ಮಾಸ್ ಖಾವ್ನ್ ಆಯ್ಲ‌ಲ್ಯಾಂಚಿಂ,

ಮನಿಸ್ ಜಾವ್ನ್ ಜಿಯೆತೆಲ್ಯಾಂನಿ ಕಶೆಂ ಅಪ್ಲ್ಯಾ ಸ್ವಾರ್ಥಾಕ್ ಲಾಗುನ್ ಮನ್ಶಾಂ ಮಧೆಂ ವೊಂಯೊಂ/ದೊರೆ ಉಭೆ ಕೆಲ್ಯಾತ್‌ಗೀ, ತೆಚ್ಚ್‌ಪರಿಂ ಮನ್ಜಾತಿಂಕ್ ಸಯ್ತ್ ಆಪ್ಲ್ಯಾ ಸ್ವಾರ್ಥಾಕ್ ಗಳ್ಸುಂಕ್ ಧರ್ಲಾಂ. ವಿಗ್ಯಾನಾಂತ್ ಇತ್ಲಿ ಪ್ರಗತಿ ಜೊಡ್‌ಲ್ಲೊ ಆಯ್ಚೊ ಪೊಕೊಳ್ ಸಂಸಾರ್ ಇತ್ಲೊ ಹಿಪೊಕ್ರೆತ್ ಜಾಲಾಕೀ; ’ಕರ್ಮ್’ ಆನಿ ’ಧರ್ಮ್’ ಮಧ್ಲೆಂ ತಫಾವತ್ ಸಯ್ತ್ ಸಮ್ಜುಂಕ್ ಸಕಾನಾ ಜಾಲಾ. ’ಕರ್ಮ್’ ಆಸ್ಚೆಂ ಕರುಂಕ್, ಧರ್ಮ್ ಆಸ್ಚೊ ಪಾಳುಂಕ್. ಪುಣ್ ಆಯ್ಚ್ಯಾ ಕಾಳಾರ್ ಹೆರಾಂಕ್ ಧಾಖಂವ್ಚೆಂಚ್ ’ಧರ್ಮ್/ಭಕ್ತ್’ ಮ್ಹಳ್ಳೆಂ ಪಿಸಾಂಟ್ ಚಿಂತಾಪ್ ಚಿಂತ್ಚೆ ಭರುನ್ ವೊಮ್ತೊತೆಲ್ಯಾ ಸಮಾಜೆಂತ್ ದೇವ್ ಮ್ಹಳ್ಯಾರ್ ಕಿತೆಂ ಮ್ಹಣ್ ನೆಣಾಸ್ಚೆ ’ದೆವಾಚ್ಯಾ ನಾಂವಾರ್’ ಎಕಾಮೆಕಾಚಿಂ ಮಾಸಾಂ ಖಾಂವ್ಕ್ ಲಾಗ್ಚೆಂ ಪಳೆತಾನಾ, ಮೊನಿ ಜಾನ್ವಾರ್ ಲೆಗೂನ್ ಹ್ಯಾ ದಲ್ಡಿರ್ ’ಮನ್ಶಾಕುಳಾಚೆರ್’ ಹಾಸುಂಕ್ ಲಾಗ್ಲ್ಯಾ.

ಭೋವ್ ಮಾರ್ಮಿಕ್ ಪುಣ್ ಸಕಾಳಿಕ್ ಚಿಂತಾಪ್ ಘೆವ್ನ್ ಆಯ್ಲಾ ಗುರ್‌ಪುರ್‌ಚೊ ತರ್ನೊ ಕವಿ ಜೈಸನ್ ಜೆ. ಸಿಕ್ವೇರಾ. ಹಿ ಫಕತ್ತ್ ಎಕ್ ಕವಿತಾ ಮಾತ್ ನ್ಹಯ್, ದೀಶ್ಟ್ ಆಸ್ಚ್ಯಾಂಕ್ ಧಾಖಯಿಲ್ಲೊ ಏಕ್ ಆರ್ಸೊ. ಪುಣ್ ಕುರ್ಡ್ಯಾ ದೊಳ್ಯಾಂಚೆರ್ ಪಟ್ಟಿ ಭಾಂದುನ್, ಹಾತಿಂ ತೊಣ್ಕೆ/ದಾಂಡೆ ಘೆವ್ನ್ ಮೆಳ್‌ಲ್ಲ್ಯಾಂಚೊ ಭೊಂಗೊಸ್ತೊಳ್ ಕರ್ತೆಲ್ಯಾಂಕ್, ಆನಿ ಅಶೆಂ ಕರವ್ನ್ ಪಯ್ಸ್ ರಾವುನ್ ತಮಾಸೊ ಪಳೆವ್ನ್, ಸಿಸ್ರಿಂ ದುಃಖಾಂ ಗಳಯ್ತೆಲ್ಯಾಂಕ್ ಹೆಂ ಕಾಂಯ್ ಪಡುನ್ ಗೆಲ್ಲೆಂ ನಾ ತೆಂ ಮಾತ್ರ್ ಖಂಡಿತ್.

ಮಾಸ್ ಖಾವ್ನ್ ಆಯ್ಲ‌ಲ್ಯಾಂಚಿಂ,

ಮಾಸಾಂ ಖಾಂವ್ಕ್ ಆಯ್ಲ‌ಲ್ಯಾಂನಿ ಹಾಡಾಂ ಮೊಡ್ಲಿಂ

ಆಮಿ ಪ‌ಯ್ಸ್ ರಾವುನ್ ಪ‌ಳಂವ್ಚಿಂ ಗಾಯ್ರಾಂ

ಪೆಂಕ್ಡಾ ಸ‌ಕ‌ಯ್ಲ್ಯಾ ಕುಡ್ಕ್ಯಾ ಮಾ‌ಸಾಕ್

ಸುಣಿಂ ರಾಸ್ ಪ‌ಡ್ಲಿಂ

ಕ‌ಸಾಯ್ಗಾರಾಚಿಂ ಭುರ್ಗಿಂ ಉಪಾಶಿಂ ರ‌ಡ್ಲಿಂ

ಆಮಿ ಪ‌ಯ್ಸ್ ರಾವುನ್ ಪ‌ಳಂವ್ಚಿಂ ಗಾಯ್ರಾಂ

ಥಂಯ್ ವಾಸ್ರಾಚಿ ಗೊಮ್ಟಿ‍ ಕಾಪ್ಲಿ

ಹಾಂಗಾ ಪಾಳ್ಣ್ಯಾಂತ್ಲಿಂ ಬಾಳಾಂ ಚಾಟ್ಟ್ಯಾರ್ ಚ‌ಡ್ಲಿಂ

ಆಮಿ ಪ‌ಯ್ಸ್ ರಾವುನ್ ಪ‌ಳಂವ್ಚಿಂ ಗಾಯ್ರಾಂ

ಆಮ್ಕಾಂ ದೇವ್ ಕೆಲೆಂ

ಆನಿ 'ಬೀಫ್' ನಾ. ತುಮಿ 'ಸೇಫ್' ಮ್ಹ‌ಳೆಂ

ಕೆದಾಂತ್ ಆತಾಂ ಶೆಣಾ ಉದಾಕ್ ಭ‌ರ್ಸುನ್ ಬುಡ್ಲಿಂ

ಆಮಿ ಪ‌ಯ್ಸ್ ರಾವುನ್ ಪ‌ಳಂವ್ಚಿಂ ಗಾಯ್ರಾಂ,

ಶಿಮ್ಟಿ ಉಕೊಲ್ನ್ ಮುತ್ಲ್ಯಾಂವ್.

- ಜೈಸನ್ ಜೆ. ಸಿಕ್ವೇರಾ [ಜುಲಾಯ್, 2017]