[ನೋವ್ ಮಯ್ನೆ ಆಪ್ಲ್ಯಾ]

ನೋವ್ ಮಯ್ನೆ ಆಪ್ಲ್ಯಾ ಪೊಟಾಂತ್ ವ್ಹಾವವ್ನ್, ಅಪುಣ್ ಜಾವ್ನ್ ಖುದ್ದ್ ಜಾಯ್ತಿ ದೂಕ್ ಭಗುನ್ ಜಲ್ಮ್ ಘೆತ್‌ಲ್ಲ್ಯಾ ಭುರ್‍ಗ್ಯಾಕ್ ಏಕ್ ಆವಯ್ ಕಿತ್ಲ್ಯಾ ಮೊಗಾ-ಮಯ್ಪಾಸಾನ್ ಪೊಸ್ತಾ, ಆನಿ ಫಕತ್ ಆಪ್ಲ್ಯಾ ಭುರ್‍ಗ್ಯಾಪಾಸತ್ ಅಪ್ಲೊ ಸಂತೊಸ್, ಅಪ್ಲೆಂ ಸುಖ್ ಸಯ್ತ್ ತ್ಯಾಗ್ ಕರ್‍ತಾ ಮ್ಹಳ್ಳೆಂ ಅಪುರ್ಭಾಯೆಚೆಂ ಚಿಂತಪ್ ವ್ಹಾಳಂವ್ಚಿ ಹಿ ಕವಿತಾ ಖರಿಚ್ಚ್ ಜಾವ್ನ್ ಕಾಳ್ಜಾಕ್ ಲಾಗ್ಚೆತಸಲಿ.

ಶೀಲಾ ಭಂಡಾರ್‌ಕರ್ ಕೊಂಕ್ಣೆಂತ್ಲ್ಯಾ ಭೋವ್ ಥೊಡ್ಯಾ ಸ್ತ್ರೀ-ಸಂವೇದನ್ ಸಾಹಿತ್ ರಚ್ತೆಲ್ಯಾಂ ಪಯ್ಕಿಂತ್ಲಿ, ಭೋವ್ ಸೊಂಪಿ ಭಾಸ್ ವ್ಹಾಪಾರ್‍ಲ್ಯಾ, ಭೋವ್ ಸಾದೆಂ ಪುಣ್ ತಿತ್ಲೆಂಚ್ ಮಹತ್ವಾಚೆಂ ಚಿಂತಾಪ್ ಆಮ್ಚ್ಯೆ ಮತಿಂತ್ ಉಟಂವ್ಚೆಂ ಪ್ರೇತನ್ ಕರ್‍ಚೆಂ ದಿಸುನ್ ಯೆತಾ.

ಹೀ ಕೋಣಿ?

ವಾಸರೆಂತು ದೂದ್ ಉಕ್ಕೂನ್

ಯೆವ್ಚೆ ಫುಡೇ ಧಾವ್ನು ವೊಚ್ಚೂನು

ವಾಡ್ವಾಯ್ತಲಿ.

ಗಾಂತುನು ದವರ್ಲೆಲೆ ಮಧುರ

ಸೊಪನ ಹೋಳ್ನು ವತ್ತನಾ...

ಪೊಳೊನು ನುತ ರಾಬ್ತಲಿ.

ಪೋಳೆ ಕರ್ಪೂನು ವಚ್ಚನಾಶಿ

ಜಾಗ್ರತಿ ಕರ್ತಲಿ..

ತಿಗೆಲಿ ಕಿತ್ಲಿ ಕೀ ಆಶಾ ಲಾಸ್ಸುನು

ಗೊಬ್ಬೊರು ಕೋರ್ನು ಉಡ್ಡಯ್ತಲಿ.

ಆಯ್ದನಾಕ ಪೊಂಗ್ ಪಣಾಶಿ

ಪೊಳೊನು ಗೆತ್ತಲಿ..

ಆಪ್ಣೆ ಲೆ ಉಮೇದಿ, ಉತ್ಸಾಹ

ಆಪಣಚಿ ಮಸ್ತೂನು ಗಾಲ್ತಲಿ.

ಆಂವ್ಗಲೆ ಚೆ ಕಲೆ ಭಾರಿ

ಬುದ್ವಂತಕಾಯೇರಿ ಫೂಟ ಕರ್ತಲಿ.

ವಿಷಾದಾ ಚಿ ಶಾಯೆನ ಬರಯಿಲೆ ನಿತ್ರಾಣೇಚೆ

ಶಬ್ದ° ಮನಾ ವಣತೇ ವೈಲೆನ ಪುಶಿತಲಿ.

ಆಶಿ ಆಕಾಂಕ್ಷಾ ಸಗಟ್

ವಿಸೊರುಕ ವಾಸರೆಂತುಲೆ

ಗಟ್ಟಿ ಧಾಂಕ್ಣೆ ಡಬ್ಬೇಂತು

ಧಾಂಕುನು ದವರ್ನು ಖುಷಿ ಪಾವ್ತಲಿ.

ಸಗ್ಟಾಲೆ ದುಕ್ಯೆಕ ವಕ್ಕದ್ ಜಾತ್ತಲಿ..

ಆಪ್ಣೇಲಿ ದೂಕಿ ಪೂರಾಯಿ

ಆಯ್ದನ ಘಾಸುಚೆ ಸಿಂಕಾಂತು

ಹೋಳೊವ್ನು ಸೊಡ್ತಲಿ.

ಪ್ರೀತಿಚೊ ಅಭ್ಯಾಸು ಒಟ್ಟು ಕೋರ್ನು

ಆಂವ್ಗಲೆ ಗಡ್ಯೆ ಭಿತ್ತರಿ ಮೊಡ್ಚುನ್

ದವರ್ನು ಬಾಗಿಲ ಬಂದ್ ಕರ್ತಲಿ.

-  ಶೀಲಾ ಭಂಡಾರ್‌ಕರ್ [ಅಕ್ತೋಬರ್ 2017]