ಸೆಜಾರಿ [ಹೆರೊಲ್ಪಿಯುಸ್]

[ಕವಿತಾ] ಸೆಜಾರಿ [ಹೆರೊಲ್ಪಿಯುಸ್]

ಭಾರತೀಯ್ ಕವಿತಾಶೆತಾಂತ್ ಕೊಂಕಣಿ ಕವಿತಾ ಎಕಾ ತೆಂಪಾಧಿಂ ಮಯ್ಲಾಂ ಪಯ್ಸ್ ಪಾಟಿಂ ಆಸ್ಲ್ಯೊ. ಕವಿತೆಕ್ ಸಮ್ಜುಂಕ್, ವ್ಹಳ್ಕೊಂಕ್ ತಶೆಂಚ್ ಉತ್ರಾಂವ್ಕ್ ಜೊಕ್ತೊ ಭಂವಾರ್ ನಾತ್ಲೊ. ಆನಿ ಕವಿತೆಚಿ ಕುರುಃ ಸಯ್ತ್ ನಾತ್‌ಲ್ಲೆ ಚಡ್ತಾವ್ ’ಕವಿತಾ’ ಮ್ಹಳ್ಳ್ಯಾ ನಾಂವಾರ್ ’ಮತಿಕ್ ಆಯಿಲ್ಲೆಂ’ ಬರಯಿಲ್ಲೆಂ ಪತ್ರಾಚೆ ಕೊನ್ಶೆ ಭರುಂಕ್ ವಾಪಾರ್ತಾಲೆ. ವಿಶೇಸ್ ಅಂಕ್ಲ್ಯಾಂನಿ ಸಯ್ತ್ ಪೋಷಕ್/ಇಸ್ತಿಹಾರಾಂ ದೀವ್ನ್ ಅಪ್ಲಿ ತಸ್ವೀರೆಸವೆಂ ’ಕವಿತಾ’ ಮ್ಹಳ್ಳೆ ನಾಂವಾರ್ ಕಿತೆಂಗಿ ಪರ್ಗಟ್ ಜಾತಾಲೆಂ. ಬಾವ್ಡೊ ಚಾ.ಫ್ರಾ. ಎಕ್ಸುರೊಚ್ ಕಿತ್ಲೆಂ ಸೊಸುನ್ ಜಿಯೆಲ್ಲೊ ಕೊಣ್ಣಾ ಮ್ಹಳ್ಳೆಂ ಚಿಂತಪ್ ಆತಾಂ ತರ್‌ಯೀ ಜಾಯ್ತೆ ಚಿಂತುನ್ ಆಸಾತ್.

ಹಾಂಗಾಸರ್ ಏಕ್ ಕವಿತಾ ಆಸಾ, ಜಿ ಪಾರಂಪರಿಕ್ ರಿತಿಚಿ, ಮ್ಹಣ್ಜೆ ಪ್ರಾಸ್-ಮಿಟರಾಂನಿ ಸಜಯಿಲ್ಲಿ. ಕೊಂಕಣಿ ಕವಿತಾಗೋಶ್ಟಿಂನಿ ಅಸಲ್ಯೊ ಕವಿತಾ ಲೊಕಾಮೊಗಾಳ್. ಯೆದೊಳ್‌ಚ್ ಮೀಸ್-ಕುಮ್ಸಾರ್, ರೆತಿರ್-ನೊವೆನಾಂನಿ ಥಕೊನ್ ಗೆಲ್ಲ್ಯಾ ಮತಿಕ್ ಆಕಸ್ಮಿಕ್ ಜಾವ್ನ್ ಥೊಡೆಪಾವ್ಟಿಂ ಘೆವ್ನ್ ಆಯಿಲ್ಲ್ಯಾ ಲೊಕಾಕ್ ಹಾಸುಂಕ್ ಜಾಯ್ ಆನಿ ಖಂಡಿತ್ ಜಾವ್ನ್ ಅಸಲ್ಯೊ ಕವಿತಾ ತಾಂಕಾಂ ಭರ್ಪೂರ್ ಮನರಂಜಿತ್ ಕರ್ತಾತ್ ಮ್ಹಣ್ಚ್ಯಾಂತ್ ದುಭಾವ್ ನಾ. ಬಾಬ್ ಹೆರೊಲ್ಪಿಯುಸ್ ನಾಮ್ಣೆಚೊ ಬರವ್ಪಿ; ಕಾಣ್‌ಯೆಗಾರ್, ವಿಡಂಬನ್‌ಕಾರ್ ಆನಿ ಅಪ್ರೂಪ್ ಕವಿ.

ಅಶೆಂ ಮ್ಹಣುನ್ ಆತಾಂ ಕೊಂಕಣಿ ಕವಿತಾಶೆತ್ ಫುಲ್ಲಾಂ ಮ್ಹಣುನ್ ನ್ಹಯ್, ಕಾಂಯ್ ಫುಲ್ಚಿಂ ಲಕ್ಷಣಾಂ ದಿಸುನ್ ಯೆತಾತ್. ಪುಣ್ ಹಿ ಬದ್ಲಾವಣ್ ಎಕಾಚ್ ದಿಸಾ ಜಾಂವ್ಚೆತಸಲಿ ನ್ಹಯ್. ಹಿ ಎಕ್ ನಿರಂತರ್ ಪ್ರಕ್ರಿಯಾ, ಆಯ್ಚೆ ಯುವಕವಿ ತಶೆಂಚ್ ಉದೆವ್ನ್ ಯೆಂವ್ಚೆ ಥೊಡೆ ಕವಿ ತರ್‌ಯೀ ಹ್ಯಾ ದಿಶೆನ್ ಚಿಂತಪ್ ಆಟಯ್ತಾತ್ ಆನಿ ಅಪ್ರೂಪ್ ತರ್‌ಯೀ ಕವಿತಾ ಬರಯ್ತಾತ್ ತೆಂ ಕೊಂಕಣಿ ಕವಿತಾಶೆತಾಕ್ ನವೊ ಭರ್ವಸೊ ದಿತಾ.

[ಕವಿತಾ] ಸೆಜಾರಿ [ಹೆರೊಲ್ಪಿಯುಸ್]

ಸೆಜಾರಿ

ವಯ್ಲ್ಯಾ ವಾಡ್ಯಾಂತ್ ಆಸ್‍ಲ್ಲೆಂ ಕಾಜಾರ್

ರೆಸ್ಪೆರ್ ದವರ್‍ಲ್ಲಿ ಇಗರ್ಜ್ ಪೆಜಾರ್

ರೊಸಾ ಜೆವ್ಣಾಕ್ ಲೋಕ್ ಕಾಂಯ್ ಹಜಾರ್

ಪಯಿಲ್ಲೆಂ ಪಾವ್ಲೊ ರುಜಾರಿಯೊ ಬಾಲ್ತಾಜಾರ್.

ರುಜಾರಿಕ್ ಕಾಜಾರಾಚೊ ಮಾಟೊವ್ ಸೆಜಾರ್

ಕಾರ್ಯಾ ಪಯ್ಲೆಂ ಹಾಚೆಂಚ್ ಮಾಗ್ಣೆಂ ರಜಾರ್

ಲುಂಗೆಗಾರ್ ರುಜಾರಿಚೆಂ ಬರ್ಮುಡಾ ಇಜಾರ್

ವ್ಹಿಸ್ಕಿ-ಸ್ಕೋಚ್ ಮ್ಹಣ್ ಮಾರ್ಲೆ ಪೆಗ್ ಚಾಚಾರ್.

ರುಜಾರಿಚ್ಯಾ ಬಾಯ್ಲೆಚೆಂ ಕುಳಾರ್ ಮಿಜಾರ್

`ಢಿಂಗ್' ಜಾವ್ನ್ ಹೊ ಪಡ್ಲೊ ತಿಚ್ಯಾ ಭುಜಾರ್

ಪಿಯೆವ್ನ್ ಬೆಬ್ದೊ ಜಾವ್ನ್ ಚಡ್ಲೊ ಮೆಜಾರ್

ರೊಸಾ ಮಾಟೊವ್ ಕೆಲೊ ಮಾಸ್ಳೆ ಬಾಜಾರ್.

ಫಿರ್ವಾತಾನಾ, ಮುಸ್ಕಾರ್ ಲೆಂವ್ತಾಲೆಂ ಮಾಜಾರ್

ಆಮಾಲ್ ದೆಂವ್ತಾನಾ ಜಾಲೊ ಕುಡಿಂತ್ ಲಾಚಾರ್

ಬಾಯ್ಲೆ ಭುಗ್ರ್ಯಾಂಕ್ ಭಿರ್ಮತ್ ಜಾಲೆಂ ಬೆಜಾರ್

ಸಗ್ಳ್ಯಾ ಗಾಂವಾರ್ ಆತಾಂ `ಪಿಂವ್ಡೊ ರುಜಾರ್'.

- ಹೆರೊಲ್ಪಿಯುಸ್ [ಎಪ್ರಿಲ್ 2018]

ಕೊಂಕಣೆಂತ್ ಹಾಚ್ಯೊ 218 ಕಥಾ/ವಿನೋದ್-ವಿಡಂಬನಾಂ, 225 ಕವಿತಾ, 341 ಲೇಕನಾಂ, 150 'ತೀನ್ ಖಿಳೆ', ತಶೆಂ 35 ಆಂಕ್ಯಾಂನಿ 5 ಸಾಂಕಳ್ ಲೇಕನಾಂ, 101 ಸಬ್ದಾಂ-ಗೊಂದೊಳ್ ಆನಿ 1200 ಚ್ಯೆಕೀ ಚಡ್ 'ಹಾಸ್ಕುಳೆ' ಫಾಯ್ಸ್ ಜಾಲ್ಯಾತ್. ಹಾಚ್ಯೊ ಕಾದಂಬರಿ 'ದೋನ್ ಥೆಂಬೆ ದುಖಾಂ' ದೇವ್‍ನಾಗರಿ ಲಿಪಿಂತ್ ಗೊಂಯಾಂ ಥಾವ್ನ್ 'ಸಾಹಿತ್ಯ್' ಪತ್ರಾರ್ ಪ್ರಕಾಶಿತ್ ಜಾವ್ನ್ ಕೊಂಕಣಿ ಭಾಷಾ ಮಂಡಳ್, ಗೊಂಯ್ ಚಿ 1972 ವರ್ಸಾಚಿ ಪ್ರಶಸ್ತಿ ಜೊಡುಂಕ್ ಪಾವ್ಲ್ಯಾ. ಹಾಣೆಂ ಏಕ್ ಕೊಂಕ್ಣಿ ನಾಟಕ್ ಆನಿ 5 ನಾಟ್ಕುಳೆ ಬರಯ್ಲ್ಯಾತ್, ತಾಂಕಾಂ ದಿಗ್ದರ್ಶನ್ ದಿಲಾಂ ಆನಿ ನಟ್ ಜಾವ್ನ್ ಪಾತ್ರ್‍ಯೀ ಘೆತ್ಲಾ. ಇಂಗ್ಲಿಶ್, ಹಿಂದಿ ಆನಿ ಕಾನಡಿಂತ್‍ಯೀ ಹಾಚಿಂ ಬರ್ಪಾಂ ಪ್ರಕಟ್ ಜಾಲ್ಯಾಂತ್.

ಹಾಚ್ಯಾ ಅವಿರತ್ ಚಾರ್ ದಶಕಾಂಚಾ ಸಾಹಿತಿಕ್ ವಾವ್ರಾ ಖಾತಿರ್ ಹಾಕಾ 2012 ವರ್ಸಾಚಿ 'ದಾಯ್ಜಿ ದುಬಾಯ್ ಸಾಹಿತಿಕ್ ಪ್ರಶಸ್ತಿ' ತಶೆಂ 2016 ವರ್ಸಾಚಿ `ಕೊಂಕಣಿ ಕುಟಮ್ ಬಾಹ್ರೇನ್ ಪ್ರಶಸ್ತಿ’, '2017 ವರ್ಸಾಚಿ `ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮೆಚಿ ಜಿಣ್ಯೆಆವ್ದೆಚಿ ಪ್ರಶಸ್ತಿ’ ಲಾಭ್ಲ್ಯಾ. `ಹೆರೊಲ್ಪಿಯುಸ್’ ಲಿಖ್ಣೆ ನಾಂವಾಚೊ ಗ್ರೇಶನ್ ಪಿಯುಸ್ ಡಿ'ಸಿಲ್ವಾ ಕುಲ್ಶೇಕರಾಂತ್ ಜನ್ಮಾಲ್ಲೊ, ಕುಡುಪು (ಪಾಲ್ದಾನೆ ಫಿರ್ಗಜ್) ವಸ್ತಿ ಕರುನ್ ಆಸಾ.