[ವಿಶ್ಲೇಷಣ್] ಘಾಟಿ (- ಸಂಗೀತಾ ನಾಯ್ಕ್)
ಘಾಟಿ (ಕವಿ: ಸಂಗೀತಾ ನಾಯ್ಕ್)
ತುಜ್ಯಾ ಘರಾಕಡೆನ್
ಉದ್ಕಾಚೆ ವ್ಹರ್ಪಾಕ್ ಪಾಯ್ಪ್ ...
ಫೊಣ್ಡ್ ಮಾರೂನ್ ಮಾರೂನ್ ಆಂಗ್
ಝರ್ಲಿ ಮ್ಹಾಜ್ಯಾ
ಪಾಯಾಚಿ ವಾಟಿ
ಹಯ್ ಹಾಂವ್ ಘಾಟಿ ....
ಸಪ್ನಾತ್ಲ್ಯಾ ಘರಾಚ್ಯೊ ತುಜ್ಯಾ
ಉಬ್ಯೊ ಕರೂಂಕ್ ವಣ್ಟಿ
ಮಾಥೆ ಕಡ್ಡಯತ್ ಪೂತ್ ಮ್ಹಜೊ
ವ್ಹಾವಯ್ತಾ ಹಿ ಯೆದಿ ಪಾಟಿಂ ...
ಹಯ್ ಹಾಂವ್ ಘಾಟಿ ...
ಆಯ್ದನ್ ಪಾಣಿ ತುಜ್ಯಾ ಘರ್ಚೆ
ಜಾವಂಚೆ ದಿಸ್ತಾದಿಸ್ತ್ ....
ಮ್ಹೂಣ್ ಭುಕೆಕಂಗಾಲ್ ಬಾಯ್ಲ್ ಮ್ಹಜಿ
ಝರ್ ಝರ್ ಝರ್ತಾ
ವ್ಹಟಿ -ಪೊಟಿಂ
ಹಯ್ ಹಾಂವ್ ಘಾಟಿ ...
ತುಜ್ಯಾ ಭುರ್ಗ್ಯಾಂಚ್ಯಾ ಹಾತಾಂತ್
ಪೆನ್ಸೀಲ್ ಆನಿ ಪಾಟಿ
ತುಜೊ ಕೊಯ್ರ್ ಭಂಗಾರ್ ಮಾತ್
ಮ್ಹಜ್ಯಾ ಪೊರಾಂಚ್ಯಾ ಫಾಟಿಂ
ಹಯ್ರೆ ಬಾಬಾ
ಹಯ್ ಹಾಂವ್ ಘಾಟಿ
ಎಕ್ದೀಸ್ ಮ್ಹಜ್ಯಾ ಜೊತ್ಯಾಂನ್
ಘಾಲ್ಗಾ ಮಾತ್ಶೆ ಪಾಯ್...
ಭೊಗ್ ಘಾಟಿ .. ಘಾಟಿ ಹಿಣಯ್ತಕೀಚ್
ಕಾಳ್ಜಾಕ್ ಜಾಲ್ಲೆ
ಭಳ್ಭಳಪಿ ಘಾಯ್
ತರಿಕಯ್ ದಿಸ್ಲೆ ತುಕಾ
ಮ್ಹಣ್ಚೆ ತೆಂಚ್ ಉತರ್
ಜಾಲ್ಯಾರ್ ಹಾಂವ್ ಹೊಲ್ಮತಲೊ
ಮನೀಸ್ ನ್ಹಿ ತು ಫಾತರ್
ಮಾಗೀರ್ ಮ್ಹಣ್ತಂ ರಾವಂ ಜಾಯ್ತೀತಲೊ
ಘಾಟಿ ... ಘಾಟಿ ... ಘಾಟಿ
ವಳುನ್ ಹಾಂವ್ ಪರತ್
ಪಳೊವ್ಚೊನಾ ರೆ ಫಾಟಿ
ವಳುನ್ ಹಾಂವ್ ಪರತ್, ಪಳೊವ್ಚೊನಾ ರೆ ಫಾಟಿ
ಮನೀಸ್ ಜಲ್ಮ್ ಘೆವಂಕ್ ಜಾಯ್ತೆ ಪೂಣ್ಯ್ ಕಮೊವ್ಚೆಂ ಪಡ್ಟಾ ಅಶೆಂ ಆಮ್ಚೆ ಜಾಣ್ಟೆ ಸಾಂಗ್ತಾಲೆ. ಮನ್ಶಾಚ್ಯಾ ತಾಟಾಂತ್ ದೆವಾನ್ ಕಿತೆಂ ವಾಡೂನ್ ದವ್ರ್ಲ್ಲಾಂ ತೆಂ ಸಾಂಗಪ್ ಸೊಪೆ ಕಾಮ್ ನಿ. ವಿಧಿ ಲಿಖೀತ್ ಜೆಂ ಕಿತೆಂ ಬರಯ್ಲಾಂ ತೆಂ ಕೊಣಾಕ್ ಚುಕ್ನಾ ಪೂಣ್ ‘ದೆವ್ ತಾರಿ ತ್ಯಾಲಾ ಕೊಣ್ ಮಾರಿ’ ಅಶಿ ಎಕ್ ಮ್ಹಣ್ ಮರಾಠೀಂತ್ ಆಸಾ ತಾಚಿ ‘ಘಾಟಿ’ ಹಿ ಕವಿತಾ ವಾಚೂನ್ ಮ್ಹಾಕಾ ಯಾದ್ ಜಾಲಿ. ಕಿತೆಂಯ್ ಕೆಲೆಂ ತರಿ ಮನ್ಶಾಂಚಿ ಭೊಗಾವ್ಳ್ ಪಯ್ಸ್ ಜಾಯ್ನಾ ಜಾಚ್ಯಾ ತಾಚ್ಯಾ ನಶೀಬಾಂತ್ ಜೆಂ ಕಿತೆಂ ಆಸಾ ತೆ ತಾಕಾ ಮೆಳ್ಟಾಚ್ ಆಯ್ಜ್ ನಾ ಜಾಲ್ಯಾರ್ ಫಾಲ್ಯಾ ಪೂಣ್ ತೆಂ ಕಶೆಂಚ್ ಚುಕ್ನಾ. ಆಯ್ಜ್ ಎಕ್ ಗಜಾಲ್ ಸಾಂಗೀನಶಿ ದಿಸ್ತಾ ತಿ ಮ್ಹಣ್ಲ್ಯಾರ್ ಎಕ್ ಲೊಹಾರ್ ಜೊ ಲೊಖ್ಣಾ ಪಾಸೂನ್ ಆವ್ತಾಂ ತಯಾರ್ ಕರ್ತಾ ತೊ ದಿಸ್ಪಾಕ್ ಕಾಳೊಕಿಟ್ಟ್ ಮ್ಹೂಣ್ ತಾಕಾ ಹಿಣ್ಸಾವಪ್ ಹೆ ಸಮಾ ನಿ. ತಾಚ್ಯಾ ಹಾತಾಂತ್ ಎಕ್ ಕಲಾ ಆಸಾ ತೊ ಕಶ್ಟ್ ಕರ್ಪಿ ಘಾಮ್ ಗಳೊವ್ನ್ ಆಪ್ಲಿ ಜಾಪ್ಸಾಲದಾರಕಿ ಸಾಂಬಾಳಪಿ. ಜಾಡ್ ಜುಡ್ ಲೊಖಾಣ್ ತಾಚೆರ್ ಘಣ್ ಘಾಲುನ್ ತಾಕಾ ಜಾಯ್ ಜಾಯ್ ತ್ಯೊ ವಸ್ತು ಕರಪ್ ಜಶೆ ಕೊಯ್ತೊ, ಆದೊಳಿ, ಪಿಕಾಸ್, ಖೊರೆಂ, ಪಾರಯ್ ಅಶೆಂ ಕಿತ್ಲೆಶ್ಯೊಚ್ ವಸ್ತು ಜ್ಯೊ ಮನ್ಶಾಚ್ಯಾ ಸದ್ಚ್ಯಾ ಕಾಮಾಂತ್ ಸಾಮ್ಕೆ ಗರ್ಜೆಚ್ಯೊ ಅಶೊ. ವಿಚಾರ್ ಕರ್ಪಾ ಸಾರ್ಕಿ ಗಜಾಲ್ ಮ್ಹಣ್ಲ್ಯಾರ್ ನಾಲ್ಲ್ ಫೊಡ್ಟಲೊ ಜಾಲ್ಯಾರ್ ಕೊಯ್ತ್ಯಾ ಶಿವಾಯ್ ಆಮಿ ತೊ ಫೊಡ್ಪಾಕ್ ಶಕ್ನಾ ಸಾದಿ ವಸ್ತ್ ಪೂಣ್ ಮ್ಹತ್ವಾಚಿ.
ಜೊ ಮನೀಸ್ ತಿ ತಯಾರ್ ಕರ್ತಾ ತೊಯ್ ಎಕ್ ಸಾದೊ ಮನೀಸ್ ತಾಚೆ ತೆಂ ಕಾಮ್ ಆನಿ ತೆಂ ಕಾಮ್ ಕರ್ಪಾಕ್ ತಾಕಾ ಆನೀಕ್ ದೊನ್ ಮನ್ಶಾಂಚೊ ಪಾಲವ್ ಜಾಯ್ ಪಡ್ಟಾ. ಎಕ್ ಶೆಗ್ಡಿ ಪೆಟೊವ್ನ್ ತಾಂತೂತ್ ಲೊಖಂಡ್ ತಾಂಬ್ಡೆ ಗುಂಜ್ ಜಾಯ್ಮೆರೆನ್ ತೆಂ ಉಜ್ಯಾಂತ್ ಭಾಜ್ಚೆಂ ಪಡ್ಟಾ ಮಾಗೀರ್ ಭಾಯ್ರ್ ಕಾಡೂನ್ ತಾಚೆರ್ ಘಣಾನ್ ವಾರ್ ಕರ್ಚೆಂ ಪಡ್ಟಾತ್ ತೆನ್ನಾ ತ್ಯಾ ಲೊಖ್ಣಾ ಪಾಸೂನ್ ಎಕ್ ನವಿ ವಸ್ತಾ ತಯಾರ್ ಜಾವಂಕ್ ಪಾವ್ತಾ. ಅಶೆಂ ಶೆಕ್ಡ್ಯಾಂನಿ ವಸ್ತು ಕರ್ಪಿ ವೆಗ್-ವೆಗ್ಳೆ ಮನೀಸ್ ಆಪ್ಲ್ಯಾ ವೆಗ್-ವೆಗ್ಳ್ಯಾ ಗಾಂವಾಂತ್ಲ್ಯಾನ್ ಗೊಂಯಾತ್ ವಾಸ್ತವ್ ಕರುನ್ ಆಸಾ. ತಾಂಚ್ಯಾ ಶಿವಾಯ್ ಆಮ್ಚೆಂ ಎಕ್ ಕಾಮ್ ನೀಟ್ ಜಾವ್ಪಾಚೆಂ ನಾ ಹೆಂ ಆಮಿ ಜಾಣಾಂತ್ ತರಿ ಆಸ್ತನಾ ಆಮಿ ತಾಂಕಾ ಮಾಯೆನ್ ವಾಗಯ್ನಾತ್. ತಾಂಕಾ ಆಮಿ ಘಾಟಿ ಮ್ಹಣ್ ಪಾಚಾರತಾತ್. ಬಾಯ್ ಸಂಗೀತಾ ನಾಈಕ್ ಹಾಣಿ ಘಡ್ಯೆ ತಾಂಚಿ ಜೀಣ್ ಲಾಗ್ಸುನ್ ಪಳಯ್ಲ್ಯಾ ಅಸೊ ಮ್ಹಜೊ ಸಮಜ್ ಕಿತ್ಯಾಕ್ ಹಿ ಕವಿತಾ ವಾಸ್ತವ್ಯ್ ದೊಳ್ಯಾ ಮುಖಾರ್ ಉಬೆಂ ಕರ್ತಾ. ‘ಘಾಟಿ’ ಹಿ ಕವಿತಾ ವಾಚತ್ಲ್ಯಾಚ್ಯಾ ದೊಳ್ಯಾ ಮುಖಾರ್ ತೊ ದೆಖಾವೊ ಉಬೊ ರಾವ್ತಾ ಮ್ಹಣ್ಲ್ಯಾರ್ ಅತಿತಾಯ್ ಜಾವ್ಚಿ ನಾ. ಜೆನ್ನಾ ಕವ್ಯಿತ್ರಿ ಮ್ಹಣ್ಟಾ ಜೊ ಮನೀಸ್ ತುಜ್ಯಾ ಘರಾಂತ್ ಉದ್ಕಾಚೆಂ ಪಾಯ್ಪ್ ಹಾಡ್ಪಾಕ್ ಫೊಂಡ್ ಮಾರ್ಪಾಕ್ ಕಶ್ಟ್ ಘೆತಾ ತೆನ್ನಾ ‘ತಾಚೆ ಆಂಗ್ ತಶೆಂಚ್ ಝರ್ತಾ ಪಾಯಾಂಚ್ಯೊ ವಾಟಿ ತರಿ ತಾಕಾ ಮ್ಹಣ್ಟಾ ಘಾಟಿ. ’ ಹ್ಯೊ ವಳಿ ವಾಚುನ್ ಮನ್ ದುಖಿ ಜಾಲ್ಯಾ ಬಗರ್ ರಾವ್ನಾ. ಆಮಿ ಮನೀಸ್ ವ್ಹಡ್ಲಿಂ ವ್ಹಡ್ಲಿ ಸಪ್ನಾ ಪಳೆತಾತ್ ತಿ ಆಮ್ಚಿ ಸಪ್ನಾ ಕೊಣ್ ಸಾಕಾರ್ ಕರ್ತಾತ್ ಆಮಿ ದುಡು ಮೊಡ್ಟಾತ್ ಪೂಣ್ ದುಡು ಆಸ್ಲೆಂ ಮ್ಹಣ್ ಜಾತಾ ಕಾಮ್ ಕರ್ಪಾಕ್ ಮನೀಸ್ ಜಾಯ್ ಪಡ್ಟಾ ಕಾಂಯ್ ನಾ ತೊಯ್ ಬಿ ಕಾಮ್ ಜಾಣಾ ಜಾಲ್ಲೊ ಮನೀಸ್ ಜಾಕಾ ಆಮಿ ಕುಶಳ್ ಕಾರೀಗರ್ ಮ್ಹಣು ಯೆತ್. ಹೆ ಕಾಮ್ ಕರ್ತಾ ಆಸ್ತನಾ ತಾಚೊ ಇಲ್ಲೊಸೊ ಭುರ್ಗೊ ಲೆಗೀತ್ ತಾಚೊ ವಾಂಗ್ಡಿ ಜಾವ್ನ್ ಹಾತ್ಭಾರ್ ಲಾಯ್ತಾ ಅಶಾ ಮನ್ಶಾಕ್ ಆಮಿ ಘಾಟಿ ಮ್ಹಣಪ್ ಕಿತ್ಲೆಂ ಯೊಗ್ಯ್ ಹೆಂ ಆಮಿ ಥಾರಾವ್ಪ್ ಅಶೆಂ ಮ್ಹಾಕಾ ದಿಸ್ತಾ. ಕವಿತಾ ಮುಖಾರ್ ವ್ಹರ್ತನಾ ಬಾಯ್ ಸಂಗೀತಾನ್ ತಾಚ್ಯಾ ಬಾಯ್ಲೆಚೆಂ ವರ್ಣನ್ ಸುಪುಲ್ಲೆಶಾ ಉತ್ರಾಂನಿ ಮಾಂಡ್ಲಾಂ ಜಶೆಂ ‘ಜೊರ್ ಕಾ ಝಟ್ಕಾ ಧಿರೆ ಸೆ ಲಗೆ,’ ಹೆ ಕಡ್ವೆ ಮನಾಕ್ ಚುರ್ಕೊ ಲಾವ್ನ್ ವತಾ.
ಎಕ್ ದಿಸ್ ಮ್ಹಜ್ಯಾ ಜೊತ್ಯಾಂನ್
ಘಾಲ್ಗಾ ಮಾತ್ಶೆಂ ಪಾಯ್..
ಭೊಗ್ ಘಾಟಿ... ಘಾಟಿ ಹಿಣಯ್ತಕೀಚ್
ಕಾಳ್ಜಾಕ್ ಜಾಲ್ಲೆ
ಭಳ್ಭಳಪಿ ಘಾಯ್
ತರೀಕಯ್ ದಿಸ್ಲೆಂ ತುಕಾ
ಮ್ಹಣ್ಚೆಂ ತೆಂಚ್ ಉತರ್
ಜಾಲ್ಯಾರ್ ಹಾಂವ್ ಹೊಲ್ಮತಲೊ
ಮನೀಸ್ ನಿ ತು ಫಾತರ್
ಮಾಗೀರ್ ಮ್ಹಣತ್ ರಾವಂ ಜಾಯ್ತೀತಲೊ
ಘಾಟಿ ...ಘಾಟಿ... ಘಾಟಿ
ಹೆ ಪಂಗ್ತೆಂತ್ ಆಯಿಲ್ಲ್ಯೊ ಹ್ಯೊ ವಳಿ ಆಮ್ಕಾ ಜಿವಿತಾಚಿ ದೆಖ್ ದಿತಾ ಅಶೀಚ್ ಮ್ಹಣ್ಚಿ ಪಡ್ಟಲಿ ಕಿತ್ಯಾಕ್ ತರ್ ಕವ್ಯಿತ್ರಿ ಸಾಂಗ್ಪಾಕ್ ಸೊದ್ತಾ ಕಿ ಮನ್ಶಾನ್ ತಾಂಚೆ ಜಿಣೆಚೊ ಥಾವ್ ಘೆವ್ಚೊ, ತಾಂಚ್ಯೊ ಬ-ಯೊ ವಾಯ್ಟ್ ಗಜಾಲಿ ಸಮ್ಜುನ್ ಘೆವ್ಚ್ಯೊ ತಾಂಚೆ ನದ್ರೆನ್ ಪಳಯ್ಲೆ ಬಗರ್ ಖರಿ ಪರಿಸ್ಥಿತೀಚಿ ಜಾಣೀವ್ ಜಾವಂಕ್ ಶಕ್ನಾ. ಘಾಟಿ ಹೆಂ ಉತರ್ ಕಿತ್ಲೆಂ ದುಖ್ ದಿಣೆಂ ತೆಂ ಸಾಂಗೂನ್ ಕಳ್ಪಾಚೆಂ ನಾ ತೆಂ ಅಣ್ಭವ್ ಕರ್ಪಾ ಸಾರ್ಕೆಂ. ಮನೀಸಪಣಾಕ್ ತೆಂ ಸೊಬ್ನಾ ತರಿ ಆಸ್ತನಾ ಮನೀಸ್ ತಾಂಕಾ ಘಾಟಿ ಮ್ಹಣ್ ಹಿಣಯ್ತಾತ್. ಮುಖಾರ್ ಬಾಯ್ ಸಂಗೀತಾ ಸಾಂಗ್ಪಾಕ್ ಸೊದ್ತಾ ತಾಂಕಾ ಹೆಂ ಉತರ್ ಆವ್ಡನಾ ತರಿ ಲೆಗೀತ್ ತುಮಿ ತಾಂಕಾ ಘಾಟಿ ಮ್ಹಣ್ಪಾಕ್ ಲಾಗ್ಲೆ ತರ್ ತೆಂ ತುಮಿ ಫಾತರ್ ಜಾಲ್ಯಾ ಮ್ಹಣ್ ಸಮ್ಜತಲೆಂ ಫಾತ್ರಾಕ್ ಮನ್ ಆಸ್ನಾ ತಾಂಕಾ ಸಂವೆದನಾ ಆಸ್ನಾ ಆಮ್ಚಿ ಮನ್ಶಾಂಚಿ ಹೀಚ್ ಗತ್ ಜಾಲ್ಯಾ ಅಶೆಂ ತೆ ಮಾನ್ಪಾಕ್ ಲಾಗ್ತಲೆಂ ತೆನ್ನಾ ಮಾತ್ ತಾಂಕಾ ಅಜಿಬಾತ್ ವಾಯ್ಟ್ ದಿಸ್ಚೆಂ ನಾ ಮಾಗೀರ್ ಮ್ಹಣಾತ್ ರಾವಾತ್ ಘಾಟಿ. ಘಾಟಿ ಹಿ ಕವಿತಾ ಸಾದೀಶಿ ದಿಸ್ತಾ ಪೂಣ್ ತಾತುಂತ್ ಜಿಣೆಚೊ ಅರ್ಥ್ ಭರಿಲ್ಲೊ ಮ್ಹಾಕಾ ದಿಸ್ತಾ. ಆಮಿ ಸಗ್ಳೆ ದೆವಾಚಿ ರಚ್ಣೂಕ್ ದೆಖೂನ್ ಆಮಿ ಕೊಣಾಂಕ್ ತಾಂಚ್ಯಾ ದೆಖ್ಣಯಾ ವಯ್ಲ್ಯಾನ್ ವಾ ರಂಗ್ ರುಪಾಕ್ ಲಾಗೂನ್ ನಾವಾಂ ದವ್ರುಂಕ್ ಶಕ್ನಾ ತೆಂ ಮನೀಸಪಣಾಚ್ಯಾ ವಿರುಧ್ದ್ ವತ್ಲೆಂ ಘಾಟಿ ಹಿ ಕವಿತಾ ಆಮ್ಕಾಂ ಹಾಚೀಯ್ ಜಾಣೀವ್ ಕರುನ್ ದಿತಾ ಅಶೆಂ ಮ್ಹಜೆಂ ಮತ್. ಫಾಮಾದ್ ದಕ್ಷಿಣ್ ಆಫ್ರೀಕೆಚೊ ऱಾಷ್ಟ್ರಪತಿ ಶ್ರಿ ನೆಲ್ಸನ್ ಮಂಡೆಲಾನ್ ಮ್ಹಣ್ಲಾಂ Everyone can rise above their circumstances and achieve success if they are dedicated to and passionate about what they do. ಜಣ್ ಎಕ್ಲ್ಯಾನ್ ಆಪ್ಲೆಂ ಕಾಮ್ ಮನ್ ಲಾವ್ನ್ ಕರೀತ್ ತರ್ ಜೈತ್ ಆಪ್ಸುಕ್ ಮೆಳ್ಟಲೆಂ ಬರೆಂ ಕಾಮ್ ಕರತ್ಲ್ಯಾಕ್ ಬರಿ ವಾಗ್ಣೂಕ್ ಮೆಳ್ಪಾಕ್ ಜಾಯ್ ಅಶೆಂ ಮ್ಹಕಾ ದೀಸ್ತಾ. ಘಾಟಿ ಮ್ಹೂಣ್ ತಾಂಕಾ ನಾವಾ ದವ್ರುನ್ ಆಮಿ ಕಿತೆಂ ಸಾದ್ಪಾಕ್ ಸೊದ್ತಾ ಕಾಯ್ ? ತಾಂಚ್ಯಾ ವಿಣೆ ಆಮ್ಚಿಂ ಕಾಮಾಂ ಜಾವ್ಪಾಚಿ ನಾ ಹೆ ಸತ್ ಜ್ಯಾ ದೀಸಾ ಆಮಿ ಜಾಣಾ ಜಾತ್ಲೆ ತ್ಯಾ ದೀಸಾ ಸಾವ್ನ್ ಘಾಟಿ ಹೆಂ ಪಾಲುಪದ್ ಮ್ಹಣ್ಪಾಚೆ ಬಂದ್ ಜಾತ್ಲೆಂ. ಹಿ ಕವಿತಾ ವಚ್ಪ್ಯಾಂಕ್ ಪರತ್ ಪರತ್ ವಾಚೀನ್ ದಿಸ್ತಲಿ ಬಾಯ್ ಸಂಗೀತಾನ್ ಬರೊ ಪ್ರಸ್ನ್ ಮಾಂಡ್ಲಾ ತೊ ಚಾಲು ಘಡ್ಣುಕಿಚೆರ್ ಆದಾರಿಲ್ಲಿ ಅಶಿ ಹಿ ಕವಿತಾ ಮನಾಂತ್ ಭರ್ತಲಿ ಹಾತೂಂತ್ ದುಬಾವ್ ನಾ.
ಎಚ್ ಮನೊಜ್, July 2020
ಆಧ್ಲಿಂ ವಿಶ್ಲೇಶಣಾಂ
1. ಆತ್ಮ್ನಿರ್ಭರ್ (ಗ್ವಾದಲುಪ್ ಡಾಯಸ್)
[Vixlexonn] Ghatti Kovi: Sangeeta Naik
Ghatti (Kovi: Sangeeta Naik)
Tujea ghorakodden
udkache vhorpak paip ...
Fonndd marun marun ang
zhorli mhajea
payachi vatti
hoi hamv ghatti ....
Sopnatlea ghoracheo tujea
ವಿಶ್ಲೇಷಕ್
Manoj J Halarnekar
ಮನೊಜ್ ಜನಾರ್ದನ್ ಹಳರ್ಣೇಕರ್
ಟೊಪಣ್ ನಾವ್ : ಎಚ್ ಮನೊಜ್
ಜಲ್ಮ್ : 19 ಎಪ್ರಿಲ್ 1966
ನಾಮೊ : ‘ಶಾಂತಾಇ’ ಘರ್. ಸಂ. 141/ಎಫ್ ಗ್ರೀನ್ ವ್ಹೆಲಿ, ಚಿಖ್ಲಿ ಗೊಂಯ್
ಮೊ. : 9822441417
ವೆವ್ಸಾಯ್ : ಪಯ್ಲಿಂ ಅವ್ರ್ ಲೆಡಿ ಒಫ್ ಡೆಸ್ತೆರೊ ಹಾಯ್ಸ್ಕೂಲ್ ಬೊಗ್ದಾ ವಾಸ್ಕೊ ಗೊಂಯ್
ಹಾಂಗಾ ಶಿಕ್ಷಕ್ ಮ್ಹಣ್ ವಾವ್ರ್.
ಸಧ್ಯಾ ರೆಜಿನಾ ಮುಂಡಿ ಹಾಯ್ಸ್ಕೂಲ್ ಚಿಖ್ಲಿ ಹಾಂಗಾ ಜೆಷ್ಠ್ ಪರ್ಯವೆಕ್ಷಕ್
ಜಾವ್ನ್ ಆಸಾ. ಹಿಂದಿ, ಕೊಂಕ್ಣಿ ಆನಿ ನೈತಿಕ್ ವಿಜ್ಞಾನ್ ವಿಶ್ಯಾಚೆ ಗೆಲಿ
29 ವರ್ಸಾ ಅಧ್ಯಾಪನ್ ಕಾರ್ಯ್ ಕರ್ತಾ.
• ಕೊಂಕ್ಣಿ ಕವಿತಾ ಆನಿ ಲೆಖ್ ಬರಪ್ ಆವ್ಡಟೊ ಛಂದ್ ಜಾವ್ನ್ ಆಸಾ.
• ‘ಮನೊಭಾವ್’ ಕವಿತಾ ಸಂಗ್ರಹ್ ಪ್ರಕಾಶೀತ್ ಜಾವ್ಚೆ ವಾಟೆರ್ ಆಸಾ.
• ಗೊಂಯ್ಚ್ಯಾ ನೆಮಾಳ್ಯಾಂನಿ ಬರಪ್ ಚಾಲು ಆಸಾ ತಶೆಂಚ್ ಕವಿತಾಯ್ ಪ್ರಕಾಶೀತ್ ಜಾಲ್ಯಾ.
• ಅಖಿಲ್ ಗೊಂಯ್ ಕೊಂಕ್ಣಿ ಮಾಧ್ಯಮೀಕ್ ಶಿಕ್ಷಕ್ ಸಂಘ್ಟನೆಚೊ ಉಪಾಧ್ಯಕ್ಷ್ ಜಾವ್ನ್ ಆಸಾ.
• {U.A.} ಯು.ಎ ಅಂಡರಎಸ್ಟೆಂಡೀಂಗ್ ಎನಾಲಿಸಿಸ್ ಹಿ ಭುರ್ಗ್ಯಾ ಖಾತೀರ್ ಆನಿ ಶಿಕ್ಷಕಾಂ ಖಾತೀರ್ ‘ನಿತಿ ಮುಲ್ಯಾಂ ಆತ್ಮಸಾಂತ್ ಕಶಿ’ ಕರಪ್ ಹಾಚೆರ್ ಆದಾರೀಲ್ಲಿ ಶಿಕ್ಷಣೀಕ್ ಕಾರ್ಯಾವಳ್ ತಾಲುಕಾ ಮಳಾರ್ ಟಿ.ಯಲ್.ಯಸ್.ಸೀಚ್ಯಾ ಪಾಲ್ವಾನ್ ವೆಗ್-ವೆಗ್ಳ್ಯಾ ಸ್ಕುಲಾಂನಿ ಘಡೊವ್ನ್ ಹಾಡ್ಲ್ಯಾ.
• ಸರ್ವ್ ಶಿಕ್ಷಾ ಅಭಿಯಾನಾಚೊ ತಾಲುಕಾ ಮಳಾರ್ ಪ್ರಶಿಕ್ಷಕ್ ನಾತ್ಯಾನ್ ವಾವ್ರ್.
• ಗೊಂಯ್ ರಾಷ್ಟ್ರಿಯ್ ಮಾಧ್ಯಮೀಕ್ ಶೀಕ್ಷಾ ಅಭಿಯಾನಾಚ್ಯಾ ಮಳಾರ್ ಪ್ರಶಿಕ್ಷಕ್ ನಾತ್ಯಾನ್ ವಾವ್ರ್.
• ಗೊಂಯ್ ಮಾಧ್ಯಮೀಕ್ ಆನಿ ಉಚ್ಚ್ ಮಾಧ್ಯಮೀಕ್ ಶಿಕ್ಷಣ್ ಮಂಡಳ್ ಆಲ್ತು ಬೆತಿಂ – ಪರ್ವರಿ, ಗೊಂಯ್ ಹಾಚೊ ವೆಗ್-ವೆಗ್ಳ್ಯಾ ಮಳಾಚೆರ್ ವಾವ್ರ್.
• ಚಿಖ್ಲಿ ಆನಿ ಬೊಗ್ಮಾಳೊ ಲಾಯನ್ಸ್ ಕ್ಲಬಾಚ್ಯಾ ವತೀನ್ ಶಿಕ್ಷಣ್ಕ್ಷೆತ್ರಾಂತ್ಲ್ಯಾ ಯೊಗ್ದಾನಾಖಾತೀರ್ ಭೌಮಾನ್ 2011.
• ಯುವಾ ಶಕ್ತಿ ಸಾಮಾಜಿಕ್ ಸಂಸ್ಥಾ ನಾಶಿಕ್ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2012 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
• ರೊಟ್ರಿ ಕ್ಲಬ್ ವಾಸ್ಕೊ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2016 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
• ಇನರ್ ವ್ಹೀಲ್ ಕ್ಲಬ್ ವಾಸ್ಕೊ ಹಾಂಚೊ ರಾಷ್ಟ್ರೀಯ್ ಸಮಾಜ್ ಪ್ರಬೊಧನ್ ಪುರಸ್ಕಾರ್ 2016 ಚೊ ಆದರ್ಶ್ ಶಿಕ್ಷಕ್ ಪುರಸ್ಕಾರ್.
