ಜಾಣ್ಟೆಂ ಮನ್ (- ವೈಷ್ಣವಿ ರಾಯ್ಕರ್)

[ಕವಿತಾ] ಜಾಣ್ಟೆಂ ಮನ್ (- ವೈಷ್ಣವಿ ರಾಯ್ಕರ್)

ಬಾಳ್ ಆಸ್ತಾನಾ ತೆಂಬೆಟ್ಯಾಂನಿ ಚಲುಂಕ್ ಧರ್ತಾನಾ ಬೊಟಾಂ ಧರುನ್ ಚಲುಂಕ್ ಶಿಕಯ್ತಾನಾ ಎಕಾ ಆವಯ್ಚಿಂ ಸ್ವಪಣಾಂ ಫಕತ್ ಇತ್ಲಿಂಚ್ ಆಸ್ತಾತ್; ಕಾಂಯ್ ಮ್ಹಜೆಂ ಬಾಳ್ ಮ್ಹಜ್ಯಾ ಕುಡಿಕ್ ಪ್ರಾಯ್ ಜಾವ್ನ್ ಅಸ್ಕತ್ ಜಾವ್ನ್ ಚಲುಂಕ್ ಜಾಯ್ನಾಸ್ತಾನಾ ಲಕ್ತಾನ ಆಧಾರ್ ದಿತಲೊ. ಆನಿ ಹಾಂಗಸರ್ ಅಸಲ್ಯಾ ಎಕಾ ಆವಯ್ಚೆಂ ರುದಾನ್ ಆಸಾ ಆನಿ ಆನಿ ತಿಚಿಂ ಸರ್ವ್ ಸ್ವಪಣಾಂ ಆತಾಂ ಯಾದಿಂತ್ ಫಿಛಾರ್ ಕೆಲ್ಲಿಂ ಹ್ಯಾ ಕವಿತೆಂತ್ ಆಸಾತ್.

[ಕವಿತಾ] ಜಾಣ್ಟೆಂ ಮನ್ (- ವೈಷ್ಣವಿ ರಾಯ್ಕರ್)

ಜಾಣ್ಟೆಂ ಮನ್

ಸುರ್ಕುತಿಲ್ಲ್ಯಾ ಕಾತೀಚೆರ್

ಲ್ಹವ್ಪೀಕ್ ಮಾಯೆಚೊ ಸ್ಪರ್ಶ್ ಜಾಯ್

ಥಕಿಲ್ಲ್ಯಾ ಮನಾಕ್

ಆಪುಲಕೆಚೆ ಶಬ್ದ್ ಜಾಯ್

ನಿಸ್ತೆಜ್ ದೊಳೆ ಮ್ಹಜೆ

ತುಜಿ ಮೊಗ್ ಆಂವ್ಡೆತಾ

ಭುರ್ಗ್ಯಾ ಮ್ಹಜ್ಯಾ

ಪಯ್ಶೆ ತುಜೆ ನಾಕಾ ಮ್ಹಾಕಾ

ಉತ್ರಾಂಚೊ ಆದಾರ್ ಜಾಯ್

ಕಾಳ್ಜಾಚ್ಯಾ ಎಕಾ ಕೊನ್ಶಾಕ್

ಇಲ್ಲೊಸೊ ಜಾಗೊ ಜಾಯ್

ವ್ಹಡ್ ತುಂ ಜಾಲೊ ಜರಿ

ಮ್ಹಜೆ ಖಾತೀರ್ ಸಾನಚ್ ತುಂ

ತುವೆಂ ಕೆಲ್ಲಿಂ ಕವ್ನಾಂ

ಮ್ಹಜ್ಯಾ ದೊಳ್ಯಾರ್ ನಿರ್ಶೆತಾತ್

ತುಜ್ಯಾ ಪೊವಾಚೊ ವಾಸ್

ನಾಕಾಂತ್ ಘುಮ್ತಾ

ನಿರಾಗಸ್ ರೂಪ್ ತುಜೆಂ

ಕೃಷ್ಣಾವರಿ ದಿಸ್ತಾಲೆಂ

ಮ್ಹೊಂವಾಳ್ ತುಜೊ ಹಾಂಸೊ

ಅಮೃತ್ ಕಸೊ ಒತ್ತಾಲೊ

ಯಾದಿ ತ್ಯೊ ಕಾಳ್ಜಾಂತ್ ಮ್ಹಜ್ಯಾ

ಕೊರಾಂತೂನ್ ದವ್ರತಾಂ

ಪೂತಾ ಮ್ಹಜ್ಯಾ,

ವಿಸ್ರುಂ ತುಂ ನಾಕಾ ಮ್ಹಾಕಾ

ಜಾಣ್ಟೆಂಪಣ್ ತುಕಾಯ್ ಆಸಾ.

- ವೈಷ್ಣವಿ ರಾಯ್ಕರ್. [ಮಾಯ್, 2020]