ಸಂಗೀತಾ ನಾಯ್ಕ್

ಸಂಸಾರಾಂತ್ ಯೆದೊಳ್ ಪಾಸೊನ್ ಕೊಣೆಂಚ್ ಕಲ್ಪನ್ ಕರುಂಕ್ ಜಾತ್‌ಲ್ಲ್ಯಾ ಕಾಳಾಂತ್ ಆಮಿ ಜಿಯೆವ್ನ್ ಆಸಾಂವ್. ಭೊವ್ಶಾ ಮ್ಹಾ-ಝುಜಾವೆಳಾರ್ ಸಯ್ತ್ ಜಾಂವ್ ಅಸಲೆ ದೀಸ್ ಕೊಣೆಂಚ್ ಕಾಡ್‌ಲ್ಲೆವಿಶಿಂ ಆಮಿ ಇತಿಹಾಸಾಚ್ಯಾ ಬುಕಾಂನಿ ವಾಚುಂಕ್ ನಾ. ಕೋವಿಡ್ ವ ಕೊರೊನಾ ವಾಯ್ರಸಾನ್ ಅಖ್ಖ್ಯಾ ಮನಶಾ ಕುಳಾಕ್‌ಚ್ ಧುಸ್ಪಟಾಯ್ಲೆಂ. ಸುರವೆರ್ ಫೊಕಾಣಾಂ ಕೆಲ್ಲ್ಯಾಂನಿ ಸಯ್ತ್ ಜೆದನಾ ಆವ್ಯಾಚೆಂ ಉದಕ್ ವಯ್ರ್ ಆಯಿಲ್ಲೆಪರಿಂ ಸಂಕಶ್ಟ್ ಅಪ್ಲ್ಯಾಚ್ ಗಾಂವಾಕ್ ಜೆದನಾಂ ಹೆಂ ವಾಯ್ರಸ್ ರಿಗ್ಲೆಂ ತೆದ್ನಾಂ ಚಿಂತುಂಕ್ ಮಜ್ಬೂರ್ ಜಾವ್ನ್ ಆಪಾಪ್ಲ್ಯಾ ಘರಾಂನಿ ಬಂಧ್ ಜಾಲೆ.

ಕವಿ ಮ್ಹಳ್ಯಾರ್ ಸಭಾರ್ ಅರ್ಥ್ ಆಸುಯೆತಾ. ಚರಿತ್ರೆಚ್ಯಾ ಬುಕಾಂನಿ ರಾಯಾಂನಿ ಅಪ್ಣಾಚಿ ವ್ಹಡ್ವಿಕ್ ಗಾಂವ್ಚ್ಯಾಕ್ ಪೊಸ್‌ಲ್ಲೆ ಕವಿ ಜಿಯೆವ್ನ್ ಆಸ್ತಾಲೆ. ತಾಂಚೆಂ ಕಾಮ್ ಫಕತ್ ಪಾಟೊಸಾಚೆರ್ ಬೊಸ್‌ಲ್ಲ್ಯಾ ರಾಯಾಂಚೆರ್, ತಾಂಚ್ಯಾ ಕಾಯ್ದೆ ಕಾನುನಾಂಚೆರ್ ಹೊಗ್ಳಿಕ್ ಉಚಾರ್ಣಿ ಕರ್ಚೆಂ ಶಿವಾಯ್ ಹೆರ್ ಕಿತೆಂಚ್ ತಾಂಕಾಂ ಪಡೊನ್ ಗೆಲ್ಲೆಂ ನಾ. ತೊ ಕಾಳ್ ರೋಮ್ಯಾಂಟಿಸಮಾಚ್ಯಾಕೀ ಆಧ್ಲೊ ಆಸುಯೆತಾ. ಉಪ್ರಾಂತ್ ರೊಮ್ಯಾಂಟಿಸಮ್ ಆಯ್ಲೆಂ, ಕಾಳ್ ಬದಲ್ನ್ ಗೆಲ್ಲೆಪರಿಂಚ್ ಕವಿಚ್ಯಾ ಅರ್ಥಾಚೊ ಸಯ್ತ್ ಬದ್ಲಾವಣ್ ಜಾವ್ನ್ ಆಯ್ಲೆಂ. ಮೋಡರ್ನ್, ಪೋಸ್ಟ್ ಮೋಡರ್ನ್ ಉಪ್ರಾಂತ್ ದಲಿತ್-ಬಂಡಾಯ್ ಕವಿತೆಂನಿ ಕವಿಂಚೆಂ ರೂಪ್‌ಚ್ ಬದ್ಲಿಲೆಂ. ಎಕಾ ತೆಂಪಾದಿಂ ಕವಿ ಮ್ಹಳ್ಯಾರ್ ರಾಯಾಂಕ್ ಹರ್ಸುಂಕ್ ಆಸ್ಲೆ ಆತಾಂ ಸಮಾಜಿಕ್ ಕಾಳ್ಜಿ ಆಸ್ಚೆ, ಸಮಾಜೆಚ್ಯಾ ದಣ್ಸಲ್ಲ್ಯಾಂಚ್ಯಾ ಜಿವಿತಾಚೆರ್ ಸಮಾಜೆಚ್ಯಾ ಸಂಘರ್ಶಾಂಚೆರ್ ಸ್ಪಂದನ್ ಕರ್ಚೆ ಜಾಲೆ. ಪುಣ್ ವಿಪರ್ಯಾಸ್ ಮ್ಹಳ್ಯಾರ್ ಅಜೂನ್ ಜಾಯ್ತೆ ಕವಿ ತೆಚ್ ಪಾರಂಪರಿಕ್ ವರ್ಗಾಂತ್ಲೆ ಜಾವ್ನ್ ಉರಲ್ಯಾತ್. ತಾಂಚ್ಯೊ ಕವಿತಾ ಫಕತ್ ಸಕ್ಕಡ್ ಸಾರ್ಕೆಂ ಆಸ್ತಾನಾ ಘಡ್ತಾತ್. ತಾಂಚ್ಯೊ ಕವಿತಾ ಬಂಧ್ ಕುಡಾಂನಿ ದಾರಾಂ ಧಾಂಪುನ್ ದೆತಾತ್. ತಾಂಚ್ಯೊ ಕವಿತಾ ಪೋಟ್ ಭರ್ನ್ ಜೇವ್ನ್ ಧೆಂಕ್ ಕಾಡ್ತಾನಾ ವೇಳ್ ಪಾಶಾರ್ ಕರ್ಚೆಂ ಅನ್ಯೇಕ್ ವಿಕಲ್ಪ್ ಭಾಶೆನ್ ಯೆತಾತ್. ಖರೆಂಪಣಿಂ ಹ್ಯಾ ಮಯ್ನ್ಯಾಚ್ಯಾ ಕವಿತಾ ಸರ್ತೆಂತ್ ಸಭಾರ್ ಕವಿತಾ ಹ್ಯಾ ’ಕೊರೊನಾ’ಚೆರ್ ಆಯ್ಲ್ಯೊ ಪುಣ್ ಚಿಂತ್ಪಾಚಿ ಗುಂಡಾಯ್ ಜಾಂವ್, ವಯ್ಚಾರಿಕ್ ವೈವಿಧ್ಯತಾ ಜಾಂವ್ ತಾಂತುಂ ಆಸ್ಲಿ ಭೋವ್ ಪಾತಳ್. ಇತ್ಲೊ ವೇಳ್ ಆಸ್ಲೊ ಪುಣ್ ಹ್ಯಾ ವೆಳಾಂತ್ ವಾಚ್ಪಾಚೊ ಬೊರ್ಗೊಳ್ ಉಟುನ್ ದಿಸ್ತಾಲೊ.

ಪುಣ್ ಥೊಡ್ಯೊ ಕವಿತಾ ಖರೆಂಚ್ ಜಾವ್ನ್ ಭೋವ್ ಸಮಧಾನ್ ಹಾಡುಂಕ್ ಸಕ್ಲ್ಯಾತ್ ಮ್ಹಣ್ಚ್ಯಾಂತ್ ದುಭಾವ್ ನಾ. ತಾಂತುಂ ಹಿ ಕವಿತಾ ಖಂಡಿತ್ ಏಕ್. ದೆಕುನ್ ’ಮಯ್ನ್ಯಾಚಿ ಕವಿತಾ’ ಜಾವ್ನ್ ವಿಂಚುಂಕ್ ಕಸ್ಲೆಚ್ ತ್ರಾಸ್ ಜಾಲೆನಾಂತ್.