ಇತಿಹಾಸ್ಯ್ [ಜೈಸನ್ ಜೆ. ಸಿಕ್ವೇರಾ]

ಸಾಮಾಚಿಕ್ ವಿಡಂಬನಾಂ ಹ್ಯಾ ಕವಿತೆಂತ್ ಉಟೊನ್ ಉಟೊನ್ ದಿಸತಾತ್; ಹರೇಕ್ ಶೆತಾಂನಿ ಅಶೆಂ ಭಗತಾ, ಮನೀಸ್ ಎಕಾಮೆಕಾಚೆರ್ ಆರಸೊ ಧರತಾ. ಪುಣ್ ದೊಳೆ ಅಸುನ್ ದೀಶ್ಟ್ ನಾತಲ್ಲೆ, ಕಾನ್ ಆಸುನ್ ಆಯ್ಕುಂಚೆಂ ತ್ರಾಣ್ ನಾತಲ್ಲೆ ತಕಲಿ ಆಸುನ್ ತಕಲೆಭಿತರ್ ಶೆಣ್ ಭರಲ್ಲ್ಯಾಂಕ್ ಕಿತೆಂ ಕಳಿತ್. ರುಪಾನ್ ಮನೀಸ್ ಜಾವನ್ ಜಲಮಲ್ಯಾರೀ ಗಾಡವಾ ಖಾಸ್ತಾಚಿ ಜೀಣ್ ಜಿಯೆವನ್ ಸವಯ್ ಜಾಲ್ಲ್ಯಾಂಕ್ ಹೆ ವಿಚಾರ್ ಕಂಯ್ ನಾಟವತೆಲೆ?

ಜೈಸನ್ ಸಿಕ್ವೇರಾ ತರ್ನೊ ಕವಿ ಪುಣ್ ಶಿಕ್ಪಿ ವರ್ಗಾಚೊ, ಎಕಾಮೆಕಾ ಮಾನ್-ಮರಯಾದ್ ದೀಂವಕ್ ಜಾಣಾಸ್ಚೊ ತಶೆಂಚ್ ಪ್ರಭುದ್ದ್ ಚಿಂತಪಾಚೊ ಮ್ಹಣುನ್ ಹಾಚಿಂ ಎಕೇಕ್ ಬರಪಾಂ ಗೊವಾಯ್ ದಿತಾತ್. ಅಪುಣ್ ಜಾಣಟೊ ಮ್ಹಣುನ್ ಹಾಣೆಂ ತರಯೀ ಕೆದಿಂಚ್ ದಾಂಗ್ರೊ ಮಾರಲ್ಲೊ ಹಾಂವೆಂ ಪಳೆಂವಕ್ ನಾ ವಾ ಆಯಕುಂಕ್ ನಾ ಪುಣ್ ಹಾಚಿ ಜಾಣಟಿಕಾಯ್ ಹಾಚ್ಯಾ ಬರಪಾಂನಿ ನಿಶೆತಾ ಆನಿ ಹಾಚ್ಯಾ ಕವಿತೆಂನಿ ದಿಸತಾ. ಕಾಜುಲ್ಯಾ ವಗರಾಚೆ ಚಿಂತಪಾಚಿ ಹಿ ಕವಿತಾ ನ್ಹಯ್; ಥೊಡೆಚ್ ಉತರಾಂನಿ ಹರೇಕ್ ಶೆತಾಂತ್ ಆರಸೊ ಧರಚಿ ಕಾಣಿ ಘೆವನ್ ಆಯಲಾ ಆನಿ ಹಿ ಕವಿತೆಕ್ ಆರಾವ್ನ್ ಧರಚೆಂ ಕಾಮ್ ತುಜೆರ್ ಸೊಡತಾಂ.

[ಕವಿತಾ] ಇತಿಹಾಸ್ಯ್ [ಜೈಸನ್ ಜೆ. ಸಿಕ್ವೇರಾ]

ಇತಿಹಾಸ್ಯ್

ಕಾಂಟ್ ಕಾಂಟ್ ಕ‌ಸ್ತಾಳ್

ಭೆಜ್ಯಾಂನಿ ಭ‌ರಾ

ಉರ್‌ಲ್ಲೆಂ ಸ‌ಕ್ಕ‌ಡ್ ಉರೊವ್ನ್

ರಾಜಾಂವ್ ಮಾತ್ರ್ ಚೊರಾ

ಭುಕೆಲ್ಲ್ಯಾಚಿ ಭುಕ್ ಥಾಂಬೊಂವ್ಕ್

ದೆವಾಳಾಕ್ ವ್ಹ‌ರಾ

ಪಿಡೇಸ್ತಾಚಿ ಪಿಡಾ ಗೂಣ್

ಪಿಟೊ ಪುಸ್‌ಲ್ಲ್ಯಾ ಫ‌ರಾ

ಉತ್ರಾಂನಿ ಆಯ್ಕಾನಾಂತ್ ತ‌ರ್

ಗಳ್ಯಾರ್ ಕೊಯ್ತಿ ಧ‌ರಾ

ಆಮಿ ತೀನಾಂಚೆರ್ ಥಾಂಬ್ಲ್ಯಾಂವ್

ತುಮಿ ಹ‌ಜಾರ್ ಮಾರಾ

ಮ‌ನ್ಶಾಪ‌ಣಾನ್ ಕಿತೆಂಚ್ ನಾಕಾ

ಭ‌ಕ್ತಿಪ‌ಣಾನ್ ಕ‌ರಾ

ಜಿವಿತ್ ಕ‌ಶೆಂಯ್ ಚ‌ಲ್ತಾ ಪುಣ್

ಸ‌ರ್ಗಾ ಖಾತಿರ್‌ಚ್ ಮರಾ

ಖಟ್ಲ್ಯಾಚ್ಯಾ ಚ್ಯಾರ್ ಪೊಂತಾಂಕ್

ಚ್ಯಾರ್ ಬೊಡಾಂಯ್ ಜಮ್ಚಿಂನಾಂತ್

ಪುಂಜಾಯ್ಲ‌ಲ್ಯಾ ಪ‌ಯ್ಶ್ಯಾಂನಿ ಮಾತ್ರ್

ಭೊಜೊ ಗ‌ಡ್ದ್ ಕ‌ರಾ!

ಇತಿಹಾಸಾಚಿಂ ಪಾನಾಂ ಆಮಿ

ತುಮ್ಕಾಂಯ್ ಸಾಂಗ್ಚೆಂ ಇತ್ಲೆಂಚ್

ನವ್ಯಾನ್ ಬ‌ರೊಂವ್ಕ್ ವ‌ಚಾನಾಕಾತ್

ಹೆಂಚ್ copy-paste ಕ‌ರಾ.

- ಜೈಸನ್ ಜೆ. ಸಿಕ್ವೇರಾ  [ಎಪ್ರಿಲ್ 2018]

ಆಸ್ಲಿ ವ ನಕ್ಲಿ |आसली..