾತ್. ಹಿ ಕವಿತಾ ಲೌಕಿಕ್ ಕಠಿಣತಾ ಆಸ್ಲ್ಯಾರೀ ಪಾತ್ಯೆಣಿ, ಸೊಸ್ಣಿಕಾಯ್ ಆನಿ ಭಕ್ತೆಕ್ ಸಾಂಬಾಳುನ್ ವರ್ಚ್ಯಾ ಮಾರಿಫಾತ್ ಮನ್ಶಾಚ್ಯಾ ಆತ್ಮ್ಯಾಕ್ ದೆವಾಚ್ಯಾ ಉಜ್ವಾಡಾ ತೆವ್ಶಿನ್ ಕಶೆಂ ವರ್ಯೆತ್ ಮುಳ್ಳೊ ಆಧ್ಯಾತ್ಮಿಕ್ ಸಂದೇಶ್ ದಿತಾ.
ಇತ್ಲೆಂ ಸಾಂಗೊನ್ ಕವಿ ಆಂಡ್ರ್ಯೂಚಿಂಚ್ ಉತ್ರಾಂ ಘೆವ್ನ್ ಆಖೆರ್ಸಿತಾಂ. ಆಮ್ಚಿ ಕಾನೂನ್ ವ್ಯವಸ್ಥಾ ಆಪ್ರಾದ್ ಕರ್ಚ್ಯಾ ಹಾತಾಂಕ್ ಧರುಂಕ್ ಆಸ್ಚಿ ತರ್, ಕವಿತೆನ್ ಹ್ಯಾ ಅಪ್ರಾಧಾಂಚಿ ಮಾಂಡಾವಳ್ ಕರ್ಚ್ಯಾ ಸೂತ್ರ್ದಾರಾಂಚ್ಯಾ ಧಗ್ಲ್ಯಾಚೆಂ ಸುತ್ ವೊಡ್ಚಿ ಗರ್ಜ್ ಆಸಾ. ಹೊ ಮಾಸ್ಟರ್ ಮೈಂಡ್ ಕೇವಲ್ ಏಕ್ ವ್ಯಕ್ತಿ ನ್ಹಯ್, ಬಗರ್ ಏಕ್ ಗುಪಿತ್ ಕುಡಾ ಥಾವ್ನ್ ಸಾಮಾಜಿಕ್ ವಿಚಾರ್ ಪ್ರವಾಹಾಂತ್ ಕಾಟ್ಕಾಯೆಪರಿಂ ವಿಸ್ತಾರ್ಚಿ ಖೋಟಿ ವಿಚಾರ್ಧಾರ್ ಜಾಂವ್ಕ್ ಸಕ್ತಾ. ಕವಿತೆಚ್ಯಾ ತೀಕ್ಷ್ಣ್ ಕಿರ್ಣಾಂಕ್ ತ್ಯಾ ಚಿಂತ್ಪಾಚ್ಯಾ ಮುಳಾಕ್ ಪಾಂವ್ಚಿ ಸಕತ್ ಆಸಾ, ಕಿತ್ಯಾಕ್ ಕವಿತಾ ಏಕ್ ಅಧ್ಯಾತ್ಮಿಕ್ ಶಸ್ತ್ರ್ ಜಾವ್ನ್ ಸತ್ ಪಾವಯ್ತಾ ಆನಿ ಸತ್, ಕಾಯ್ದ್ಯಾಕ್ ನ್ಹಯ್, ಬಗಾರ್ ಉಜ್ವಾಡಾಕ್ ಬಾಂದುನ್ ಆಸಾ.
ಆಯ್ಕಾಲ್ಲ್ಯಾ ತುಮ್ಕಾಂ ಸರ್ವಾಂಕ್ ದೇವ್ ಬೊರೆಂ ಕರುಂ......
(ಆಶಾವಾದಿ ಪ್ರಕಾಶನ್ ಆನಿ ಕಾರ್ಮೆಲ್ ಕೊಲೆಜಿಚ್ಯಾ ಜೊಡ್ ಪಾಲವಾಖಾಲ್, ೨೨ ಫೆಬ್ರೆರ್ ೨೦೨೬ ವೆರ್, ನುವೆಂ ಗೊಂಯಾಂತ್ ’ಕಾರ್ಮೆಲ್ ಕೊಲೆಜಿಚ್ಯಾ ಸಭಾಂಗ್ಣಾಂತ್’ ಆಯೊಜಿತ್ ಕೆಲ್ಲ್ಯಾ ’ಕೊಂಕಣಿಂತ್ಲ್ಯೊ ಆಧ್ಯಾತ್ಮಿಕ್ ಕವಿತಾ’ ರಾಷ್ಟ್ರಿಯ್ ಸೆಮಿನಾರಾಂತ್ ’ಕನ್ನಡ ಲಿಪಿಚ್ಯಾ ಕೊಂಕಣಿಂತ್ಲ್ಯೊ ಆಧ್ಯಾತ್ಮಕ್ ಕವಿತಾ ಪ್ರಕಾರಾಂತ್ ಆಂಡ್ರ್ಯೂ ಎಲ್. ಡಿಕುನ್ಹಾಚ್ಯಾ ಕವಿತೆಂಚೆರ್ ಸಾದರ್ ಕೆಲ್ಲೆಂ ಪ್ರಪತ್ರ್)
