Monis, Dhamvnni ani Zoit
Dhamv marchi onivary sthiti az sorvank anivary, vellacho obhavo, unni zaun ayil'li sosnnikai, choddit zomomvchi pisai hea somsarant jieteleank sobhar pauttim kaim ami jivi matr vo yontram? mholl'llim chintnam ubhzoitat.
Kaim eka tempadhim riximuni topsy kortale kom-i, disangttle soironnen boschak kaim rana-molleamni vell kaddtale kom-i. Azkal toslim ranam ’vikasa’ chea ponda chirddoleant, prakritik sobhai, noisrgik rupam bodlon yetat. Ami semvchem vharem, ami piemvchem udak legun mhellem zatech yemvchea hea kallar, edoll mhonnasor ami ubhi ramvchea bhumycher matr tteaks bhorunk aslem tor, atatam udkak soit tteaks bhorunk poddlam, nitoll vayak soit fuddilea disamni tteaks bhorunk poddtelem. Zoxem minrol udak molak gheun semvchem samany zal'leporim, oksizonachim potim molak ghemvchem samany zamvche dis chodd pois nant.
Horyeka ghoddye bodlon yemvchea aichoya kallar amchim chintnam bodlotat, amche vichar bodlotat. Hachim karnnam koslim-i asondit, punn az monis gamvchim ghoram soddun flettamni jieunko posond kortana, flettamni jietolo bongleamni jieunko posond korta. Ani somajik nodrent ’man’ opnnamvochak, kitem sorou korta. Cholun vecho gaddi gheta, lhan gaddi ascho vhodd gaddi gheta. Ani ’zoiteunt’ mholl'llea chouktt'ttant rigazoi tor, ek bonglo asonk zai, ek gaddi asonk zai, hem asonk zai, tem asonk zai.... Mholl'lli pott'tti toyar zata. Amkam zonm' diun vhodd kel'lea amchea prayest auy-bapaik ’axreant’ dourtamv, ani aplea bongleamni desi-videsi petteank postamv. Nhoi? ani hea petteank nhannounko, mustaiki nhesounko, va sodam-i bhair bhomvddaunko mhonn nomearlele astit punn amchea prayest auy-bapaik amchea ghoramni poschi tank zamv chintap soit amkam na. Ami khoinchorgi vatt chukleamv mholl'llem apradhim chintap amche motint/kallzant asa toryi amkam tem vimrsun chintchi xeathi zamv soironn na, dekun amkam he sombondh uddasak korun dimvche dolali udeleat. Aveancho divs, bapaicho divs, akycho divs, mamacho divs mholl'lle dis udeleat, ani viproyas mhollear ami soit hea divsak achronn kortamv. Hem sombondhak mat kiteak? fuddilea disamni ’petteancho divs’, ’majrancho divs’, ’reddeancho divs’, ’moxincho divs’ yetit, ani te palltolem-i dharall astit.
Zoit konnak naka? horyeklo jieta zoiteunt zaunko. Bhovo borem chintap hem. Punn ’zoiteunt’ mholl'llea sobdhant kitem sorv attapon asa? hem somzonchem bhovo mohtvachem. Somajik nodren ’il'li ast, ek bonglo, ghor-kamachim, ghorant gaddi, beank bealens....’ itlench? hem konixtt mapan zai nhoi?
Borem, tor amkanch ami vicharoyam; amcheach bhava va bhoinnik nagoun kel'li ast ti ast?
Zonm' datarank duk diun bhandl'lo bonglo konnachea sukhak? va koslea doulotek?
Petteank bhomvddamvchi gaddi zor amchea ontostechi kuruH dita tor, kosli ti ontost?
Chintunk gelear zaitim sovalam amchea motint udetit, punn chintunk konnak vell asa? motik besor ghalunk konnak soironn asa?
Amim dhamveam, punn cholon vetelea herank lottun ghalchem naka. Ami jikeam punn herank solvomvochi jik omkam naka. Amim borim mhonn ruzu korunk heranchem unnemponn mezunk vechem naka. Ami vhodd zaveam punn herank lhan korun nhoi.
- Valley Quadros (Janer 2016)
