[ಸಂಪಾದಕೀಯ್ - 38] ಕೊಂಕಣಿಕ್ ತರ್ಜಣ್ ಆನಿ ಲಿಪ್ಯಂತರಾಚಿ ಗರ್ಜ್
ಇಸ್ಕೊಲಾಚ್ಯಾ ದಿಸಾಂನಿ ಟಿಚೆರಿನ್ ಆಮ್ಕಾಂ ಏಕ್ ಕಾಡಿ ದಿವುನ್ ತಿ ಮೊಡುಂಕ್ ಸಾಂಗ್ತಾನಾ ಆಮಿ ಸಲೀಸಾಯೆನ್ ಮೊಡ್ಲಿ ದೆಕುನ್ ದೋನ್ ಕಾಡಿಯೊ ದಿವ್ನ್ ತ್ಯೊ ಮೊಡುಂಕ್ ಸಾಂಗ್ತಾನಾ ಆಮಿ ತ್ಯೊ ಮೊಡ್ಲ್ಯೊ ದೆಕುನ್ ತೀನ್.. ಚ್ಯಾರ್.. ಅಶೆಂ ಆಮಿ ಮೊಡುನ್ ಗೆಲ್ಲೆಪರಿಂಚ್ ಟಿಚೆರಿನ್ ಜೆದ್ನಾಂ ಧಾ-ಭಾರಾ ಕಾಡಿಯೊ ದಿವುನ್ ತ್ಯೊ ಮೊಡುಂಕ್ ಸಾಂಗ್ತಾನಾ ಆಮ್ಚ್ಯಾನ್ ತೆಂ ಜಾಲೆಂನಾ. ’ಜೊಡ್ಲ್ಯಾರ್ ತಾಕತ್ ಯೆತಾ ಮೊಡ್ಲ್ಯಾರ್ ತಿ ವೆತಾ’ ಲಿಸಾಂವ್ ಆಮಿ ಆಮ್ಚ್ಯಾ ಇಸ್ಕೊಲಾಚ್ಯಾ ದಿಸಾಂನಿ ಶಿಕುನ್ ಆಯಿಲ್ಲ್ಯಾಂವ್. ಖಂಯ್ಚೀಯ್ ಸಮಾಜ್ ಜೆದ್ನಾಂ ಎಕೆಕಾ ನಿಬಾಕ್ ಸೊಧುನ್ ಎಕಾಮೆಕಾ ಮೊಡುಂಕ್ ಆಯ್ತಿ ಜಾತಾ ತಾಚ್ಯಾಕೀ ವಿನಾಶೆಚೆಂ ಹಾತೆರ್ ಹೆರ್ ಕಿತೆಂಯ್ ಆಸುಂಕ್ ಸಾಧ್ಯ್ ನಾ. ಕೊಂಕಣಿ ಭಾಸೆಚಿ ಆನಿ ಸಾಹಿತ್ಯಾಚಿ ಪರಿಗತ್ ಆಜ್ ಖಂಯ್ಚ್ಯಾ ಪಾಂವ್ಡಾರ್ ಆಸಾ? ಆಮ್ಕಾಂ ಕೊಂಕಣಿ ಭಾಸೆಚಿ, ಕೊಂಕಣಿ ಸಾಹಿತ್ಯಾಚಿ ಮುಳಾವಿ ಸಮ್ಜಣಿ ಆಸಾಗಿ? ಆಸಾ ತರ್ ಕಿತ್ಲಿ ಆಸಾ? ಹಿಂ ಸವಾಲಾಂ ಆಮಿ ಅಮ್ಕಾಂ ವಿಚಾರ್ಚಿ ಗರ್ಜ್ ಆಸಾ. ಕೊಂಕಣಿ ಭಾಸೆವಿಶ್ಯಾಂತ್ ಚರಿತ್ರೆವಿಶಿಂ ವಾರ್ಯಾರ್ ಉಲಯ್ತೆಲಿಂ ತಶೆಂಚ್ ತೆಂ ಆಯ್ಕುನ್ ಮತಿಚೆ ಕಾನ್-ದೊಳೆ ಧಾಂಪುನ್ ಪಾತ್ಯೆತೆಲಿಂ ಜಾಯ್ತಿಂ ಆಸಾತ್ ಪುಣ್ ಖರೆಂಪಣಿ ಕೊಂಕಣಿ ಭಾಸೆಂತ್ ಆಸ್ಚ್ಯಾ ಸಾಹಿತ್ಯಾಚಿ ಒಳೊಕ್, ಮಾಹೆತ್ ಆಸ್ಚಿ ಗರ್ಜ್ ಆಮ್ಕಾಂ ಆಸಾ. ಸಮ್ಜಣಿ ಆನಿ ಜಾಣ್ವಾಯ್ ವೆಗ್ಳೊ ವಿಶಯ್. ಕೊಂಕಣಿ ಸಾಹಿತ್ಯಾಚಿ ಸುರ್ವಾತ್ ರೊಮಿ ಲಿಪಿಂತ್ ಜಾವ್ನ್ ಉಪ್ರಾಂತ್ ಕನ್ನಡ ಲಿಪಿಯೆಂತ್ ಕೊಂಕಣಿ ಸಾಹಿತ್ಯ್ ಉದೆಲೆಂ ಆನಿ ತ್ಯೇ ಉಪ್ರಾಂತ್ ದೇವ್ವಾಗರಿ ಲಿಪಿಯೆಂತ್ ಸಾಹಿತ್ಯ್ ಉದೆಲೆಂ. ಆಯ್ಚ್ಯಾ ಡಿಜಿಟಲ್ ಕಾಳಾರ್ ಆಮಿ ಕೊಂಕಣಿ ಸಾಹಿತ್ಯಾಚೆಂ (ಖಂಚ್ಯಾಯ್ ಲಿಪಿಯೆಂನಿ ತೆಂ ಆಸುಂ) ಸಮೀಕ್ಶಾ, ಅಭ್ಯಾಸ್ ಕರುಂಕ್ ವಾಟ್ ಕೆಲ್ಯಾ ವಾ ತ್ಯಾ ದಿಶೆನ್ ಕಾಮ್ ಕೆಲಾಂ? ಹೆಂ ಚಿಂತಪ್ ಗರ್ಜೆಚೆಂ.
ಫಕತ್ ದುಡು ಆನಿ ಪುರಸ್ಕಾರ್ ಎಕಾ ಸಾಹಿತ್ಯಾಕ್ ಘಟಾಯ್ ದೀಂವ್ಕ್ ಸಕಾನಾ. ಜಾಂವ್ ರೊಮಿ, ವಾ ಕನ್ನಡ ವಾ ನಾಗರಿ. ಜೊ ಬುನ್ಯಾದಿ ಸಾಹಿತ್ಯಿಕ್ ವಾವ್ರ್ ಕೆಲ್ಲ್ಯಾ ಕೊಣೆಂಯ್ ದುಡ್ವಾಂತ್ ಜಾಂವ್ ಪುರಸ್ಕಾರಾ ರುಪಾರ್ ಜಾಂವ್ ಜೊಡ್ಲ್ಲೆಂ ಕಿತೆಂಚ್ ನಾ ಮ್ಹಳ್ಳೆಂ ಅಡ್ಹೂಕ್ ಸತ್. ಆಜ್ ಪುರಸ್ಕಾರ್, ಪ್ರಶಸ್ತ್ಯೊ, ಇನಾಮಾಂ, ಮಾನ್-ಸಮ್ಮಾನ್, ದುಡು ಸಗ್ಳೆಂ ಯಥೇಶ್ಟ್ ಮಾಪಾನ್ ಆಸಾ ಪುಣ್ ಬರವ್ಪಿ ನಾಂತ್, ಕಿತ್ಯಾಕ್ ಮ್ಹಳ್ಯಾರ್ ವಾಚ್ಪಿ ಉಣೆ ಜಾಲ್ಯಾತ್. ಹ್ಯಾ ಸಂಕೀರ್ಣ್ ಪರಿಗತೆಂತ್ ಪರತ್ ಆಮಿ ಪಯ್ಲೆಂಚ್ ಮೊಡ್ಲ್ಲ್ಯಾಕ್ ಚ್ಯುರೆ ಕರುನ್ ಅಪ್ಲ್ಯಾ ಆಬ್ಲೇಸಾಚ್ಯಾ ಸುಪ್ತ್ ಇರಾದ್ಯಾಪಾಸತ್ ಪಯ್ಲೆಂಚ್ ಮೊಡ್ಲೆಲ್ಯಾ ಚ್ಯುರಾಂಕ್ ಚ್ಯುರೆ ಕರ್ನ್ ಅಮ್ಕಾಂಚ್ ಆಮಿ ರಾಯ್ ಕೆಲಾ. ಜೆದ್ನಾಂ ಆಮ್ಚಿ ನದರ್ ಆಮ್ಚ್ಯಾ ತಳ್ಹಾತಾಚ್ಯಾಕೀ ಮುಕಾರ್ ವಚಾನಾ ತರ್ ಫುಡಾರಾವಿಶಿಂ ಚಿಂತಪ್ ಕಶೆಂ ಕಟ್ಟ್ಯಾಂತ್ ರಿಗ್ಚೆಂ?
ಸಾಹಿತ್ಯ್ ಏಕ್ ವಿಸ್ತಾರ್ ಶೆತ್, ಹಾಂತ್ಲೆಂ ಫಕತ್ ಏಕ್ ಪ್ರಕಾರ್ ಹಾಂವ್ ಮ್ಹಜ್ಯಾ ಉಲವ್ಪಾಕ್ ಘೆತಾಂ; ಕನ್ನಡ ಲಿಪಿಯೆಚ್ಯಾ ಕೊಂಕಣಿಂತ್ ತರ್ಜಣ್/ಲಿಪ್ಯಂತರ್ ಮೊಟ್ವೊ ಕಥಾ.
ತರ್ಜಣ್ ಮ್ಹಳ್ಯಾರ್ ಫಕತ್ ಎಕಾ ಭಾಸೆಥಾವ್ನ್ ಅನ್ಯೇಕಾ ಭಾಸೆಕ್ ಬದಲ್ಚಿಂ ಉತ್ರಾಂ ಮ್ಹಳ್ಳೆಂ ಚುಕಿಚೆಂ ಕಲ್ಪನ್ ಸಭಾರಾಂಚ್ಯಾ ಮತಿಂತ್ ಆಸಾ ಪುಣ್ ತರ್ಜಣೆಚೊ ಅರ್ಥ್ ವಿಸ್ತಾರ್ ಜಾವ್ನಾಸಾ. ತರ್ಜಣ್ ಮ್ಹಳ್ಯಾರ್ ಎಕಾ ಸಂಸ್ಕೃತೆಚಿ ಒಳೊಕ್ ಅನ್ಯೇಕಾ ಸಂಸ್ಕೃತಿ ಪಾಳ್ತೆಲ್ಯಾಂಕ್ ಸಾಹಿತ್ಯಾಮುಖಾಂತ್ರ್ ಕರುನ್ ದಿಂವ್ಚಿ ಏಕ್ ಪ್ರಕ್ರಿಯಾ.
ಹೋಮರಾಚ್ಯಾ ಫಾಮಾದ್ ಅಣ್ಬವಾಂಚೆಂ (Homer’s classic Odyssey) ಲ್ಯಾಟಿನ್ ಭಾಸೆಂತ್ ತರ್ಜಣ್ ಕೆಲ್ಲೊ ಲಿವಿಯೊ ಆಂಡ್ರೊನಿಕೊನ್ (Livio Andronico) ಯುರೋಪಾಂತ್ಲೊ ಪಯ್ಲೊ ತರ್ಜಣ್ಕಾರ್; ಕಾಂಯ್ ಕ್ರಿಸ್ತ್ ಪೂರ್ವ್ 250 ಇಸ್ವೆಂತ್. ಹಾಣೆಂ ಫಕತ್ ಮೂಳ್ ಭಾಸೆಚಿಂ ಉತ್ರಾಂ ಬದ್ಲುನ್ ಶೆವೊಟ್ ಭಾಸೆಂತ್ ಬರಯಿಲ್ಲೆಂ.
ಪುಣ್ ಜೆರಾಲ್ ರಿತಿನ್ ಹಿಬ್ರೂ ಭಾಸೆಂತ್ಲೊ ಬಾಯ್ಬಲ್ ತಿಸ್ರ್ಯಾ ಶೆಕ್ಡ್ಯಾಂತ್ ಪಯ್ಲೆಂ ತರ್ಜಣ್ ಜಾಲ್ಲೆಂ ಪುಸ್ತಕ್. ಹ್ಯಾ ಉಪ್ರಾಂತ್ ಬಾಯ್ಬಲ್ ಸಂಸಾರಾಚ್ಯಾ ಚಡ್ತಾವ್ ಸರ್ವ್ ಭಾಸೆಂನಿ ತರ್ಜಣ್ ಜಾಲೊ.
ಜಾಗತಿಕ್ ಸ್ಥಾರಾರ್ ಸಯ್ತ್ ತರ್ಜಣೆಂತ್ ಧಾರ್ಮಿಕಾಂನಿ ಮಹತ್ವಾಚೆಂ ಯೋಗ್ದಾನ್ ದಿಲಾಂ. ಮೆಸಪೊಟೆಮಿಯಾ ಕಾಳಾಂತ್ ಗಿಲ್ಗಮೆಶ್ (ಸುಮೆರಿಯನ್ ಕವಿತಾ) ಆಸಿಯಾಂತ್ ಜಾಲ್ಲೆಂ ಪಯ್ಲೆಂ ತರ್ಜಣ್. ಹಾಚೆಶಿವಾಯ್ ಚಾಯ್ನಾಂತ್ಲ್ಯಾ ಜಾಯ್ತ್ಯಾ ಬುಧಿಸ್ತಾಂನಿ ಭಾರತೀಯ್ ಧಾರ್ಮಿಕ್ ಗೃಂಥಾಂಕ್ ಚಾಯ್ನೀಸ್ ಭಾಸೆಂತ್ ತರ್ಜಣ್ ಕೆಲಾಂ.
ಸಾಂತ್ ಜೆರೊಮಾಕ್ ’ತರ್ಜಣೆಚೊ ಬಾಪುಯ್’ ಮ್ಹಣ್ತಾತ್. ಚೊವ್ತ್ಯಾ ಶೆಕ್ಡ್ಯಾಂತ್ ಹಾಣೆಂ ಗ್ರೀಕ್ ಭಾಸೆಥಾವ್ನ್ ಲ್ಯಾಟಿನ್ ಭಾಸೆಕ್ ಖೂಪ್ ತರ್ಜಣೆಚೆಂ ಕಾಮ್ ಕೆಲಾಂ.
ಮೊಟ್ವ್ಯಾ ಕಾಣಿಯಾಂಚೊಚ್ ಪ್ರಕಾರ್ ಘೆತ್ಲೊ ತರ್ ಇಂಗ್ಲಿಶಾಂತ್ ಜೆಫ್ರಿ ಚೋಸರಾಚೊ ’ಕ್ಯಾಂಟರ್ಬರಿ ಟೇಲ್ಸ್ (Canterbury Tales) ಕಾಂಯ್ 14ವ್ಯಾ ಶೆಕ್ಡ್ಯಾಂತ್ ಬರಯಿಲ್ಲೊ ಪಯ್ಲೊ ಮೊಟ್ವ್ಯಾ ಕಥೆಂಚೊ ಜಮೊ.
ಕೊಂಕಣಿ ಸಾಹಿತಿಕ್ ಸುರ್ವಾತ್ ಸಯ್ತ್ ಜಾಲ್ಲಿ ತರ್ಜಣೆ ಮುಖಾಂತ್ರ್. ಜಾಂವ್ ತಿಂ ಧಾರ್ಮಿಕ್ ಬರ್ಪಾಂ, ಕಾಂತಾರಾಂ, ಗಿತಾಂ, ಮಾಗ್ಣಿಂ, ವಾಂಜೆಲ್, ಸಾಂತಾಂಚಿ ಜಿಣ್ಯೆಕಥಾ ತಶೆಂಚ್ ಹೆರ್ ಪ್ರಕಾರಾಚೆಂ ತರ್ಜಣ್.
ಕನ್ನಡ ಲಿಪಿಯೆಂತ್ಲೆಂ ಸಾಹಿತ್ಯ್ ಅಭ್ಯಾಸ್ ಕರ್ತಾಸ್ತಾಂ ಸಮ್ಜುಂಕ್ ಮೆಳ್ತಾ ಕನ್ನಡ ಲಿಪಿಯೆಂತ್ಲೆಂ ಪಯ್ಲೆಂ (1912 ಇಸ್ವೆಂತ್) ಕೊಂಕಣಿ ನೆಮಾಳೆಂ ’ಕೊಂಕಣ್ ದಿರ್ವೆಂ’ ಯೆಂವ್ಚ್ಯಾದಿಂಚ್ ತರ್ಜಣೆಚಿಂ ಪುಸ್ತಕಾಂ ಛಾಪುನ್ ಆಯಿಲ್ಲಿಂ. 1918 ಇಸ್ವೆಂತ್ ಹ್ಯಾ ನೆಮಾಳ್ಯಾಚೆಂ ಸಂಪಾದಕ್ಪಣ್ ಚಲಯಿಲ್ಲ್ಯಾ ಜುಂವಾವ್ ಪೆದ್ರು ಸೊಜಾನ್ ಕೊಂಕಣಿ ಮೊಟ್ವ್ಯಾ ಕಾಣಿಯಾಂಚೆರ್ ಬುನ್ಯಾದಿಚೊ ವಾವ್ರ್ ಕೆಲ್ಲೊ ಭೋವ್ ಮಹತ್ವಾಚೊ. ಹಾಣೆಂ ಸಭಾರ್ ಕೊಂಕಣಿ ಮೊಟ್ವ್ಯಾ ಕಾಣಿಯಾಂಕ್ ಇಂಗ್ಲಿಶ್ ಭಾಸೆಥಾವ್ನ್ ಕೊಂಕಣಿಕ್ ತರ್ಜಣ್ ಕೆಲ್ಯಾಂತ್. 1912 ಇಸ್ವೆಂತ್ ’ಪಾರ್ವೊ’, ತಶೆಂಚ್ ’ಗುಲೊಬಾಚೆಂ ಝಡ್’ ಪುಸ್ತಕಾಂ ಕನ್ನಡ ಲಿಪಿಯೆಂತ್ಲ್ಯಾ ಕೊಂಕಣಿಂತ್ ಪರ್ಗಟುನ್ ಆಯಿಲ್ಲಿಂ ಪಯ್ಲಿಂ ಮೊಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ. 1914 ಇಸ್ವೆಂತ್ ’ಕೆನೇರಿ ಸುಕ್ಣೆಂ’, ’ಕೊಂಕಣಿ ಕಥಾ’ ಹಿಂ ಸರ್ವ್ ಜುಂವಾವ್ ಪೆದ್ರು ಸೊಜಾನ್ ತರ್ಜಣ್ ಕರುನ್ ಪರ್ಗಟ್ಲೆಲಿಂ ಕೊಂಕಣಿ ಮೊಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ. 1915 ಇಸ್ವೆಂತ್ ಫಾ.ಜೇಮ್ಸ್ ಸಿಕ್ವೇರಾಚೆಂ ತರ್ಜಣ್ ಕಾಣಿಯಾಂಚೆಂ ಪುಸ್ತಕ್ ’ಜೆನೆವಿವ್’, 1928 ಇಸ್ವೆಂತ್ ಫಾ.ಸಿ.ಸಿ.ಗೊನ್ಸಾಲ್ವಿಸಾಚೆಂ ’ಸಯ್ರೊ ಬಾಬ್’, 1941 ಇಸ್ವೆಂತ್ ಫಾ.ಸಿಲ್ವೆಸ್ಟರ್ ಮಿನೇಜಾಚೆಂ ’ಜೆನೆವಿವ್’ ತರ್ಜಣ್ ಮೊಟ್ವ್ಯಾ ಕಾಣಿಯಾಂಚಿಂ ಪುಸ್ತಕಾಂ.
ಭಾರತಾಕ್ ಸ್ವಾತಂತ್ರ್ ಮೆಳ್ಲ್ಲ್ಯೆ ಉಪ್ರಾಂತ್ ಕೊಂಕಣಿ ಸಾಹಿತ್ಯ್ ಖರಿಚ್ ಜಿವಾಳ್ಳಿ. 1960 ಇಸ್ವೆಂತ್ ಫಾ.ಸಿಲ್ವೆಸ್ಟರ್ ಮಿನೇಜಸಾನ್ ಕೆವಿನ್ ಸ್ಮಿಡಾಚ್ಯೊ ಮೊಟ್ವ್ಯಾ ಕಾಣಿಯಾಂಚೆಂ ತರ್ಜಣ್ ಕೆಲ್ಲೆಂ ಪುಸ್ತಕ್ ’ಕೊಂಕಣ್ ಕಥಾವಳ್’ ಪರ್ಗಟ್ಲೆಂ. 1961 ಇಸ್ವೆಂತ್ ’ಜೆನೆವಿವ್’ ಪುಸ್ತಕ್ ದೋನ್ ಪಾವ್ಟಿಂ ಛಾಪೊನ್ ಆಯ್ಲೆಂ. 1966 ಇಸ್ವೆಂತ್ ಸಿರಿವಂತಾಚೆಂ ’ಝೆಲಿನ್ ಆನಿ ಡೀನಾ (ಲೀಯೊ ಟೋಲ್ಸ್ಟಾಯ್)’ ತರ್ಜಣ್ ಮೊಟ್ವ್ಯಾ ಕಾಣಿಯಾಂಚೆಂ ಪುಸ್ತಕ್, ’ಪರ್ವತಾ ವಯ್ಲೊ ಪ್ರಕಾಸ್’ ಜರ್ಮನ್ ಭಾಸೆಂತ್ಲ್ಯಾ ಮೊಟ್ವ್ಯಾ ಕಾಣಿಯಾಂಚೆಂ ತರ್ಜಣ್ ಜಾವ್ನ್ ಪರ್ಗಟ್ ಜಾಲ್ಲೆಂ ಪುಸ್ತಕ್. 1970 ಇಸ್ವೆಂತ್ ’ಫುಲಾಂಚಿ ದಾಲಿ (ಫಾ.ಸಿಲ್ವೆಸ್ಟರ್ ಮಿನೇಸ್)’, 1973 ಇಸ್ವೆಂತ್ಲೆಂ ಹರ್ಮಿಯೊಯ್ಚ್ಯಾ ಮೊಟ್ವ್ಯಾ ಕಥೆಂಚೆಂ ಪ್ರದೀಪಾನ್ ಕೆಲ್ಲೆಂ ತರ್ಜಣ್ ಪುಸ್ತಕ್ ’ಕಿನ್ನರಿ ಕಥಾ’. ತಶೆಂಚ್ ಎ.ಎಕ್ಸ್.ಪತ್ರಾವೊನ್ ಕೆವಿನ್ ಫ್ಲೋಡ್ ಸ್ಮಿಡಾಚ್ಯಾ ಕಥೆಂಚೆಂ ಕೊಂಕಣಿ ತರ್ಜಣ್ ಕೆಲ್ಲೆಂ ಪುಸ್ತಕ್ ’ಲ್ಹಾನ್ ಗಾಯಕಿ’, 1986 ಇಸ್ವೆಂತ್ ದೊ.ವಿಲ್ಲಿ ಡಿ’ಸಿಲ್ವಾನ್ ಯಶವಂತ ಚಿತ್ತಾಲಚ್ಯಾ ಕನ್ನಡ ಮೊಟ್ವ್ಯಾ ಕಾಣಿಯಾಂಚೆಂ ತರ್ಜಣ್ ಕೆಲ್ಲೆಂ ಪುಸ್ತಕ್ ’ಖೆಳ್ ಆನಿ ಹೆರ್ ಕಥಾ’, ಕಾಂಯ್ 1998 ಇಸ್ವೆಂತ್ ನಾ.ಡಿ’ಸೋಜಾಚ್ಯಾ ಕನ್ನಡ ಕಾಣಿಯಾಂಚೆಂ ಕೊಂಕಣಿ ತರ್ಜಣ್ ಕರುನ್ ರಾಕ್ಣೊ ಪ್ರಕಾಶನಾನ್ ಪರ್ಗಟ್ಲ್ಲೆಂ ಪುಸ್ತಕ್ ’ಇಗರ್ಜೆ ಭಂವ್ತಿಲಿಂ ಘರಾಂ’, 1995 ಇಸ್ವೆಂತ್ ಡಾ.ಕೆ.ಪೂರ್ಣಿಮಾ ಭಟ್ ಹಿಣೆಂ ಕೊಂಕಣಿಕ್ ತರ್ಜಣ್ ಕೆಲ್ಲೆಂ ಮೊಟ್ವ್ಯಾ ಕಾಣಿಯಾಂಚೆಂ ಪುಸ್ತಕ್ ’ಮೊಡ್ಡಾಕ್ ಪಾವ್ಸಾಚೆಂ ಸೊಪ್ಪನ್’, 1997 ಇಸ್ವೆಂತ್ ದೊ.ವಿಲ್ಲಿ ಡಿ’ಸಿಲ್ವಾನ್ ಕೆ. ಪೂರ್ಣಚಂದ್ರ ತೇಜಸ್ವಿಚ್ಯಾ ಕಾಣಿಯಾಂಚೆಂ ಕೆಲ್ಲೆಂ ತರ್ಜಣ್ ಪುಸ್ತಕ್ ’ಕುಬಿ ಆನಿ ಇಯಾಲ’.
2005 ಇಸ್ವೆಂತ್ ಮಿಕ್ಮ್ಯಾಕ್ಸಾನ್ ತರ್ಜಣ್ ಕೆಲ್ಲೆಂ ನಿರಂಜನಾಚ್ಯಾ ಕಥೆಂಚೆಂ ತರ್ಜಣ್ ಪುಸ್ತಕ್ ’ನಿಮಾಣೊ ಗಿರಾಯ್ಕ್’, 2010 ಇಸ್ವೆಂತ್ಲೆಂ ’ತರ್ನ್ಯೊ ಆಂಕ್ರ್ಯೊ’, 2014 ಇಸ್ವೆಂತ್ಲಿಂ ’ಜಾದೂ ಡೋಲ್’ (ಗೌರಿ ಮಲ್ಯಾ), ’ಅಪಹರಣ್’ (ಜೆರಾಲ್ಡ್ ವಿ. ಕಾರ್ಲೊ), 2018 ಇಸ್ವೆಂತ್ ’ಪಾಟಿಂ ಪರ್ತಲ್ಲಿಂ ಲ್ಹಾರಾಂ’ (ವಾಲ್ಟರ್ ಲಸ್ರಾದೊ), 2020 ಇಸ್ವೆಂತ್ ಡೊ.ಜೀತಾ ಲೋಬೊಚ್ಯಾ ಇಂಗ್ಲಿಶ್ ಮೊಟ್ವ್ಯಾ ಕಾಣಿಯಾಂಚೆಂ ಕೊಂಕಣಿ ತರ್ಜಣ್ ಕೆಲ್ಲೆಂ ಪುಸ್ತಕ್ ದೊ.ವಿಲ್ಲಿ ಡಿ’ಸಿಲ್ವಾಚೆಂ ’ಕಮ್ರಾಬಾಂದ್’ ಪುಸ್ತಕ್ ಪ್ರಮುಕ್ ಪುಸ್ತಕಾಂ.
ಲಿಪ್ಯಂತರಾಚಿಂ ಪುಸ್ತಕಾಂ: 2008 ಇಸ್ವೆಂತ್ 20ವ್ಯಾ ಶೆಕ್ಡ್ಯಾಚ್ಯೊ ಕೊಂಕಣಿ ಕಾಣಿಯೊ 2019 ಇಸ್ವೆಂತ್ ’ಸುರ್ಯೊ ಉದೆತಾ' (ಲಿಪ್ಯಂತರ್: ವಲ್ಲಿ ಕ್ವಾಡ್ರಸ್) ಕರ್ನಾಟಕ್ ಕೊಂಕಣಿ ಸಾಹಿತ್ಯ್ ಅಕಾಡೆಮಿನ್ ಪರ್ಗಟ್ಲಾಂ. 2021 ಇಸ್ವೆಂತ್ ’ಸುರ್ಯೊ ಉದೆಲಾ’ (ಲಿಪ್ಯಂತರ್: ವಲ್ಲಿ ಕ್ವಾಡ್ರಸ್). ’ಕಥಾವಿಹಾನ್’ (2021), ’ಚಲ್ ದೋನ್ ಚಂದ್ರಾಂಕ್’ (2021) ಮ್ಹಳ್ಳಿಂ ದೋನ್ ಮೊಟ್ವ್ಯಾ ಕಾಣಿಯಾಂಚೆರ್ ಅಧ್ಯಯನ್ ಕೆಲ್ಲ್ಯಾ ಪ್ರಬಂಧಾಂಚಿಂ ಲಿಪ್ಯಂತರ್ ಜಾಲ್ಲಿಂ ಡಿಜಿಟಲ್ ಪುಸ್ತಕಾಂ. 2020 ಇಸ್ವೆಂತ್ ಸುರು ಜಾಲ್ಲೆಂ ’ಪಯ್ಣಾರಿ ಡಿಜಿಟಲ್ ಕೊಂಕಣಿ ಸಾಹಿತ್ಯಿಕ್ ಜರ್ನಲ್’ ಏಕ್ ಮಾತ್ ತೀನ್ ಲಿಪಿಯಾಂನಿ ಲಿಪ್ಯಂತರ್ ಜಾವ್ನ್ ಪರ್ಗಟ್ಚೆಂ ಡಿಜಿಟಲ್ ಸಾಹಿತ್ಯಿಕ್ ಜರ್ನಲ್.
ಜೆರಾಲ್ ಸಮ್ಜಣೆಂತ್ ತರ್ಜಣೆವಿಶ್ಯಾಂತ್ ಪುರ್ತಿ ಮಾಹೆತ್ ಆಸ್ಚೆ ಬರವ್ಪಿ ತಶೆಂಚ್ ಸಂಪಾದಕ್ ಭೋವ್ ಥೊಡೆ. ತರ್ಜಣ್ ಮ್ಹಳ್ಯಾರ್ ಉಣ್ಯಾ ಮೊಲಾಚೆಂ ವಾ ನಕ್ಕಲ್ ಕರ್ಚೆಂ ಮ್ಹಳ್ಳೆಂ ಚಿಂತಪ್ ಆಸ್ಚೆ ಚಡ್. ಪುಣ್ ಖೊಲಾಯೆನ್ ಪಳೆಲ್ಯಾರ್ ತರ್ಜಣ್ ಚಡ್ ಮಿನತೆಚೆಂ ತಶೆಂಚ್ ತ್ರಾಸಾಚೆಂ ಕಾಮ್. ಎಕಾ ತರ್ಜಣ್ಕಾರಾಕ್ ಮೂಳ್ (Source language) ತಶೆಂಚ್ ಶೆವೊಟ್ (Destination language) ದೊನ್ಯೀ ಭಾಸೆಂಚಿ ಜಾಣ್ವಾಯ್ ಆಸುಂಕ್ ಜಾಯ್. ಫಕತ್ ಭಾಸೆಚಿ ಜಾಣ್ವಾಯ್ ಆಸ್ಲ್ಯಾರ್ ಮಾತ್ ಪಾವಾನಾ, ಸಂಸ್ಕೃತೆಚಿ ಜಾಣ್ವಾಯ್ ಸಯ್ತ್ ಆಸ್ಚಿ ಗರ್ಜೆಚಿ. ಕಿತ್ಯಾಕ್ ಮ್ಹಳ್ಯಾರ್ ದರೇಕಾ ಭಾಸೆಂತ್ ಏಕ್ ಸಂಸ್ಕೃತಿ ಆಸ್ತಾ ಆನಿ ತ್ಯಾ ಸಂಸ್ಕೃತೆಕ್ ಲಗ್ತಿ ಜಾಲ್ಲಿಂ ಉತ್ರಾಂ/ವಾಖ್ಯಾಂ ಆಸ್ತಾತ್ ತಿಂ ಎಕಾ ಭಾಸೆಥಾವ್ನ್ ಅನ್ಯೇಕಾ ಭಾಸೆಕ್ ತರ್ಜಣ್ ಕರ್ತಾನಾ ಅರ್ಥ್ ಆಸ್ಲೊ ಅಪಾರ್ಥ್ ಜಾಂವ್ಚಿ ಸಾಧ್ಯತಾ ಆಸ್ತಾ.
ಕನ್ನಡ ಲಿಪಿಯೆಚ್ಯಾ ಚಡ್ತಾವ್ ನೇಮಾಳ್ಯಾಂನಿ ತರ್ಜಣ್ ಕಥೆಂಕ್, ಕಾದಂಬರಿಕ್, ಕವಿತೆಂಕ್ ಮಾನ್ ದಿಲಾ. ತರ್ಜಣೆಂತ್ ಪಯ್ಕಿಂತ್ ದೊ.ವಿಲ್ಲಿ ಡಿ’ಸಿಲ್ವಾ, ಎವ್ಲಾಲಿಯಾ ಅಲ್ವಾರಿಸ್, ಸುನಂದ್, ಲಿಯಾಬ್, ವಾಲ್ಟರ್ ಲಸ್ರಾದೊ, ಜೆರಾಲ್ಡ್ ವಿ. ಕಾರ್ಲೊ, ಉಬ್ಬ ಮೂಡ್ಬಿದ್ರಿ ಹಾಣಿಂ ಮೊಟೊ ವಾವ್ರ್ ಕೆಲಾ. ಹೆರ್ ಸಭಾರಾಂನಿ ಸಯ್ತ್; ಮಿಕ್ಮ್ಯಾಕ್ಸ್, ಲಿಯಾಬ್ (ಲಿಯೊ ಡಿಸೋಜ್), ಎಡ್ವಿನ್ ಜೆ.ಎಫ್.ಡಿಸೋಜ್, ಸಿಜ್ಯೆಸ್ ತಾಕೊಡೆ, ಸ್ಟೆಲ್ಲಾ ಡಿಕೊಸ್ತಾ (ನಂದಿನಿ), ಲಿಲ್ಲಿ ಮಿರಾಂದ, ರೇಗಾಮ್ ತಾಕೊಡೆ, ಮೆಲ್ವಿನ್ ರೊಡ್ರಿಗಸ್, ಮಾವ್ರಿಸ್ ಶಾಂತಿಪುರ್, ಕ್ಯಾಥರಿನ್ ರೊಡ್ರಿಗಸ್, ಸೋನಿಯಾ ದೆಕೋಸ್ತಾ, ಕಿಶೂ ಬಾರ್ಕುರ್, ಫಾ.ಚೇತನ್ ಲೋಬೊ, ಸ್ಟೀಫನ್ ಕ್ವಾಡ್ರಸ್, ರಿಚ್ಚಿ ಲಸ್ರಾದೊ ಆನಿ ಹೆರಾಂನಿ ವಾವ್ರ್ ಕೆಲಾ. ಲಿಪ್ಯಂತರಾಚೊ ಬುನ್ಯಾದಿಚೊ ವಾವ್ರ್ ಮಾವ್ರಿಸ್ ಶಾಂತಿಪುರಾನ್ ’ರಾಕ್ಣೊ’ ನೇಮಾಳ್ಯಾಚೊ ಸಹ-ಸಂಪಾದಕ್ ಜಾವ್ನಾಸ್ಲೆಲ್ಯಾ ವೆಳಾರ್ ಕೆಲ್ಲೊ, ಉಪ್ರಾಂತ್ ’ಉಮಾಳೊ’ ನೇಮಾಳ್ಯಾಂತ್ ತರ್ಜಣ್ ಆನಿ ಲಿಪ್ಯಂತರಾಚೊ ಬರೊ ವಾವ್ರ್ ಕೆಲಾ. ಪುಣ್ ಪುಸ್ತಕಾಂ ರುಪಾರ್ ಹೊ ಸರ್ವ್ ವಾವ್ರ್ ಚಡ್ ಜಾವ್ನ್ ಪರ್ಗಟ್ ಜಾಂವ್ಕ್ ನಾ.
ಕನ್ನಡ ಲಿಪಿಯೆಂತ್ಲ್ಯಾ ಕೊಂಕಣಿ ಕಾಣಿಯಾಂಕ್ ಹೆರ್ ಭಾಸೆಂನಿ (ಕನ್ನಡ್, ಇಂಗ್ಲಿಶ್) ತರ್ಜಣ್ ಕೆಲ್ಲ್ಯಾಂ ಪಯ್ಕಿಂತ್ ಆನಂದಾಗರ ಕಿನ್ನಿಗೋಳಿ, ಡೊ.ಗೀತಾ ಶೆಣಯ್, ಗೋಪಲಕೃಷ್ಣ ಗೌಡ, ಸ್ಟೀಫನ್ ಕ್ವಾಡ್ರಸ್ ಆನಿ ಹೆರ್ ಥೊಡಿಂ ಪ್ರಮುಕ್. ವಲ್ಲಿ ವಗ್ಗ ಆನಿ ವಲ್ಲಿ ಕ್ವಾಡ್ರಸ್ ಹಾಣಿಂ ಸ್ವತಾ ಆಪ್ಲಿಂ ಕನ್ನಡ ಲಿಪಿಯೆಚ್ಯಾ ಕೊಂಕಣಿ ಕಾಣಿಯಾಂಚ್ಯಾ ಪುಸ್ತಕಾಂಕ್ ಕನ್ನಡ ಭಾಸೆಕ್ ತರ್ಜಣ್ ಕರುನ್ ಪರ್ಗಟ್ಲ್ಯಾಂತ್; ’ಹೆಗಲ ಶಿಲುಬೆ (ವಲ್ಲಿ ವಗ್ಗ)’, ’ಕಂಗಾಲನ ಕುಕ್ಕೆಹಳ್ಳಿಯ ಕತೆಗಳು (ವಲ್ಲಿ ಕ್ವಾಡ್ರಸ್).
1850 ಇಸ್ವೆಥಾವ್ನ್ 2023 ಇಸ್ವೆ ಮ್ಹಣಾಸರ್ ಕನ್ನಡ ಲಿಪಿಯೆಂತ್ ಜಾಲ್ಲ್ಯಾ ತರ್ಜಣ್ ವಾವ್ರಾಕ್ ಅಂಕ್ಯಾಂನಿ ಉತ್ರಾಂವ್ಚೆಂ ತರ್ - ಫಕತ್ ಏಕ್ ಠಕ್ಕೊ (1%) ಮಾತ್ರ್.
ವಯ್ರ್ ದಾಕಯಿಲ್ಲ್ಯಾ ಅಂಖ್ಯಾಂನುಸಾರ್ ಕನ್ನಡ ಲಿಪಿಯೆಂತ್ ಪುಸ್ತಕಾರುಪಾರ್ ಪರ್ಗಟುನ್ ಆಯಿಲ್ಲ್ಯಾ ಸಾಹಿತ್ಯಾಚೊ ವಿವರ್ ಪಳಯ್ತಾನಾ ಮೊಟ್ವ್ಯಾ ಕಾಣಿಯಾಂಚೆಂ ತರ್ಜಣ್ ಪುಸ್ತಕಾ ರುಪಾಂನಿ ಆಯಿಲ್ಲೆಂ ಭೋವ್ ಉಣೆಂ ದಿಸ್ತಾ. 1900 ಥಾವ್ನ್ 1949 ಕಾಳಾರ್ 7 ಪುಸ್ತಕಾಂ ತರ್ಜಣ್ ಕಾಣಿಯಾಂಚಿಂ ಪರ್ಗಟುನ್ ಆಯ್ಲಿಂ. 1950 ಥಾವ್ನ್ 1999 (ಹಾಕಾ ಹಾಂವ್ ಕೊಂಕಣಿ ಸಾಹಿತ್ಯಾಚೊ ಭಾಂಗ್ರಾಳೊ ಕಾಳ್ ಮ್ಹಣ್ತಾಂ) ಕಾಳಾರ್ 13 ತರ್ಜಣ್ ಕಾಣಿಯಾಂಚಿಂ ಪುಸ್ತಕಾಂ ಪರ್ಗಟುನ್ ಆಯ್ಲಿಂ. ಪುಣ್ 2000 ಉಪ್ರಾಂತ್ಲ್ಯಾ (ಡಿಜಿಟಲ್) ಕಾಳಾರ್ 22 ಪುಸ್ತಕಾಂ ಪ್ರಿಂಟ್ ಆನಿ ಡಿಜಿಟಲ್ ಪುಸ್ತಕಾಂ ರುಪಾರ್ ಪರ್ಗಟೊನ್ ಆಯ್ಲಿಂ (ತರ್ಜಣ್ ಆನಿ ಲಿಪ್ಯಂತರ್ ದೊನ್ಯೀ ಮೆಳವ್ನ್).
ತರ್ಜಣ್ ಮ್ಹಳ್ಯಾರ್ ಎಕಾ ಸ್ವತಂತ್ರ್ ಭಾಸೆಥಾವ್ನ್ ಅನ್ಯೇಕಾ ಸ್ವತಂತ್ರ್ ಭಾಸೆಕ್ ಜಾಂವ್ಚೆಂ ಸಾಹಿತ್ಯಿಕ್ ಪಯ್ಣ್.
ಲಿಪ್ಯಂತರ್ (ಭಾರತೀಯ್ ಭಾಸೆಂನಿ ಫಕತ್ ಥೊಡ್ಯಾ ಭಾಸೆಂಕ್ ಮಾತ್ರ್ ಹೆಂ ಯೋಗ್ ಫಾವೊ ಆಸಾ, ತಾಂತುಂ ಕೊಂಕಣಿ ಗ್ರೇಸ್ತ್ ಭಾಸ್ ಮ್ಹಣ್ಚ್ಯಾಂತ್ ದುಭಾವ್ ನಾ, ಕಿತ್ಯಾಕ್ ಮ್ಹಳ್ಯಾರ್ ಪಾಂಚ್ ಲಿಪಿಯಾಂನಿ ಕೊಂಕಣಿ ಸಾಹಿತ್ಯ್ ಆಸಾ) - ಎಕಾ ಸ್ವತಂತ್ರ್ ಭಾಸೆಂತ್ಲ್ಯಾ ಎಕಾ ಲಿಪಿಯೆಂತ್ ಆಸ್ಚೆಂ ಸಾಹಿತ್ಯ್ ಅನ್ಯೇಕಾ ಲಿಪಿಯೆಕ್ ಕೆಲ್ಲೆಂ ಸಾಹಿತ್ಯಿಕ್ ರೂಪಾಂತರ್.
ಬೊಲ್ಯಂತರ್ (ಭಾಸ್ - ಲಿಪಿ - ಬೊಲಿ - ಸಮುದಾಯ್....) ಅಶೆಂ ಏಕ್ ಲಿಪ್ಯೆಂತ್ ಸಾಹಿತ್ಯ್ ರಚ್ತೆಲೆ ವೆಗ್-ವೆಗಳ್ಯಾ ಸಮುದಾಯಾಂತ್ ಆಸಾತ್, ಹಾಂಗಾಸರ್ ಬೊಲ್ಯಂತರ್ (ಎಕಾ ಬೊಲಿಥಾವ್ನ್ ಅನ್ಯೇಕಾ ಬೊಲಿಕ್) ವಾವ್ರ್ ಭೊವ್ಶಾ ಚಡ್ ತ್ರಾಸಾಚೊ. ಹಾಂಗಾಸರ್ ಸಯ್ತ್ ಮೂಳ್ ಆನಿ ಶೆವೊಟ್ ಬೊಲಿಚಿ ಪುರ್ತಿ ಜಾಣ್ವಾಯ್ ಆಸ್ಚಿ ಭೋವ್ ಗರ್ಜೆಚಿ.
- ವಲ್ಲಿ ಕ್ವಾಡ್ರಸ್ [ಜನೆರ್, 2024]
