ಪ್ರವಚನ್ [-ಎಲಾಸ್ ಅಲಂಗಾರ್]

[ಕವಿತಾ] ಪ್ರವಚನ್ [-ಎಲಾಸ್ ಅಲಂಗಾರ್]

’ಮೂಂ ಮೆ ರಾಮ್ ರಾಮ್, ಬಗಲ್ ಮೆ ಚೂರಿ’ ಹಿ ಸಾಂಗಣಿ ಪರ್ನಿ ದಿಸುಂಕ್ ಪುರೊ ಪುಣ್ ಆಮ್ಚ್ಯಾ ಸಮಾಜೆಚಿ ಹಕೀಗತ್. ದೆಕುನ್ ಜಶೆಂ ಹಸ್ತಿಕ್ ದಾಕವ್ಪಾಚೆ ದಾಂತ್ ವೆಗ್ಲೆ ಅನಿ ಚಾಬ್ಚೆಂ ದಾಂತ್ ವೆಗ್ಳೆ ತಶೆಂಚ್ ಆಮ್ಚಾ ಸಮಾಜೆಂತ್ ಸಯ್ತ್ ಅಸಲೆ ಸವಾಯ್ ಬುಧ್ವಂತ್ ಕಾಂಯ್ ಉಣೆಂ ನಾಂತ್. ಮಿರ್ಜಾ ಘಾಲಿಬಾಚ್ಯಾ ಉತ್ರಾನ್ ಸಾಂಗ್ಚೆಂ ತರ್; ’ದುನಿಯಾ ಮೆ ಬೇವಕೂಫೊಂ ಕಿ ಕಮೀ ನಹೀಂ ಹೈ, ಎಕ್ ಕೊ ಡೂಂಡೊ, ಹಜಾರ್ ಮಿಲ್ತೆ ಹೈ’. ತಶೆಂ ಹೆರಾಂಕ್ ಪ್ರವಚನ್ ದಿತೆಲೆ ಹೆ ಸವಾಯ್ ಬುಧ್ವಂತ್ ಸರ್ವ್ ವರ್ಗಾಂನಿ ಭರುನ್ ಗೆಲ್ಯಾತ್. ಆನಿ ಕವಿ ಎಲಾಸ್ ಅಲಂಗಾರ್ ಅಪುರ್ಭಯೆನ್ ಕವಿತೆನ್ ಅಸಲ್ಯಾ ಸಂಯ್ಬಾಚೆಂ ಮುಖೊಟೆಂ ಕಾಡ್ಚೆಂ ವೆರ್ಥ್ ಪ್ರೇತನ್ ಕರುನ್ ಆಸಾ.

[ಕವಿತಾ] ಪ್ರವಚನ್ [-ಎಲಾಸ್ ಅಲಂಗಾರ್]

ಪ್ರವಚನ್

ಹೆರಾಂಕ್ ಪ್ರವಚನ್.

ತಾಂಚೆಭಿತರ್ ಕುರ್ಲ್ಯಾಂಚೆ

ಗೂಣ್.

ಮೊಗಾನ್ ಜಿಯೆಯಾ

ಮ್ಹಣೊನ್ ದಿತಾತ್ ಶಿಕೊನ್.

ಪೂಣ್ ತಾಂಚೆಭಿತರ್

ಭರ್ಲಾಂ ಮೊಸ್ರಿಪಣ್.

ಸೊಡ್ ರೆ ಮಿಂಗಾ

ಸಕ್ಕಡ್ ನ್ಹಹಿಂರೆ ತಶೆಂ...

ಎಕ್ಲ್ಯಾಕ್ ಪಳೆಯ್ಲ್ಯಾರ್

ಅನೈಕ್ಲ್ಯಾಕ್ ಜಾಯ್ನಾ.

ತಾಣೆ ಕಿತೆಂಯ್ ಸಾಂಗ್ಲ್ಯಾರ್

ಹಾಕಾ ಜಾಯ್ನಾ.

ಹಾಚೆ ಆಯ್ಕಾನಾತ್ಲ್ಯಾರ್

ತಾಚೆ ದೆಂವ್ಚಾರ್ ಪಣ್.

ಸೊಡ್ ರೆ ಮಿಂಗಾ

ಸಕ್ಕಡ್ ನ್ಹಹಿಂರೆ ತಶೆಂ...

ಹಾಕಾ ಪದ್ವಿ, ನಾಂವ್

ಬಿಜಿನೆಸ್ ಮೈಂಡ್.

ತಾಚೆ ಸಾಧೆಂಪಣ್.

ಹಾಕಾ ಆಸ್ತ್ ಸಂಪತ್ತ್.

ತಾಚೆ ಉದಾರ್ ಪಣ್.

ಹಾಂಚೆ ಮಧೆಂ ಜಾತಾ

ಸದಾಂಚ್ಚ್ ಜಟಾಪಟ್.

ಸೊಡ್ ರೆ ಮಿಂಗಾ

ಸಕ್ಕಡ್ ನ್ಹಹಿಂರೆ ತಶೆಂ...

ಸೊಡ್ ಮ್ಹನ್ಶ್ಯಾ ಪಯ್ಲೆಂ

ತುಜೆ ಕುಸ್ಡೆಪಣ್!!

ಉಪ್ರಾಂತ್ ದಿ ತುಜಿ

ಶಿಕೊನ್, ಪ್ರವಚನ್.

ಜಿಯೆಂವ್ನ್ ದಾಕಯ್

ಸ್ವತಹಾ ತುಜೆ ಮ್ಹನ್ಶ್ಯಾಪಣ್.

ಉಪ್ರಾಂತ್ ಮುಕಾರ್ಸಿಯ್

ಮಿಸಾಂವಾಚೆ ಪಯ್ಣ್.

ಸೊಡ್ ರೆ ಮಿಂಗಾ

ಸಕ್ಕಡ್ ನ್ಹಹಿಂರೆ ತಶೆಂ...

ಅಸಾತ್ ರೆ ಸಬಾರ್ ಬರೆಂ....

- ಎಲಾಸ್ ಅಲಂಗಾರ್. [ದಸೆಂಬ್ರ್, 2019]

ಎಲಾಸ್ ಅಲಂಗಾರ್: ಲಿಖ್ಣೆನಾಂವಾನ್ ಬರಂವ್ಚೊ ಎಲಿಯಾಸ್ ಇಸ್ರೇಲಾಂತ್ ವಾವ್ರ್ ಕರುನ್ ಆಸಾ ತರ್‌ಯೀ ಸಮಾಜಿಕ್ ಜಾಳಿಜಾಗ್ಯಾಂನಿ ತಶೆಂಚ್ ಪತ್ರಾಂನಿ ಕೊಂಕಣಿ ಕವಿತಾ ಬರವ್ನ್ ಆಸಾ.