ಕವಿತಾकविताPoem

ಶೂನ್ಯ್ ಹಿಶೋಬ್ [ಡಾ|ಪೂರ್ಣಾನಂದ ಚಾರಿ]

’ಆಮಿ ಮಾತಿಯೆಚ್ಯಾ ಮುದ್ಯಾಕ್ ಮೊಡಕ್ಯಾಚೆಂ ರೂಪ್ ದಿತಾಂವ್, ಪುಣ್ ತ್ಯಾ ಮೊಡಕ್ಯಾಂತ್ ಕಿತೆಂಯ್ ದವರ್ನ್ ಘೆಂವ್ಚಿ ಶ್ಯಾಥಿ ದಿಂವ್ಚಿ ರಿತೆಪಣಾನ್’ - ನಾಮಣೆಚೊ ಚಾಯ್ನೀಸ್ ತತ್ವ್‌ಗಿನ್ಯಾನಿ ಲಾವೋ ತ್ಸೂಚೆಂ ಉತರ್ ಹೆಂ. ಉತರಾಂನಿ ಗಾಜ್ ಆಸಾ, ಆವಾಜ್ ಆಸಾ. ಉತರಾಂನಿ ಗೀತ್ ಘಡುಯೆತಾ, ಸಂಗೀತ್ ಘಡುಯೆತಾ. ಉತರಾಂನಿ ಕಾಳಜಾಂ ಮೊಡುಯೆತಾ, ಮೊಡ್ಲೆಲಿಂ ಕಾಳಜಾಂ ಜೊಡುಯೆತಾ. ಪುಣ್ ಉತರಾಚ್ಯಾಕೀ ಚಡಿತ್ ಭಳಾಧಿಕ್ ಜಾವನಾಸಾ ’ಮೌನ್’.

ಸಂಸಾರಿ ದೀಸ್ಪಡ್ತೆಂತ್ ಶೂನ್ಯಾಕ್ ಮೋಲ್ ನಾ. ಎಕಾ ಥಾವ್ನ್ ನೋವ್ ಮಾತ್ರ್ ಮೊಲಾಚೆಂ ಶಿವಾಯ್ ಶೂನ್ಯ್ ನ್ಹಯ್. ಪುಣ್ ಹ್ಯಾ ಶೂನ್ಯಾಚೆಂ ಮೋಲ್ ಸಮ್ಜಲ್ಲೆ ಮಾತ್ರ್ ಎಕಾ ಥಾವ್ನ್ ನೊವಾಂಕ್ ಹಜಾರ್, ಲಾಕ್, ಕೊರೊಡ್... ಕರುಂಕ್ ಸಕ್ತಾತ್. ಶೂನ್ಯಾಕ್ ಸೊಧುನ್ ಕಾಡ್‌ಲ್ಲೆಂ ಆಮ್ಚ್ಯಾ ದೇಶಾಚ್ಯಾ ’ಆರ್ಯಭಟಾನ್’, ದೆಕುನ್ ಆಜ್ ಪಾಸೊತ್ ಲೇಕ್‌ಶಾಸ್ತಿರಾಂತ್ ಭಾರತ್ ದೇಶಾಚಿ ದೇಣ್ಗಿ ಮಹತ್ವಾಚಿ.

ಪುಣ್ ಹಾಂಗಸರ್ ದಿಸ್ಚೆಂ ಶೂನ್ಯ್ ಮನ್ಶಾಪಣಾಚ್ಯಾ ವೆವೆಗಳ್ಯಾ ಭಗಣಾಂಕ್ ನಾಗಡೆಂ ಕರಚೆಂ. ಉಪಕಾರಾಂಕ್ ಮೆಳಚೆ ಶಿರಾಪ್, ವಿಶ್ವಾಸಾಕ್ ಮೆಳ್ಚೆ ಧಖೆ, ದೆಕುನ್ ದರಯೊಚ್ ವಾಂಝ್ ಜಾತಾನಾ ಕವಿಮನ್ ’ಶೂನ್ಯ್ ಹಿಸಬಾಚೆಂ ಕವನ್ ಕಿತ್ಯಾ ಗಾಂವ್?’ ಮ್ಹಣತಾ ಕವಿತೆಂನಿ ಜೆದ್ನಾಂ ಹೆಂ ಶೂನ್ಯ್ ಅಮೂರ್ತ್ ಇಮಾಜ್ ಜಾವ್ನ್ ಉಭಿ ಜಾತಾನಾ ಥಂಯ್ಚರ್ ಕಿತ್ಲೆಸ್ಯಾ ದಿಶೆಂನಿ ವಾಟೊ ದಿಸತಾತ್ ಮ್ಹಣಚ್ಯಾಕ್ ಕಾಂಯ್ ಹಿ ಕವಿತಾ ಅಪುರ್ಭಾಯೆಚಿ ಗವಾಯ್ ದೀತ್. ಡಾ|ಪೂರ್ಣಾನಂದ ಚ್ಯಾರಿ ಏಕ್ ಪ್ರಾಧ್ಯಾಪಕ್, ವಿಚಾರ್‌ವಂತ್, ಭೋವ್ ಸಾದೊ ಆನಿ ಮೊಗಾಳ್ ಕಲಾಕಾರ್. ತಾಚ್ಯಾ ಕಾಳಜಾಂತ್ ಜಿತ್ಲೊ ಮೋಗ್ ಆಸಾ, ತಾಚ್ಯಾ ತಾಳ್ಯಾಂತ್ ತಿತ್ಲಿಚ್ ಲಯ್ ಆಸಾ, ತಾಚ್ಯಾ ಕವಿತೆಂನಿ ಸಯ್ತ್ ಎಕಾ ಮಧುರ್ ಗಿತಾಚಿ ಸಾವಳಿ ಆಸ್ಚಿ ದಿಸ್ತಾ, ಪುಣ್ ಹ್ಯಾ ಕವಿತೆಚ್ಯಾ ಎಕೆಕಾ ವಳಿಂನಿ ಲಿಪೊನ್ ಆಸ್ಚ್ಯಾ ಇಮಾಜಿಂಕ್ ವಳ್ಕೊಂಚೆಪರಿಂಚ್ ಕವಿತೆಚಿ ಸಕತ್ ಮತಿಕ್ ಸುಸ್ತತಾ. ಹಿ ಕಾಂಯ್ ಏಕ್ ಪಾವಟಿಂ ವಾಸ್ಚಿ ಕವಿತಾ ನ್ಹಯ್, ದೆಕುನ್ ಹ್ಯಾ ಕವಿತೆಚೆ ಎಕೆಕ್ ವಿಶ್ವೆ ಮೆಜುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಶೂನ್ಯ್ ಹಿಶೋಬ್ [ಡಾ|ಪೂರ್ಣಾನಂದ ಚಾರಿ]

ಶೂನ್ಯ್ ಹಿಶೋಬ್

ರಿತ್ಯಾ ಕಳ್ಶಾಂಚೊ ಹಿಶೊಬ್ ಕಿತ್ಯಾ ಲಾಂವ್?

ಶೂನ್ಯ್ ಹಿಸ್ವಾಚೆಂ ಕವನ್ ಕಿತ್ಯಾ ಗಾಂವ್?

ಯತ್ನಾಚಿಂ ರತ್ನಾಂ ಕಾಡೂಂಕ್ ದರಯಾ ಘುಸಳ್ಳೆ

ವಿಶ್ವಾಸ್ ವೆರ್ ಘಾಲೂನ್ ಸಗ್ಳೆ ಫಾಸಾಳ್ಳೆಂ

ವಾಂಝ್ ದರ್ಯಾಕ್ ಕಾನ್ ಕಿತ್ಯಾ ಲಾಂವ್?

ಶೂನ್ಯ್ ಹಿಸ್ಬಾಚೆಂ ಕವನ್ ಕಿತ್ಯಾ ಗಾಂವ್?

ನವ್ಲಾಂಚೊ ದರಯಾ ಹುಪೂಂಕ್ ತಾರ್ ಮೆಳಯ್ಲಿ

ಧಕ್ಯಾವೆಲ್ಯಾ ಧಕ್ಯಾರ್ ಕೊಣಿ ಶಿಡಾಂ ಪಳಯ್ಲಿಂ

ಜೀರ್ಣ್ ಶಿಡಾಂಕ್ ಥಿಗ್ಳಾಂ ಕಿತ್ಯಾ ಲಾಂವ್?

ಶೂನ್ಯ್ ಹಿಸ್ಬಾಚೆಂ ಕವನ್ ಕಿತ್ಯಾ ಗಾಂವ್?