[ಭುರ್ಗ್ಯಾಪಣಾಲ್ಯಾ]

ಭುರ್ಗ್ಯಾಪಣಾಲ್ಯಾ ದಿಸಾಂನಿ ಕೊಡು ವ್ಹಕಾತ್ ಪಿಯೆಂವ್ಕ್ ದಿತಾನಾ, ಕಾಂಯ್ ಮ್ಹೊಂವಾಸವೆಂ ಭರ್ಸುನ್ ದಿಂವ್ಚಿ ಕಲಾ ಚಡ್ತಾವಾಂಕ್ ಪರಿಚಿತ್. ಕವಿತೆಂತ್ ಸಯ್ತ್ ಮ್ಹೊಂವಾಳ್ ಉತ್ರಾಂ ಮಧೆಂ ಅಸಲೆಚ್ಚ್ ಅಪುರ್ಭಾಯೆಚೆ ವಿಚಾರ್ ಲಿಪಂವ್ಚಿ ಶ್ಯಾಥಿ ಆಸ್ಚೆ ಕವಿ ಕೊಂಕ್ಣೆಂತ್ ಆಸ್ಚೆ ಕಾಂಯ್ ಭೋವ್ ಉಣೆಂ. ಆನಿ ತಾಂತುಂ ಮ್ಹಾಕಾ ಉಟೊನ್ ದಿಸ್ಚೊ ಕವಿ ಮಾವ್ರಿಸ್ ಡೆ’ಸಾ.

ಹೊ ಅಪ್ರೂಪಾಯೆನ್ ಪುಣ್ ಅಪುರ್ಭಾಯೆಚೆಂ ಸಾಹಿತ್ ರಚ್ತಾ ದೆಕುನ್ ಹಾಚಿಂ ಬರ್ಪಾಂ; ಜಾಂವ್ ಲೇಖನಾಂ, ಜಾಂವ್ ಕಾಣ್ಯೊ, ವ ಕವಿತಾ ವಾಚ್ತಾನಾ ಏಕ್ ಅಥ್ವೊಚ್ಚ್ ಅನ್ಭೋಗ್ ಕಾಳ್ಜಾ-ಮನಾಂತ್ ಉದೆತಾ ದೆಕುನ್ ತೆಂ ಬರಪ್ ಪರತ್ ವಾಚುಂಕ್ ಪ್ರೇರಿತ್ ಕರ್ತಾ.

ಹಾಂಗಾಸರ್ ಹಿ ಕವಿತಾ ವಯ್ಲ್ಯಾವಯ್ರ್ ವಾಚ್ಲಿ ತರ್ ಸಂಪಿ ದಿಸತ್ ವ ಅಸ್ವಾಭಾವಿಕ್ ದಿಸತ್, ಪುಣ್ ಕವಿತಾ ಮ್ಹಳ್ಳೊ ಪ್ರಕಾರ್ ವೆಗ್ಳೊಚ್ಚ್ ಆಸ್ತಾಂ, ಹಿ ಕವಿತಾ ಕಾಂಯ್ ತಾತ್ವಿಕ್ ಚಿಂತ್ಪಾಂತ್ ಘೆತ್ಲಿ ತರ್ ಕಾಂಯ್ ಅಪುರ್ಭಾಯೆಚೆಂ ಲಿಸಾಂವ್ ಶಿಕಯ್ನಾ? ಹೆಂ ತುಕುಂಕ್/ಮಾಪುಂಕ್/ಸಮ್ಜುಂಕ್ ತುಕಾಚ್ಚ್ ಸೊಡ್ತಾಂ.

ವಜ್ರಾಚಿ ಮುದಿ ಘಾಲ್ಲೆಂ

ಮ್ಹಜ್ಯಾ..

ದಾವ್ಯಾ ಹಾತಾಚೆಂ

ಮಧ್ಲೆಂ ಬೋಟ್

ಚೊರ್ಲಾಂ

ನಿದ್ತಾನಾ ಆಸ್‌ಲ್ಲೆಂ

ಸಕಾಳಿಂ ಉಟ್ತನಾ

ಮಯಾಕ್ ಜಾಲಾಂ

ದುಖಯ್ನಾಸ್ತಾಂ

ಚೊರ್ನ್ ವೆಲ್ಲ್ಯಾಂಚಿ

ಭುಧ್ವಂತ್ಕಾಯ್ ಹಾಂವ್ ಮಾನ್ತಾಂ

ಬೊಟಾ ಸವೆಂ

ಮುದಿ ವೆಲ್ಲ್ಯಾಕ್

ಧನ್ಯ್‌ವಾದ್ ಮ್ಹಜೆ

ಬೋಟ್ ಆಸ್ಲ್ಯಾರ್‌ಚ್ಚ್ ನ್ಹಯ್‌ವೇ

ಮುದಿಯೆಚಿ ಖಂತ್

ದಯ ಕರ್ನ್

ಹೆಂ ಬೋಟ್

ಪಾಟಿಂ ಮೆಳುಂಕ್ ಕುಮಕ್ ಕರಾ

ಸಾಂಗಾತಾ ಮುದಿ ಸಯ್ತ್

ಕಿತ್ಯಾಕ್ ಮ್ಹಳ್ಯಾರ್

ಬೋಟ್ ಮೆಳ್ತಾನಾ

ಮುದೀಯ್

ಜಾಯ್ ಪಡ್ತಾ ನ್ಹಯ್‌ವೇ?

- ಮಾವ್ರಿಸ್ ಡೆ’ಸಾ [ಅಗೋಸ್ತ್, 2016]

ಮಾವ್ರಿಸ್ ಡೆ’ಸಾ: ಕೊಂಕ್ಣೆಂತ್ ಕವಿ ಜಾವ್ನ್ ಉದೆಲ್ಲೊ ಮಾವ್ರಿಸ್ ಶಾಂತಿಪುರ್ ಏಕ್ ಬರೊ ಪತ್ರ್‌ಕರ್ತ್, ಲೇಖಕ್, ಕಾಣ್ಯೆಗಾರ್ ಸಯ್ತ್. ’ಕಿರಾ ಬೋಂಚ್’, ’ಭಿಂಗಾರಿ’ ಹಾಚೆ ದೋನ್ ಕವಿತಾಜಮೆ. ’ಉಮಾಳೊ’, ’ಆಮ್ಚೊ ಯುವಕ್’, ’ಕಾಣಿಕ್’ ಪತ್ರಾಚೆಂ ಸಂಪಾದಕ್‌ಪಣ್ ಚಲಯಿಲ್ಲೊ ಹೊ ಸದ್ದ್ಯಾಕ್ ಅಪ್ಲೆಂಚ್ ಮ್ಹಳ್ಳೆಂ ಉಧ್ಯಮ್ ಚಲವ್ನ್ ಆಸಾ.