ಕವಿತಾकविताPoem
ಮಯ್ನ್ಯಾಚೊ ಕವಿ - 12 [Nov 2020]
[ಸ್ಪರ್ಧೊ] ಮಯ್ನ್ಯಾಚೊ ಕವಿ - 12 [Nov 2020]
ಸಿಂಧುಕ್ ಆನಿ ತಿಚ್ಯಾ ಧುವಾಂಕ್
ಪಾಂಚ್ ನ್ಹಂಯೊ ವ್ಹಾಳೊನ್ ಆಸ್ತಾನಾ
ಅಸೊಯ್ ರಿಗ್ಲೊ ಖಡ್ಪಾ ಫಾತರ್
ಆನಿ ತ್ಯೆ ಪಾಜೆಕ್ ಆಪ್ಟಲ್ಲ್ಯಾ ಉದ್ಕಾನ್
ಬದಲ್ಲಿ ದಿಶಾ ವ್ಹಾಳ್ಯಾಚಿ ಆನಿ ಥಂಯ್ ಜಾಲೆ –
ವಾಂಟೆ ದೆಶಾಂಮದೆಂ.
*
ಹೆ ಸಿಂಧು, ತುಜೆ ಥಾವ್ನ್ ಜಲ್ಮಲ್ಲ್ಯಾ
ಪಾಂಚಾಂ ಪಯ್ಕಿಂತ್ಲ್ಯೆ ಮಾಲ್ಗಡೆ
ಸಟ್ಲೆಜಿಕ್ ವಿಚಾರ್ಜಯ್ ಆಸ್ಲ್ಲೆಂ -
ʼಜಾಯ್ ಆಸ್ಲೊವೆ ತಿಕಾ ವಾ ತಿಚ್ಯಾ ಭಯ್ಣ್ಯಾಂಕ್,
ತುಜ್ಯೆ ಆಸ್ತಿಂತ್ಲೊ ವಾಂಟೊ?ʼ
ಆತಾಂ ಪಳೆ ಮೆಳ್ಳೊನಾ ತಾಂಕಾಂಯ್
ಆನಿ ನಾ ಹಕ್ಕ್ ತುಕಾಯ್, ವಿಚಾರುಂಕ್
ತುಜೆಚ್ ಆಸ್ತಿಕ್!
ತುಜಿಂ ಭುರ್ಗಿಂಚ್ ಜಾಲಿಂ
ಪಂಜಾಬಾಚಿ ಜೆವ್ಚಾ ದಾಲಿಂ.
ವಾಟ್ಲಿ ತಾಂಚಿ ಭರೊಂಕ್ ವ್ಹಾಳ್ತಾತ್ ತಿಂ
ಬೆಸಾಯೆಕ್ ಪಾವ್ತಾ ಪರ್ಯಾನ್,
ಪುಸ್ತಾತ್ ಸರ್ದಾರಾಚಿಂ ದುಕಾಂ
ಆನಿ ತೆ ಉಡೊನ್ ನಾಚ್ತಾನಾ
ಭರ್ತಾತ್ ತುಜ್ಯಾ ಭುರ್ಗ್ಯಾಂಚೆ ದೊಳೆ, ಪಳೆವ್ನ್
ದಾದ್ಲ್ಯಾಂಚೊ ಭಾಂಗ್ಡಾ, ಬಾಯ್ಲಾಂಚೊ ಗಿದ್ದಾ.
ನಾಚ್ ಪಳೆಲೊ ತುಮಿ ಪಿಲಾಂನೊ ಜಾಯ್ತೊ
ಪೂಣ್ ಭೊಂವ್ಡಾಯ್ಲಿ ಜರ್ ಏಕ್
ದೀಶ್ಟ್ ತುಮ್ಚ್ಯೆ ಆವಯ್ಚೆರ್ -
ಕಳ್ತೆ ತುಮ್ಕಾಂಯ್ ತಿಣೆಂ ಭೊಗ್ಲ್ಲೆ ಕಷ್ಟ್
ಟಿಬೆಟಿ ಥಾವ್ನ್ ಕರಾಚಿ ಪರ್ಯಾನ್.
ಜಿಕಾ ಪಯ್ಲೆಂ ಫಾಪ್ಸುನ್ ದೆಶಾಂ ಮದೆಂ
ಗಳ್ಯಾಕ್ ವೊಡ್ಲೊ ಟಿಬೆಟ್ಯಾಂನಿ
ಮಧ್ಲ್ಯಾ ಭಾಗಾಕ್ ಉರಯ್ಲೊ ಆಮಿ
ನಿಮಾಣ್ಯಾಕ್ ಆಮ್ಕಾಂ ಜಾಯ್ನಾತ್ಲೆಲ್ಯಾಂನಿ!
ಆತಾಂ ವಾಪರ್ತಾತ್ ತಿಕಾ ತೇಗ್ ರಾಶ್ಟ್ರ್
ಆನಿ ಪಿಯೆತಾತ್ ತೆಂಚ್ ತಿಚೆಂ ಉದಕ್
ತರೀ ಝಗಡ್ತಾತ್ ಗಡಿರ್, ತಿಚೆ ತಡಿರ್.
ಆನಿ ತುಮಿಂ ʼಪಂಚ್ʼ ನ್ಹಂಯಾಂನೊ -
ಸಿಂಧುಚೊಚ್ ಪಾನೊ ಚಿಂವುನ್
ರಾವ್ಲ್ಯಾತ್ ಆಡ್ ತುಮ್ಚೆಚ್ ಆವಯ್ಚೆರ್!
ಮಾತೆಚೆರ್ ದಾಡ್ ಘಾಲುನ್
ಉಬ್ಜಲ್ಲೆ ಅಶಾಂತೆನ್ ಆಜ್
ಶಿಂಪ್ಲ್ಯಾತ್ ತುಮಿ ದೋನ್ ನಾಡಾಂನಿ.
ತ್ರಿವರ್ಣಾ ಸಂಗಿಂಯ್ ಮಿಸ್ಳಯ್ಲೊ ಪಾಚ್ವ್ಯಾಕ್
ಆತಾಂ ತೆಂ ನಿಳ್ಶೆಂ ರೊದ್ ಘುಂವ್ಚೆಂಚ್ ರಾವ್ಲಾಂ
ಪಳೆವ್ನ್ ತುಮ್ಚಿ ಗತ್.
*
ಸಿಂಧುಚೊ ಖರೊ ಮೋಗ್ ವಳ್ಕಲ್ಲ್ಯಾ ಪಯ್ಕಿಂ
ʼಇಕ್ಬಾಲ್ʼ ತೊ ಎಕ್ಲೊ
ಜಾಣೆಂ ಬರಯಿಲ್ಲೆಂ ಗೀತ್ ಗಾತಾನಾಂ
ಲ್ಹೊಂವ್ ಉಬಿ ಜಾತಾ ಸಿಂಧುಚಿಯ್,
ತ್ಯಾ ವ್ಹಾಳ್ಚ್ಯಾ ಪಾಂಚ್ ನ್ಹಂಯಾಂಚಿಯ್ -
“ಸಾರೆ ಜಹಾನ್ ಸೆ ಅಚ್ಛಾ, ಹಿಂದುಸ್ಥಾನ್ ಹಮಾರಾ”!
ಹಿ ಏಕ್ ಕವಿತಾ ಏಕ್ ಮಧುರ್ ಗೀತ್ ಗಾಯ್ತಾ, ಆನಿ ಗೀತ್ ಗಾಂವ್ಚೆಸಂಗಿಂ ಸಾಮಾಜಿಕ್, ರಾಜಕೀಯ್ ವಯ್ಚಾರಿಕ್ ಡೋಂಗ್ ಆನಿ ಹ್ಯಾ ಡೋಂಗಾಂತ್ ಎಕಾಚ್ ಆವಯ್ಚಿಂ ಭುರ್ಗಿಂ ಜಾವ್ನ್ ಎಕಾಮೆಕಾಚಿಂ ಮಾಸಾಂ ಖಿಮ್ಚುನ್ ಖಾಂವ್ಚಿ ಕಥಾಯ್ ಸಾಂಗುನ್ ವೆತಾ. ಕವಿತೆಂತ್ ವ್ಹಾಪಾರ್ಲ್ಲಿ ಭಾಸ್ ಸೊಂಪಿ ಆಸಾ ದೆಕುನ್ ಇಮಾಜಿಂಕ್ ಸುಟಾವೆಂ ವಿವರಾಂವ್ಚಿ ಗರ್ಜ್ ನಾ, ಕವಿತಾರಸಿಕಾಂ ಹಿ ಕವಿತಾ ವಾಚುನ್ ಗೆಲೆಪರಿಂಚ್ ಹ್ಯಾ ಕವಿತೆಚ್ಯಾ ವ್ಹಾಳ್ಯಾಂತ್ ಆನಂದ್ ಭಗುನ್ ಸಮ್ಜತೆಲಿಂ. ಹಿ ಕವಿತಾ ಫಕತ್ ಸಿಂಧು ನ್ಹಂಯ್ಚೆರ್ ಮಾತ್ರ್ ಆಸಾ ಮ್ಹಣುನ್ ಚಿಂತ್ಚೆತಸಲಿ ನ್ಹಯ್. ಹ್ಯಾ ನ್ಹಂಯ್ಚಿ ಸಾವ್ಳಿ ಆಮ್ಚ್ಯಾ ಸಮಾಜೆಂತ್ ಸಯ್ತ್ ಆಮಿ ಪಳೆವ್ಯೆತ್. ಎಕಾಚ್ ಆವಯ್ಚಿಂ ಭುರ್ಗಿಂ ತ್ಯಾ ಆವಯ್ಕ್ಚ್ ಖೆಂಡುನ್ ಅಪ್ಲಿ ಜಿಣಿ ಸಾರ್ಚೆಂ ಅಪ್ರೂಪ್ ಕಾಂಯ್ ನ್ಹಯ್. ಅಶೆಂಯ್ ಚಿಂತುಂಕ್ ಜಾತಾ ಜಶೆಂ ಎಕಾಚ್ ಭಾಸೆಚಿಂ ಭುರ್ಗಿಂ (ಲಿಪಿ) ಕಶೆಂ ಸ್ವಾರ್ಥ್ ಆನಿ ಅಬ್ಲೇಸ್ಪಣಾನ್ ಎಕಾಮೆಕಾ ಚ್ಯುರಾನ್ ಚ್ಯುರೆ ಕರುನ್ ತ್ಯಾ ಆವಯ್ಕ್ ಅಕ್ಮಾನ್, ನಿಂದಾ ಕರ್ತಾನಾ ತ್ಯೇ ಆವಯ್ಕ್ ಸಮ್ಜುನ್ ತಿಚೆ ತಳ್ಮಳೆ, ತಿಲೆ ವ್ಹಳ್ವಳೆ/ಕಳ್ವಳೆ ಉತ್ರಾಂನಿ ಸಾಂಗುನ್ ವೆತಾ.
[ಸ್ಪರ್ಧೊ] ಮಯ್ನ್ಯಾಚೊ ಕವಿ - 12 [Nov 2020]
[ಸ್ಪರ್ಧೊ] ಮಯ್ನ್ಯಾಚೊ ಕವಿ - 11 [Oct 2020]
ಸ್ಮಿತಾ ಶೆಣಯ್: ಕೊಂಕಣಿ, ಕನ್ನಡ್, ಇಂಗ್ಲಿಶ್ ನೆಮಾಳ್ಯಾಂನಿ ತಶೆಂಚ್ ಜಾಳಿಜಾಗ್ಯಾಂನಿ ಬರಂವ್ಚಿ ಹಿ ಮಂಗ್ಳುರ್ಚ್ಯಾ ಬೆಸೆಂಟ್ ಕೊಲೆಜಿಂತ್ ಪತ್ರಿಕೋಧ್ಯಮ್ ವಿಭಾಗಾಚಿ ಮುಖೇಸ್ತ್ ಜಾವ್ನ್ ವಾವ್ರ್ ಕರುನ್ ಆಸಾ. ಟಿವಿ ಚ್ಯಾನಲಾಂನಿ ನಿರೂಪಕಿ, ನಾಟಕಾಂನಿ ಅಭಿನಯ್, ಮಂಗ್ಳುರ್ ಆಕಾಶ್ವಾಣಿಂತ್ ಕಾರ್ಯಕ್ರಮಾಂ, ಡಿಜಿಟಲ್ ಆಡಿಯೊಂತ್ ಕಥಾ ಸಾದರ್ಪಣ್ ಅಶೆಂ ಹಿಚಿ ಪ್ರತಿಭಾ ವೆವೆಗಳ್ಯಾ ಶೆತಾಂತ್ ಆಸಾ.
More in Poinnari
ಕವಿತಾकविताPoem Feb 2025
ಧಾಳ್ಯೊ [ಡೊ. ಝೀಟಾ ಲೋಬೊ]
ಕವಿತಾकविताPoem Oct 2020
ಕೆನ್ನಾಂ ಪುಣಿ ಉಟ್ತೆಲ್ಯಾತ್... (- ವಿಲ್ಮಾ ಬಂಟ್ವಾಳ್)
ಕವಿತಾकविताPoem Nov 2016
ಎಕಾ ಫೊಂಡಾಚಿ ಕಥಾ
Send your comments to author on this writing
This is not a comment box. Nothing you write here appears on the site or is shown to any other reader: it is sent to him by email, privately, and he replies to you directly if a reply is called for.