ಸಂಪಾದಕೀಯ್ - 12. ಜಿಣಿ, ಸಂವೇದನ್ ಆನಿ ಸಾಹಿತ್ಯ್
ಹ್ಯಾ ಸಂಸಾರಾಂತ್ ಜಲ್ಮೊನ್ ಆಯಿಲ್ಲ್ಯಾ ಹರ್ಯೆಕಾಕ್ ’ಜಿಣಿ’ ಮ್ಹಣುನ್ ಆಸ್ತಾ, ಆನಿ ತ್ಯಾ ಜಿಣಿ ಮ್ಹಳ್ಳೆ ಆವ್ದೆಂತ್ ತೊ ಕೊಣಾಕ್ ಪರ್ಕಿ/ಅಪ್ಲೊ/ಪೆಲೊ ಜಾತಾ, ಕಾಂಯ್ ಥೊಡೆಂ ಹೆರಾಂಲಾಗಿಂ ಅಭಿವ್ಯಕ್ತಿ ಕರ್ತಾ, ಕಾಂಯ್ ಇಲ್ಲೆಂ ಹೆರಾಂ ಥಾವ್ನ್ ಆಯ್ಕತಾ, ಸಮ್ಜತಾ ವಾ ಶಿಕ್ತಾ. ಆಜ್ಕಾಲ್ ಹೆಂಚ್ ಕಾಮ್ ಮನ್ಶಾನ್ ರಚ್ಲ್ಲೆಂ ರೊಬಾಟ್ ಸಯ್ತ್ ಕರ್ತಾ ದೆಕುನ್, ರೊಬಾಟ್ ಆನಿ ಮನ್ಶಾಕ್ ಕಾಂಯ್ ಫರಕ್ ಆಸ್ತಾ? ಮನ್ಶಾಕ್ ಕಾಳಿಜ್ ಆಸಾ, ಬರೆಂ/ವಾಯ್ಟ್ ಮ್ಹಳ್ಳೆಂ ಚಿಂತ್ಚಿ ಸಕತ್ ಆಸಾ, ಆನಿ ಕಾಳ್ಜಾಂತ್ ಬರೆಂ/ವಾಯ್ಟ್ ಮ್ಹಣುನ್ ಸಾಂಗ್ಚಿ ಏಕ್ ಬೋಬ್ ಆಸಾ. ತರ್ ಸಮಾಜೆಂತ್ ಎಕಾ ಸಾಹಿತಿಕ್ ತಶೆಂಚ್ ಎಕಾ ಮನ್ಶಾಕ್ ತಫಾವತ್ ಅಸಾ?
ಹರ್ ಏಕ್ ಸಾಹಿತಿ ಏಕ್ ಮನಿಸ್ ಪುಣ್ ಹರ್ ಏಕ್ ಮನಿಸ್ ಸಾಹಿತಿ ನ್ಹಯ್. ತರ್ ಸಾಹಿತಿ ಮ್ಹಳ್ಯಾರ್ ಕೊಣ್?
ಪುಣ್ ಹಾಚ್ಯಾಧಿಂ ಸಾಹಿತ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಆಮಿ ಸಮ್ಜುಂಚಿ ಗರ್ಜ್. ಜ್ಯೆ ಕಿತೆಂ ಬರ್ಪಾನಿಶಿಂ ಆಸಾ ತೆಂ ಸಾಹಿತ್ ಮ್ಹಣ್ ಜಾಯ್ತೆ ವಾದ್ ಮಾಂಡ್ತಿತ್, ಹೆಂ ಸತ್ ಆಸ್ತೆಂ ತರ್ ’ಅಜಂತಾ-ಎಲ್ಲೋರಾಚ್ಯೊ ಮೊನ್ಯೊ ಫಾತ್ರಾ ಪುತ್ಳ್ಯೊ ಆಜ್ ಸಂಸಾರಾಕ್ ಕವಿತಾ ಜಾತ್ಯೊನಾಂತ್’ ನ್ಹಯ್?, ತರ್ ಸಾಹಿತ್ ಮ್ಹಳ್ಯಾರ್ ಕಿತೆಂ?
ಏಕ್ ಅಭಿವ್ಯಕ್ತಿ, ಜಿ ಎಕಾ ಮನ್ಶಾಚ್ಯಾ ಸಮ್ಜೊಣೆಂತ್ ವಾ ಜಾಣ್ವಾಯೆಂತ್ ಮಿಸ್ಳೊನ್, ಜೆಮೆಂವ್ಚ್ಯಾ ಸಮಾಜೆಚ್ಯಾ ಸಂವೇದನಾಂಕ್ ಸ್ಪಂದನ್ ಕರ್ಚೆಂ ಬರವ್ಪ್. ಹೆಂ ಸಂವೇದನ್ ಕಸಲೇಂಯ್ ಆಸ್ಯೆತಾ, ದಯಾ-ಭಿರ್ಮತ್ ಆಸ್ಯೆತಾ, ಜಾಗ್ವಣ್-ತಿದ್ವಣ್ ಆಸ್ಯೆತಾ, ಏಕ್ ಸಿದ್ದಾಂತಿಕ್ ವಾಟ್ ಆಸ್ಯೆತಾ ವಾ ಏಕ್ ವೈಚಾರಿಕ್ ದಿಶ್ಟಾವೊ ಆಸ್ಯೆತಾ, ಪುಣ್ ಖಂಚ್ಯಾಯ್ ಎಕಾ ಸಾಹಿತಿಕ್ ಆಸುಂಕ್ ಜಾಯ್ ಜಾಲ್ಲಿ ಮುಳಾವಿ ಅರ್ಹತಾ ಜಾವ್ನಾಸಾ; ಹೆರಾಂಚ್ಯಾ ದುಃಖಿಕ್ ಸಮ್ಜುಂಚೆಂ ಆನಿ ತ್ಯಾ ದುಃಖಿಕ್ ಸ್ಪಂದನ್ ಕರ್ಚೆಂ.
ಆಗುಸ್ತೊ ಕ್ಯೂರಿಚಿಂ ಉತ್ರಾಂ ಯಾದಿಕ್ ಯೆತಾತ್; "Sensitive people suffer more, but they love more and dream more."
ಸಂವೇದನ್ಶೀಲತಾ (Sensitivity) ಕೊಣಾಕ್ ಅಸ್ಕತ್ಕಾಯ್ ಮ್ಹಣ್ ದಿಸುಂಕ್ ಪುರೊ ಕೊಣಾಕ್ ಹೆರ್ ಕಿತೆಂ. ಪುಣ್ ಜೊ ಕೊಣ್ ಸಂವೇದನ್ಶೀಲತಾ ಸಾಂಡುನ್ ಬರಯ್ತಾ, ತೊ ಕಿತ್ಲೊಯ್ ಪ್ರತಿಭಾವಂತ್ ಅಸುಂದಿ, ಪುಣ್ ನೈತಿಕ್ ಸಂಸಾರಾಂತ್ ತೊ ಪೊಕೊಳ್.
ಏಕ್ ಕವಿ ಸಯ್ತ್ ಎಕಾ ರಿತಿಚೊ ಸಾಹಿತಿ, ಜೆದ್ನಾಂ ತೊ ಸಮಾಜಿಕ್ ಸ್ಪಂದನ್ ಕರ್ತಾ, ಸಮಾಜಿಕ್ ಜವಾಭ್ದಾರಿ ಘೆತಾ ತೆದ್ನಾ ತೊ ಸಾಹಿತಿ ಜಾತಾ ಶಿವಾಯ್, ಫಕತ್ತ್ ಉತ್ರಾಂ ಗುಂತುನ್ ಕವಿತಾ ಸಜಂವ್ಕ್ ಜೆದ್ನಾಂ ಹೆರಾಂಚೊ ಮಾನ್ ಗಳ್ಸಿತಾ ತೊ ಫಕತ್ತ್ ಏಕ್ ’ಕಾಗ್ದಾಚೆಂ ಫುಲ್’ ಮಾತ್ರ್ ಜಾತಾ, ಫಕತ್ತ್ ಧಾಖವ್ಪ್ ಶಿವಾಯ್ ತಾಂತುಂ ಕಸ್ಲೊಚ್ಚ್ ’ಸ್ವಾದ್/ಪರ್ಮಳ್’ ಮ್ಹಳ್ಳೊ ಆಸಾನಾ.
ಕವಿ ಕೆದ್ನಾಂಯ್ ವೆಗ್ಳೊಚ್ಚ್ ಜಾವ್ನಾಸ್ತಾ, ಜಮ್ಯಾಂತ್ ಸಯ್ತ್ ತೊ ಎಕ್ಸುರೊಚ್, ಆನಿ ಎಕ್ಸುರೊ ಜಾವ್ನ್ಯೀ ತೊ ಜಮ್ಯಾಕ್ ದೆಖ್ತಾ; "The solitude of the poet is the uniqueness of his experience, and the particularity of his sensitivity and imagination" (ಕವಿಚೆಂ ಏಕಾಂತ್ಪಣ್ ಅಪ್ಲ್ಯಾ ಅನ್ಭೋಗಾಚಿ ಎಕೀನ್ಪಣ್ ಜಾವ್ನಾಸಾ; ತಶೆಂಚ್ ತಾಚಿ ಸಂವೇದನ್ಶೀಲತಾ ಆನಿ ಕಲ್ಪನಾಂಚಿ ವಿಶೇಷತಾ ಜಾವ್ನಾಸಾ.) ಮ್ಹಳ್ಳಿಂ - ಖ್ಯಾತ್ ಪೋಲಿಶ್ ಕವಿ ಎಮ್. ಜಾಸ್ತ್ರುನಾಚಿಂ ಉತ್ರಾಂ ಯಾದಿಕ್ ಯೆತಾತ್.
ಜಿಣ್ಯೆ ಪಯ್ಣಾಂತ್ ಜಾಯ್ತೆಂ ಬರೆಂ/ವಾಯ್ಟ್ ಆಮಿಂ ಪಳೆತಾಂವ್, ಆಯ್ಕತಾಂವ್, ಅನ್ಭೋಗ್ ಕರ್ತಾಂವ್. ಥೊಡೆಂ ಆಮ್ಕಾಂ ಗರ್ಜೆಚ್ಯಾಕೀ ಚಡ್ ಸಮ್ಜತಾ ತರ್ ಥೊಡೆಂ ಆಮ್ಕಾಂ ಸಮ್ಜತಾನಾ ವೇಳ್ ಉತರ್ತಾ. ಹೊಚ್ಚ್ ಜಿಣ್ಯೆಚೊ ಮಿಸ್ತೆರ್ ನ್ಹಯ್ಗೀ?.
ಅಜೀಕ್ ಕಾಂಯ್ ಪಂಚ್ವೀಸ್ ವರ್ಸಾಧಿಂ, ಮಂಗ್ಳುರಾಂತ್ಲ್ಯಾ ಸಾಂ|ಲುವಿಸ್ ಕೋಲೆಜಿಂತ್ ಪಿ.ಜಿ.ಡಿ.ಸಿ.ಎ (PGDCA) ಶಿಕೊನ್, ಜೊಕ್ತೆಂ ಕಾಮ್ ಮೆಳ್ ಮೆಳುಂಕ್ನಾ ದೆಕುನ್ ಯುರೇಕಾ ಫೋರ್ಬ್ಸ್ ಮ್ಹಳ್ಳ್ಯಾ ಎಕಾ ಕಂಪ್ಣೆಂತ್ ಘರಾನ್ಘರ್ ವಚುನ್ ’ವ್ಯಾಕ್ಯೂಮ್ ಕ್ಲೀನರ್’ ವಿಖ್ಚೆಂ ಕಾಮ್ ಧರ್ಲೆಂ. ಮ್ಹಾಕಾ ಶಿವ್ಮೊಗ್ಗಾಂತ್ ಕಾಮ್ ಕರುಂಕ್ ಧಾಡ್ಲೊ. ಪೆಂಟೆಂತ್ಲ್ಯಾ ಎಕಾ ಲಾಡ್ಜಾಂತ್ ದಿಸಾಕ್ ವೀಸ್ ರುಪಯಾಂಚೆಂ ರೂಮ್ ಭಾಡ್ಯಾಕ್ ಕರ್ನ್ ರಾವ್ಲೊಂ. ಕಾಮ್ ವೆಳಾನುಸಾರ್ ಜಾಂವ್ಕ್ ಆಸ್ಲೆಂ;
ಸಕಾಳಿಂ ಸಾರ್ಕೆ ಸಾತ್ ವೊರಾಂಕ್ ಮೀಟಿಂಗ್ ಆಸ್ಲೆಂ; ಆನಿ ತ್ಯಾ ಮಿಟಿಂಗಾಕ್ ಹಾಜರ್ ಜಾವ್ನ್, ಆಜ್ ಹಾಂವ್ ಖಂಚ್ಯಾ ಗಾಂವಾಕ್ ವೆಚ್ಯಾರ್ ಆಸಾಂ, ಕಿತ್ಲಿಂ ಮಿಶಿನಾಂಚೊ ಡೆಮೋ ಆಸಾ, ಕಿತ್ಲಿಂ ಮಿಶಿನಾಂ ವಿಖ್ಚಿ ಸಾಧ್ಯತಾ ಆಸಾ ಮ್ಹಣ್ ಸಾಂಗುಂಕ್ ಆಸಾ, ತೆಂ ಸರ್ವ್ ಆಮ್ಚೊ ಬೋಸ್ ಅಪ್ಲ್ಯಾ ಡಾಯ್ರಿಂತ್ ಬರವ್ನ್ ಘೆತಾಲೊ. ಫಕತ್ತ್ ಧಾ ಮಿನುಟಾಂಚೆಂ ಮಿಟಿಂಗ್, ಉಪ್ರಾಂತ್ ಆಮಿ ಎಕೆಕ್ಲೆ ಎಕೆಕಾ ಗಾಂವಾತೆವ್ಶಿನ್ ಭಂವ್ತಾಲ್ಯಾಂವ್. ತಶೆಂಚ್ ಸಾಂಜೆರ್ ಸಾರ್ಕೆಂ ೮ ವೊರಾರ್ ಪರತ್ ಏಕ್ ಮಿಟಿಂಗ್ ಆಸ್ಲೆಂ, ಆನಿ ತ್ಯಾ ಮಿಟಿಂಗಾಂತ್, ಸಕಾಳಿಂ ದಿಲ್ಲ್ಯಾ ಪಟ್ಟೆಕ್ ಅನುಸಾರ್ ಕಾಮ್ ಕೆಲಾಂಗಿ ವ ನಾಂಗಿ ಮ್ಹಳ್ಳಿ ಜವಾಬ್ ದಿಲ್ಯಾರ್ ಜಾಲೆಂ.
ಶಿವ್ಮೊಗ್ಗಾಂತ್ ಕೊಣಾಚ್ಯೀ ವಳೊಕ್ ನಾತ್ಲ್ಲಿ ದೆಕುನ್ ಟೆಲಿಫೋನ್ ಡೈರೆಕ್ಟರಿಂತ್ ಆಸ್ಚ್ಯಾ ನಂಬ್ರಾಂಕ್ ವಿಂಚುನ್ ಎಕೆಕ್ಲ್ಯಾಕ್ ಫೋನ್ ಕರುನ್, ತಾಂಚೆಂ ಅಪೋಂಯ್ಟ್ಮೆಂಟ್ ಘೆಂವ್ಕ್ ಆಸ್ಲೆಂ. ತಾಂತುಂ ಎಕ್ಲೊ ಆಸ್ಲೊ ಕೊಲೆಜಿಚೊ ಪ್ರೊಫೆಸ್ಸರ್; ಪ್ರೊ|ಆನಂದ್. ತಾಚ್ಯಾ ಘರಾ ವಚುನ್ ವ್ಯಾಕ್ಯೂಮ್ ಕ್ಲೀನರಾಚೊ ಡೆಮೋ ದಿತಾನಾ, ತಾಣೆಂ ಮ್ಹಜೆವಿಶಿಂ, ಮ್ಹಜ್ಯಾ ಶಿಕ್ಪಾವಿಶಿಂ ಸವಾಲ್ ಕೆಲೆಂ. ಹಾಂವೆಂ ತಾಕಾ ಸತ್ಚ್ಚ್ ಸಾಂಗ್ಲೆಂ ದೆಕುನ್ ತಾಣೆಂ ಏಕ್ ಸಲ್ಹಾ ದಿಲಿ; ’ತುಂ ಪಿ.ಜಿ. ಶಿಕೊನ್ ಹೆಂ ಕಾಮ್ ಕರ್ತಾಯ್? ತುಕಾ ಆಸಕ್ತ್ ಆಸಾ ತರ್, ತುಕಾ ಎಕಾ ಕಂಪ್ಯೂಟರ್ ಶಿಕಂವ್ಚಾ ಕ್ಲಾಸಿಂತ್ ಶಿಕಂವ್ಚೆಂ ಕಾಮ್ ದಿತಾಂ, ಪಾರ್ಟ್-ಟಾಯ್ಮ್ ಕಾಮ್’ ಮ್ಹಣಾಲೊ.
ಸಕಾಳಿಂ ಸಾತ್ ಥಾವ್ನ್ ನೋವ್ ವೊರಾ ಪರ್ಯಾಂತ್ ಶಿಕಂವ್ಕ್ ಆಸ್ಲೆಂ; ಕಾಂಯ್ ಇಕ್ರಾ-ಭಾರಾ ವಿಧ್ಯಾರ್ಥಿಂ ಆಸ್ಲಿಂ. ಮ್ಹಾಕಾಯ್ ಶಿಕಂವ್ಚಿ ಉರ್ಭಾ ಆಸ್ಲಿ ದೆಕುನ್ ವೆಳಾರ್ ಸಕ್ಕಡ್ ಕಾಮ್ ಕರುಂಕ್ ಆಸ್ಲೆಂ. ಸಕಾಳಿಂ ಹಾಂವ್ ಸಾಡೆ ಪಾಂಚ್ ವೊರಾಂಕ್ ಉಟ್ತಾಲೊಂ, ಆನಿ ಸಾತಾಚೆಂ ಮಿಟಿಂಗ್ ಅಖೆರ್ ಜಾತಚ್ಚ್ ಸವಾಯ್ ಸಾತಾಂಕ್ ಕ್ಲಾಸ್ ಘೆಂವ್ಕ್ ಯೆತಾಲೊಂ, ಪುಣ್ ಎಕ್ಲೊ ತರ್ನಾಟೊ ಸದಾಂಯ್ ಮ್ಹಜ್ಯಾಕೀ ತಡವ್ ಕರ್ನ್ ಕ್ಲಾಸಿಕ್ ಯೆತಾಲೊ. ಥೊಡೆ ದೀಸ್ ಗೆಲ್ಲೆಪರಿಂಚ್ ಹಾಂವೆಂ ’ವೆಳಾರ್ ಕ್ಲಾಸಿಕ್ ಯೇನಾತ್ಲ್ಯಾರ್ ಅಪುಣ್ ಕ್ಲಾಸಿಕ್ ಘೆಂವ್ಚೊನಾ’ ಮ್ಹಣುನ್ ತಾಕಾ ಚತ್ರಾಯ್ ದಿಲಿ. ತರ್ಯೀ ತೊ ತಡವ್ ಕರ್ನ್ ಯೆತಾಲೊ ದೆಕುನ್ ಎಕಾ ದಿಸಾ ತಾಕಾ ಹಾಂವೆಂ ಕ್ಲಾಸಿಂತ್ಲೊ ಭಾಯ್ರ್ ಘಾಲೊ.
ನೋವ್ ವೊರಾಂಚೆರ್ ಕ್ಲಾಸ್ ಸಂಪವ್ನ್ ಹಾಂವ್ ಭಾಯ್ರ್ ಯೆತಾನಾ ತೊ ತರ್ನಾಟೊ ಅಪ್ರಾಧಿ ಜೀನ್ಸಾರ್ ಮ್ಹಾಕಾಚ್ಚ್ ರಾಕುನ್ ಆಸ್ಲೊ. ಭೋವ್ ನಮೃತಾಯೆನ್ ಮ್ಹಾಕಾ ಸಮ್ಜಾಯ್ಲಾಗ್ಲೊ; ತೊ ಆನಿ ತಾಚಿ ಆವಯ್ ಸಕಾಳಿಂ ಸಾಡೆ ತೀನ್ ವೊರಾಂಕ್ ಉಟೊನ್, ವೀಸ್-ಭಾವೀಸ್ ಮೊಶಿಂಚೆಂ ದೂದ್ ಕಾಡುನ್, ಉಪ್ರಾಂತ್ ತೆಂ ದೂದ್ ವರುನ್ ಹೊ ತರ್ನಾಟೊ ಹೊಟೆಲಾಂನಿ ವಿಖುನ್ ಕ್ಲಾಶಿಕ್ ಯೆತಾಲೊ, ಪುಣ್ ಹೊಟೆಲ್ ಕೆದ್ನಾಂ ಸಾತಾಂಕ್ ತರ್ ಕೆದ್ನಾಂ ಧಾ-ವೀಸ್ ಮಿನುಟಾಂ ತಡವ್ ಜಾತಾಲೊ ದೆಕುನ್ ಕ್ಲಾಶಿಕ್ ಯೆತಾನಾ ಸಯ್ತ್ ತರ್ನಾಟ್ಯಾಕ್ ತಡವ್ ಜಾತಾಲೊ.
ಆಯ್ಕುನ್ ಮ್ಹಾಕಾಚ್ಚ್ ಮ್ಹಜೆರ್ ರಾಗ್ ಆಯ್ಲೊ, ತ್ಯೇ ಉಪ್ರಾಂತ್ ಹಾಂವ್ ಮುಂಬಯಾಂತ್ ಸಭಾರ್ ವರ್ಸಾಂ ಶಿಕಯ್ತಾಲೊಂ ದೆಕುನ್ ಹರ್ಯೆಕಾ ವಿಧ್ಯಾರ್ಥಿವಿಶಿಂ ಪಯ್ಲೆಂ ಸಮ್ಜುಂಚಿ ಮ್ಹಜಿ ಪಯ್ಲಿ ಗರ್ಜ್ ಮ್ಹಣ್ ಸಮ್ಜುನ್ ಆಯಿಲ್ಲೊಂ. ಮ್ಹಜ್ಯಾ ಜಿಣ್ಯೆಂತ್ ಹೊ ತರ್ನಾಟೊ ಎಕ್ ಕವಿತಾ ಜಾವ್ನ್ ಉದೆಲ್ಲೊ ಆನಿ ಕೆದಿಂಚ್ ವಿಸ್ರುಂಕ್ ಸಕುಂಕ್ ಜಾಯ್ನಾ ತಸ್ಲೊ ಅನ್ಭೋಗ್ ಜಾವ್ನ್ ಉರ್ಲೊ.
ಶಿಕ್ಚೆಂ ಮನ್ ಆಸ್ಲ್ಯಾರ್ ಫಾತ್ರಾಥಾವ್ನ್ಯೀ ಲಿಸಾಂವ್ ಶಿಕ್ಯೆತಾ, ಪುಣ್ ವೈಚಾರಿಕ್ ಕಾಂಠಾಳೊ ಮತಿಂತ್ ಭರೊನ್ ಗೆಲ್ಲ್ಯಾಂಕ್, ವೇಳ್ ನಾ, ಸಯ್ರಣ್ ನಾ, ಚಿಂತಾಪ್ ನಾ, ದೆಕುನ್ ಹ್ಯಾ ಸಂಸಾರಾಂತ್ ಜಿಯೆತಾತ್ ತರ್ಯೀ ತಾಂತುಂ ಅಪ್ಲೊಚ್ಚ್ ಮ್ಹಳ್ಳೊ ಸಂಸಾರ್ ಕರುನ್ ಜಿಯೆತಾತ್. ಭೆರೊಯ್ ಬರೊ, ಬರೊಯ್ ಭೆರೊ ಮ್ಹಣ್ತಾನಾ ಖರೆಂಚ್ ಅಸಲೆ ತರ್ ’ಸಾಹಿತಿ/ಕವಿ’ ತರ್, ತ್ಯಾ ಸಾಹಿತಿ/ಕವಿ ಮ್ಹಳ್ಳ್ಯಾ ಸಭ್ದಾಂಕ್ಚ್ಚ್ ಕಾಂಠಾಳೊ ಉಭ್ಜತಾ. ಸಾಹಿತ್ ಆವಾಜ್ ಕರಿನಾ, ಸಾಹಿತ್ ಮೌನ್. ಸಾಹಿತ್ ಪಂಗಡ್ ಭಾಂದಿನಾ, ಸಾಹಿತ್ಚ್ಚ್ ಏಕ್ ಜಮೊ. ಪುಣ್ ಕುಂಡೊಚ್ಚ್ ’ಉಂಡೊ’ ಮ್ಹಣ್ತೆಲ್ಯಾಂಕ್ ಕಿತೆಂ ಪಡೊನ್ ಗೆಲಾಂ ಕೊಣ್ ಬರೊ ಕೊಣ್ ಭೆರೊ ಮ್ಹಣುನ್?
ಅಶೆಂ ಮ್ಹಣ್ತಾಸ್ತಾಂ ಅಜೀಕ್ ಇಕ್ರಾ ವರ್ಸಾಧಿಂ ಬರಯಿಲ್ಲ್ಯಾ ದೋನ್ ವೊಳಿಂಚೊ ಉಡಾಸ್ ಜರೂರ್ ಯೆತಾ;
’ಸತ್ ಸಾಂಗುಂಕ್ ಜಾಯ್ನಾಂಗಾ ದೆಕುನ್ ಮಾಂಕೊಡ್ ಜಾಲಾ ವಾಗ್ಗಾ
ರಾಯ್ ಜಾವ್ನ್ಚ್ಚ್ ಉರ್ತಾಂ, ರಿತ್ಯಾ ಪೊಟಾರ್ಚ್ಚ್ ಮೊರ್ತಾಂ, ಫಿಕಿರ್ ಕೊಣಾಕ್ ಕಿತ್ಯಾಕ್?
- ವಲ್ಲಿ ಕ್ವಾಡ್ರಸ್ [ಮಾರ್ಚ್, , 2017]
