[ಮಟ್ವಿ ಕಾಣಿ] ಬೊಂಬೊಯ್ಚೊ ಮಾಮ್ [ ವಲ್ಲಿ ಕ್ವಾಡ್ರಸ್]
ಹಿ ಏಕ್ ಕಾಣಿ ಮಾತ್ರ್ ನ್ಹಯ್, ಸಭಾರಾಂಚಿ ಜಿಣಿ ಸಯ್ತ್. ಪುಣ್ ಕುಟಮ್, ಭಾಂಧ್ ಮ್ಹಳ್ಳೆ ದಾಕ್ಶೆಣೆಂತ್, ಭಿರಾಂತೆನ್ ಅಸಲ್ಯೊ ಕಿತ್ಲೆಶ್ಯೊ ಕಾಣಿಯೊ ಅಜೂನ್ ಕಾಳೊಕಾಂತ್ ಉರ್ಲ್ಯಾತ್. ಹಿ ಏಕ್ ಹಕೀಗತ್ ಜಿ ಹಾಂವೆಂ ಲಾಗ್ಶಿಲ್ಯಾನ್ ಪಳೆಲ್ಲಿ ತಶೆಂಚ್ ಪಾರ್ಕಿಲ್ಲಿ. ಬಾಕಿಚೆಂ ಸರ್ವ್ ತ್ಯಾ ತ್ಯಾ ವಾಚ್ಪ್ಯಾಚ್ಯಾ ಚಿಂತ್ಪಾಚ್ಯಾ ಪ್ರಭುದ್ದತೆಚೆರ್ ಸೊಡ್ತಾಂ.
[ಮಟ್ವಿ ಕಾಣಿ] ಬೊಂಬೊಯ್ಚೊ ಮಾಮ್ [ ವಲ್ಲಿ ಕ್ವಾಡ್ರಸ್]
’ಬೊಂಬೊಯ್ಚೊ ಮಾಮ್ ಸರ್ಲೊ ಕಂಯ್’, ಸಕಾಳಿಂ ಉಟುನ್ ಕುಜ್ನಾಂತ್ ರಿಗೊನ್ ಚಾ ಕರ್ಚೆ ವೆಳಾರ್ ಮೊಬಾಯ್ಲಾಂತ್ ಆಯಿಲ್ಲಿ ವಾಟ್ಸ್ಆಪ್ ಮೆಸೇಜ್ ವಾಚ್ಲ್ಲ್ಯಾ ರೀಟಾಚ್ಯಾ ಮತಿಂತ್ ಕಸಲಿಂಚ್ ಭಗ್ಣಾಂ ಉದೆಲ್ಲಿಂ ನಾಂತ್. ತೊ ಇತ್ಲೊ ತೇಂಪ್ ಖಂಯ್ ಆಸ್ಲೊ? ಕೊಣಾಗೆರ್ ಆಸ್ಲೊ? ಕಿತೆಂ ಕರ್ನ್ ಆಸ್ಲೊ ಮ್ಹಳ್ಳೆಂ ಕೊಣಾಕ್ಚ್ ನಖ್ಖೆಂ ಕಳಿತ್ ನಾತ್ಲೆಂ ತರ್ಯೀ ಆಯ್ಲೆವಾರ್ ಗಾಂವ್ಚ್ಯಾ ಕೊಲೆಜಿಂತ್ ಶಿಕ್ಚಾ ಆಕಯ್ಚ್ಯಾ ನಾತ್ವಾನ್ ’ಫ್ಯಾಮಿಲಿ’ ಮ್ಹಳ್ಳೊ ಏಕ್ ವಾಟ್ಸ್ಆಪ್ ಪಂಗಡ್ ಕೆಲ್ಲೊ ಆನಿ ಅಪ್ಣಾಕ್ಯೀ ತಾಂತುಂ ಭರ್ತಿ ಕೆಲ್ಲೊ ದೆಕುನ್ ತ್ಯಾ ಪಂಗಡಾಂತ್ ಬೊಂಬೊಯ್ಚ್ಯಾ ಮಾಮಾವಿಶಿಂ ಕೊಣೆಂಗೀ, ಕಿತೆಂಗೀ ಬರಯಿಲ್ಲೆಂ ವಾಚ್ಲ್ಲೊ ಉಡಾಸ್, ಪುಣ್ ಉಡಾಸ್ ದವರುಂಕ್ ರೀಟಾ ಸಕ್ಲ್ಲೆಂ ನಾ.
ರಿಟಾನ್ ಅಪ್ಲ್ಯಾ ಎಕ್ಸುರಿ ಜಿಣ್ಯೆಚಿಂ ಪನ್ನಾಸ್ ವರ್ಸಾಂ ಎದೊಳ್ಚ್ಚ್ ಸಂಪ್ಲ್ಲಿಂ. ’ಕುಟಮ್’ ಮ್ಹಣ್ಚೆಪರಿಂ ಕೊಣ್ಯೀ ನಾತ್ಲ್ಲಿಂ, ತರ್ನೆ ಪ್ರಾಯೆರ್ ನರ್ಸಿಂಗ್ ಶಿಕುನ್ ಪಯ್ಲೆಂ ಬೊಂಬೊಯ್ಚ್ಯಾ ಆಸ್ಪತ್ರೆಂತ್ ಕಾಮ್ ಕರುನ್, ಥೊಡೆಚ್ ವರ್ಸಾಂನಿ ಲಂಡನ್ ಗೆಲ್ಲೆಂ ರೀಟಾ, ಪಾಟ್ಲ್ಯಾ ಇಕ್ರಾ ವರ್ಸಾಂನಿ ಸ್ವೀಡನಾಂತ್ ಕಾಮ್ ಕರುನ್ ಆಸ್ಲೆಂ. ವಾಚಪ್ ಆನಿ ಸಂಗೀತ್ ಸೊಡ್ಲ್ಯಾರ್ ಹೆರ್ ಕಸಲ್ಯಾಕ್ಯೀ ಹುಮೆದ್ ಜಾಂವ್ ಆವ್ಕಾಸ್ ಜಾಂವ್ ರೀಟಾಕ್ ನಾತ್ಲೊ.
’ಕುಟಮ್’ ವಾಟ್ಸ್ಆಪ್ ಪಂಗ್ಡಾಂತ್ ಸಯ್ತ್ ಆಜ್ಕಾಲ್ ಕರ್ಕರೆ ಚಡುನ್ ಗೆಲ್ಲೆ; ಕೋಣ್ ದೇವ್, ಸಾಂತ್, ಇಗರ್ಜೆಚ್ಯೊ ತಸ್ವೀರೊ ಧಾಡ್ನ್ ಅಪ್ಲಿ ಭಕ್ತೆಚಿ ಉಚಾರ್ಣಿ ಕರ್ತಾ ತರ್ ಕೊಣ್ ಖಾಣಾಚ್ಯೊ ತಸ್ವೀರೊ ಧಾಡ್ತಾ. ಕೊಣ್ ನವ್ಯಾ ಘರಾಚಿ ತಸ್ವೀರ್ ಧಾಡ್ತಾ ಆನಿ ಕೊಣ್ ತಾಂಕಾಂಚ್ ಸಮ್ಜನಾತ್ಲ್ಲಿ ಮಾಹೆತ್ ವಾ ಜೋಕ್ಸ್ ಧಾಡ್ತಾ. ಸಭಾರ್ ಪಾವ್ಟಿಂ ರೀಟಾನ್ ಚಿಂತ್ಲ್ಲೆಂ ಆಸಾ, ಅಪ್ಣಾನ್ ಮಾಂಯ್ಗಾಂವ್ ಸೊಡ್ನ್ ಕಾಂಯ್ ತೆತ್ತೀಸ್-ಚೊವ್ತೀಸ್ ವರ್ಸಾಂ ಜಾಲಿಂ. ತರ್ಯೀ ಗಾಂವಾಂತ್ ಎಲಿಸಾಂವಾವಿಶಿಂ ಪ್ರಚಾರ್, ಧರ್ಮಾಚ್ಯಾ ನಾಂವಾನ್ ಜಾಂವ್ಚ್ಯಾ ಮಾರಾಮಾರೆವಿಶಿಂ ವಾ ಲ್ಹಾ-ಲ್ಹಾನ್ ಭುರ್ಗ್ಯಾಂಚೆರ್ ಚಲ್ಚ್ಯಾ ಭಲತ್ಕಾರ್ ತಶೆಂಚ್ ಖುನಿಯೆವಿಶಿಂ ಖಬ್ರೊ ವಾಚುನ್ ಪುರೊ ಜಾಲ್ಲ್ಯಾಕ್ ಆತಾಂ ವಾಟ್ಸ್ಆಪಾಚೆರ್ ಸಯ್ತ್ ತಸಲೆಚ್ ಫೊಟೊ/ವಿಡಿಯೊ ಯೆಂವ್ಚ್ಯೊ ಪಳೆಂವ್ಕ್ ರೀಟಾಕ್ ನಾಕಾಸ್ಲೆಂ. ಏಕ್ ದೋನ್ ಪಾವ್ಟಿಂ ಅಪ್ಣಾನ್ ವಾಟ್ಸ್ಆಪಾರ್ ಆಸ್ಚೆಂ ಕಿತ್ಯಾಕ್ ಹೆರಾಂಕ್ ಕಳಯ್ಲೆಂ ಮ್ಹಳ್ಳೆ ಚುರ್ಚುರೆ ಸಯ್ತ್ ರೀಟಾಕ್ ಭಗ್ತಾಲೆ ಆನಿ ಅಪುಣ್ ಹ್ಯಾ ಪಂಗಡಾಥಾವ್ನ್ ಭಾಯ್ರ್ ವೆಚೆಂಚ್ ಬರೆಂ ಮ್ಹಣ್ ಭಗ್ತಾಲೆಂ. ಪುಣ್ ’ಕುಟಮ್’ ಮ್ಹಳ್ಳೆಂ ಅರ್ಥ್ ನಾತ್ಲ್ಲೆಂ ಚಿಂತ್ಪಾನ್ ತೆಂ ಸೊಡ್ದೊಡ್ ಕರ್ತಾಲೆಂ. ಹ್ಯಾ ಫಾರ್ವರ್ಡ್ ಮೆಸೇಜಿಂ ಮಧೆಂ ಅಪ್ರೂಪಾಯೆನ್ ಸಯ್ರ್ಯಾಂಚ್ಯೊ ಖಬ್ರೊ ಮೆಳ್ತಾಲ್ಯೊ ತ್ಯೊ ತೆಂ ಸಾಂಜೆರ್ ಕಾಮ್ ಸಂಪವ್ನ್ ಪಾಟಿಂ ಯೆತಾನಾ ಮೆಟ್ರೊಚೆರ್ ಬಸುನ್ ವಾಚ್ತಾಲೆಂ.
ಲ್ಹಾನ್ಪಣಾರ್ ಬೊಂಬೊಯ್ಚೊ ಮಾಮ್ ಮ್ಹಳ್ಯಾರ್ ಪಯ್ಲೊ ತಾಕಾ ಮೋಗ್ ಆಸ್ಲೊ. ತಾಣೆಂ ಬೊಂಬೊಯ್ ಥಾವ್ನ್ ಹಾಡ್ಚ್ಯೊ ಖಾರಿ ಬಿಸ್ಕುಟೊ, ಕಡಕ್ ಪಾವ್, ಆನಿ ಗಾಂವಾಂತ್ ತಾಣೆಂ ಯೇವ್ನ್ ಆಮ್ಕಾಂ ಖಾಂವ್ಕ್ ದಿಂವ್ಚೊ ಮಸ್ಕಾ ಪಾವ್ ಮ್ಹಳ್ಯಾರ್ ಆಮಿ ಕಿತೆಂಯ್ ಕರುಂಕ್ ತಯಾರ್ ಆಸ್ಲ್ಯಾಂವ್ ಆನಿ ತಿಚ್ಚ್ ಆಮ್ಚಿ ಅಸ್ಕತ್ಕಾಯ್ ಜಾವ್ನಾಸ್ಲಿ. ಎಕ್ಲೊಚ್ ಭಾವ್ ದೆಕುನ್ ಮಾಂಯ್ಕ್ ತೊ ಮೊಗಾಚೊ. ದೆಕುನ್ ಸಕಾಳಿಂ ಥಾವ್ನ್ ಸಾಂಜ್ ಪರ್ಯಾಂತ್ ’ಬಾಯೆ ತೆಂ ರಾಂದ್, ಬಾಯೆ ಹೆಂ ರಾಂದ್’ ಮ್ಹಣ್ತಾಲೊ. ಮಾಂಯ್ಕ್ ಸಯ್ತ್ ತಾಚೆರ್ ವಿಶೇಸ್ ಮೋಗ್, ಲ್ಹಾನ್ ಭುರ್ಗೊ ಆಸ್ತಾನಾಂಚ್ ತಾಂಚಿ ಆವಯ್ ಸರ್ಲಿ ದೆಕುನ್ ತಿಚ್ಚ್ ಮಾಮಾಚಿ ಭಯ್ಣ್ ತರ್ಯೀ ಆವಯ್ಪರಿಂ. ಆಟ್ವಿ ಕ್ಲಾಸ್ ಫೇಯ್ಲ್ ಜಾಲ್ಲೊಚ್ಚ್ ಸೆಜಾರಿ ಬೊಂಟಾಚ್ಯಾ ಮಾಧು ಶೆಟ್ಟಿಸವೆಂ ಬೊಂಬೊಯ್ ಗೆಲ್ಲೊ ಮಾಮ್, ತ್ಯಾಚ್ ಬೊಂಟಾಂಚ್ಯಾ ಹೊಟೆಲಾಂತ್ ಕಾಮ್ ಕರುಂಕ್ ಲಾಗ್ಲ್ಲೊ ಮ್ಹಣುನ್ ಲ್ಹಾನ್ಪಣಾರ್ ಆಯ್ಕಲ್ಲೊ ಉಡಾಸ್.
ರೀಟಾನ್ ತಾಕಾ ಪಯ್ಲೆಂ ಪಳೆತಾನಾ ತೊ ಕಾಂಯ್ ಭಾವೀಸ್-ತೆವೀಸ್ ವರ್ಸಾಂಚೊ ತರ್ನಾಟೊ, ರೀಟಾ ಪಾಂಚ್ವೆ ಕ್ಲಾಶಿಂತ್ ಶಿಕ್ಚೆಂ ಭುರ್ಗೆಂ. ಚಡಾವತ್ ಜಾವ್ನ್ ಮಾಧು ಶೆಟ್ಟಿ ಆನಿ ಬೊಂಬೊಯ್ಚೊ ಮಾಮ್ ಸಾಂಗಾತಾ ಯೆತಾಲೆ ವೆತಾಲೆ ಆನಿ ತಾಂಚಿ ಖಾಸ್ ಇಸ್ಟಾಗತ್. ಮಾಧು ಶೆಟ್ಟಿ ಸಯ್ತ್ ಮಾಮಾಪರಿಂಚ್ ತಾಚ್ಯಾ ಭಯ್ಣಿಗೆರ್ ರಾವ್ತಾಲೊ. ಆನಿ ತಾಚ್ಯಾ ಭಯ್ಣಿಕ್ ಜೊವ್ಳಿಂ ಚೆಡ್ವಾಂ ಸಾತ್ವೆ ಕ್ಲಾಶಿಂತ್ ಶಿಕ್ತಾಲಿಂ. ದೋನ್ ಹಫ್ತ್ಯಾಚ್ಯಾ ರಜೆರ್ ಆಯಿಲ್ಲ್ಯಾ ಮಾಧು ಶೆಟ್ಟಿನ್ ಬೊಂಬೊಯ್ ಥಾವ್ನ್ ಫಿಯೆಟ್ ಕಾರ್ ಹಾಡ್ಚೆಂ ಆಸ್ಲೆಂ. ಕುಕ್ಕೆಹಳ್ಳಿಕ್ ಕಾರ್ ಆಯ್ಲೆಂ ಮ್ಹಳ್ಯಾರ್ ಆತಾಂ ಸಗ್ಳ್ಯಾಂಕ್ ಕಳಿತ್ ಆಸ್ಲೆಂ, ತೆಂ ಮಾಧು ಶೆಟ್ಟಿಚೆಂ ಫಿಯೆಟ್ ಕಾರ್ ಮ್ಹಣುನ್.
ಮಾಧು ಶೆಟ್ಟಿಚ್ಯಾ ಭಯ್ಣಿಚ್ಯಾ ದೊಗಾಂಯ್ ಧುವಾಂಚ್ಯಾ ಮತಿಂತ್ ತಾಂಚೊ ಮಾಮ್ ಮಾಧು ಶೆಟ್ಟಿಚ್ ತಾಂಚೊ ಮುಖ್ಲೊ ಘೊವ್ ಮ್ಹಣುನ್ ಆಸ್ಲೆಂ ತರ್ಯೀ ದೊಗಾಂಯ್ ತಾಚ್ಯೊ ಬಾಯ್ಲೊ ಕಶೆಂ ಜಾಂವ್ಚ್ಯೊ ಮ್ಹಳ್ಳೆಂ ಸವಾಲ್ ರೀಟಾಚ್ಯಾ ಮತಿಂತ್ ಧೊಸ್ತಾಲೆಂ. ರೀಟಾ ಸಯ್ತ್ ಎಕ್ಲೆಂಚ್ ಚೆಡುಂ, ಬೊಂಬೊಯ್ಚಾ ಮಿಲ್ಲಾಂತ್ ಕಾಮ್ ಕರ್ನ್ ಆಸ್ಚೊ ರೀಟಾಚೊ ಆನ್ ರೀಟಾ ದೇಡ್ ವರ್ಸಾಂಚೆಂ ಭುರ್ಗೆಂ ಆಸ್ಚೆವೆಳಾರ್ ಆವ್ಘಡಾಂತ್ ಅಂತರ್ಲ್ಲೊ ದೆಕುನ್ ತ್ಯಾ ಮಿಲ್ಲಾನ್ ದಿಲ್ಲೊ ಥೊಡೊ ಪೊಯ್ಸೊ ಬೆಂಕಾಂತ್ ದವ್ರುನ್ ಗಾಂವಾಂತ್ ಮಾಧು ಶೆಟ್ಟಿಚ್ಯಾ ಗೆಣಿಚ್ಯಾ ಅರ್ಧ್ಯಾ ಎಕ್ರ್ಯಾ ಜಾಗ್ಯಾರ್ ಕಾಂಯ್ ಇಲ್ಲಿ ಕೃಷಿ/ರಾಂದ್ವಯ್ ಲಾವ್ನ್, ಲ್ಹಾನ್ ಎಕಾ ಕುಡಾಚೆಂ ಘರ್ ಕರ್ನ್ ದೀಸ್ ಕಾಡ್ನ್ ಆಸ್ಚ್ಯಾ ರೀಟಾ ಆನಿ ತಿಚ್ಯಾ ಆವಯ್ಕ್ ಬೊಂಬೊಯ್ಚಾ ಮಾಮಾಚೊಚ್ ಆಧಾರ್.
ರೀಟಾ ಶಿಕ್ಪಾಂತ್ ಚುರುಕ್ ಆನಿ ಬುಧ್ವಂತ್, ಇಗರ್ಜೆಚ್ಯಾ ಮಿಸಾಕ್ ವೆತಾಲೆಂ. ರಜೆರ್ ಆಯಿಲ್ಲೊ ಮಾಮ್ ಸಯ್ತ್ ರೀಟಾಕ್ ಮಿಸಾಕ್ ಆಪವ್ನ್ ವ್ಹರ್ತಾಲೊ ತರ್ಯೀ ರೀಟಾಕ್ ಕಿತೆಂಗೀ ಅಪ್ಲ್ಯಾ ಮಾಮಾಚೆರ್ ಎಕಾ ರಿತಿಚೆಂ ಅಸವ್ಕಸಾಯೆಚೆಂ ಭಗಾಪ್. ಜಾಂವ್ಕ್ ಮಾಮ್ ಮೊಗಾಳ್, ಕೆದಿಂಚ್ ರೀಟಾಚೆರ್ ದಡ್ಯೊ ಘಾಲುನ್ ವಾ ಜ್ಯೋರ್ ಕರುನ್ ಉಲಂವ್ಕ್ ನಾ. ಜಾಯ್ ಜಾಲ್ಲೆಂ ಘೆವ್ನ್ ದಿತಾಲೊ; ಜಶೆಂ ಐಸ್ಕೆಂಡಿ, ಕೂಲ್ ಡ್ರಿಂಕ್ಸ್, ಚೊಕ್ಲೆಟಾಂ. ಫಿಲ್ಮಾಕ್ ಆಪವ್ನ್ ವ್ಹರ್ತಾಲೊ, ನವೆಂ ವಸ್ತುರ್ ಘೆವ್ನ್ ದಿತಾಲೊ, ಬೂಕ್, ಪೆನ್ನಾಂ ಘೆವ್ನ್ ದಿತಾಲೊ ತರ್ಯೀ ಅಪ್ಣಾಕ್ ಬೊಂಬೊಯ್ಚೊ ಮಾಮ್ ಕಿತ್ಯಾಕ್ ಖಾಯ್ಸ್ ಜಾಯ್ನಾ ಮ್ಹಳ್ಳೆಂ ತಾಕಾ ಸಮ್ಜನಾತ್ಲ್ಲೆಂ.
ರೀಟಾ ಸಕಾಳಿಂಚೊ ಉಟಾಉಟಿಂ ಮೆಟ್ರೊ ಧರುನ್ ಕಾಮಾಚ್ಯಾ ವಾಟೆರ್ ಆಸ್ಲೆಂ.
ಮಾಂಯ್ಗಾಂವಾಕ್ ವಚಾನಾಸ್ತಾನಾ ಕಾಂಯ್ ಸತ್ರಾ ವರ್ಸಾಂ ಉತ್ರಲ್ಲಿಂ. ಸತ್ರಾ ವರ್ಸಾಧಿಂ ಆವಯ್ಚ್ಯಾ ಮೊರ್ನಾಕ್ ಗೆಲ್ಲೆಂ ರೀಟಾ, ತ್ಯೇ ಉಪ್ರಾಂತ್ ಗೆಲ್ಲೆಂ ನಾ. ಮೊರ್ನಾಕ್ ಗೆಲ್ಲೆವೆಳಾರ್ ಪಯ್ಶಿಲೆ ಮೌಶೆನ್ ರೀಟಾಚೊ ಫೋನ್ ನಂಬರ್ ಘೆತ್ಲ್ಲೊ ಆನಿ ತವಳ್ತವಳ್ ಅಪ್ಲ್ಯಾ ಭುರ್ಗ್ಯಾಂಕ್ ಶಿಕ್ಪಾಕ್ ಪೊಯ್ಶೆ ಧಾಡುಂಕ್ ಫೋನ್ ಕರ್ತಾಲಿ ಆನಿ ರೀಟಾ ಸಯ್ತ್ ತಾಂಕಾಂ ಪೊಯ್ಶೆ ಧಾಡ್ತಾಲೆಂ ತರ್ಯೀ ಸಂಬಂಧ್ ಮ್ಹಣುನ್ ರೀಟಾಕ್ ಕೊಣ್ಯೀ ನಾತ್ಲ್ಲಿಂ. ಫಕತ್ ಅಪ್ಲಿ ಆಸ್ಪತ್ರ್, ಘರ್ ಆನಿ ಹೆಂ ಮೆಟ್ರೊ ಸೊಡ್ಲ್ಯಾರ್ ರೀಟಾ ಖಂಯ್ಚರ್ಯೀ ವಚಾನಾತ್ಲೆಂ. ಮಿಸಾಕ್ ವೆಚೆಂಯ್ ಭೋವ್ ಅಪ್ರೂಪ್ ಜಾಲ್ಲೆಂ ದೆಕುನ್ ಟಿವಿ ಆನಿ ಖಬ್ರೊ ತೆಂ ವಾಚ್ತಾಲೆಂ.
ನಾಕಾ ನಾಕಾ ಮ್ಹಳ್ಯಾರೀ ತಾಚ್ಯಾ ಮತಿಂತ್ ಬೊಂಬೊಯ್ಚ್ಯಾ ಮಾಮಾಚಿಂಚ್ ಚಿಂತ್ನಾಂ ಮತಿಂತ್ ಯೆತಾಲಿಂ. ತೊ ಕಸೊ ಮೆಲೊ? ತಾಚೆಂ ಮೋರ್ನ್ ಕರುಂಕ್ ಕೊಣ್ ಆಸಾ? ಆತಾಂ ಕಿತೆಂ ಜಾತೆಲೆಂ? ಎಕೆಚ್ಚ್ ಸವಾಲ್ ರೀಟಾಚ್ಯಾ ಮತಿಕ್ ಧೊಸ್ತಾಲೆಂ.
’ಮಾಧು ಶೆಟ್ಟಿ ನಶಿಬ್ವಂತ್, ತಾಕಾ ದೊಗಿ ಬಾಯ್ಲೊ, ಪುಣ್ ಅಪ್ಣಾಚೆಂ ನಶೀಬ್ ಖೊಟೆಂ’ ಏಕ್ ದೋನ್ ಪಾವ್ಟಿಂ ಮಾಮ್ ರಜೆರ್ ಆಯಿಲ್ಲೆವೆಳಾರ್ ಸಾಂಗ್ತಾಲೊ. ಪುಣ್ ರೀಟಾಚ್ಯಾ ನೆಣ್ತ್ಯಾ ಮತಿಕ್ ಕಿತೆಂಚ್ ಸಮ್ಜಾನಾತ್ಲ್ಲೆಂ. ಆವಯ್ನ್ ರೀಟಾಕ್ ಸಮ್ಜಾಯಿಲ್ಲೆಂ; "ಅಳೆ ಪುತಾ, ಬೊಂಟಾಂಚಿಂ ಥೊಡಿಂ ಬಾಯ್ಲಾಂ, ಅಪ್ಲ್ಯಾಚ್ ಲ್ಹಾನ್ ಭಾವಾಕ್ ಅಪ್ಲ್ಯಾ ಧುವೆಕ್ ದೀವ್ನ್ ಕಾಜಾರ್ ಕರಯ್ತಾತ್"
ರೀಟಾಕ್ ಕಾಜಾರ್ ಮ್ಹಳ್ಳೆಂ ಆಯ್ಕುನ್ ಲಜ್ ದಿಸ್ತಾಲಿ.
ದೀಸ್ ಗೆಲ್ಲೆಪರಿಂಚ್ ಬೊಂಬೊಯ್ಚೊ ಮಾಮ್ ದೆದೆಸ್ಪ್ರೊರ್ ಜಾಲ್ಲೊ ದಿಸ್ತಾಲೊ. ಎಕಾ ಕುಡಾಚ್ಯಾ ಘರಾಂತ್ ಎಕಾ ಕುಶಿನ್ ಘಾಲ್ಲ್ಯಾ ಮಾಂದ್ರೆಂತ್ ರೀಟಾ ಆನಿ ತಿಚಿ ಆವಯ್ ನಿದ್ತಾಲಿಂ ತರ್ ಅನ್ಯೇಕಾ ಕೊನ್ಶಾಂತ್ ಮಾಂದ್ರೆರ್ ಬೊಂಬೊಯ್ಚೊ ಮಾಮ್ ನಿದ್ತಾಲೊ. ತಾಕಾ ನೀದ್ ಲಾಗ್ಲಿ ಮ್ಹಳ್ಳೆಂ ತಾಣೆಂ ಘೊರೆಂವ್ಕ್ ಸುರು ಕರ್ತಾನಾಂಚ್ ಕಳ್ತಾಲೆಂ. ಪುಣ್ ಪಾಟ್ಲೆ ಥೊಡೆ ದೀಸ್ ಥಾವ್ನ್ ತಾಣೆಂ ಘೊರೆಂವ್ಚೊ ಆವಾಜ್ ಆಯ್ಕನಾತ್ಲೊ.
ಏಕ್ ಪಾವ್ಟಿಂ ತುಕಾ ಹಾಂವ್ ಸೈಕಲ್ ಸೊಡುಂಕ್ ಶಿಕಯ್ತಾಂ ಮ್ಹಣುನ್ ಏಕ್ ಭಾಡ್ಯಾಚೆಂ ಸೈಕಲ್ ಘೆವ್ನ್ ಆಯಿಲ್ಲ್ಯಾ ಮಾಮಾನ್ ಸೈಕಲ್ ಸೊಡುಂಕ್ ಶಿಕ್ಲ್ಯಾರ್ ಅಪುಣ್ ಏಕ್ ನೊವೆಂ ಸೈಕಲ್ ಘೆವ್ನ್ ದಿತಾಂ ಮ್ಹಳ್ಳೆಂ ಆಯ್ಕುನ್ ರಿಟಾಚ್ಯಾ ಹುಮೆದಿಕ್ ಪಾಕಾಂ ಲಾಗ್ಲ್ಲಿಂ. ಅಶೆಂ ಸೈಕಲ್ ಸೊಡುಂಕ್ ಶಿಕಂವ್ಕ್ ಗೆಲ್ಲ್ಯಾ ಮಾಮಾನ್ ರಿಟಾಕ್ ಅಪ್ಲ್ಯಾ ಬಾವ್ಳ್ಯಾಂನಿ ಆರಾವ್ನ್ ಧರ್ನ್ ಸೈಕಲ್ ಶಿಕಯ್ತಾನಾ ರಿಟಾಕ್ ಸೈಕಲ್ ಶಿಕ್ಚಾಂತ್ ಭಿಲ್ಕುಲ್ ಧ್ಯಾನ್ ಗೆಲ್ಲೆಂಚ್ ನಾ.
ಥೊಡೆ ದಿಸಾಂನಿ ಮಾಮಾನ್ ರೀಟಾಕ್ ಫಿಲ್ಮಾಕ್ ಆಪವ್ನ್ ವ್ಹರ್ತಾಂ ಮ್ಹಣ್ತಾನಾ, ರೀಟಾ ಅಪ್ಣಾಕ್ ಫಿಲ್ಮಾಕ್ ವಚುಂಕ್ ನಾಕಾ ಮ್ಹಳ್ಳೆಂ ಮಾತ್ರ್. ರೀಟಾಚ್ಯಾ ಆವಯ್ನ್ ರೀಟಾಚ್ಯಾ ಕಾನ್ಸುಲಾಚೆರ್ ದೋನ್ ಥಾಪ್ಡಾಂ ಘಾಲುನ್ ಸಾಂಗ್ಲೆಂ; ’ತುಜೊ ಮಾಮ್ಗೊ ತೊ, ತುಕಾ ಖಾಂವ್ಚೊನಾ, ವ್ಹಚ್’
ಆನಿ ರೀಟಾ ಉಪಾಯ್ ನಾಸ್ತಾನಾ ಮಾಮಾಸವೆಂ ಫಿಲ್ಮಾಕ್ ಗೆಲ್ಲೆಂ. ತ್ಯೇ ದಿಸಾ ಥಾವ್ನ್ ರಿಟಾಕ್ ಅಪ್ಲ್ಯಾ ಆವಯ್ಚೆರ್ ಆನಿ ಮಾಮಾಚೆರ್ ಮೋನ್ ಮೊಡ್ಲ್ಲೆಂ.
ಥೊಡೆ ದಿಸಾ ಉಪ್ರಾಂತ್ ಮಾಮ್ ಬೊಂಬೊಯ್ ಪಾಟಿಂ ಗೆಲ್ಲೊ ಆನಿ ರೀಟಾನ್ ಅಪ್ಲ್ಯಾ ಆವಯ್ಲಾಗಿಂ ಸಾಂಗುಂಕ್ ಧರ್ಲೆಂ; "ಮ್ಹಾಕಾ ಮಾಮ್ ಕಿತ್ಯಾಕ್ಗಿ ಖಾಯ್ಸ್ ಜಾಯ್ನಾ ಮಾಂ, ತೊ ಮ್ಹಾಕಾ ಕಂಯ್ ಕಂಯ್ ಅಪಡ್ತಾ ಆನಿ ಕೀಸ್ ದಿತಾ... ಮಾಧು ಶೆಟ್ಟಿ ಅಪ್ಲ್ಯಾ ಭಾಚಿಯಾಂಕ್ ತಶೆಂ ಕರ್ತಾ, ಅಶೆಂ ಕರ್ತಾ ಮ್ಹಣ್ತಾ ಮಾಂ, ಮ್ಹಾಕಾ ಸಮ್ಜನಾ.."
ಪುಣ್ ರಿಟಾಚ್ಯಾ ಆವಯ್ನ್ ಕಿತೆಂಚ್ ಪ್ರತಿರೋಧ್ ಧಾಖಯಿಲ್ಲೊ ನಾ. "ತುಕಾ ಲಾಗ್ಲಾಂ ಪಿಶೆಂ, ನಾಕಾ ಜಾಲ್ಲೆಂ ಚಿಂತುನ್ ಭೆಶ್ಟೆಂಚ್ ತುಜಿ ತಕ್ಲಿ ಪಾಡ್ ಕರ್ತಾಯ್, ತಾಣೆಂ ಕೀಸ್ ದಿಲ್ಯಾರ್ ಕಿತೆಂ ಜಾಲೆಂ, ತೊ ತುಜೊ ಮಾಮ್ ನೆ?"
ಪುಣ್ ರೀಟಾಚ್ಯಾ ನೆಣ್ತುಲ್ಯಾ ಮತಿಕ್ ಕಿತೆಂಚ್ ಸಮ್ಜನಾತ್ಲ್ಲೆಂ, ಖಂಯ್ಗೀ, ಕಿತೆಂಗೀ ಸಾರ್ಕೆಂ ಜಾಯ್ನಾ ಮ್ಹಳ್ಳೆಂ ಚಿಂತಪ್ ತಾಚ್ಯಾ ಮತಿಂತ್ ಉದೆವ್ನ್ ಯೆತಾಲೆಂ.
ಅಶಿಂಚ್ ವರ್ಸಾಂ ಪಾಶಾರ್ ಜಾಲ್ಲೆಪರಿಂ ರೀಟಾಚಿ ಧಾವಿ ಕ್ಲಾಸ್ ಜಾವ್ನ್ ನರ್ಸಿಂಗ್ ಶಿಕುಂಕ್ ಗೆಲೆಂ. ಆನಾಚ್ಯಾ ಕಂಪೆನಿಥಾವ್ನ್ ಮೆಳ್ಲ್ಲೊ ಇಲ್ಲೊ ಪೊಯ್ಸೊ ಬೆಂಕಾಂತ್ ಆಸ್ಲೊ, ತೊ ಚೆಡ್ವಾಚ್ಯಾ ಶಿಕ್ಪಾಕ್ ಆಸುಂದಿ ಮ್ಹಣುನ್ ರಿಟಾಚಿ ಆವಯ್ ಥಂಯ್ ಹಾಂಗಾ ಕಾಮ್ ಕರುನ್ ದೀಸ್ ಕಾಡ್ತಾಲಿ. ಅಶೆಂ ಥೊಡೆಚ್ ವರ್ಸಾಂನಿ ನರ್ಸಿಂಗ್ ಜಾವ್ನ್ ಕಾಮ್ ಸೊಧುನ್ ಆಸ್ಚೆವೆಳಾರ್ ಮಾಮಾನ್ ಬೊಂಬೊಯ್ ವ್ಹರುನ್ ಕಾಮಾಕ್ ಲಾಗಂವ್ಚಿ ಇಚ್ಚಾ ವೆಕ್ತ್ ಕೆಲಿ ಮಾತ್ರ್ ನ್ಹಯ್, ರೀಟಾಕ್ ಆಪವ್ನ್ ವರುಂಕ್ ಗಾಂವಾಕ್ ಆಯಿಲ್ಲೊ. ರೀಟಾಲಾಗಿಂ ಸಯ್ತ್ ದುಸ್ರಿ ವಾಟ್ ನಾಸ್ತಾನಾ ಅಪ್ಲ್ಯಾ ಮಾಮಾಸವೆಂ ಬಸ್ಸಾರ್ ಬೊಂಬೊಯ್ ಗೆಲ್ಲೆಂ.
ಸಕಾಳಿಂಚೊ ವೇಳ್ ಜಾಲ್ಲ್ಯಾನ್ ಮೆಟ್ರೊಚೆರ್ ಗಡ್ದಿ ನಾತ್ಲ್ಲಿ. ರೀಟಾ ತೆಂಪಾಧ್ಲಿಂ ಚಿಂತ್ನಾಂ ಘೆವ್ನ್ ಆಸ್ಪತ್ರೆಕ್ ರಿಗೊನ್ ಕಾಮ್ ಕರ್ತಾಸ್ತಾನಾ ಸಯ್ತ್ ರೀಟಾಚಿ ಮತ್ ಬೊಂಬೊಯ್ಚ್ಯಾ ಮಾಮಾವಿಶಿಂಚ್ ಚಿಂತಾಲಿ. ಅಪ್ಣಾನ್ ತಾಚ್ಯಾ ಮೊರ್ನಾಕ್ ವೆಚೆಂ? ಖಂಯ್ ಮ್ಹಣ್ ವೆಚೆಂ? ಕಿತ್ಯಾಕ್ ಮ್ಹಣ್ ವ್ಹೆಚೆಂ?
ರೀಟಾಚ್ಯಾ ಮತಿಂತ್ ಹಳ್ತಾಚೆಂ ವಾದಾಳ್ಚ್ ಉಟ್ಲ್ಲೆಂ.
ಆಸ್ಪತ್ರೆಂತ್ ಸಯ್ತ್ ವೆವೆಗ್ಳ್ಯಾ ಜಾತಿ-ಕಾತಿಚ್ಯಾ ಪಿಡೆಸ್ತಾಂಕ್ ಮೆಳುನ್ ತಾಂಚ್ಯೊ ಎಕೇಕ್ ಕಾಣ್ಯೊ ಆಯ್ಕುನ್ ಸವಯ್ ಜಾಲ್ಲ್ಯಾ ರೀಟಾಕ್ ಆತಾಂ ಮಾಮಾಚ್ಯಾ ಮೊರ್ನಾಕ್ ಲಾಗುನ್ ಗಾಂವಾಕ್ ವೆಚೆಂ ಕಸಲೆಂಚ್ ಚಿಂತಾಪ್ ನಾತ್ಲ್ಲೆಂ. ಅವ್ಚಿತ್ ಮ್ಹಳ್ಳೆಪರಿಂ ತ್ಯೇ ದಿಸಾ ಏಕ್ ಲ್ಹಾನ್ ಭುರ್ಗ್ಯಾಕ್ ಎಮರ್ಜೆನ್ಸಿ ವಾರ್ಡಾಂತ್ ಭರ್ತಿ ಕೆಲ್ಲೊ ಆನಿ ರೀಟಾಕ್ ಸಯ್ತ್ ತ್ಯೇ ದಿಸಾ ಎಮರ್ಜೆನ್ಸಿ ವಾರ್ಡಾಂತ್ ಡ್ಯೂಟಿ ಆಸ್ಲಿ.
ಲ್ಹಾನ್ ಭುರ್ಗೆಂ, ಕಾಂಯ್ ಇಕ್ರಾ-ಭಾರಾ ವರ್ಸಾಚೆಂ ಭುರ್ಗೆಂ. ಮಾಸಿಕ್ ಸ್ರಾವಾಂತ್ ವಿಪ್ರೀತ್ ರಗತ್ ವ್ಹಾಳ್ಲ್ಲೆಂ ದೆಕುನ್ ತಿಕಾ ಭರ್ತಿ ಕೆಲಾ ಮ್ಹಣ್ ಕೊಣೆಂಗಿ ಸಾಂಗ್ಚೆಂ ಆಯ್ಕಲೆಂ. ಪುಣ್ ಉಪ್ರಾಂತ್ ಕಳೊನ್ ಆಯ್ಲೆಂ, ತಿಚ್ಯಾಚ್ ಎಕಾ ಸಯ್ರ್ಯಾನ್ ತಿಚೆರ್ ಭಲತ್ಕಾರ್ ಕೆಲಾ ಮ್ಹಣುನ್.
ರಿಟಾಚಿ ತಕ್ಲಿ ಪಿಸಾಂತುರ್ ಜಾಲಿ, ಚೆಡುಂ ಮತಿರ್ ನಾತ್ಲ್ಲೆಂ. ಒಪರೇಶನಾಚಿ ತಯಾರಾಯ್ ಕರುಂಕ್ ಆಸ್ಲಿ ದೆಕುನ್ ಹೆರ್ ನರ್ಸಾಂ ಸವೆಂ ರೀಟಾ ಸಯ್ತ್ ತಯಾರಾಯ್ ಕರುಂಕ್ ಲಾಗ್ಲೆಂ.
"ಸ್ವೀಡನ್ ತಸಲ್ಯಾ ಪ್ರಗತಿಶೀಲ್ ಶ್ಹೆರಾಂತ್ ಸಯ್ತ್ ಅಸಲಿಂ ಆಣ್ವಿಂ ಕಾಮಾಂ ಘಡ್ತಾತ್?" ರೀಟಾಸವೆಂ ಕಾಮ್ ಕರ್ನ್ ಆಸ್ಚೆಂ ಇಥಿಯೋಪಿಯಾಚೆ ನರ್ಸಾನ್ ಹಳೂ ತಾಳ್ಯಾಂತ್ ಪುಸ್ಪುಸ್ಚೆಂ ರೀಟಾನ್ ಆಯ್ಕಲೆಂ.
"ಖಂಯ್ಚೆಂಯ್ ಶ್ಹೆರ್ ಕೊಣಾಯ್ಚೆರ್ಯೀ ಭಲತ್ಕಾರ್ ಕರಿನಾ, ಪುಣ್ ತಿ ವಿಕೃತ್ ಮನೋಗತ್ ಕರ್ತಾ" ರೀಟಾನ್ ಜಾಪ್ ದಿಲ್ಲಿ.
"ಭಿರ್ಮತ್ ತ್ಯಾ ಭುರ್ಗ್ಯಾಚಿ, ಪುಣ್ ತಿಕಾ ರಾಕುಂಕ್ ತಿಚ್ಯಾ ಘರಾಂತ್ ದಾದ್ಲೊ ಕೊಣ್ಯೀ ನಾತ್ಲೊ?" ಪರತ್ ತಿಚೆಂ ಸವಾಲ್.
"ಘರ್ಚ್ಯಾ ದಾದ್ಲ್ಯಾನ್ಚ್ ಕೆಲ್ಯಾರ್ ಕೋಣ್ ಆಸ್ಚೊ ರಾಕ್ವಲಿ?" ರೀಟಾನ್ ಸಮ್ಜಾಂವ್ಚೆಂ ಪ್ರೇತನ್ ಕೆಲೆಂ.
ತಿತ್ಲ್ಯಾರ್ ಡಾಕ್ಟರ್ ಒಪರೇಶನ್ ಥಿಯೇಟರಾಕ್ ರಿಗ್ಲೊ.
ಒಪರೇಶನ್ ಜಾತಚ್ಚ್ ರೀಟಾ ಆನಿ ಹೆರ್ ನರ್ಸಾಂ ಚೆಡ್ವಾಚೆರ್ ನದರ್ ಖಂಚವ್ನ್ ಬಸ್ಲ್ಲಿಂ.
ಚೆಡ್ವಾಕ್ ಪಳೆಲ್ಲೆಪರಿಂಚ್ ರೀಟಾಚಿಂ ಚಿಂತ್ನಾಂ ಜಾಗಿಂ ಜಾತಾನಾ ಭಗ್ಣಾಂ ಸಯ್ತ್ ಉಚಾಂಬಳ್ ಜಾವ್ನ್ ಯೆತಾಲಿಂ. ಅಪ್ಣಕ್ ಕಾಮಾಕ್ ಲಾಗಯ್ತಾಂ ಮ್ಹಣುನ್ ಬೊಂಬೊಯ್ ಆಪವ್ನ್ ಹಾಡ್ಲ್ಲ್ಯಾ ಮಾಮಾನ್ ಅಪ್ಣಾಕ್ ತಾಚ್ಯಾ ಎಕಾ ಇಶ್ಟಾಗೆರ್ ಆಪವ್ನ್ ವೆಲ್ಲೆಂ, ಪಯ್ಣಾಚ್ಯಾ ಪುರಾಸಣೆಂತ್ ಆಯಿಲ್ಲ್ಯಾ ಮ್ಹಾಕಾ ಜೇಂವ್ಕ್ ಜಾಂವ್ಕ್ ನಾಕಾಸ್ಲೆಂ ದೆಕುನ್ ಪಿಯೆಂವ್ಕ್ ದಿಲ್ಲೆಂ ಕಿತೆಂ ಮ್ಹಳ್ಳೆಂ ರೀಟಾ ಭಿಲ್ಕುಲ್ ನ್ಹೆಣಾಸ್ಲೆಂ. ಫಕತ್ ದುಸ್ರೆ ದಿಸಾ ಉಟ್ತಾನಾ ಮಾತ್ರ್ ಕಠೀಣ್ ಆಂಗ್ ದೂಕ್ ಆಸ್ಚೆಂ ರೀಟಾನ್ ವಗೆಚ್ಚ್ ಸೊಸ್ಚೆಶಿವಾಯ್ ನಿರ್ವೋಗ್ ನಾತ್ಲೊ ದೆಕುನ್ ಆಜ್ ಪಾಸೊನ್ ರಿಟಾಕ್ ಸಗ್ಳೆ ದಾದ್ಲೆ ಅಪ್ಲ್ಯಾ ಬೊಂಬೊಯ್ಚ್ಯಾ ಮಾಮಾಪರಿಂಚ್ ದಿಸ್ತಾಲೆ ದೆಕುನ್ ಎಕ್ಸುರೆಂಚ್ ಉರ್ಲ್ಲೆಂ.
"ಕಿತ್ಲೆಂ ಮಾಸೂನ್ ಭುರ್ಗೆಂ, ಅಸಲ್ಯಾ ನೆಣ್ತ್ಯಾ ಭುರ್ಗ್ಯಾಚೆರ್ ಸಯ್ತ್ ಭಲತ್ಕಾರ್ ಕರುಂಕ್ ಖಂಚ್ಯಾ ದಾದ್ಲ್ಯಾಕ್ ಮನ್ ಆಯ್ಲೆಂಗಾಯ್?" ಇಥಿಯೋಪಿಯಾಚೆಂ ನರ್ಸ್ ಪರತ್ ಪುರ್ಪುರೊನ್ ಆಸ್ಲೆಂ.
