ಪಾಟಿರ್ ಮ್ಹಜ್ಯಾ ಪಡ್ ತುಂ

ಚಡ್ಣಿ ಪಡ್ಣಿ ಮಧೆಂ ಅಪ್ಣಾಕ್ ತಶೆಂಚ್ ಆಪ್ಲ್ಯಾಂಕ್ ಸಾಂಭಾಳುನ್ ಜಿಯೆಂವ್ಚ್ಯಾಕ್ ಜಿಣಿ ಮ್ಹಣ್ಚಿ ತರ್; ಪಾವ್ಸ್, ವೋತ್ ಸಾಂಕೇತಿಕ್ ರುಪಾನ್ ಸುಖ್ ದುಃಖಾಕ್ ಪಿಂತ್ರಾಯ್ತಾ. ಪಾವ್ಸ್ ಬೌದ್ದಿಕ್ ಅರ್ಥಾನ್ ಉದಾಕ್, ಜಿವಿತಾಚಿ ಶೆಳ್, ಜಿವ್ಯಾಂಕ್; ಜಶೆಂ ಮನಿಸ್, ಮನ್ಜಾತ್, ಸುಕ್ಣಿಂ-ಸಾವ್ಜಾಂ, ತಶೆಂಚ್ ಪಾಚ್ವಿಂ ರಾನಾಂ, ರುಕಾಂ, ಝಡಾಂಕ್ ನವೆಂ ಜಿವಿತ್ ಲಾಭಯ್ತಾ. ಪಾವ್ಸ್ ಕವಿತೆಚ್ಯಾ ಅರ್ಥಾನ್ ಮೋಗ್, ಮಯ್ಪಾಸ್ ಮಾತ್ ನ್ಹಯ್, ಲಾಸೊನ್ ಆಸ್ಚ್ಯಾಕ್ ಥಂಡಾಯ್ ದಿಂವ್ಚಿ ಸಕತ್. ಹಿ ಕವಿತಾ ಕಾಂಯ್ ಸಂಪಿ ನ್ಹಯ್, ಜಿತ್ಲೆ ಗುಂಡಾಯೆನ್ ಚಿಂತುಂಕ್ ಸಕ್ಶಿ, ತಿತ್ಲಿ ಗುಂಡಾಯ್ ಆಸ್ಚಿ ಹಿ ಕವಿತಾ ಎಕಾ ವಾಚ್ಪಾಂತ್ ಸಾದಿ ದಿಸತ್ ತರ್‌ಯೀ, ಹಾಂತ್ಲೊ ತಾತ್ವಿಕ್ ನಿಯಾಳಾಚೊ ಸಾರ್ ಅಪುರ್ಭಾಯೆಚೊ.

ವೃತ್ತೆನ್ ಪ್ರಾಧ್ಯಾಪಕ್ ಜಾವ್ನ್ ಆಸ್ಚೊ ಸ್ಟೀಫನ್ ಕ್ವಾಡ್ರಸ್, ಕೊಂಕಣಿಂತ್ ಸಾಹಿತಿಕ್ ವಿಶ್ಲೇಷಣ್, ವಿಮರ್ಸೊ, ಲೇಖನಾಂಕ್ ನಾಂವಾಡ್ಲಾ ತರ್‌ಯೀ, ಹೊ ಅಪ್ರೂಪ್ ತರ್‌ಯೀ ಅಪುರ್ಭಾಯೆಚೊ ಕವಿ ಮ್ಹಣ್ ಪಾತ್ಯೆತೆಲ್ಯಾಂ ಪಯ್ಕಿಂತ್ ಹಾಂವ್‌ಯೀ ಎಕ್ಲೊಂ. ಆನಿ ಮ್ಹಜ್ಯಾ ಪಾತ್ಯೆಣೆಕ್ ಮಾಂದುಂಕ್ ಆತಾಂ ತುಕಾಚ್ ಉಲೊ ದಿತಾಂ.

ಪಾಟಿರ್ ಮ್ಹಜ್ಯಾ ಪಡ್ ತುಂ

ಪಿಟಿಪಿಟಿ ಪಡುನ್

ಘಾಮಾಳಿಂ ಮ್ಹಜಿಂ ಫಡ್ ತುಂ

ತಳಪಳ ಪಡುನ್

ಪಾಯಾಂ ಮುಳಾಂತ್ ಖೆಳ್ ತುಂ

ಸಳಸಳ ಉಡುನ್

ತಳ್ಯಾಂಕ್ ಜಿವಾಂತ್ ಭರ್ ತುಂ

ಶೆತ್ಕಾರಾಂಚ್ಯಾ ಭಾಟಾಂ ಬಯ್ಲಾಂತ್

ಕೆದಿಂಚ್ ವಿಸ್ರನಾಕಾ ಪಡುಂಕ್

ನಾತ್ಲ್ಯಾರ್ ಉರತ್ ತುಕಾ ಫಕತ್

ತಾಂಚ್ಯಾ ಮಡ್ಯಾರ್ ರಡುಂಕ್

ಫಾತ್ರಿ ಕಾಳ್ಜಾಂ ಫಡ್ ತುಂ

ಕಾತ್ರಿ ಮನಾಂ ಮೊಡ್ ತುಂ

ಪಾಚ್ವೆಂ ಭುಂಯ್ಚೆರ್ ಹಾಡ್ ತುಂ

ಮನಾಂಕ್ ಆಮ್ಚ್ಯಾ ವೋಡ್ ತುಂ

ಪಾಟಿರ್ ಮ್ಹಜ್ಯಾ ಪಡ್ ತುಂ

- ಸ್ಟೀಫನ್ ಕ್ವಾಡ್ರಸ್, ಪೆರ್ಮುದೆ [ಮಾಯ್, 2016]

ಸ್ಟೀಫನ್ ಕ್ವಾಡ್ರಸ್, ಪೆರ್ಮುದೆ: ವೃತ್ತೆನ್ ಪ್ರಾಧ್ಯಾಪಕ್ ಜಾವ್ನ್ ವಾವ್ರ್ ಕರುನ್ ಆಸ್ಚೊ ಸ್ಟೀಫನ್ ಕ್ವಾಡ್ರಸ್, ಕೊಂಕಣಿಂತ್ ಏಕ್ ವಿಶ್ಲೇಷಣ್‌ಕಾರ್, ವಿಮರ್ಶಕ್ ತಶೆಂಚ್ ಅಪ್ರೂಪ್ ಕವಿ. ’ಸಾಹಿತ್ ಆನಿ ವಿಮರ್‍ಸೊ’, ’ಜನ್ನ ಮಹಾಕವಿಚೊ ಯಶೋಧರಾ ಚರಿತ’, ’ಬಾನ್ನೆಂ’ ಕವಿತೆಂಕ್ ಲಗ್ತಿ ಜಾಲ್ಲೆ ಹೆ ಬೂಕ್ ಪರ್ಗಟ್ ಜಾಲ್ಲ್ಯಾ ಬುಕಾಂ ಪಯ್ಕಿಂತ್ಲೆ ಥೊಡೆ.