ಉತ್ರಾಂ [ಶರತ್‌ಚಂದ್ರ ಶೆಣಯ್]

ಮನ್ಶಾ, ಸಾಂಭಾಳ್ ತುಜಿಂ ಉತ್ರಾಂ, ಜಿಂ ಉತ್ರಾಂ ಎಕಾ ಮನ್ಶಾಚ್ಯಾ ಕಾಳ್ಜಾಂತ್ ರಾವ್ಳೆರಾಂ ಭಾಂದುಂಕ್ ಸಕ್ತಾತ್, ತಿಂಚ್ ಉತ್ರಾಂ ಎಕ್ಲ್ಯಾಚೆಂ ಸ್ವಪಾಣ್ ಪಿಡ್ಡ್ಯಾರ್ ಕರುಂಕ್‌ಯೀ ಸಕ್ತಾತ್. ನಾಮ್ಣೆಚೊ ಕಾದಂಬರಿಕಾರ್ ಎಟ್ಯೆಲಾಚ್ಯಾ ಕಾದಂಬರೆಂತ್ಲಿಂ ಉತ್ರಾಂ ಹಿಂ.

’ಎದ್ಯಾ ವ್ಹಡಾ ಹಸ್ತೆಕ್ ಸಲ್ವುಂಕ್ ಏಕ್ ಮೂಯ್ ಸಕ್ತಾ’, ಕವಿತೆಚಿಂ ದೋನ್ ಉತ್ರಾಂ ಕಾಂಯ್ ಕೊಣಾಕ್ ಆಡ್-ಉಭೆಂ ಚಿರುಂಕ್ ಸಕ್ತಾ ಮ್ಹಣ್ಚ್ಯಾಕ್ ಹ್ಯೊ ಲ್ಹಾ-ಲ್ಹಾನ್ ಕವಿತಾ ಗೊವಾಯ್ ದಿತಾತ್. ಉತ್ರಾಂ ನಿಜಾಯ್ಕೀ ಫಾತ್ರಾಚ್ಯಾಕೀ ಭಳಿಶ್ಟ್. ಎಕೆಕಾ ಕವಿತೆಂನಿ ಎಕೆಕ್ ಕಾಣಿ ಆಸಾ ತಶೆಂಚ್ ಜಾಯ್ತೆಂ ತಾತ್ವಿಕ್ ಚಿಂತಪ್ ಆಸಾ. ಕೊಚ್ಚಿಚೊ ನಾಮ್ಣೆಚೊ ಕವಿ ಬಾಬ್ ಶರತ್‌ಚಂದ್ರ ಶೆಣಯ್‌ಚಿ ಚಡ್ತಾವ್ ಕವಿತಾ ಗುಂಡಾಯೆಚ್ಯಾ ಚಿಂತ್ಪಾಚಿಂ, ಹಾಂಗಾಸರ್‌ಯೀ ಹಿಂ ಕವಿತಾ, ಕವಿತಾರಸಿಕಾಚಿಂ ಮನಾಂ ಉಲ್ಲಾಸಿತ್ ಕರ್ತಾತ್.

[ಕವಿತಾ] ಉತ್ರಾಂ [ಶರತ್‌ಚಂದ್ರ ಶೆಣಯ್]

ಉತ್ರಾಂ

ಉತ್ರಾಂ ಶೆವ್ಟೂನ್ ಮಾರತ್ಲ್ಯಾ,

ಉತ್ರಾಂಚೆಂ ಹೆಂ ಕಿತೆಂ ರೆ ಕೆಲಾಂ!

ಕಸ್ಲಿ ಗರಜ್ ತುಕಾ ಉತ್ರಾಂಚಿ?

ಗರಜ್ ತುಕಾ ಫಕತ್ ಫಾತ್ರಾಂಚಿ!

ಆಯ್ಚೊ ಮನೀಶ್

ಕೊಣ್ ಬರೊ, ಕೊಣ್ ಕೂಡೊ?

ಹೆಂ ಮಾಕಾ ವಿಚಾರೂಂನಾಕಾ.

ಕೊಣಾಚ್ಯಾನ್ ಮಾಕಾ ಫಾಯ್ದೊ?

ಕೆವ್ಲ್ ಇತ್ಲೆಂಚ್ ಹಾಂವ್ ಜಾಣಾ!

ಗರೊವ್ಪಿ

ಬರೊವ್ಪಿ ನ್ಹಯ್, ಗರೊವ್ಪಿ ತುಂ!

ಬಾರೀಕ್ ಎಕ್ ಉತರ್ ಉಡೊವ್ನ್

ಮೆಳತ್ ಎಕ್ ಕವಿತಾ ಮ್ಹಣೂನ್

ಅಶೀಚ್ ವಾಟ್ ಪಳೊವ್ಪಿ..

ರಗ್ತಾಚಿ ವಳಖ್

ರಗತ್ ಖರೆಂ ಕೊಣಾಚೆಂ ಆಸಾ ಆಮ್ಚ್ಯಾ ಶೀರಾಂನಿ?

ಮನಯ್ತ್ ಕಾಯ್ ಫಾಲ್ಯಾ ನರ್ಕಾಸುರಜಯಂತಿ!

ಸಪನ್

ಸಪನ್ ಆಶಿಲ್ಲೆಂ ಗೊಡ್ ಗೊಡ್

ಪೂಣ್ ಅದ್ರ್ಯಾನ್ ಜಾಗ್ ಆಯ್ಲಿ!

ಮ್ಹೂಣ್ ಕಿತೆಂ? ಪರ್ತೂನ್ ನಿದೆವಂಚೆಂ?

ನಾ ರೆ ನಾ! ಜೀವಿತ್ ಶೆಣೊವಂಚೊಂ ನಾ!

ಅಸ್ವಡಿಂ

ಶಿಷ್ಯಾಚಿ ತೊಖ್ಣಾಯ್ ಅಸ್ವಡಿಂ

ಗುರೂಚಿ ಟಿಕಾ ಅಸ್ವಡಿಂ

ಬಾಪಾಯ್ಲೊ ಮೊಗ್ ಅಸ್ವಡಿಂ

ಪುತಾಲೊ ರಾಗ್ ಅಸ್ವಡಿಂ..

ಜೀವಿತಾಚೆಂ ಪುಸ್ತಕ್

ಜೀವಿತಾಚ್ಯಾ ಪುಸ್ತಕಾಕ್ ಖಂಡ್ ಚಾರ್

ಚೊವೀಸ್ ಅಧ್ಯಾಯ್ ಆನಿ ಪಾನಾಂ ಸಾಬಾರ್

ಕಾಗ್ತಾಂ ಥೊಡಿಂ ಬುರ್ಶಿಂ ಕಾಳಿಂ

ಅಧ್ಯಾಯ್ ಥೊಡೆ ನಾಶಿಲ್ಲೆಚ್ ಬರೆ!

ತರೀಯ್ ಮಿತ್ರ್, ಇತ್ಲೆಂ ಹೆಂ ಆವ್ಡೀಚೆಂ ಕಿ

ಹೆಂಚ್ ಪುರೊ, ಹೆಂಚ್ ಜಾಯ್!

ರೇಲ್ವೆ‌ಸ್ಟೇಶನ್

ಗಾಡಿ ಲೆಟ್ ಮ್ಹಣೂನ್ ಆಮಿ

ಎಕಾಮೆಕಾಂಚಿ ವಳಖ್ ಘೆತ್ಲೆಲಿ

ಖಬರ್ ಸಾಂಗೂನ್ ವೆಳ್ ಗೆಲೊ

ಗಾಡಿ ಯೆತಾ ಮ್ಹಣೂನ್ ಆತಾಂ

ಖೊಶೀಚ್ ದಿಸ್ನಾ..

- ಶರತ್‌ಚಂದ್ರ ಶೆಣಯ್ [ಅಗೊಸ್ತ್ 2018]

ಶರತ್‌ಚಂದ್ರ ಶೆಣಯ್: ಎರ್ನಾಕುಳಮ್ ಕೇರಳಾಚೊ ನಾಮಣೆಚೊ ಕೊಂಕಣೀ ಕವಿ. ಸಾಹಿತ ಅಕಾಡೆಮಿ, ಟಿ.ಎಮ್.ಎ.ಪೈ ಬೂಕ್ ಪುರಸ್ಕಾರ್ ಅಸಲೆ ಪ್ರತಿಶ್ಟಿತ್ ಪುರಸ್ಕಾರ್ ಜಿಕಪಿ. ’ಇದಂ ನ ಮಮ್’ ಹಾಂಚೊ ಕವಿತಾಜಮೊ ಸವೆಂ ಸಭಾರ್ ಹೆರ್ ಬೂಕ್ ಸಯ್ತ್ ಸಂಪಾದನ್ ಕರುನ್ ಪರ್ಗಟ್ ಕೆಲ್ಯಾತ್.