[ಸಂಪಾದಕೀಯ್ - 31] ಮಾಯಾನಗರಿ, ಜೋಪಡ್ಪಟ್ಟಿ ಆನಿ ವಯ್ರಸ್
ಅಖ್ಖ್ಯಾ ಸಂಸಾರಾಂತ್ ಕಾಂಯ್ ಅಸಲೆ ಮಾರೆಕಾರ್ ದೀಸ್ ಯೆಂವ್ಚೆ ಹೆಚ್ ಪಯ್ಲೆ ಪಾವ್ಟಿಂ. ಪಿಡಾ-ಶಿಡಾ ಸಂಸಾರಾಕ್ ನವಿ ನ್ಹಯ್, ಹ್ಯಾ ಆದಿಂ ಸಯ್ತ್ ಜಾಯ್ತ್ಯೊ ಪಿಡಾ ಆಯ್ಲ್ಯಾತ್. ಆನಿ ತಿ ಪಿಡಾ ಸಂಸಾರ್ಭರ್ ವಿಸ್ತಾರುನ್ ಹಜಾರಾಂನಿ ಲೋಕ್ ಮೆಲಾ. ಪುಣ್ ತೆದ್ನಾಂಚೊ ಕಾಳ್ ವೆಗ್ಳೊ ಆಸ್ಲೊ ಆನಿ ಆತಾಂಚೊ ಕಾಳ್ ವೆಗ್ಳೊ. ಸಂಸಾರ್ ಆಜ್ ಪ್ರಗತೆಚ್ಯಾ ಪಾವ್ಲಾಂನಿ ಇತ್ಲೊ ಮುಕಾರ್ ಪಾವ್ಲಾ ತರ್ಯೀ ಹ್ಯಾ ಎಕಾ ಮಾರೆಕಾರ್ ಪಿಡೆನ್ ಮನ್ಶಾಪಣಾಕ್ ಮಾತ್ರ್ ನ್ಹಯ್ ಮನ್ಶಾಚ್ಯಾ ಮನಾಂತ್ಲ್ಯಾ ಚಿಂತ್ಪಾಕ್ ಹಾಲವ್ನ್ ಧರ್ಲಾಂ. ಹ್ಯಾ ಸಂಸಾರಾಂತ್ ಖಂಯ್ಚೊಯ್ ದೇಶ್ ಭಳಿಶ್ಟ್ ನಾ, ಸಂಸಾರಾಂತ್ ಖಂಚೊಯ್ ಧರ್ಮ್ ಭಳಿಶ್ಟ್ ನಾ, ಸಂಸಾರಾಂತ್ ಖಂಚೊಯ್ ದೇವ್ ಮ್ಹಳ್ಳೊ ನಾ. ಕಿತೆಂಯ್ ಆಸಾ ತರ್ ತೆಂ ಮನ್ಶಾಪಣ್ ಆನಿ ಮನ್ಶಾ ತತ್ವಾಂ. ಆನಿ ಕಾಂಯ್ ತೆಂಪಾಥಾವ್ನ್ ಹೊಚ್ ಮನಿಸ್ ಅಪ್ಲ್ಯಾ ಸ್ವಾರ್ಥಾಕ್ ಲಾಗುನ್ ವೆವೆಗ್ಳೆ ದೇವ್, ಧರ್ಮ್, ತತ್ವಾಂ ಘಡುನ್ ಮನ್ಶಾಪಣಾಕ್ಚ್ ಚ್ಯುರಾನ್ ಚ್ಯುರೊ ಕರುನ್ ಜಿಯೆಂವ್ಕ್ ಲಾಗ್ಲ್ಲ್ಯಾ ವೆಳಾರ್ ಸಂಸಾರಾಂತ್ ಖಂಚ್ಯಾಯ್ ದೆವಾಕ್ ಮ್ಹಣುನ್ ಭಾಂದ್ಲ್ಲ್ಯಾ ಖಂಚ್ಯಾಯ್ ಭಾಂದ್ಪಾಂತ್ ಜಿಯೆಂವ್ಚ್ಯಾ ಖಂಚ್ಯಾಯ್ ದೆವಾಲಾಗಿಂ ಜಾಪಿ ನಾಂತ್ ಮ್ಹಳ್ಳೆಂ ಹಕೀಗತ್.
ಚರಿತ್ರಾ ಸಾಂಗ್ತಾ; ಜೆದ್ನಾಂಯ್, ಸಂಸಾರಾಂತ್ ಅನ್ವಾರಾಂ ಆಯ್ಲಿಂ ತರ್, ಪಯ್ಲೊ ಆನಿ ಭೋವ್ ವ್ಹಡ್ ಮಾರ್ ಖಾಂವ್ಚೊ ಲೋಕ್ಚ್ ದುಬ್ಳೊ ಆನಿ ಅಸ್ಕತ್ ಲೋಕ್. ಥೊಡ್ಯಾ ಮಯ್ನ್ಯಾದಿಂ ಸಂಸಾರಾಂಚಿಂ ಹೆರ್ ರಾಶ್ಟ್ರಾಂ ಹ್ಯಾ ಮಾರೆಕಾರ್ ಪಿಡೆಂತ್ ವ್ಹಳ್ವಳುನ್ ಆಸ್ಲೆವೆಳಾರ್ ಆಮ್ಚೊ ದೇಶ್, ಆಮಿ ಅಮ್ಚೊ ಲೋಕ್ ನಿದ್ಲೆಲ್ಯಾ ರೆಡ್ಯಾಚ್ಯಾ ಪಾಟಿಚೆರ್ ಪಡ್ಲ್ಲ್ಯಾ ಮಾರಾಪರಿಂ ಜಿಯೆತಾಲೊ. ಪಯ್ಲೊ ಮಾರ್ ಪಡ್ತಾನಾ ಕಸ್ಲೆಂಚ್ ಗುಮಾನ್ ನಾತ್ಲೆಂ, ದುಸ್ರೊ ಮಾರ್ ಪಡ್ತಾನಾ ಕಸ್ಲೊಗಿ ಆವಾಜ್ ಆಯ್ಕಲ್ಲೊ ಜೋಪ್ ಜಾಲೊ, ತಿಸ್ರೊ ಮಾರ್ ಪಡ್ತನಾ ತೊ ಆವಾಜ್ ಲಾಗ್ಶಿಲ್ಯಾನ್ ಜಾಲ್ಲೊ ಜೋಪ್ ಜಾಲೊ. ಚೊವ್ತೊ ಮಾರ್ ಪಡ್ತಾನಾ ’ಕಾಂಯ್ ತೊ ಆವಾಜ್ ಅಪ್ಲ್ಯಾ ಆಂಗಾಚೆರ್ ಜಾಲಾಕಾಯ್?’ ಮ್ಹಳ್ಳೆಂ ಚಿಂತಪ್ ಆನಿ ಪಾಂಚ್ವೊ ಮಾರ್ ಪಡ್ತಾನಾಂಚ್ ನಖ್ಖೆಂ ಜಾಲೆಂ ’ಓಹ್ ತೊ ಮಾರ್ ಅಪ್ಲ್ಯಾಚ್ ಪಾಟಿಚೆ ಪಡ್ಚೊ’ ಆನಿ ಆಮಿ ಸಯ್ತ್ ಹ್ಯಾ ಕಾಣಿಯೆಥಾವ್ನ್ ವೆಗ್ಳಿಂ ನ್ಹಯ್. ಹ್ಯಾ ಪಿಡೆಚೆರ್ ಖೆಳ್ಖುಳಾಂ ಕರ್ನ್ ಸಮಾಜಿಕ್ ಜಾಳಿಜಾಗ್ಯಾಂನಿ ತಾಂಕ್ತಾ ತಿತ್ಲಿಂ ಫೊಕಾಣಾಂ ಕೆಲಿಂ. ಆಜ್ ದೇಶಾಚಿ ಪರಿಗತ್ ಕಶಿ ಆಸಾ? ಪಯ್ಲೆಂ ಎಕೆಕ್ ಅಂಕೊ ಉಪ್ರಾಂತ್ ದೊಡೆ ಅಂಕೆ ಬದ್ಲುನ್ ಶೆಂಭೊರಾಂನಿ ಜಾಲೆ ಆತಾಂ ದಿಸಾಚೆಂ ಹಜಾರಾಂನಿ ನವೆ ಪಿಡೆಸ್ತ್ ಉದೆತಾತ್ ಆನಿ ದಿಸಾಚಿಂ ದೊಡ್ಯಾ ಅಂಕ್ಯಾಂನಿ ಮೊಡಿಂ ಪಡೊನ್ ಆಸಾತ್. ತಾಂತುಂಯೀ ದೇಶಾಂತ್ ಚಡ್ ಮಾಪಾನ್ ಹಿ ಭಿರಾಂತೆಚೊ ಕಾಳ್ ಉದೆಲಾ ಮಾಯಾನಗರಿ ಮುಂಬಂಯ್ಕ್.
1984 ಇಸ್ವೆಂತ್ ಪಯ್ಲೆಪಾವ್ಟಿಂ ಹ್ಯಾ ಮಾಯಾನಗರಿಕ್ ಪಾಂಯ್ ತೆಂಕ್ಚಾವೆಳಾರ್ ಹಾಂವೆಂ ಪಯ್ಲೆಂ ಪಾರ್ಕಿಲ್ಲಿ ಜಾವ್ನಾಸಾ ’ಘಾಣ್’ ಆನಿ ಮ್ಹೆಳೆಂಪಣ್. ತರ್ಯೀ ಸ್ವಪ್ಣಾಂಚ್ಯಾ ಹ್ಯಾ ಶ್ಹೆರಾಚೆಂ ನಾಂವ್ ಆಸ್ಲೆಂ ’ಬೋಂಬೆ’. ಘಾಟ್ಕೊಪರಾಂತ್ಲ್ಯಾ ಅಸಲ್ಫಾಂತ್ಲ್ಯಾ ಚಾಲಿಂತ್ ಥೊಡೆ ದೀಸ್ ಕಾಡ್ತಚ್ ಉಪ್ರಾಂತ್ ಬೊರಿವಲಿಂತಲ್ಯಾ ಗೋಕುಲ್ಧಾಮ್ ಸೊಸಾಯ್ಟಿಚೊ ಲಿಫ್ಟ್ಮೆನ್ ಜಾವ್ನ್ ಕಾಮ್ ಕರ್ನ್ ಆಸ್ಚ್ಯಾ ಸೆಜಾರಿ ರಯ್ಯ ದಟ್ಟುಸವೆಂ ಟೆರೆಸಾರ್ ದೀಸ್ ಕಾಡ್ತಾನಾ, ತಾಚ್ಯಾಚ್ ಉತ್ರಾಂಕ್ ಪಾಳೊ ದಿವ್ನ್ ಮರೀನ್ ಲಾಯ್ನ್ಸಾಂತ್ಲ್ಯಾ ’ಜೋಲಿ ಎಲೆವೇಟರ್ಸ್’ ಕಂಪ್ಣೆಂತ್ ಅಸಿಸ್ಟೆಂಟ್ ಮೆಕ್ಯಾನಿಕ್ ಜಾವ್ನ್ ಕಾಮ್ ದೀವ್ನ್ ಕಾಂಯ್ ಥೊಡ್ಯಾಚ್ ಮಯ್ನ್ಯಾಂನಿ ದೇಶಾಚ್ಯಾ ತವಳ್ಚ್ಯಾ ಪ್ರಧಾನಿ ಇಂದಿರಾ ಗಾಂಧಿಚಿ ಹತ್ಯಾ ಜಾಲ್ಲಿ ಆನಿ ಘಡ್ಯೆನ್ ಬೊಂಬೊಯ್ಂಯ್ತ್ ದೊಂಬಿ. ಸಗ್ಳ್ಯಾನ್ ಬಂಧ್, ಗಾಡಿಯೊ ಹುಲ್ಪೊನ್ ವೆಚ್ಯೊ, ಬಾಂಬ್ ಬ್ಲಾಸ್ಟ್, ರಸ್ತ್ಯಾರ್ ಮೊಡಿಂ ಪಡ್ಲ್ಲಿಂ, ಆನಿ ತಾಂಚೆಂ ರಗತ್ ದಾಟೆಲ್ಲೆಂ, ಜೊಪ್ಡಿಂ ಲಾಸ್ಚಿಂ ಪಯ್ಲೆಪಾವ್ಟಿಂ ಪಳೆಲ್ಲೆಂಚ್ ತೆದ್ನಾಂ. ಇತ್ಲೆಂಚ್ ನ್ಹಯ್, ಸಿಖ್ ಧರ್ಮಾಂಚ್ಯಾಂಕ್ ಧರುನ್ ಧರುನ್ ಮಾರ್ಚೆ ದೀಸ್ ಸಯ್ತ್ ತೆದ್ನಾಂ ಪಳೆಲೆ. ಬಸ್ಸಾಂ/ರಯ್ಲಾಂ ಬಂಧ್. ಥೊಡ್ಯಾಚ್ ದಿಸಾಂನಿ ಕಾಮಾಕ್ ವೆಚೆಂ ಅನಿವಾರ್ಯ್. ತೆದ್ನಾಂಚ್ ಮ್ಹಾಕಾ ಬೋಸಾನ್ ಇಂತರ್ವ್ಯೂ ವೆಳಾರ್ ದಿಲ್ಲೆಂ ಲಿಸಾಂವ್ ಯಾದಿಂತ್ ಆಯಿಲ್ಲೆಂ. ತಾಣೆಂ ಚ್ಯಾರ್ ಸಬ್ಧಾಂಚೊ ತಫಾವತ್ ಮ್ಹಾಕಾ ವಿಚಾರ್ಲ್ಲೊ ತಶೆಂಚ್ ಉಪ್ರಾಂತ್ ಮ್ಹಾಕಾ ಸಮ್ಜಾಯಿಲ್ಲೆಂ.
Cost ( ಖರ್ಚ್): ಜೆಂ ಅಮಿ ದೀಂವ್ಕ್ ಆಸ್ಚೆಂ, Price ( ದಿಂವ್ಚೆಂ ಮೋಲ್): ಜೆಂ ಆಮಿ ದೀಂವ್ಕ್ ಆಸ್ಚೆಂ, Value ( ಘೆತ್ಲ್ಲೆಂ ಮೋಲ್): ಜೆಂ ಅಮಿ ಘೆಂವ್ಕ್ ಆಸ್ಚೆಂ, Worth ( ಲಾಯೆಕ್): ಜೆಂ ಕಿತ್ಲೆಂ ಲಾಯೆಕ್ ಆಸ್ಚೆಂ. ಬೋಸಾನ್ ಮ್ಹಾಕಾ ದಿಸಾಕ್ ಸಾತ್ ರುಪ್ಯಾಂಚೊ ಸಾಂಭಾಳ್ ಮ್ಹಣ್ ನಿಘಂಟ್ ಕರ್ತಚ್, ಹ್ಯಾ ಸಾತ್ ರುಪಯಾಂಕ್ ಲಾಗುನ್ ಹಾಂವೆಂ ಸಗ್ಳೊ ದೀಸ್ ಮಿನತ್ ಕರ್ಚಿ ಕಿತ್ಯಾಕ್ ಗರ್ಜ್ ಮ್ಹಣುನ್ ಮ್ಹಾಕಾ ಸಮ್ಜಾಂವ್ಕ್ ತಾಚೆಂ ಪ್ರಯತ್ನ್ ತೆಂ. ಆಫಿಸಾಚ್ಯಾ ಲಾಗ್ಸಾರ್ಚ್ ಸರ್ಕಾರಾನ್ ದುಭ್ಳ್ಯಾಂಕ್ ಉಣ್ಯಾರ್ ಖಾಣ್ ಲಾಭಾಶೆಂ ಕರುಂಕ್ ಮ್ಹಣುನ್ ’ಜುಣ್ಕಾ ಭಾಖರ್’ ಕ್ಯಾಂಟೀನ್ ಆಸ್ಲೆಂ. ಫಕತ್ ಎಕಾ ರುಪ್ಯಾಂಕ್ ಸುಕಿ ಭಾಕ್ರಿ ತಶೆಂಚ್ ಚಣ್ಯಾಚೊ ಸಾರ್ ಏಕ್ ತರ್ನಿ ಮಿರ್ಸಾಂಗೆಸವೆಂ ಖಾಂವ್ಕ್. ತ್ಯಾ ದಿಸಾಚ್ಯಾ ಸಾತ್ ರುಪ್ಯಾಂನಿ ಸಯ್ತ್ ಹ್ಯಾ ಸ್ವಪ್ಣಾಂಚ್ಯಾ ಶೆರಾಂತ್ ಜಿಯೆವ್ಯೆತ್ ಮ್ಹಳ್ಳೊ ಸಂಧೇಶ್ ದೀಂವ್ಕ್ ತೊ ಪೆಚಾಡ್ತಾಲೊ. ತ್ಯಾ ಖಾತಿರ್ ಮಯ್ನ್ಯಾಚೊ ರೇಲ್ವೆಚೊ ಪಾಸ್ ಆಸ್ಲೊ ಜಾಲ್ಲ್ಯಾನ್ ಟಿಕೆಟಿಚೊ ಖರ್ಚ್ ನಾ - ತೊ ಮ್ಹಾಕಾ ಸಮ್ಜಾಯ್ತಾಲೊ. ಗೋಕುಲ್ಧಾಮ್ ಸೊಸಾಯ್ಟಿಥಾವ್ನ್ ಬೊರಿವ್ಲಿ ಸ್ಟೆಶನಾಕ್ ಅಡೆಜ್ ಫರ್ಲಾಂಗಾಚಿ ವಾಟ್ ಆಸಾ. ತಶೆಂಚ್ ಮರೀನ್ ಲಾಯ್ನ್ಸ್ ಸ್ಟೆಶನಾಥಾವ್ನ್ ದಫ್ತರಾಕ್ ಅರ್ಧೆಂ ಮಯ್ಲಾಚಿ ವಾಟ್. ಹಾಂಗಾಸರ್ ಹ್ಯಾ ಕಾಣಿಯೆಂಚೊ ಪ್ರಮುಕ್ ವಿಶಯ್ ಮ್ಹಳ್ಯಾರ್, ಸರ್ಕಾರಿ ಕ್ಯಾಂಟಿನಾಕ್ ಅಪ್ಲ್ಯಾ ಸುರಾತೆಕ್ ಗಳ್ಸುನ್ ಕಸೊ ಮನಿಸ್ ಎಕಾಮೆಕಾ ಗಳ್ಸಿತಾ (Exploit ಕರ್ತಾ) ಮ್ಹಣ್ಚೊ. ಎಕಾ ದಿಸಾ ಮಯ್ನ್ಯಾಕ್ ಹಜಾರಾಂನಿ ಪಾಗ್ ಜೊಡುಂಕ್ ಹಾಂವೆಂ ಹೆ ಮಾಂದುನ್ ಘೆಂವ್ಕ್ ಆಸ್ಲೆಂ. ಆನಿ ಭುಕೆಸವೆಂ ಪಯ್ಲಿ ಭೆಟ್ ಜಾಲ್ಲಿ ಹೆಚ್ ವೆಳಾರ್.
ಜೊಪ್ಡಿಂ ಆಮ್ಕಾಂ ನವಿಂ ನ್ಹಯ್, ಆಮ್ಚ್ಯ ಗಾಂವಾಂನಿ ಸಯ್ತ್ ಆಮಿ ತಿಂ ಪಳೆಲ್ಯಾಂತ್. ಜೆದನಾಂ ರಸ್ತ್ಯಾಚೆಂ ಕಾಮ್ ಚಾಲು ಜಾತಾನಾ, ತೆಂ ಕಾಮ್ ಕರುಂಕ್ ಮ್ಹಣುನ್ ಆಯಿಲ್ಲೆ; ಬೀದರ್, ಗುಲ್ಬರ್ಗಾ, ಅನಿ ಹೆರ್ ಜಿಲ್ಲ್ಯಾಂತ್ಲೊ ಲೋಕ್ ತಾಣಿಂ ಕಾಮ್ ಕರುನ್ ಆಸ್ಚೆಲಾಗಿಂಚ್ ರಸ್ತ್ಯಾದೆಗೆನ್ ಚ್ಯಾರ್ ಗುಂಟೆ ಪುರುನ್, ತ್ಯಾ ಗುಂಟ್ಯಾಂಚೆರ್ ಟರ್ಪಲ್ ವಾ ಪರ್ದ್ಯಾಂನಿ ಪಾಕೆಂ ಭಾಂದುನ್, ತಾಂಚೆಸವ್ಂ ಹಾಡ್ಲ್ಲ್ಯೊ ಪೊಟ್ಲ್ಯೊ ದವರ್ನ್ ದೀಸ್ ಸಾರ್ತಾಲೊ; ಬಾಯ್ಲಾಂ, ಭುರ್ಗಿಂ, ತಶೆಂಚ್ ದಾದ್ಲೆ ಸಗ್ಳೆ ಚಡ್ತಾವ್ ಜಾವ್ನ್ ಏಕ್ ನಾ ಏಕ್ ಕಾಮ್ ಕರ್ನ್ ಆಸ್ತಾಲೆ. ಹಿಂ ಥಿರ್ ಜೊಪ್ಡಿಂ ನ್ಹಯ್. ಥೊಡೆ ದೀಸ್ ಸಂಪ್ತಚ್ ತೊ ಲೋಕ್ ಅಪಪ್ಲಿಂ ಜೊಳ್ಗಿಂ/ಪೊಟ್ಲ್ಯೊ ಘೆವ್ನ್ ಅನ್ಯೇಕಾ ಸುವಾತೆರ್ ವಸ್ತಿ ಕರ್ತಾಲೊ. ಪುಣ್ ಜೋಪಡ್ಪಟ್ಟಿ ಮ್ಹಳ್ಯಾರ್ ಜೊಪ್ಡಿಂ ನ್ಹಯ್. ಚಡುಣೆಂ ಲಾಂಬ್ ಕಾಳ್ ಪರ್ಯಾಂತ್ ಲೋಕ್ ಆಪಾಪ್ಲ್ಯಾ ಕುಟ್ಮಾಸವೆಂ ವಸ್ತಿ ಕರ್ತಾ. ಲ್ಹಾಲ್ಹಾನ್ ಕುಡಾಂಚ್ಯೊ, ಅಶೀರ್ ರಸ್ತ್ಯಾಚ್ಯೊ ಚಾಲಿ ತ್ಯೊ. ಕುಡಾಂನಿ ಖಾಕುಸ್ ನಾಂತ್. ಚಾಲಿಚ್ಯಾ ಕೊನ್ಶ್ಯಾಂನಿ ಏಕ್-ದೋನ್ ಖಾಕುಸ್ ಆಸ್ತಾತ್ ಆನಿ ಕಾಂಯ್ ದೊನ್ಶಿಂ-ತಿನ್ಶಿಂ ಕುಡಾಂಕ್ ಏಕ್-ದೋನ್ ಮ್ಹಣ್ ಆಸ್ಚ್ಯಾ ತ್ಯಾ ಖಾಕುಸಾಕ್ಯೀ ಎಕಾ ಸಕಾಳಿಂ ಲಾಯ್ನ್ ಆಸ್ತಾ. ಸಕಾಳಿಂ ಉಟುನ್ ಡಬ್ಬೊ ಘೆವ್ನ್ ತ್ಯಾ ಲಾಯ್ನಿಚೆರ್ ಉಭೊ ರಾವುಂಕ್ ಆಸಾ ಆನಿ ಅಪ್ಲಿ ಸರ್ತ್ ಯೆತಾನಾ ತೊ ಖಾಕುಸ್ ವಾಪ್ರುಂಕ್ ಆಸಾ. ಪಾವ್ಸಾಂತ್ ಹಾಂಗಾಚಿ ಪರಿಗತ್ ವಿಪ್ರ್ಈತ್; ಪಾವ್ಸಾಚೆಂ ಮ್ಹೆಳೆಂ ಉದಕ್ ತಶೆಂಚ್ ಗಟಾರ್ಆಂನಿ ಭರ್ಲ್ಲೆಂ ಉದಕ್ ಹ್ಯಾ ಚಾಲಿಂನಿ ವ್ಹಾಳ್ತಾ, ದೆಕುನ್ ತ್ಯಾ ಉದ್ಕಾವಯ್ಲ್ಯಾನ್ ಚಲುನ್ ವಚುಂಕ್ ಫುಟ್ಕರ್ ನಳೆ, ಟೈಲ್ಸ್ ವಾ ಫಾತರ್ ದವರ್ತಾಲೆ ಆನಿ ಖಾಕ್ಸಾಕ್ ವೆಚೊ ಲೋಕ್ ಚತ್ರಾಯೆನ್ ತ್ಯಾ ಫಾತ್ರಾಂಚೆರ್ ಪಾಂಯ್ ದವರುನ್ ಚಲ್ತಾಲೊ. ಥೊಡಿಂ ಭುರ್ಗಿಂ ಯೇವ್ನ್ ತ್ಯಾ ಫಾತ್ರಾಂಚೆರ್ ಬೊಸೊನ್ ಹಾಗುನ್ ವೆತಾಲಿಂ, ಕೊಣಾಯ್ಕೀ ಉಲಂವ್ಚೆಪರಿಂ ನಾ. ತಿತ್ಲೆಂಚ್ ನ್ಹಯ್, ಥೊಡೆಪಾವ್ಟಿಂ ಹೆರ್ ಥೊಡ್ಯಾಂನಿ ಫಾತ್ರಾಚೆರ್ ಪಾಂಯ್ ದವರ್ತಾನಾ ಫಾತ್ರಾಚ್ಯಾ ಸಕ್ಲಾ ಆಸ್ಚೆಂ ಮ್ಹೆಳೆಂ ಚಿಕ್ಲಾಚೆಂ ಉದಕ್ ’ಪಚಕ್’ ಕರ್ನ್ ಉಸಳ್ತಾಲೆಂ. ಮ್ಹೆಳೆಂ ಆನಿ ಆಂಗ್ ಹಿಂವ್ಳಾಂವ್ಚಿ ಘಾಣ್ ಸದಾಂಚಿ. ಪುಣ್ ಸಗ್ಳಿಂ ಹೆಚ್ ಜಿಣ್ಯೆಕ್ ಸವಯ್ ಕರುನ್ ಜಿಯೆಂವ್ಚೆಂ ಅನಿವಾರ್ಯ್. ಹಾಂಗಾಸರ್ ಗರೀಬಿ, ಪಿಡಾ, ಭುಕ್ ಸದಾಂಚಿ. ಪುಣ್ ಹ್ಯಾ ಸರ್ವಾಂ ಮಧೆಂ ಜಿಣ್ಯೆ ಸಂಘರ್ಶ್ ಆಸಾ, ಅಪ್ಣಾನ್ ಮುಕಾರ್ ಯೇಜಯ್, ಆಮ್ಚ್ಯಾ ಭುರ್ಗ್ಯಾಂಕ್ ಮುಕಾರ್ ಹಾಡಿಜಯ್, ಚಡಿತ್ ಶಿಕಯ್ಜಯ್ ಮ್ಹಳ್ಳಿಂ ಸ್ವಪ್ಣಾಂ ಆಸಾತ್. ದೆಕುನ್ ಆಜ್ ಸಯ್ತ್ ಹರ್ ರಿತಿಚ್ಯಾ ಶೋಷಣಾಕ್ ಪಯ್ಲಿ ಶಿಕಾರಿ ಜಾಂವ್ಚೊ ಲೋಕ್ ಹೊಚ್. ಜಾಂವ್ ತೊ ದಂಗೊ, ಜಾಂವ್ ತೊ ಜಾತಿ-ಧರ್ಮಾಚ್ಯಾ ನಾಂವಾನ್ ವಾ ಹೆರ್ ಕಸಲ್ಯಾಯ್ ನಿಬಾನ್.
ಥೊಡ್ಯಾ ಜಾಗ್ಯಾಂನಿ ಚಾಲಿಚಿ ಲಾಂಬಾಯ್ ಉಭಾರುನ್, ತ್ಯಾ 10 x 10 ವಾ 15 x 15 ಫುಟ್ ಕುಡಾಂತ್ ಸಯ್ತ್ ಮ್ಹಾಳಯ್. ಚಡ್ ಕರುನ್ ಪಾವ್ಸಾಂತ್ ಗಟಾರಾಚೆಂ ವಾ ಪಾವ್ಸಾಚೆಂ ಉದಕ್ ಚಾಲಿಭಿತರ್ ಯೆತೆಲ್ಯಾಂನಿ ಚಡ್ ಕರುನ್ ಅಸಲ್ಯಾ ವೆವಸ್ತೆಕ್ ಕರ್ಚೆಂ ಅನಿವಾರ್ಯ್. ಚಡ್ ಕರುನ್ ಲೋಕ್, ಅಸಲ್ಯಾ ಮಾಳಯೆಂನಿ ಸಯ್ತ್ ಭಾಡ್ಯಾಕ್ ದಿತಾ. ಅಸಲ್ಯಾ ಮಾಳಯೆಂತ್ ದೀಸ್ ಕಾಡ್ಲ್ಲೊ ಉಡಾಸ್ ಅಜೂನ್ ಆಸಾ.
ಮುಂಬಯ್ ಶ್ಹೆರ್ ಅವ್ತಾರಾಂಚೆಂ ಶ್ಹೆರ್. ಚರಿತ್ರೆಚಿಂ ಪಾನಾಂ ಪಳೆಲ್ಯಾರ್ ಸಯ್ತ್ ಗಮ್ತಾ ಹ್ಯಾ ಶ್ಹೆರಾಂತ್ ವೆಳಾಕಾಳಾಕ್ ತೆಕಿದ್ ನಮೂನ್ಯಾವಾರ್ ಅವ್ತಾರ್ ಜಾತೆಚ್ ಆಯ್ಲ್ಯಾತ್.
ನಾಂವಾಚೊ ಆವ್ತಾರ್:
16ವ್ಯಾ ಶೆಕಡ್ಯಾಂತ್ ’ಮೊಂಬಾಯ್ನ್ (1525)’, ’ಬೋಂಬೆ (1538)’, ’ಬೊಂಬಾಯ್ನ್ (1552)’, ’ಬೊಂಬಾಯ್ಮ್ (1552)’, ’ಮೊನ್ಬಯ್ಮ್ (1554)’, ’ಮೊಂಬಾಯ್ಮ್ (1563)’, ’ಮೊಂಬಾಯ್ಮ್ (1644)’, ’ಬಂಬಾಯೆ (1666)’, ’ಬೊಂಬಾಈಮ್ (1966’), ’ಬೊಂಬೆಯೆ (1676)’, ’ಬೂನ್ ಬೇ (1690)’ ಆನಿ ’ಬೋನ್ ಬಹಿಯಾ’. ಕೋಲಿ ಆನಿ ಆಗ್ರಿ ಕುಳಿಯೆಚೆ ಮರಾಠಿ ಮೊಗೊರ್ ಮಾಸ್ಳಿ ಪಾಗುನ್ ಜಿಯೆವ್ನ್ ಆಸ್ಲ್ಲ್ಯಾ ಹ್ಯಾ ಗಾಂವ್ಚಿ ಕುಲದೇವತಾ ’ಮುಂಬಾದೇವಿ’ ಮ್ಹಣುನ್ ಮರಾಠಿ ಭಾಶಿಕ್ ಕೋಲಿ ಸಮುದಾಯ್ ಮಾಂದ್ತಾಲೊ. ಪೋರ್ಚುಗೀಸ್ ಭಾಶೆಂತ್ ’ಬೋಮ್ ಬೇ’ ಮ್ಹಳ್ಯಾರ್ ಬರಿ ಕುದ್ರೊ ಮ್ಹಳ್ಳೊ ಅರ್ಥ್ ಜಾತಾ. 1995 ಇಸ್ವೆಂತ್ ಜೆದ್ನಾಂ ಶಿವ್ಸೇನಾಚೆಂ ರಾಜ್ ಸುರು ಜಾಲೆಂ, ತೆದ್ನಾಂ ಬೋಂಬೆ ಆಸ್ಲೆಂ ನಾಂವ್ ಬದ್ಲುನ್ ಮುಂಬಯ್ ಕರ್ತಾನಾ ಹಾಂವ್ ಹೆಚ್ ಮುಂಬಂಯ್ತ್ ಆಸ್ಲೊಂ.
ಬೋಂಬೆ ವ ಮುಂಬಯ್ ಮ್ಹಳ್ಯಾರ್ ಫಕತ್ ಏಕ್ ಕುದ್ರೊ (Island) ನ್ಹಯ್, ಬಗಾರ್, ಸಾತ್ ಕುದ್ರೆ;
ಬೋಂಬೆಚೆಂ ಐಸ್ಲೆ (Isle of Bombay) ಹೊ ಕುದ್ರೊ ಮಲಬಾರ್ ಹಿಲ್ ಥಾವ್ನ್ ಡೊಗ್ರಿ ಪರ್ಯಾಂತ್ ಆಸಾ.
ಕೊಲಾಬಾ (Colaba) .
ಲ್ಹಾನ್ ಕೊಲಾಬಾ (Old Woman's Island (Little Colaba) .
ಮಾಹಿಮ್ (Mahim) .
ಮಜ್ಗಾಂವ್ (Mazagaon) .
ಪರೇಲ್ (Parel) .
ವರ್ಲಿ (Worli) .
ಪುಣ್ ಮುಂಬಯ್ ಮ್ಹಳ್ಯಾರ್ ಫಕತ್ ಕುದ್ರೊ ನ್ಹಯ್, ಮೊಳ್ಬಾಕ್ ತೆಂಕ್ಚಿಂ ಭಾಂದ್ಪಾಂಯ್ ನ್ಹಯ್. ಮುಂಬಂಯ್ತ್ ಆಜ್ ಪಾಸುನ್ ಲಾಗಿಂ ಲಾಗಿಂ ಅರ್ಧಿ ಮುಂಬಯ್ಭರ್ ಜೋಪಡ್ಪಟ್ಟಿ ಆಸಾ. ಇಂಗ್ಲಿಶಾಂತ್ Slum ಸಬ್ಧಾಚೊ ಅರ್ಥ್ ’ಗಲೀಜ್ ಜಾಗೊ’, ಹಿಂದಿ ಭಾಶೆಂತ್ ’ಗಂದಿ ಬಸ್ತಿ’, ಮರಾಠಿಂತ್ ’ಜೋಪಡ್ಪಟ್ಟಿ’. ಮಾಯಾನಗರಿ ಮುಂಬಯ್ಂಯ್ತ್ 42% ಜಾಗೊ ಹ್ಯಾಚ್ ಜೋಪಡ್ಪಟ್ಟೆಂತ್ ಜಿಯೆತಾ (ಲಗ್ಬಗ್ 90 ಲಾಕ್ ಲೋಕ್). ಭಾರತಾಂತ್ 104 ಲಾಕ್ ಲೋಕ್ ಅಜೂನ್ ಜೋಪಡ್ಪಟ್ಟೆಂನಿ ಜಿಯೆತಾ (ಮ್ಹಳ್ಯಾರ್ ಲಗ್ಬಗ್ 10% ಲೋಕ್).
ಸಂಸಾರಾಂತ್ ತಿಸ್ರಿ ವ್ಹಡ್ ಜೋಪಡ್ಪಟ್ಟಿ (ಧಾರಾವಿ) ಮುಂಬಂಯ್ತ್ ಆಸಾ. ಹಿಂ ಥೊಡಿಂ ಸಂಸಾರಾಂತ್ಲಿಂ ವ್ಹಡ್ ಜೋಪಡ್ಪಟ್ಟಿ;
1. ಓರಂಗಿ (Orangi, Karachi (Pakistan)
2. ನೆಜಾ (Neza (Mexico)
3. ಧಾರಾವಿ (Dharavi, India)
4. ಖಿಬೆರಾ (Kibera, Nairobi (Kenya)
5. ಖಾಯೆಲಿಸ್ಶಾ (Khayelitsha, Cape Town (South Africa)
ಧಾರಾವಿ ಜೋಪಡ್ಪಟ್ಟೆಕ್ 1882 ಇಸ್ವೆಂತ್ ಬ್ರಿಟಿಶಾಂನಿ ಘಡ್ಲಿ. ಸದ್ದ್ಯಾಕ್ ಧಾರಾವಿಂತ್ 700,000 ಥಾವ್ನ್ 1,000,000 ಲೋಕ್ ಜಿಯೆತಾ. ಕಾಂಯ್ ಪಾಂಚ್ ಹಜಾರ್ ರಿತಿಚಿಂ ಉಧ್ಯಮಾಂ ಚಲುನ್ ಆಸಾತ್ ಆನಿ ವರ್ಸಾಚೊ ವಯ್ವಾಟ್ 5,000 ಕೊರೊಡ್ ಥಾವ್ನ್ 10,000 ಕೊರೊಡ್ ರುಪ್ಯಾಂಚೊ ಮ್ಹಳ್ಯಾರ್ ಅಜ್ಯಾಪ್ ನಾ.
ಜೋಪಡ್ಪಟ್ಟಿ ಕಿತ್ಯಾಕ್?
ಸಂಸಾರಾಂತ್ ಜಿಯೆತಲೊ ಮನಿಸ್ ಎಕಾಮೆಕಾ ವೆವೆಗ್ಳೆ ಪ್ರಕಾರ್ ಕರುನ್ ಜಿಯೆತಾ. ಹೆ ಪ್ರಕಾರ್ ಧರ್ಮಾಚೆ ಆಸುಯೆತಾ, ಜಾತಿಚೆ ಆಸುಯೆತಾ, ಭಾಸೆಚೆ ಆಸುಯೆತಾ ವಾ ಬೊಲಿಯೆಚೆ. ಎಕಾಚ್ ಭಾಸೆಚೆ, ಬೊಲಿಚೆ ಸಯ್ತ್ ಎಕಾ ಮನಾನ್ ಜಿಯೆಂವ್ಕ್ ಸಕಾನಾಂತ್, ಬಗಾರ್ ಕುಳಿಯೆಚೆ ವರ್ಗ್ ಕರ್ತಾತ್; ಬ್ರಾಹ್ಮಣ್, ಶೂದ್ರ್, ವೈಶ್ಯ್, ಕ್ಷತ್ರಿಯ್ ಅಸಲೆ ವರ್ಗ್. ಶಿಕ್ಪಿ ವರ್ಗ್ ಹೆ ಸಬ್ಧ್ ವ್ಹಾಪಾರಿನಾಂತ್ ತರ್ಯೀ, ತಾಂಚಿಂ ಕರ್ಮಾಂ ತಿಂಚ್; ಉಣ್ಯಾರ್ ಉಣೆ ದೋನ್ ವರ್ಗಾಚೆ ತರ್ಯೀ ಖಂಡಿತ್ ಆಸ್ತಾತ್; ಪಯ್ಲೊ: ಕಾಮ್ ಕರಯ್ತಲೊ, ದುಸ್ರೊ: ಕಾಮ್ ಕರ್ತಲೊ. ಕಾಮ್ ಕರಯ್ತಲೊ ದುಡ್ವಾಚೊ ಮನಿಸ್, ತೊ ಸಂಸಾರಾಂತ್ಲೆಂ ಕಿತೆಂಯ್ ಮೊಲಾಂವ್ಕ್ ಸಕ್ತಾ ಮ್ಹಳ್ಳ್ಯಾ ಚಿಂತ್ಪಾಚೊ. ಕಾಮ್ ಕರ್ತಲೊ ಅಪ್ಲಿ ಜಿಣಿಂಚ್ ಸಂಘರ್ಶಾಕ್ ಲಾಗುನ್ ಆಸ್ಚಿ ಮ್ಹಳ್ಳೆ ಚಿಂತ್ಪಾನ್ ಕಾಮ್ ದಿತೆಲ್ಯಾಚ್ಯಾ ಹಾತಾಚಿ ಬಾವ್ಲಿ ಜಶಿ ರಂಗ್ಮಾಂಚಿಯೆವಯ್ಲಿ ಕಟ್ಪುತ್ಳಿ ಕಶಿ ಜಿಯೆತಾ. ದೆಕುನ್ ಚಡ್ತಾವ್ ದೇಶಾಂನಿ, ಪ್ರತ್ಯೇಕ್ ಜಾವ್ನ್ ಆಮ್ಚ್ಯಾ ಭಾರತಾಂತ್ ಖಂಚ್ಯಾಯ್ ಶೆರಾಂತ್ ಜಿತ್ಲಿಂ ಊಂಚ್ ಭಾಂದ್ಪಾಂ ಆಸಾತ್ಕಿ, ತಿತ್ಲಿಂಚ್ ವಿಸ್ತಾರ್ ಜೊಪ್ಡಿಂ ಅನಿ ಜೊಪಡ್ಪಟ್ಟಿ ಸಯ್ತ್ ಆಸ್ತಾತ್. ಎಕಾಮೆಕಾಶಿವಾಯ್ ದೊನ್ಯೀ ವರ್ಗಾಚೆ ಅಧುರೆ. ಉಂಚ್ಲ್ಯಾ ಭಾಂದ್ಪಾಂನಿ ಜಿಯೆತೆಲ್ಯಾಂಚಿಂ ಕಾಮಾಂ; ಜಾಂವ್ ತಾಂಚ್ಯೊ ಗಾಡಿಯೊ ಧುಂವ್ಕ್, ಗಾಡಿಯೊ ಧಾಂವ್ಡಾಂವ್ಕ್, ತಾಂಚಿಂ ಘರಾಂ ನಿತಳ್ ಕರುಂಕ್, ತಾಂಚಿಂ ವಸ್ತ್ರಾಂ ಧುಂವ್ಕ್, ತಾಂಚ್ಯಾ ವಸ್ತ್ರಾಂಕ್ ಲಾಂಡ್ರಿ ಕರುಂಕ್, ತಾಂಕಾಂ ಫುಲ್-ಫಳಾಂ, ವೊರ್ವಿ ಹಾಡ್ನ್ ದೀಂವ್ಕ್ ಸರ್ವಾಕ್ ಅಸಲೊಚ್ ಕಾಮ್ ಕರ್ಚೊ ವರ್ಗ್ ಜಾಯ್. ಆನಿ ಕಾಮ್ ದಿತಲೆ ಜಿತ್ಲೆ ಮಾಪಾನ್ ಅಸಲ್ಯಾ ಕಾಮ್ ಕರ್ತೆಲ್ಯಾಂಚೆಂ ರಗತ್ ಪಿಯೆತಾತ್ ತಿತ್ಲೆ ದಾಟೆ-ಮೊಟೆ ಜಾತಾತ್, ಜಶೆಂ ಗಾಯೆಚ್ಯಾ ಆಂಗಾಚೆಂ ರಗತ್ ಚಿಂವ್ಚ್ಯಾ ಕಿರಾಂಟೆಪರಿಂ.
10 x 10 ವ 15 x 15 ಫುಟಿಚ್ಯಾ ಲ್ಹಾನ್ ಲ್ಹಾನ್ ಕುಡಾಂನಿ ಚಡ್ತಾವ್ ಜಿಯೆವ್ನ್, ಥಂಯ್ಚ್ ಕಾಮ್ ಕರುನ್ ಜಿಯೆಂವ್ಚೊ ಲೋಕ್ ಚಡ್ ಕರುನ್ ಮುಂಬಯ್ ಭಾಯ್ಲೊ. ಜಾಂವ್ಕ್ ಪುರೊ ತಮಿಳ್ನಾಡು, ಆಂಧ್ರ ಪ್ರದೇಶ್, ಕರ್ನಾಟಕ್, ಕೇರಳಾ, ಬಿಹಾರ್, ಯುಪಿ, ಗುಜರಾಥ್, ಕಲ್ಕತ್ತಾ, ಪಂಜಾಬ್ ಅಶೆಂ ದೇಶಾಚ್ಯಾ ವೆವೆಗ್ಳ್ಯಾ ರಾಜ್ಯಾಂತ್ಲೊ ಲೋಕ್ ದೀಸ್ಪಡ್ತೊ ಗ್ರಾಸ್ ಸೊಧುನ್ ಆಯಿಲ್ಲೊ ಹಾಂಗಾಸರ್ ವೆವೆಗ್ಳ್ಯಾ ರಿತಿಚೆಂ ಉದ್ಪಾದನಾಚೆಂ ಕಾಮ್ ಕರ್ತಾ. ಚಾಮ್ಡೆಂ, ಪ್ಲಾಸ್ಟಿಕ್, ಮೊಡ್ಕ್ಯೊ, ವಸ್ತ್ರಾಂ, ಖೆಳಾವಸ್ತು ಹೆಂ ಪ್ರಮುಕ್.
ದೀಸ್ಪಡ್ತೊ ಗ್ರಾಸ್ ಜೊಡುಂಕ್ ದೇಶಾಚ್ಯಾ ವೆವೆಗ್ಳ್ಯಾ ಕೊನ್ಶ್ಯಾಥಾವ್ನ್ ಆಯಿಲ್ಲೊ ಲೋಕ್ ವಿವಿಧ್ ರಿತಿಚೊ ಸಂಘರ್ಶ್ ಕರುನ್ ಜಿಯೆತಾ. ಸಗ್ಳೆ ಫ್ಲ್ಯಾಟಾಂನಿ ಜಿಯೆನಾಂತ್, ಸಗ್ಳೆ ಜೋಪಡ್ಪಟ್ಟೆಂನಿ ಜಿಯೆನಾಂತ್. ಪುಣ್ ಜೊ ಲೋಕ್ ಜೊಪಡ್ಪಟ್ಟೆಂನಿ ಜಿಯೆತಾ ತಾಂಚೆಲಾಗಿಂ ಆತಾಂ ಸಮಾಜಿಕ್ ಅಂತರ್ (Social distancing) ಮ್ಹಳ್ಳೊ ವಿಕಲ್ಪ್ ನಾ. ಜೋಪಡ್ಪಟ್ಟಿ ಸೊಡ್ಯಾಂ, ಮುಂಬಂಯ್ತ್ ಅಜೂನ್ ಹಜಾರಾಂನಿ ಕುಟ್ಮಾಂ ರಸ್ತ್ಯಾಚ್ಯಾ ಸಾಂಕವಾ ಪಂದಾ ಟೆಂಟಾಂನಿ ಜಿಯೆತಾ. ಹಿಂ ಜೊಪ್ಡಿಂ ನ್ಹಯ್, ಸಗ್ಳೊ ದೀಸ್ ತಿಂ ಟ್ರೇಯ್ನಾಂನಿ, ವಾ ರಸ್ತ್ಯಾಂನಿ ಖಚ್ರ್ಯಾಚಿ ಬೆಗಾಂ ವಿಕುನ್, ವಾ ಪೆನ್ನಾಂ, ಪಿನ್ನಾಂ, ಬಪ್ಪಿನಾಂ, ತುವಾಲೆ, ಪರ್ಸ್ ಆನಿ ಖೆಳಾವಸ್ತು ವಿಕುನ್ ದೀಸ್ ಕಾಡ್ತಾ, ರಾತ್ಚೆಂ ಯೇವ್ನ್ ರಸ್ತ್ಯಾಚ್ಯಾ ದೆಗೆಲ್ಯಾ ಫುಟ್ಪಾತಿಚೆರ್ ನಿದ್ತಾ. ಆನಿ ಹ್ಯಾ ಲೋಕ್ಡಾವ್ನಾಂತ್ ವ್ಹಡ್ಲೊ ಮಾರ್ ಖೆಲ್ಲೊಯ್ ತಾಣಿಂಚ್. ಚಡ್ತಾವ್ ಲೋಕ್ ಯುಪಿ/ಬಿಹಾರ್ಚೊ. ಘರಾಂ ಆಸ್ಚಿಂ ಆಪ್ಲ್ಯಾ ಘರಾಂನಿ ಬಸ್ಲಿಂ ಪುಣ್ ಹಾಂಚೆಲಾಗಿಂ ಘರಾಂ ನಾಂತ್ ತರ್ ಹಾಣಿಂ ಕಂಯ್ ಬೊಸ್ಚೆಂ? ರೇಲ್ವೆ ಪ್ಲ್ಯಾಟ್ಫೊರ್ಮಾಂನಿ ಥೊಡೊ ಲೋಕ್ ಚೊರಿಯೆಂತ್ ದೀಸ್ ಕಾಡುನ್ ಆಸಾ.
ಥಾಣೆ ಸ್ಟೆಶನಾಕ್ ದಿಸಾಚೆಂ 1000 ಟ್ರೇಯ್ನಾಂ ಯೆತಾತ್ ಆನಿ ಲಗ್ಬಗ್ 6.54 ಲಾಕ್ ಲೋಕ್ ಪಾಶಾರ್ ಜಾತಾ. ಆನಿ ತ್ಯಾ ಸ್ಟೆಶನಾಚ್ಯಾ ಪ್ಲ್ಯಾಟ್ಪೊರ್ಮಾಂ ಆಜ್ ರಿತಿಂ. ವಿಟಿಂತ್ (ಛತ್ರಪತಿ ಶಿವಾಜಿ ಟರ್ಮಿನಸ್) ಲಗ್ಬಗ್ 6.36 ಲಾಕ್ ಲೋಕ್ ಪಾಶಾರ್ ಜಾತಾ. ಆನಿ ತ್ಯಾ ಸ್ಟೆಶನಾಚ್ಯಾ ಫ್ಲೇಟ್ಫೊರ್ಮಾಂ ಆಜ್ ರಿತಿಂ. ಅಂಧೇರಿ (6.04 ಲಾಕ್ ಲೋಕ್ ಪಾಶಾರ್ ಜಾತಾ), ದಾದರ್ (5.77 ಲಾಕ್ ಲೋಕ್ ಪಾಶಾರ್ ಜಾತಾ), ಚರ್ಚ್ಗೇಟ್ (5.05 ಲಾಕ್ ಲೋಕ್ ಪಾಶಾರ್ ಜಾತಾ), ಬೆಂಡ್ರಾ (4.91 ಲಾಕ್ ಲೋಕ್ ಪಾಶಾರ್ ಜಾತಾ), ವಿವಾರ್ (3.95 ಲಾಕ್ ಲೋಕ್ ಪಾಶಾರ್ ಜಾತಾ), ಕುರ್ಲಾ (3.81 ಲಾಕ್ ಲೋಕ್ ಪಾಶಾರ್ ಜಾತಾ), ಕಲ್ಯಾಣ್ (3.60 ಲಾಕ್ ಲೋಕ್ ಪಾಶಾರ್ ಜಾತಾ) ಪುಣ್ ಆಜ್ ಹ್ಯಾ ಸ್ಟೆಶಾನಾಂ ರಿತಿಂ.
ಮುಂಬಯ್ಚೆಂ ಲಾಯ್ಫ್ಲಾಯ್ನ್ ಬಂಧ್. ಬಿಎಸ್ಟಿ ತಶೆಂಚ್ ಹೆರ್ ಬಸ್ಸಾಂ ಬಂಧ್. ಹೆಂ ಶೆರಾಭಿತರ್ಲಿ ಅವಸ್ತಾ ತರ್, ಪರ್ಗಾಂವ್ಚೊ ಲೋಕ್ ಪಾಟಿಂ ಗೆಲ್ಲೆಪರಿಂ ನಾ ಮ್ಹಣ್ತಚ್ ಜೊ ಲೋಕ್ ಜೋಪಡ್ಪಟ್ಟೆಂನಿ ಜಿಯೆತಾ, ತಸಲ್ಯಾಂಚೆ ಮುಕ್ಲೆ ದೀಸ್ ಭೋವ್ ಮಾರೆಕಾರ್ ಜಾವ್ನ್ ಉದೆಂವ್ಚ್ಯಾಂತ್ ಸವಾಲ್ ನಾ. ಫುಟ್ಪಾತಿಂನಿ ವಸ್ತ್ರಾಂ, ಮೊಚೆ, ಫಳಾಂ, ಖಾಣಾಂ, ವ್ಹಾಣೊ, ವಸ್ತು ವಿಕುನ್ ದೀಸ್ ಕಾಡ್ಚೊ ಹಜಾರಾಂನಿ ಲೋಕ್ ಆಜ್ ಕಾಮ್ ನಾಸ್ತಾನಾ, ರಾವುಂಕ್ ಸುವಾತ್ ನಾಸ್ತಾನಾ, ಖಾಂವ್ಕ್, ನ್ಹಾಂವ್ಕ್ ನಾಸ್ತಾನಾ ಕಂಗಾಲ್ ಜಾಲಾ. ದುಡ್ವಾದಿಕ್ ಲೋಕ್ ಬಂಗ್ಲ್ಯಾಂನಿ ಜಿಯೆತಾ. ಮಾಧ್ಯಮ್ ವರ್ಗಾಚೊ ಲೋಕ್ ಫ್ಲೇಟಾಂನಿ ಜಿಯೆತಾನಾ ಹ್ಯಾ ಪಿಡೆನ್ ಪಯ್ಲೆಂ ಶಿಕಾರ್ ಕರುಂಕ್ ಮೆಳ್ಚೊ ಲೋಕ್ಚ್ ಗರೀಬ್. ಧಾರಾವಿ ತಸಲ್ಯಾ ಜೋಪಡ್ಪಟ್ಟಿಂತ್ ವಯ್ರಸ್ ರಿಗ್ಲಾಂ ಮ್ಹಳ್ಯಾರ್ ಖರೆಂಚ್ ಜಾವ್ನ್ ಮಾರೆಕಾರ್ ದೀಸ್ ಫುಡೆಂ ಯೆಂವ್ಚೆಂ ನಖ್ಖೆಂ (ಜರ್ತರ್ ಜೊಕ್ತಿಂ ಕ್ರಮಾಂ ಘೆತ್ಲಿಂನಾಂತ್ ತರ್). ಲಾಗ್ಶಿಲ್ಯಾನ್ ಸಾಯನ್ ಕೊಲಿವಾಡಾ, ಕುರ್ಲಾ, ಚೆಂಬೂರ್, ಮಾಂಕುರ್ಡ್, ಗೊವಂಡಿ, ಭಿವಂಡಿ ತಶೆಂಚ್ ವಡಾಲಾ, ನಾಗ್ಪಾಡಾ, ಅಗ್ರಿಪಾಡಾ..... ಮುಂಬಯ್ಚ್ಯಾ ವೆವೆಗ್ಳ್ಯಾ ಪ್ರಾಂತ್ಯಾಂನಿ ಆಸ್ಚ್ಯಾ ಸರ್ವ್ ಜೋಪಡ್ಪಟ್ಟೆಂಕ್ ಹಿ ಪಿಡಾ ವಿಸ್ತಾರುಂಕ್ ಚಡ್ ವೇಳ್ ನಾ.
ಹ್ಯಾ ಮಾರೆಕಾರ್ ಪಿಡೆನ್ ಖರೆಂಚ್ ಮನ್ಶಾಕುಳಾಕ್ ಜಾಗಯ್ಲಾಂ. ಮನ್ಶಾಕ್ ಪರತ್ ಏಕ್ ಪಾವ್ಟಿಂ ಅಪ್ಣಾನ್ ಸಾಂಡ್ಲ್ಲ್ಯಾ ಕಾಳಾಕ್ ಪರತ್ ಯಾದ್ ಕರಿಶೆಂ ಕೆಲಾಂ. ಪುಣ್ ಹಾಂತ್ಲಿಂ ಲಿಸಾಂವಾಂ ಮನಿಸ್ ಕಿತ್ಲೊ ಶಿಕ್ಲಾ ವಾ ಶಿಕ್ತಾ ಮ್ಹಳ್ಳೆಂ ಕೊಣ್ಯೀ ಸಾಂಗುಂಕ್ ಸಕ್ತಾ ತರ್ ತೊ ಜಾವ್ನಾಸಾ ’ವೇಳ್’.
- ವಲ್ಲಿ ಕ್ವಾಡ್ರಸ್ [ಎಪ್ರಿಲ್, 2020]
