ಪಾವ್ಸಾಚಿಂ ಲಿಸಾಂವಾಂ

’ದೊಳೆ ಆಸ್ಚೆ ಕುಡಿಕ್, ದೀಶ್ಟ್ ಆಸ್ಚಿ ಭಲಾಯ್ಕೆಭರಿತ್ ಮತಿಕ್’ - ಭೋವ್ ಅರ್ಥಾಭರಿತ್ ಸಾಂಗ್ಣಿಂ ಆಯ್ಲೆವಾರ್ ಮ್ಹಾಕಾ ವಾಚುಂಕ್ ಮೆಳ್ಳಿ. ತಾಚಿ ಜಿವಿ ರುಜ್ವಾತ್ ಆಮ್ಚಿ ಸಮಾಜ್, ಆಮ್ಚೊ ಲೋಕ್ (ಆಮ್ಕಾಂ ಧರುನ್). ದೀಶ್ಟ್ ಆಸ್ಚ್ಯಾಂಕ್ ಮತಿಚಿ ಭಲಾಯ್ಕಿ ಗರ್ಜೆಚಿ. ಮತಿಚಿ ಬಲಾಯ್ಕಿ ಆಸ್ಚಾಂಕ್ ಹೆರಾಂನಿ ವೀಕ್ ದೀವ್ನ್ ತಾಂಚಿ ಮತ್ ವಿಕಾಳ್ ಕರುಂಕ್ ಸಾಧ್ಯ್ ನಾ, ತಶೆಂಚ್ ತಸಲೆ ಹೆರಾಂಚ್ಯಾ ಚಿಂತ್ನಾಂಕ್ ವೀಕ್ ದೀಂವ್ಕ್‌ಯೀ ವಚಾನಾಂತ್. ಆಮ್ಕಾಂ ಲಿಸಾಂವ್ ಶಿಕುಂಕ್ ಆಸಾ ತರ್ ಖಡ್ಪಾಥಾವ್ನ್, ವ್ಹಾಳ್ಯಾಥಾವ್ನ್, ಉದ್ಕಾಥಾವ್ನ್, ಪಾವ್ಸಾಥಾವ್ನ್ ಸಯ್ತ್ ಶಿಕುಯೆತಾ. ಪುಣ್ ಆಮಿ ಕುರ್‍ಡೆ, ಹಿ ಸಮಾಜ್ ಕುರ್‍ಡಿ, ದೆಕುನ್ ಆಮಿ ಪಳೆತಾಂವ್ ತರ್‌ಯೀ ಆಮ್ಕಾಂ ದಿಸಾನಾ, ಆಮಿ ಆಯ್ಕತಾಂವ್ ತರ್‌ಯೀ ಆಮ್ಕಾಂ ಸಮ್ಜನಾ.

ಹೆಚ್ಚ್ ಅಪುರ್‍ಭಾಯೆಚ್ಯಾ ಚಿಂತ್ಪಾಕ್ ಅಪ್ಲ್ಯಾ ಕವಿತೆಂತ್ ವಿಣುನ್ ’ಪಾವ್ಸ್ ಆಯ್ಲಾ ಆಮ್ಕಾಂ ಲಿಸಾಂವ್ ಶಿಕಂವ್ಕ್’ ಮ್ಹಣ್ತಾ ತಾಕೊಡೆಚೊ ಕವಿ ನೆರಿ ನಜ್ರೆತ್. ಮುಂಬಯ್ ಪ್ರಾಂತ್ಯಾಂತ್ ವಸ್ತಿ ಕರುನ್ ಆಸ್ಚೊ ನೆರಿಚ್ಯಾ ಕವಿತಾಪ್ರತಿಬೆವಿಶಿಂ ಮುಂಬಯ್ಚೊ ಸಾಹಿತಿಕ್ ವರ್ತುಲ್ ಜಾಣಾ. ಅಪ್ರೂಪ್ ತರ್‌ಯೀ, ಅಪುರ್ಭಾಯೆಚೆಂ ಚಿಂತಾಪ್ ಕವಿತೆಂನಿ ವ್ಹಾಳಂವ್ಚಿ ಶ್ಯಾಥಿ ಆಸ್ಚ್ಯಾ ಹಾಚ್ಯಾ ಹ್ಯೇ ಕವಿತೆಕ್ ಮಾಪ್ಚೆಂ ಕಾಮ್ ತುಕಾ ಸೊಡ್ತಾಂ.

ಪಾವ್ಸಾಚಿಂ ಲಿಸಾಂವಾಂ

ಘ್ಹಡ್ಗಡಾವ್ನ್ ಝಗ್ಲಾವ್ನ್

ಕಾಲ್ ಘಡ್ಯೆನ್

ಮ್ಹಳಾಬ್ ಹಾಲವ್ನ್

ಅಂತ್ರಾಳ್ ಕಾಲವ್ನ್

ಧರ್‍ಣಿಕ್ ಕಾಳೊಕ್ ಘಾಲುನ್

ಹಾರಿ ಹಾರಿಂನಿ ದೆಂವ್ಲಿಂ ಕುಪಾಂ

ದೊಂಗೊರ್ ಜಾವುನ್

ವಾರ್ಯಾಚ್ಯಾ ಉಮ್ಯಾಕ್

ಭುಂಯ್ಚೆರ್ ಹಳು ಹಳೂ

ಆಯ್ಲಿಂ ತೊವೊನ್

ತಾನೆಲ್ಲ್ಯಾ ಧರ್ನಿಕ್ ಭಿಜಂವ್ಕ್

ಉದ್ಕಾಚ್ಯಾ ಪಾವ್ಳ್ಯಾಂಚೊ

ಶಿಂವೊರ್ ದಿವುನ್

ಪಾವ್ಸಾನ್ ಕೆಲಿಂ ಆಚರ್ಯಾಂ

ಸುಕ್ ಲ್ಲ್ಯಾ ದೊಂಗ್ರಾಚ್ಯಾ ಪೊಪ್ಸಾಂತ್

ಉಟಯ್ಲಿ ಶೆಳ್

ಆನಿ ಫುಡ್ ಫುಡೀತ್ ಮಾತ್ಯೆಚ್ಯಾ

ಉಸ್ಕ್ಯಾರ್ ಥಾವ್ನ್ ಉಮಾಳೊನ್

ಆಯ್ಲಿ ನಿತಳ್

ಉದ್ಕಾಚಿ ಝರ್

ಸುಕೊ ದೊಂಗೊರ್

ಬದ್ಲಾಲೊ

ಜಾವ್ನ್ ಝರಿಚೆಂ ಮೂಳ್

ಭಾರಿಕ್ ಭಾರಿಕ್ ಝರಿ

ಸಾಂಗಾತಾ ಮೆಳೊನ್

ಸಾಂಗಾತಾ ವ್ಹಾಳೊನ್

ಜಾಲ್ಯೊ ಮೊಟ್ಯೊ

ದೀವ್ನ್ ಜಲ್ಮ್

ತ್ಯಾ ದೊಂಗ್ರಾರ್ ಥಾವ್ನ್

ವ್ಹಾಳೊನ್ ಯೆಂವ್ಚ್ಯಾ ನ್ಹಂಯ್ಕ್...!

ಅಶೆಂ....ಪಾವ್ಸಾ ಥೆಂಬೊ

ಉದ್ಕಾ ಝರ್ ಜಾವ್ನ್

ಝರಿ ವ್ಹಾಳೊ ಜಾವ್ನ್

ವ್ಹಾಳೊ ನ್ಹಂಯ್ ಜಾವ್ನ್

ಧರ್ನಿಕ್ ಫುಟ್ಲಿಂ

ತಣಾಂ ಪಾನಾ

ದೀವ್ನ್ ಸಮ್ರದ್ಧೆಚಿಂ ಫಳಾಂ

ಪಾವ್ಸಾಚಿಂ ಹಿಂ ನಿಸ್ವಾರ್ಥಿ ಲಕ್ಷಣಾಂ..

ಮ್ಹನಿಸ್

ಕಿತ್ಯಾಕ್ ಗಾ ಪಾರ್ಕಿನಾ...?

- ನಜ್ರೆತ್ ನೆರಿ, ತಾಕೊಡೆ. [ಜುಲಾಯ್, 2017]