[अणकार] कामगाराचें दोतोराक भाश्य [बेर्टोल्ट ब्रेख्त]
आमी जाणात आमच्या दुयेंसाचें कारण
आमी जेन्ना दुयेंत जातात
उतर सांगता
आमकां बरे करपी तुमीच
धा वर्सांचें, आमी आयकतात
तुमी घेतलां शिक्षण कूड निरोगी करपाचें
शिरबंत कॉलेजींनी
जीं बांदल्यांत जनतेच्या दुडवांनी
आनी तुमी तें गिन्यान मेळोवंक
खर्च केल्या दौलत
हाचो अर्थ तुमी आमकां
निरोगी करूंक शकतात.
पूण खरेंच तुमी आमकां निरोगी करूंक शकतात?
आमी तुमचेकडेन येतात तेन्ना
आमची मुस्तायकी आसता बोतरां जाल्ली
आनी कान लावन आयकतात तुमी
आमचे नागडे कुडींचो आवाज सगळेवटेंतल्यान.
पूण सोदूंक कारण आमच्या दुयेंसाचें
आमच्या बोतरां जाल्ल्या कपड्यांचेर नदर मारल्यार पुरो
एकाच कारणाक लागून झरुन वतात
आमच्यो कुडी आनी आमचे कपडे.
आमच्या भुजांत दुख येता
तुमी म्हंटात ती ओलसाणीक लागून
आनी तेंच कारण
आमच्या घराचे वंटिर आयिल्ल्या थिगळाचें.
मागीर सांगात आमकां:
हि ओलसाण आयली खंयसावन?
सुमाराभायले कश्ट आनी साप उणें जेवण
आमकां करता दुबळे आनी हाडावळी.
तुमचें रसैत सांगता:
वजन वाडय.
आनी तुमच्यानी तर सांगुं येता
नुस्त्याक लेगीत झाडार चडूंक
तुमचेकडेन आसाच कितलो वेळ आमचेखातीर?
आमी देखतात: तुमच्या घरांतल्या गालिच्याचें मोल
म्हळ्यार तुमी वाशील केल्ली फी
पांच हजार दुयेंतींकडल्यान
तुमी सेर्त खुबळटले
दाखयत तुमची निरागसताय
आमच्या घरांतले वंटीवयलें थिगळ लेगीत
तीच काणी सांगता
***
