ದಿಸಾಕ್ ದೋನ್ ಪಾವ್ಟಿಂ

ಆಮ್ಚ್ಯಾ ದೀಸ್ಪಡ್ತೆಂತ್ ಕಿತ್ಲೆಶೆಪಾವ್ಟಿಂ ಆಮಿಂ ವಣದಿಚ್ಯಾ ಘಡಿಯಾಳಾಚೆರ್ ನದರ್ ಘಾಲ್ತಾಂವ್, ಹಾತಾಚೆರ್ ಭಾಂದ್‌ಲ್ಲ್ಯಾ ವೊಚಾಚೆರ್ ನದರ್ ಘಾಲ್ತಾಂವ್ ಪುಣ್ ತ್ಯಾ ಘಡ್ಯಾಳಾಚೆ ದೋನ್ ಕಾಂಟೆ ಜಿಣ್ಯೆಲಿಸಾಂವ್ ದಿಂವ್ಚೆಂ ಎಕಾ ಕವಿಕ್ ನಾಸ್ತಾನಾ ಆನಿ ಕೊಣಾಕ್ ದಿಸತ್? ಜಿಣ್ಯೆಚೊ ಖರೊ ಮತ್ಲಬ್‌ಚ್ಚ್ ವ್ಹಾಳ್ಚೆಂ ಶಿವಾಯ್ ರಾಂವ್ಚೆಂ ನ್ಹಯ್. ದೆಕುನ್ ಜ್ಯೆ ಕಿತೆಂ ವ್ಹಾಳ್ತಾ ತೆಂ ಬಾಳ್ತಾ ಆನಿ ಜ್ಯೆ ಕಿತೆಂ ರಾವ್ತಾ ತೆಂ ಸಂಪ್ತಾ. ಹೊ ಮತ್ಲಭಿ ಸಂಸಾರ್ ರುಕಾರ್ ಥಾವ್ನ್ ಸುಕೊನ್ ಪಡ್ಲೆಲ್ಯಾ ಖೊಲಿಯೆಂತ್ ಸಯ್ತ್ ಅಪ್ಲೊ ಮತ್ಲಬ್ ಸೊಧ್ತಾನಾ ಮನ್ಶಾಮೊಲಾಂ, ನಯ್ತಿಕತಾ ಆನಿ ಬರೆಂ-ಫಾಲೆಂ ಫಕತ್ ಮೊನ್ಯೊ ಇಮಾಜಿ ಜಾವ್ನ್ ಉರ್‌ತಾತ್ ಇರ್‌ತಾತ್ ಆನಿ ಜಿರ್‌ತಾತ್ - ಹೆಂಚ್ ಚಾಲ್ತ್ಯಾ ಜಿವಿತಾಚೆಂ ಹಕೀಗತ್.

ರೋಹನ್ ಅಡ್ಕಾಬಾರೆ ಲ್ಹಾನ್ ಪ್ರಾಯೆರ್ ಸಯ್ತ್ ಇತ್ಲ್ಯಾ ಅಪುರ್ಭಾಯೆಚಿ ಕಾವ್ಯಾಳ್ ನದರ್ ಘೆವ್ನ್ ಆಯ್ಲಾ. ಹಿ ಕವಿತಾ ವಾಚ್ತಾಂ ವಾಚ್ತಾಂ ಕೊಂಕ್ಣಿ ಕವಿತಾಶೆತಾಚ್ಯಾ ಫಾಲ್ಯಾಚೆರ್ ಅಪ್ಸೊಚ್ಚ್ ಅಭಿಮಾನ್ ಉದೆತಾನಾ ಮ್ಹಜೆಂ ಕಾಳಿಜ್ ಮೊರಾಚಿಂ ಪಾಕಾಂ ನ್ಹೆಸುನ್ ನಾಚ್ತಾನಾ. ರೋಹನ್ ಥಾವ್ನ್ ಅಸಲಿಂಚ್ ಅಪುರ್ಭಾಯೆಚಿಂ ಕವಿತಾ ವ್ಹಾಳುನ್ ಯೆಂವ್ದಿ ಮ್ಹಳ್ಳೆಚ್ ಮ್ಹಜೆ ಆಂವ್ಡೆ.

ದಿಸಾಕ್ ದೋನ್ ಪಾವ್ಟಿಂ

ಸಾರ್ಕೊ ವೇಳ್ ದಾಕಯ್ತಾ ಖಂಯ್!

ಹೆತ್ತ್ ಪಿಶ್ಯಾ,

ಅಸ್ಲಿ ಆಲೋಚನ್ ಕಿತ್ಯಾ?

ರಾವ್ಲ್ಯಾರ್ ತುಕಾ ದೋನ್ ಪಾವ್ಟಿಂ

ಯೇವ್ನ್ ಪಳೆತಾ ಕೋಣ್?

ಸೆಕುಂದಾಂಕ್ ಸೆಕುಂದಾಂ

ಮಿನುಟಾಂಕ್ ಮಿನುಟಾಂ

ಘಡ್ಶಿಲ್ಯಾರ್ ಮಾತ್ರ್

ವಾಜ್ತಲ್ಯೊ ಘಾಂಟಿ.

ತುಕಾ ಹುಂಗ್ಚೆಂ ಧಾಂವ್ತಾನಾ

ಮಾತ್ರ್, ಘಾಂಟ್

ವಾಜ್ತಾನಾ ತುಜೆರ್ ನದರ್.

ಮಧೆಂ ಕೊಣೆಂಯ್

ಯಾದ್ ಕೆಲಿ ತರ್

ಫುಗಾನಾಕಾ...

ಹರ್ಯೆಕಾಂತಿ ಸ್ವಾರ್ಥ್ ಹಾಂಗಾ...

ಪಾತ್ಯೆನಾಂಯ್ ತರ್

ಥೊಡೊ ವೇಳ್ ರಾವ್.

ಪಳೆ ಸಂಸಾರಾಕ್

ಬಾರ್ಕಾಯೆನ್ ಏಕ್ ಪಾವ್ಟಿಂ

ರಾವ್‌ಲ್ಲೆಂ ಘಡಿಯಾಳ್ ಜಾವ್ನ್!!

- ರೋಹನ್ ಅಡ್ಕಬಾರೆ [ಫೆಬ್ರೆರ್ 2018]

ರೋಹನ್ ಅಡ್ಕಬಾರೆ: ಕೊಂಕ್ಣಿ ಕಲಾ, ಸಾಹಿತ್ ಶೆತಾಂತ್ ಆತಾಂ ಪರ್ಜಳುನ್ ಆಸ್ಚ್ಯಾ ಥೊಡ್ಯಾ ಪ್ರತಿಭಾವಂತ್ ಯುವಜಣಾಂ ಪಯ್ಕಿಂತ್ಲೊ ಹೊ ಎಕ್ಲೊ. ಅಪುರ್ಭಾಯೆಚೆಂ ನಟನ್ ಕರ್ಚೊ, ತಶೆಂಚ್ ಅಖಿಲ್ ಭಾರತೀಯ್ ಮಟ್ಟಾಚ್ಯಾ ಕವಿತಾವಾಚನ್ ಸರ್ತೆಂತ್ ಪಯ್ಲೆಂ ಇನಾಮ್ ಲಾಭ್‌ಲ್ಲೊ ಹೊ ಏಕ್ ಕವಿ ಸಯ್ತ್. ಸಾಂ| ಲುವಿಸ್ ಕೊಲೆಜಿಂತ್ ಪದ್ವೆಚೆಂ ಶಿಕಪ್ ಸಂಪಯಿಲ್ಲೊ ಹೊ, ಫುಡ್ಲ್ಯಾ ದಿಸಾಂನಿ ಕೊಂಕ್ಣೆಚೊ ಏಕ್ ಭಳ್ವಂತ್ ಕವಿ ಜಾಂವ್ಚಿಂ ಜಾಯ್ತಿಂ ಖುಣಾಂ ಮ್ಹಾಕಾ ತರ್‌ಯೀ ಹಾಚೆಥಂಯ್ ದಿಸುನ್ ಯೆತಾತ್.