[Onkonn] Breksitt(Brexit) oni amcho dex - ek porichoi
Breksitt (Brexit) oni amcho dex - ek porichoi
Prostaun:
Yuropiyon yuniyon, 1949 isvent Council of Europe thaun prarombh zal'li prokria oni hea prokriak, 01/11/1993 ver yuropiyon yuniyon (European Union) moll'lle namv mell'lle. Yuropiyon yuniyonacha odhikrot zalli zago www.europa.eu hache prokar ho 27 yuropiyon dexacho ek ekvott.
Yuropiyon yuniyonant sobar vibhag osat, zose yuropiyon oyog punn yuropiyon somsod hantu promuk zaunasa. Hea sorv vibhagank 27 dexanche protinidhi oppol'lea dexa thaun chunayit zamvn yetat. He 27 dex horyeka vorsa oppol'lea dexache kanun, orthik nit, zomea khorchache lekachar (Budget) oni itor sobar dhoronna, yozana oni niti toyar kortana, yuropiyon yuniyon hea sorv 27 dexank chaltem (Common) kanun, orthik nit, zomea khorchache lekachar (Budget) oni itor sobar dhoronna, yozana oni niti toyar korta. Hangasor hea lekonacha droxtten, yuropiyon yuniyonan maddumn haddcha sobhar yozonant, sokoil tillsil'le tin vixoi promukh zaunasat. ( Reference: https://europa.eu/european-union/about-eu_en )
Proyann- yuropiyon yuniyonacha bhitor yuropiyon yuniyonacha sandeamni (Citizens) sulobhayen proyann koriet, hanchi visa prokriyo va eka dexa thamvn onyeka dexak vosonk otyont solis zaunasa.
Veapar- hangasor gorjeche zaunasa ’Single Market’ chintap, ose mollear, yuropiyon yuniyonacha bhitor yuropiyon yuniyonacha sandeamni (Citizens) kaideanusar xikap xikoyet oni jieyot. Tem nhoi osta punkeak mollear tirvo nasta dexam modhem vostu osor-posor koriet. Veapar korcha droxtten hi ek otyont onkul va paideachi poristhiti zaunasa. (Reference -https://europa.eu/european-union/topics/single-market_en )
saganta oslear... Sorv bore... Hem yuropiyon yuniyona thamvn xikchem tosole lisamv zaunasa. Yuropiyon yuniyonan yuropant kel'lea kama khatir 2012 isvent nobel xanti puroskar lablam.
Punn hea yuropiyon yuniyonant ... Britton ...Na!!!, oni haka karonn..Breksitt!.. Breksitt mollear Brtish Exit, mollear yuropiyon yuniyona thaun brittonan bhair veche.
Breksitt:
Yuropiyon yuniyonacha dakhlea prokar britton oni yuropiyon yuniyonacho sombondh sumar challis oni so (46 ) vorsancho, 01/01/1973 ver hea ekvottak va songhottonacho sando zalea brittonacho sombondh titlo kaim boro osol'lo mhonn sagonk zaina. 1975 cha zonadexant (Referendum ) brittixamni hea nirdharak bohumot dil'le, zaleari eka kallar somsarbhor rajeadhikar cholon souy zalea brittixank hem koxtt zatale.(Referece : Jeremy Black -Britain and Europe: A Short History ), tem nhoi osta, 1975 isvent novo sande dex osol'lea hea songhottonant sande chodd zamvn yetale, orthik udrogote khatir osa kel'le hem songhotton dis veta veta razokiya oni itor vixoyani meter zaunko xuru zal'le. Hancho porinnam' zamvn, hea songhottona virodh lokan ovaz xuru kel'lo. Brittonant hea chintpacho oni dusrea dexancha lokancho sonkho chodd zate osa moll'llem (Immigration) nib ghemvn, chunaunna vellar vottanche razokiya xuru zal'lem. (Reference: Euro sceptisism on raise in Europe - Poll Suggest - BBC dated 08/06/2016 and Support to Eurosceptic Parties Doubles in two decades across EU - The Guardian dated 02/03/2020 )
him songlle monant dourun 2015 isvent tedallacho brittix prodhani ddevidd keamoron hanne zonadex osa kelo, ho zonadex 23/06/2016 ver zalo oni 52% bohumotan brittix lokan yuropiyon yuniyon soddizai mhonn vott dilo, hea prokar 31/01/2020 ver brittonan yuropiyon yuniyon soddle, niyoma prokar 31/01/2020 thamvn 31/12/2020 monnasor bodlapachi ovdi (transition period) tacha nontor, britton yuropiyon yuniyona thamvn somrpunn ritin bair vetale.
Vixlexonn:
Breksitta nontor britton yuropiyon yuniyona thamvn svotontr zata, yuropiyon yuniyonacho kosoloi odhikar, niyom' va kanun brittonak lagu zaina. Tose mollear yuropiyon yuniyonacho kosoloi dobavo nastona brittonak tachi niyoma, protyek zamvn veapar oni proyann hantu ghemvn zatat. Ose zalean somrpunn breksitta uprant brittonacha veapar oni proyannant niyomani mullavi bodlounn zamvchi sadheata osa.
Hagamsor provex zata om'mcho dex bharot. Brexit and its Impact on India's Export Business by V.V.L.N. Sastry hacha sonxodhona prokar om'mcha dexak veaporant faido zamvchi sadhyota chodd osa monnta, punn hem 2018 isvent kel'le sonxodhon. Prostut poristhitent brittonant bonddovall galn va duddu galn veapar korcha poyil'lea vis dexam poikim bharot ek zaunasa. Sumar 800 voir bharotache kompeni brittonant osat (Reference: www.ons.co.uk). Brittonyi bharotant duddu galn veapar korcheat patti na. Voir tillsil'lea sonxodhona prokar britton poyil'lea dha dexam poiki ek zaunasa, ose he onke-sonkhe polliyil'lear doni dexank ekamekachi gorz dista. Punn dis veta veta bodlun yemvcha doni dexancha razokiya poristhiti polleyitana, hem titlem sulabayeche mhonn bhogana. Hagamsor otyont gorjeche oni vixes zamvn gomon dizai zal'lo vixoi zamvnasa, breksitta uprant britton oni yuropacho sombondh, pattlea challis oni so vorsam sangata osol'lea hanka ekamekachi gorz mostu osa. Zannteanchi sombhaxonna oni sonxodhon monant dourun am'mcha dexacha veaparacha droxtten porinnam' galche vixoi hea pori osat.
Mottvea ovdek bharotant brittonacho duddu (Foreign Direct Investment) unno zatalo, punn hem don dexancha somvadocher hondon osol'lean hantu sudhar zamvchi sadheata osa. Om'mka sorvonk kollit osol'leapori britton dexantor monxeacher (Migrant Labour) hondon oscho dex, veapar nhoyi osta meddikol oni kompyuttor kxetrant sobar bharotiya lok kam' korta. Breksitta uprantlea somvadant am'mcha dexan bharotiyak brittonak vecha prokriant soddilai vicharizai mholl'lli obhiprai osa.
Bharotak britton, yuropak veche dar zaunasa, hem dar breksitta mukantr bond zatana, bharotache komponi yuropacha veaparak dusre dar khonddit sodtale. Prostut poristhitent sobar kompeni brittona thamvn Single Market hacho faido ghemvn yuropant veapar kortat, ose veapar korcha kompenink ople veaparache mull (Head Office) brittona thamvn kaddn yuropa bhitor korichai poddtole, haka choddit duddu (Additional Investment) zai poddtolo.
Breksitta nontor, yurop bharota kodde chodd oni chodd veapar korchi sadheata osa. Omerika oni china modlo monostavo, yurop oni omerikak chinache voddon yemvchi vorchosv (Supremacy) unne korizai zalear bharota kodde boro somvad korchi gorz osa.
Sumar 14-15 lak bharotiya lok oni 800 voir bharotache kompeni brittonant osolea somrdhobar edollch osol'lea veaparak brittonant mukar vorunk zai zal'lo choddit sohokar mellchi sadheata osa.
Ronak Desai - What Brexit Means for India July 06, 2016 hacha prokar breksitta nontor panddache mol demvtale, hea vorvim brittonant osol'lea veaparink veaparant labh korunk koxtt zatale, tem nohim osta khonchayi kompeni brittonant oson taka purok vostu va kochcha vost labomvchi kompeni (Supply Chain) yuropant osat zalear breksitta uprant tirvo (Taxation) dimvchi rit sonkirnn zatali, hea vixoyacho faido ghemvn yuropachi dusri dexam potyek zamvn prans oni zormoni nohi keul bharotak bogar brittonant osol'lea sobar itor dexacha kompenink oplea dexa thoim okorxit korunk sorv proitn kortoli. Osolea vellar om'mcho sorkar yurop oni brittona kodde koso somvad korta hache voir hondon osa.
Somrpunn breksittak sumar panch mohine baki osat, koronan edollch veapar korcha ritint sobar chintinatol'li bodlaunn haddlea ose zalean muklea disani ho ek chorchasvod vixoi zamvn ostalo oni hacho porinnam' vella sove bodlomn vetalo.
- Larens V. Barboz, Meanchesttor-UK. Aug 2020
