[ಅಂಕಣ್] 2. ಬ್ರೇಕ್ಸಿಟ್ (Brexit) ಅನಿ ಆಮ್ಚೊ ದೇಶ್ - ಎಕ್ ಪರಿಚಯ್
ಬ್ರೇಕ್ಸಿಟ್(Brexit) ಅನಿ ಆಮ್ಚೊ ದೇಶ್ - ಎಕ್ ಪರಿಚಯ್
ಪ್ರಸ್ತಾವನ್:
'If Europe were once united in the sharing of its common inheritance there would be no limit to the happiness, prosperity and glory which its 300 million or 400 million people would enjoy', ದುಸ್ರ್ಯಾ ಮಹಾಝುಜಾ ವೆಳಾರ್ ಬ್ರಿಟನಾಚೊ ಪ್ರಧಾನಿ ಜಾವ್ನ್ ಅಸಲ್ಲ್ಯಾ ವಿಸ್ಟನ್ ಚರ್ಚಿಲಾನ್, 1946 ಇಸ್ವೆಂತ್ ಸಾಂಗಲ್ಲಿ ಉತ್ರಾಂ ಹಿಂ. ದುಸ್ರ್ಯಾ ಮಹಾಝುಜಾ ಉಪ್ರಾಂತ್ ಯುರೋಪ್ ಎಕ್ ಜಾಯ್ಜಾಯ್ ಮ್ಹಣ್ ಸಾಂಗಲ್ಲ್ಯಾ ಪಯ್ಕಿ ಹೊ ಪ್ರಮುಕ್ ಜಾವ್ನಾಸಾ. ಅಶೆಂ 1945, ಮಳ್ಯಾರ್ ದುಸ್ರ್ಯಾ ಮಹಾಝುಜಾ ಉಪ್ರಾಂತ್ ಯುರೋಪಾಂತ್, ಪ್ರಮುಕ್ ಜಾವ್ನ್ ಸಮಾಧಾನ್, ಶಾಂತಿ ಅನಿ ಉಪ್ರಾಂತ್ ಪ್ರಜಾರಾಜ್, ಸಮಾನಾತಾ, ಕಾನೂನ್, ಮನ್ಶ್ಯಾಚಿ ಹಕ್ಕಾಂ, ಅನಿ ಸ್ವತಂತ್ರತಾ ಉಕ್ಲುನ್ ದರುಂಕ್ ಯುರೋಪಾಚಾ ದೇಶಾಂನಿ ಸಾಗಾಂತಾ ಮೆಳೊಂನ್ ಘಡಲ್ಲೊ ಎಕ್ ಎಕ್ವಟ್ ವಾ ಸಂಘಟನ್ ಜಾವ್ನಾಸಾ ಯುರೋಪಿಯನ್ ಯುನಿಯನ್ (European Union). ಬ್ರೇಕ್ಸಿಟ್ ಮಳ್ಯಾರ್ ಹ್ಯಾ ಯುರೋಪಿಯನ್ ಯುನಿಯನಾ ಥಾವ್ನ್ ಬ್ರಿಟನಾನ್ ಬಾಯ್ರ್ ವೆಚೆಂ (Exit). ಹೊ ಎಕ್ ಸಂಕೀರ್ಣ್ ಅನಿ ಲಾಂಬ್ ವಿಷಯ್, ಅಶೆಂ ಜಾಲ್ಯಾನ್ ಹ್ಯಾ ಲೇಖನಾಂತ್ ಬ್ರೇಕ್ಸಿಟ್ ಅನಿ ವ್ಯಾಪಾರಾಚೆರ್ ಬ್ರೇಕ್ಸಿಟಾಚೊ ಪರಿಣಾಮ್ ಸೊಂಪ್ಯಾ ರಿತಿನ್ ವಿಶ್ಲೇಷಣ್ ಕರ್ಚೆಂ ಪ್ರಯತ್ನ್ ಕೆಲಾ. ವಿಸ್ತಾರ್ ವಿವರ್ ಲೇಖನಾಂತ್ ದಿಲ್ಲ್ಯಾ ಉಲ್ಲೇಖ್ ವಾ ಆಧಾರ್ (Reference), ಹಾಂತುಂ ಅಸಾತ್.
ಯುರೋಪಿಯನ್ ಯುನಿಯನ್, 1949 ಇಸ್ವೆಂತ್ Council of Europe ಥಾವ್ನ್ ಪ್ರಾರಂಭ್ ಜಾಲ್ಲಿ ಪ್ರಕ್ರಿಯಾ ಅನಿ ಹ್ಯಾ ಪ್ರಕ್ರಿಯಾಕ್, 01/11/1993 ವೆರ್ ಯುರೋಪಿಯನ್ ಯುನಿಯನ್ (European Union) ಮಳ್ಳೆಂ ನಾಂವ್ ಮೆಳ್ಳೆಂ. ಯುರೋಪಿಯನ್ ಯುನಿಯನಾಚಾ ಅಧಿಕ್ರತ್ ಜಾಳಿ ಜಾಗೊ www.europa.eu ಹಾಚೆ ಪ್ರಕಾರ್ ಹೊ 27 ಯುರೋಪಿಯನ್ ದೇಶಾಚೊ ಎಕ್ ಎಕ್ವಟ್.
ಯುರೋಪಿಯನ್ ಯುನಿಯನಾಂತ್ ಸಬಾರ್ ವಿಭಾಗ್ ಅಸಾತ್, ಜಶೆಂ ಯುರೋಪಿಯನ್ ಅಯೋಗ್ ಪುಣ್ ಯುರೋಪಿಯನ್ ಸಂಸದ್ ಹಾಂತುಂ ಪ್ರಮುಕ್ ಜಾವ್ನಾಸಾ. ಹ್ಯಾ ಸರ್ವ್ ವಿಭಾಗಾಂಕ್ 27 ದೇಶಾಂಚೆ ಪ್ರತಿನಿಧಿ ಅಪ್ಪಲ್ಲ್ಯಾ ದೇಶಾ ಥಾವ್ನ್ ಚುನಾಯಿತ್ ಜಾವ್ನ್ ಯೇತಾತ್. ಹೆ 27 ದೇಶ್ ಹರ್ಯೇಕಾ ವರ್ಸಾ ಅಪ್ಪಲ್ಲ್ಯಾ ದೇಶಾಚೆ ಕಾನೂನ್, ಅರ್ಥಿಕ್ ನೀತ್, ಜಮ್ಯಾ ಖರ್ಚಾಚೆ ಲೆಕಾಚಾರ್ (Budget) ಅನಿ ಇತರ್ ಸಬಾರ್ ಧೋರಣಾ, ಯೋಜಾನಾ ಅನಿ ನೀತಿ ತಯಾರ್ ಕರ್ತಾನಾ, ಯುರೋಪಿಯನ್ ಯುನಿಯನ್ ಹ್ಯಾ ಸರ್ವ್ 27 ದೇಶಾಂಕ್ ಚಾಲ್ತೆಂ (Common) ಕಾನೂನ್, ಅರ್ಥಿಕ್ ನೀತ್, ಜಮ್ಯಾ ಖರ್ಚಾಚೆ ಲೆಕಾಚಾರ್ (Budget) ಅನಿ ಇತರ್ ಸಬಾರ್ ಧೋರಣಾ, ಯೋಜಾನಾಂ ಅನಿ ನೀತಿ ತಯಾರ್ ಕರ್ತಾ. ಹಾಂಗಾಸರ್ ಹ್ಯಾ ಲೇಕನಾಚಾ ದ್ರಷ್ಟೆನ್, ಯುರೋಪಿಯನ್ ಯುನಿಯನಾನ್ ಮಾಂಡುನ್ ಹಾಡ್ಚಾ ಸಭಾರ್ ಯೋಜನಾಂತ್, ಸಕಯ್ಲ್ ತಿಳ್ಸಿಲ್ಲೆ ತೀನ್ ವಿಶಯ್ ಪ್ರಮುಖ್ ಜಾವ್ನಾಸಾತ್. ( Reference: https://europa.eu/european-union/about-eu_en )
ದುಡ್ವಾ ಆಧಾರ್- ಯುರೋಪಿಯನ್ ಯುನಿಯನಾಕ್ ತಶೆಂಚ್ ಮ್ಹಳ್ಳೆಂ ಜಮ್ಯಾ ಖರ್ಚಾಚೆ ಲೆಕಾಚಾರ್ (Budget) ಅಸಾ, ಹಾಂತುಂ ಯುನಿಯನಾಚೊ ಹರ್ಯೇಕ್ ದೇಶ್ ದುಡು ಗಾಲ್ತಾ,(Reference: Who pays in and who gets most back- BBC - 27/05/2019) ಅಸೊ ಜಮೊ ಜಾಲ್ಯಾ ದುಡ್ವಾ ಥಾವ್ನ್ ಯುರೋಪಿಯನ್ ಯುನಿಯಾನ್ ಹ್ಯಾ 27 ದೇಶಾಚಾ ಪರಿಸ್ಥಿತೆಕ್ ಅನುಸಾರ್ ಜಾವ್ನ್ ಸಬಾರ್ ಕಾಮಾಂಕ್ ದುಡು ದಿತಾ. ಹಾಂತುಂ ಸಂಶೋಧನ್, ಶಿಕಾಪ್, ಪಾಟಿಂ ಉರಲ್ಲ್ಯಾ ಯುರೋಪಿಯನ್ ಯುನಿಯನಾಚಾ ದೇಶಾಂಚಿ ಉರ್ದಗತಿ ಅನಿ ದರ್ಯಾಕ್ ಸಂಬಂದ್ ಜಾಲ್ಲೆ ವಿಶಯ್ (Maritime and Fisheries) ಪ್ರಮುಕ್ ಜಾವ್ನ್ ಅಸಾತ್.
ಪ್ರಯಾಣ್- ಯುರೋಪಿಯನ್ ಯುನಿಯನಾಚಾ ಭಿತರ್ ಯುರೋಪಿಯನ್ ಯುನಿಯನಾಚಾ ಸಾಂದ್ಯಾಂನಿ (Citizens) ಸುಲಭಾಯೆನ್ ಪ್ರಯಾಣ್ ಕರಿಯೆತ್, ಹಾಂಚಿ ವಿಸಾ ಪ್ರಕ್ರಿಯ ವಾ ಎಕಾ ದೇಶಾ ಥಾವ್ನ್ ಅನ್ಯೇಕಾ ದೇಶಾಕ್ ವಚುಂಕ್ ಅತ್ಯಂತ್ ಸಲೀಸ್ ಜಾವ್ನಾಸಾ.
ವ್ಯಾಪಾರ್- ಹಾಂಗಾಸರ್ ಗರ್ಜೆಚೆಂ ಜಾವ್ನಾಸಾ ’Single Market’ ಚಿಂತಾಪ್, ಅಸೆ ಮಳ್ಯಾರ್, ಯುರೋಪಿಯನ್ ಯುನಿಯನಾಚಾ ಭಿತರ್ ಯುರೋಪಿಯನ್ ಯುನಿಯನಾಚಾ ಸಾಂದ್ಯಾಂನಿ (Citizens) ಕಾಯ್ದ್ಯಾನುಸಾರ್ ಶಿಕಾಪ್ ಶಿಕಯೆತ್ ಅನಿ ಜಿಯೆಯತ್. ತೆಂ ನ್ಹಯ್ ಅಸ್ತಾಂ ಪುಂಕ್ಯಾಕ್ ಮಳ್ಯಾರ್ ತಿರ್ವೊ ನಾಸ್ತಾ ದೇಶಾಂ ಮಧೆಂ ವಸ್ತು ಆಶಾರ್-ಪಾಶಾರ್ ಕರಿಯೆತ್. ವ್ಯಾಪಾರ್ ಕರ್ಚಾ ದ್ರಷ್ಟೆನ್ ಹಿ ಎಕ್ ಅತ್ಯಂತ್ ಅನ್ಕೂಲ್ ವಾ ಫಾಯ್ದ್ಯಾಚಿ ಪರಿಸ್ಥಿತಿ ಜಾವ್ನಾಸಾ. (Reference -https://europa.eu/european-union/topics/single-market_en )
ಸಾಗಾಂತಾ ಅಸ್ಲ್ಯಾರ್... ಸರ್ವ್ ಬರೆಂ... ಹೆಂ ಯುರೋಪಿಯನ್ ಯುನಿಯನಾ ಥಾವ್ನ್ ಶಿಕ್ಚೆಂ ತಸಲೆ ಲಿಸಾಂವ್ ಜಾವ್ನಾಸಾ. ಯುರೋಪಿಯನ್ ಯುನಿಯನಾನ್ ಯುರೋಪಾಂತ್ ಕೆಲ್ಲ್ಯಾ ಕಾಮಾ ಖಾತಿರ್ 2012 ಇಸ್ವೆಂತ್ ನೊಬೆಲ್ ಶಾಂತಿ ಪುರಸ್ಕಾರ್ ಲಾಬ್ಲಾಂ.
ಪುಣ್ ಹ್ಯಾ ಯುರೋಪಿಯನ್ ಯುನಿಯನಾಂತ್ ... ಬ್ರಿಟನ್ ...ನಾ!!!, ಅನಿ ಹಾಕಾ ಕಾರಣ್..ಬ್ರೇಕ್ಸಿಟ್!.. ಬ್ರೇಕ್ಸಿಟ್ ಮಳ್ಯಾರ್ Brtish Exit, ಮಳ್ಯಾರ್ ಯುರೋಪಿಯನ್ ಯುನಿಯನಾ ಥಾವ್ನ್ ಬ್ರಿಟನಾನ್ ಭಾಯ್ರ್ ವೆಚೆಂ.
ಬ್ರೇಕ್ಸಿಟ್:
ಯುರೋಪಿಯನ್ ಯುನಿಯನಾಚಾ ದಾಖ್ಲ್ಯಾ ಪ್ರಕಾರ್ ಬ್ರಿಟನ್ ಅನಿ ಯುರೋಪಿಯನ್ ಯುನಿಯನಾಚೊ ಸಂಬಂಧ್ ಸುಮಾರ್ ಚಾಳಿಸ್ ಅನಿ ಸ (46 ) ವರ್ಸಾಂಚೊ, 01/01/1973 ವೆರ್ ಹ್ಯಾ ಎಕ್ವಟಾಕ್ ವಾ ಸಂಘಟನಾಚೊ ಸಾಂದೊ ಜಾಲ್ಯಾ ಬ್ರಿಟನಾಚೊ ಸಂಬಂಧ್ ತಿತ್ಲೊ ಕಾಂಯ್ ಬರೊ ಅಸಲ್ಲೊ ಮ್ಹಣ್ ಸಾಗೊಂಕ್ ಜಾಯ್ನಾ. 1975 ಚಾ ಜನಾದೇಶಾಂತ್ (Referendum ) ಬ್ರಿಟಿಶಾಂನಿ ಹ್ಯಾ ನಿರ್ಧಾರಾಕ್ ಬಹುಮತ್ ದಿಲ್ಲೆ, ಜಾಲ್ಯಾರಿ ಎಕಾ ಕಾಳಾರ್ ಸಂಸಾರ್ಭರ್ ರಾಜ್ಯಾಧಿಕಾರ್ ಚಲೊನ್ ಸವಯ್ ಜಾಲ್ಯಾ ಬ್ರಿಟಿಶಾಂಕ್ ಹೆಂ ಕಷ್ಟ್ ಜಾತಾಲೆ.(Referece : Jeremy Black -Britain and Europe: A Short History ), ತೆಂ ನ್ಹಯ್ ಅಸ್ತಾ, 1975 ಇಸ್ವೆಂತ್ ನೋವ್ ಸಾಂದೆ ದೇಶ್ ಅಸಲ್ಲ್ಯಾ ಹ್ಯಾ ಸಂಘಟನಾಂತ್ ಸಾಂದೆ ಚಡ್ ಜಾಂವ್ನ್ ಯೆತಾಲೆ, ಅರ್ಥಿಕ್ ಉದರ್ಗತೆ ಖಾತಿರ್ ಅಸಾ ಕೆಲ್ಲೆಂ ಹೆಂ ಸಂಘಟನ್ ದೀಸ್ ವೆತಾಂ ವೆತಾಂ ರಾಜಕೀಯಾ ಅನಿ ಇತರ್ ವಿಶಯಾಂನಿ ಮೆತೆರ್ ಜಾಂವ್ಕ್ ಸುರು ಜಾಲ್ಲೆಂ. ಹಾಂಚೊ ಪರಿಣಾಮ್ ಜಾವ್ನ್, ಹ್ಯಾ ಸಂಘಟನಾ ವಿರೋಧ್ ಲೊಕಾನ್ ಅವಾಜ್ ಸುರು ಕೆಲ್ಲೊ. ಬ್ರಿಟನಾಂತ್ ಹ್ಯಾ ಚಿಂತ್ಪಾಚೊ ಅನಿ ದುಸ್ರ್ಯಾ ದೇಶಾಂಚಾ ಲೊಕಾಂಚೊ ಸಂಖೊ ಚಡ್ ಜಾತೆ ಅಸಾ ಮಳ್ಳೆಂ (Immigration) ನೀಬ್ ಘೆಂವ್ನ್, ಚುನಾವಣಾ ವೆಳಾರ್ ವೋಟಾಂಚೆ ರಾಜಕೀಯಾ ಸುರು ಜಾಲ್ಲೆಂ. (Reference: Euro sceptisism on raise in Europe - Poll Suggest - BBC dated 08/06/2016 and Support to Eurosceptic Parties Doubles in two decades across EU - The Guardian dated 02/03/2020 )
ಹೆಂ ಸಗ್ಳೆಂ ಮನಾಂತ್ ದವರುನ್ 2015 ಇಸ್ವೆಂತ್ ತೆದಾಳಾಚೊ ಬ್ರಿಟಿಶ್ ಪ್ರಧಾನಿ ಡೆವಿಡ್ ಕ್ಯಾಮರೊನ್ ಹಾಣೆ ಜನಾದೇಶ್ ಅಸಾ ಕೆಲೊ, ಹೊ ಜನಾದೇಶ್ 23/06/2016 ವೆರ್ ಜಾಲೊ ಅನಿ 52% ಬಹುಮತಾನ್ ಬ್ರಿಟಿಶ್ ಲೊಕಾನ್ ಯುರೋಪಿಯನ್ ಯುನಿಯನ್ ಸೊಡಿಜಾಯ್ ಮ್ಹಣ್ ವೋಟ್ ದಿಲೊ, ಹ್ಯಾ ಪ್ರಕಾರ್ 31/01/2020 ವೆರ್ ಬ್ರಿಟನಾನ್ ಯುರೋಪಿಯನ್ ಯುನಿಯನ್ ಸೊಡ್ಲೆಂ, ನಿಯಮಾ ಪ್ರಕಾರ್ 31/01/2020 ಥಾವ್ನ್ 31/12/2020 ಮಣಾಸರ್ ಬದ್ಲಾಪಾಚಿ ಅವ್ದಿ(transition period) ತಾಚಾ ನಂತರ್, ಬ್ರಿಟನ್ ಯುರೋಪಿಯನ್ ಯುನಿಯನಾ ಥಾವ್ನ್ ಸಂರ್ಪೂಣ್ ರೀತಿನ್ ಬಾಯ್ರ್ ವೆತಾಲೆಂ.
ವಿಶ್ಲೇಷಣ್:
ಬ್ರೇಕ್ಸಿಟಾ ನಂತರ್ ಬ್ರಿಟನ್ ಯುರೋಪಿಯನ್ ಯುನಿಯನಾ ಥಾವ್ನ್ ಸ್ವತಂತ್ರ್ ಜಾತಾ, ಯುರೋಪಿಯನ್ ಯುನಿಯನಾಚೊ ಕಸಲೊಯ್ ಅಧಿಕಾರ್, ನಿಯಮ್ ವಾ ಕಾನೂನ್ ಬ್ರಿಟನಾಕ್ ಲಾಗೂ ಜಾಯ್ನಾ. ತಶೆಂ ಮಳ್ಯಾರ್ ಯುರೋಪಿಯನ್ ಯುನಿಯನಾಚೊ ಕಸಲೊಯ್ ದಬಾವ್ ನಾಸ್ತನಾ ಬ್ರಿಟನಾಕ್ ತಾಚಿ ನಿಯಮಾ, ಪ್ರತ್ಯೇಕ್ ಜಾಂವ್ನ್ ವ್ಯಾಪಾರ್ ಅನಿ ಪ್ರಯಾಣ್ ಹಾಂತುಂ ಘೆವ್ನ್ ಜಾತಾತ್. ಅಶೆಂ ಜಾಲ್ಯಾನ್ ಸಂರ್ಪೂಣ್ ಬ್ರೆಕ್ಸೀಟಾ ಉಪ್ರಾಂತ್ ಬ್ರಿಟನಾಚಾ ವ್ಯಾಪಾರ್ ಅನಿ ಪ್ರಯಾಣಾಂತ್ ನಿಯಮಾನಿ ಮುಳಾವಿ ಬದ್ಲವಣ್ ಜಾಂವ್ಚಿ ಸಾಧ್ಯಾತಾ ಅಸಾ.
ಹಾಗಾಂಸರ್ ಪ್ರವೇಶ್ ಜಾತಾ ಮ್ಚೊ ದೇಶ್ ಭಾರತ್. Brexit and its Impact on India's Export Business by V.V.L.N. Sastry ಹಾಚಾ ಸಂಶೋಧನಾ ಪ್ರಕಾರ್ ಅಮ್ಚಾ ದೇಶಾಕ್ ವ್ಯಾಪರಾಂತ್ ಫಾಯ್ದೊ ಜಾಂವ್ಚಿ ಸಾಧ್ಯತಾ ಚಡ್ ಅಸಾ ಮಣ್ತಾ, ಪುಣ್ ಹೆಂ 2018 ಇಸ್ವೆಂತ್ ಕೆಲ್ಲೆ ಸಂಶೋಧನ್. ಪ್ರಸ್ತುತ್ ಪರಿಸ್ಥಿತೆಂತ್ ಬ್ರಿಟನಾಂತ್ ಬಂಡವಾಳ್ ಗಾಲ್ನ್ ವಾ ದುಡು ಗಾಲ್ನ್ ವ್ಯಾಪಾರ್ ಕರ್ಚಾ ಪಯಿಲ್ಲ್ಯಾ ವೀಸ್ ದೇಶಾಂ ಪಯ್ಕಿಂ ಭಾರತ್ ಎಕ್ ಜಾವ್ನಾಸಾ. ಸುಮಾರ್ 800 ವಯ್ರ್ ಭಾರತಾಚೆ ಕಂಪೆನಿ ಬ್ರಿಟನಾಂತ್ ಅಸಾತ್ (Reference: www.ons.co.uk . ಬ್ರಿಟನ್ಯಿ ಭಾರತಾಂತ್ ದುಡು ಗಾಲ್ನ್ ವ್ಯಾಪಾರ್ ಕರ್ಚ್ಯಾತ್ ಪಾಟಿ ನಾ. ವಯ್ರ್ ತಿಳ್ಸಿಲ್ಲ್ಯಾ ಸಂಶೋಧನಾ ಪ್ರಕಾರ್ ಬ್ರಿಟನ್ ಪಯಿಲ್ಲ್ಯಾ ಧಾ ದೇಶಾಂ ಪೈಕಿ ಎಕ್ ಜಾವ್ನಾಸಾ, ಅಸೆ ಹೆ ಅಂಕೆ-ಸಂಖೆ ಪಳಿಯಿಲ್ಲ್ಯಾರ್ ದೋನಿ ದೇಶಾಂಕ್ ಎಕಾಮೆಕಾಚಿ ಗರ್ಜ್ ದಿಸ್ತಾ. ಪುಣ್ ದೀಸ್ ವೆತಾ ವೆತಾ ಬದ್ಲುನ್ ಯೆಂವ್ಚಾ ದೋನಿ ದೇಶಾಂಚಾ ರಾಜಕೀಯಾ ಪರಿಸ್ಥಿತಿ ಪಳೆಯಿತಾನಾ, ಹೆಂ ತಿತ್ಲೆಂ ಸುಲಾಬಾಯೆಚೆ ಮ್ಹಣ್ ಭೊಗಾನಾ. ಹಾಗಾಂಸರ್ ಅತ್ಯಂತ್ ಗರ್ಜೆಚೆ ಅನಿ ವಿಶೇಸ್ ಜಾಂವ್ನ್ ಗಮನ್ ದೀಜಾಯ್ ಜಾಲ್ಲೊ ವಿಷಯ್ ಜಾಂವ್ನಾಸಾ, ಬ್ರೇಕ್ಸಿಟಾ ಉಪ್ರಾಂತ್ ಬ್ರಿಟನ್ ಅನಿ ಯುರೋಪಾಚೊ ಸಂಬಂಧ್, ಪಾಟ್ಲ್ಯಾ ಚಾಳಿಸ್ ಅನಿ ಸ ವರ್ಸಾಂ ಸಾಂಗಾತಾ ಅಸಲ್ಲ್ಯಾ ಹಾಂಕಾ ಎಕಾಮೆಕಾಚಿ ಗರ್ಜ್ ಮಸ್ತು ಅಸಾ. ಜಾಣ್ತ್ಯಾಂಚಿ ಸಂಭಾಷಣಾ ಅನಿ ಸಂಶೋಧನ್ ಮನಾಂತ್ ದವರುನ್ ಆಂಮ್ಚಾ ದೇಶಾಚಾ ವ್ಯಾಪಾರಾಚಾ ದ್ರಷ್ಟೇನ್ ಪರಿಣಾಮ್ ಗಾಲ್ಚೆ ವಿಶಯ್ ಹ್ಯಾ ಪರಿ ಅಸಾತ್.
ಮಟ್ವ್ಯಾ ಅವ್ದೆಕ್ ಭಾರತಾಂತ್ ಬ್ರಿಟನಾಚೊ ದುಡು (Foreign Direct Investment) ಉಣೊ ಜಾತಾಲೊ, ಪುಣ್ ಹೆಂ ದೋನ್ ದೇಶಾಂಚಾ ಸಂವಾದಚೆರ್ ಹೊಂದೊನ್ ಅಸಲ್ಲ್ಯಾನ್ ಹಾಂತು ಸುಧಾರ್ ಜಾಂವ್ಚಿ ಸಾಧ್ಯಾತಾ ಅಸಾ. ಅಂಮ್ಕಾ ಸರ್ವಂಕ್ ಕಳಿತ್ ಅಸಲ್ಲ್ಯಾಪರಿ ಬ್ರಿಟನ್ ದೇಶಾಂತರ್ ಮನ್ಶ್ಯಾಚೆರ್ (Migrant Labour) ಹೊಂದೊನ್ ಅಸ್ಚೊ ದೇಶ್, ವ್ಯಾಪಾರ್ ನ್ಹಯಿ ಅಸ್ತಾ ಮೆಡಿಕಲ್ ಅನಿ ಕಂಪ್ಯೂಟರ್ ಕ್ಷೇತ್ರಾಂತ್ ಸಬಾರ್ ಭಾರತೀಯಾ ಲೊಕ್ ಕಾಮ್ ಕರ್ತಾ. ಬ್ರೇಕ್ಸಿಟಾ ಉಪ್ರಾಂತ್ಲ್ಯಾ ಸಂವಾದಾಂತ್ ಆಂಮ್ಚಾ ದೇಶಾನ್ ಭಾರತೀಯಾಕ್ ಬ್ರಿಟನಾಕ್ ವೆಚಾ ಪ್ರಕ್ರಿಯಾಂತ್ ಸಡಿಲಾಯ್ ವಿಚಾರಿಜಾಯ್ ಮ್ಹಳ್ಳಿ ಅಭಿಪ್ರಾಯ್ ಅಸಾ.
ಭಾರತಾಕ್ ಬ್ರಿಟನ್, ಯುರೋಪಾಕ್ ವೆಚೆ ದಾರ್ ಜಾವ್ನಾಸಾ, ಹೆಂ ದಾರ್ ಬ್ರೇಕ್ಸಿಟಾ ಮುಕಾಂತ್ರ್ ಬಂದ್ ಜಾತಾನಾ, ಭಾರತಾಚೆ ಕಂಪನಿ ಯುರೋಪಾಚಾ ವ್ಯಾಪಾರಾಕ್ ದುಸ್ರೆ ದಾರ್ ಖಂಡಿತ್ ಸೊದ್ತಾಲೆ. ಪ್ರಸ್ತುತ್ ಪರಿಸ್ಥಿತೆಂತ್ ಸಬಾರ್ ಕಂಪೆನಿ ಬ್ರಿಟನಾ ಥಾಂವ್ನ್ Single Market ಹಾಚೊ ಫಾಯ್ದೊ ಘೆಂವ್ನ್ ಯುರೋಪಾಂತ್ ವ್ಯಾಪಾರ್ ಕರ್ತಾತ್, ಅಸೆ ವ್ಯಾಪಾರ್ ಕರ್ಚಾ ಕಂಪೆನಿಂಕ್ ಅಪ್ಲೆ ವ್ಯಾಪಾರಾಚೆ ಮುಳ್ (Head Office) ಬ್ರಿಟನಾ ಥಾಂವ್ನ್ ಕಾಡ್ನ್ ಯುರೋಪಾ ಭಿತರ್ ಕರಿಚಾಯ್ ಪಡ್ತಲೆ, ಹಾಕಾ ಚಡಿತ್ ದುಡು (Additional Investment) ಜಾಯ್ ಪಡ್ತಲೊ.
ಬ್ರೇಕ್ಸಿಟಾ ನಂತರ್, ಯುರೋಪ್ ಭಾರತಾ ಕಡೆ ಚಡ್ ಅನಿ ಚಡ್ ವ್ಯಾಪಾರ್ ಕರ್ಚಿ ಸಾಧ್ಯಾತಾ ಅಸಾ. ಅಮೇರಿಕಾ ಅನಿ ಚೀನಾ ಮದ್ಲೊ ಮನಸ್ತಾವ್, ಯುರೋಪ್ ಅನಿ ಅಮೇರಿಕಾಕ್ ಚೀನಾಚೆ ವಡೊನ್ ಯೇಂವ್ಚಿ ವರ್ಚಸ್ವ್ (Supremacy) ಉಣೆ ಕರಿಜಾಯ್ ಜಾಲ್ಯಾರ್ ಭಾರತಾ ಕಡೆ ಬರೊ ಸಂವಾದ್ ಕರ್ಚಿ ಗರ್ಜ್ ಅಸಾ.
ಸುಮಾರ್ 14-15 ಲಾಕ್ ಭಾರತೀಯಾ ಲೊಕ್ ಅನಿ 800 ವಯ್ರ್ ಭಾರತಾಚೆ ಕಂಪೆನಿ ಬ್ರಿಟನಾಂತ್ ಅಸಲ್ಯಾ ಸಂರ್ಧಬಾರ್ ಎದೊಳ್ಚ್ ಅಸಲ್ಲ್ಯಾ ವ್ಯಾಪಾರಾಕ್ ಬ್ರಿಟನಾಂತ್ ಮುಕಾರ್ ವರುಂಕ್ ಜಾಯ್ ಜಾಲ್ಲೊ ಚಡಿತ್ ಸಹಕಾರ್ ಮೆಳ್ಚಿ ಸಾಧ್ಯಾತಾ ಅಸಾ.
RonaK Desai - What Brexit Means for India July 06, 2016 ಹಾಚಾ ಪ್ರಕಾರ್ ಬ್ರೇಕ್ಸಿಟಾ ನಂತರ್ ಪಾಂಡಾಚೆ ಮೋಲ್ ದೆಂವ್ತಾಲೆ, ಹ್ಯಾ ವರ್ವಿಂ ಬ್ರಿಟನಾಂತ್ ಅಸಲ್ಲ್ಯಾ ವ್ಯಾಪಾರಿಂಕ್ ವ್ಯಾಪಾರಾಂತ್ ಲಾಭ್ ಕರುಂಕ್ ಕಷ್ಟ್ ಜಾತಾಲೆ, ತೆಂ ನಹಿಂ ಅಸ್ತಾ ಖಂಚಾಯಿ ಕಂಪೆನಿ ಬ್ರಿಟನಾಂತ್ ಅಸೊನ್ ತಾಕಾ ಪೂರಕ್ ವಸ್ತು ವಾ ಕಚ್ಚಾ ವಸ್ತ್ ಲಾಬೊಂವ್ಚಿ ಕಂಪೆನಿ (Supply Chain) ಯುರೋಪಾಂತ್ ಅಸಾತ್ ಜಾಲ್ಯಾರ್ ಬ್ರೇಕ್ಸಿಟಾ ಉಪ್ರಾಂತ್ ತಿರ್ವೊ (Taxation) ದೀಂವ್ಚಿ ರೀತ್ ಸಂಕೀರ್ಣ್ ಜಾತಾಲಿ, ಹ್ಯಾ ವಿಶಯಾಚೊ ಫಾಯ್ದೊ ಘೆವ್ನ್ ಯುರೋಪಾಚಿ ದುಸ್ರಿ ದೇಶಾಂ ಪತ್ಯೇಕ್ ಜಾಂವ್ನ್ ಪ್ರಾನ್ಸ್ ಅನಿ ಜರ್ಮನಿ ನಹಿ ಕೇವಲ್ ಭಾರತಾಕ್ ಬಗಾರ್ ಬ್ರಿಟನಾಂತ್ ಅಸಲ್ಲ್ಯಾ ಸಬಾರ್ ಇತರ್ ದೇಶಾಚಾ ಕಂಪೆನಿಂಕ್ ಅಪ್ಲ್ಯಾ ದೇಶಾ ಥಂಯ್ ಅಕರ್ಶಿತ್ ಕರುಂಕ್ ಸರ್ವ್ ಪ್ರಯತ್ನ್ ಕರ್ತಲಿ. ಅಸಲ್ಯಾ ವೆಳಾರ್ ಅಮ್ಚೊ ಸರ್ಕಾರ್ ಯುರೋಪ್ ಅನಿ ಬ್ರಿಟನಾ ಕಡೆ ಕಸೊ ಸಂವಾದ್ ಕರ್ತಾ ಹಾಚೆ ವಯ್ರ್ ಹೊಂದೊನ್ ಅಸಾ.
ಸಂರ್ಪೂಣ್ ಬ್ರೇಕ್ಸಿಟಾಕ್ ಸುಮಾರ್ ಪಾಂಚ್ ಮಹಿನೆ ಬಾಕಿ ಅಸಾತ್, ಕೊರೊನಾನ್ ಎದೊಳ್ಚ್ ವ್ಯಾಪಾರ್ ಕರ್ಚಾ ರೀತಿಂತ್ ಸಬಾರ್ ಚಿಂತಿನಾತಲ್ಲಿ ಬದ್ಲಾವಣ್ ಹಾಡ್ಲ್ಯಾ ಅಶೆಂ ಜಾಲ್ಯಾನ್ ಮುಕ್ಲ್ಯಾ ದೀಸಾನಿ ಹೊ ಎಕ್ ಚರ್ಚಾಸ್ವದ್ ವಿಶಯ್ ಜಾಂವ್ನ್ ಅಸ್ತಾಲೊ ಅನಿ ಹಾಚೊ ಪರಿಣಾಮ್ ವೆಳಾ ಸವೆ ಬದ್ಲೊಂನ್ ವೆತಾಲೊ.
- ಲಾರೆನ್ಸ್ ವಿ ಬಾರ್ಬೊಜಾ - ಮ್ಯಾನ್ಚೆಸ್ಟರ್, Aug 2020
