ಅಸ್ತುರಿ (- ಅನಘಾ ವಿ. ಕಾಮತ್)

[ಕವಿತಾ] ಅಸ್ತುರಿ (- ಅನಘಾ ವಿ. ಕಾಮತ್)

ಎಕಾ ಅಸ್ತುರೆವಿಶಿಂ ಸಭಾರ್ ಕವಿಂನಿ ಬರಯ್ಲಾಂ ಆನಿ ಕಾಳಾಥಾವ್ನ್ ಕಾಳಾ ಪರ್ಯಾಂತ್ ಅಸ್ತುರೆಚೆರ್ ಬರಯ್ತೆಲೆ ಆಸ್ತೆಲೆಚ್. ಕಿತ್ಯಾಕ್ ಮ್ಹಳ್ಯಾರ್ ಎಕಾ ಅಸ್ತುರೆಚ್ಯಾ ಮಿನತೆಕ್ ಕೆದಿಂಚ್ ಮಜೂರಿ ನಾ, ತಿಚ್ಯಾ ಮೊಗಾಕ್ ಕೆದಿಂಚ್ ಮೋಲ್ ನಾ ಪುಣ್ ಏಕ್ ಅಸ್ತುರಿ ಕಿತೆಂಚ್ ಅಪೇಕ್ಶಾ ಕರಿನಾಸ್ತಾನಾ ಅಪ್ಲೊ ವಾವ್ರ್ ಕರುನ್ ವೆತಾ.

ಬಾಯ್ ಅನಘಾ ವಿ. ಕಾಮತ್ ಕೊಂಕಣಿಂತ್ ಏಕ್ ಸಕ್ರಿಯ್ ಬರವ್ಪಿಣ್ ತಶೆಂಚ್ ವಾವ್ರಾಡಿ. ಹಿಚ್ಯಾ ಕವಿತೆಂತ್ಲಿಂ ಭಾವನಾಂ ಆನಿ ವಿಚಾರಾಂಕ್ ಸಮ್ಜುಂಕ್ ಆತಾಂ ತುಕಾಚ್ ಸೊಡ್ತಾಂ.

[ಕವಿತಾ] ಅಸ್ತುರಿ (- ಅನಘಾ ವಿ. ಕಾಮತ್)

ಅಸ್ತುರಿ

ಸಕಾಳಿಂ ಸಗ್ಳ್ಯಾಂತ್ ಪಯ್ಲಿಂ ಉಠ್ಣಾರಿ

ಸಗ್ಳ್ಯಾಂತ್ ನಿಮ್ಣೆಂ ಹಾಂತ್ರುಣಾರ್ ಪಡ್ಣಾರಿ

ಯೆತಾ ತಶಾ ವಾರ್ಯಾಕ್ ಸೂಪ್ ದೆಣಾರಿ

ಆಸ್ತಾ ತಿ ಎಕ್ ಮಹಾನ್ ಅಸ್ತುರಿ.

ಕಾಮಕ್ಶ್ಟಾನ್ ಆಪ್ಲೆಂ ಘರ್ ಸಜಯ್ಣಾರಿ

ಮಾಯೆಮೊಗಾನ್ ಘರ್ಚ್ಯಾಂಕಡೆನ್ ವಾಗ್ಣಾರಿ

ಯೆತ್ಲ್ಯಾವೆತ್ಲ್ಯಾಕ್ ಲಾಗಿಂ ಕರ್ಣಾರಿ

ತ್ಯಾಗಾಚಿ ಮ್ಹುರ್ತ್ ತಿ, ಎಕ್ ಮೊಗಾಳ್ ಅಸ್ತುರಿ.

ಮಾಂಯ್ಕ್ ಮಾಂವಾಕ್ ,ದೆರ್-ಜಾವ್ ಘೊವಾಕ್ ಜಪ್ಣಾರಿ

ಬಾಪಾಯ್ಕ್, ಭಾವ್ಭಯಣಾಂಕ್ ಮಾನಾನ್ ವಾಗಯ್ಣಾರಿ

ಘರಾ-ಕುಳಾರಾ ,ದೊನಯ್ ಘರಾಂನಿ ಝಿಜ್ಣಾರಿ

ನಮ್ಳಾಯೆಚೆಂ ಪ್ರತೀಕ್ ಆಸಾ ಮ್ಹೊಂವಾಳ್ ಅಸ್ತುರಿ.

ಭುರ್ಗ್ಯಾಬಾಳಾಂಕ್ ಅಪುರಬಾಯೆನ್ ಸಾಂಬಾಳಣಾರಿ

ಲ್ಹಾನ್ಪಣಾಂತ್ ಹಾಂಸ್ತೆಮುಖಾನ್ ಶಿ,ಸು ಕಾಡ್ಣಾರಿ

ಮೊನ್ಯಾಂನಿ ಸಗ್ಲೆಂ ಮಾಯೆನ್ ಕಾಮ್ ಹಾತಾಳಣಾರಿ

ಮಮ್ತೆನೆ ಭರಿಲ್ಲಿ ಎಕ್ ಗರೀಬ್,ಶುದ್ರ್ ಅಸ್ತುರಿ.

ಭುರ್ಗ್ಯಾಂನಿ ಶೂರ್ವೀರ್ ಜಾವ್ಚೆಂ ಅಶೆಂ ಮ್ಹಣ್ಣಾರಿ

ಸಂವ್ಸಾರಾಂತಲೆ ಉಜು ಮಾರ್ಗ್ ದಾಖಯ್ಣಾರಿ

ಭಂಯ್ ಭಿರಾಂತ್ ಮನಾಂತ್ಲ್ಯಾನ್ ಕಾಡೂನ್ ಉಡಯ್ಣಾರಿ

ಕ್ಷತ್ರೀಯ್ ಮನಾಚಿ ತಿ ಖಂಬೀರ್ ಅಸ್ತುರಿ.

ಭುರ್ಗ್ಯಾಚೆರ್ ಬರೆ ಸಂಸ್ಕಾರ್ ಘಡಯ್ಣಾರಿ

ಶ್ರೀಗ್ಣೆಶಾ, ಪರವ್ಡ್ ನಿತ್ಯನೆಮಾನ್ ಶಿಕಯ್ಣಾರಿ

ಭಕ್ತೀಭಾವಾನ್ ದೆಖ್ದಿಣ್ಯೊ ಕಥಾಕಾಣಯೊ ಸಾಂಗ್ಣಾರಿ

ಬ್ರಾಹ್ಮಣಾಚೆ ಗೂಣ್ ಆಸ್ಣಾರಿ ಸದ್ಗುಣಿ ಅಸ್ತುರಿ.

ಭುರ್ಗ್ಯಾಂಚ್ಯಾ ಶಿಕ್ಷಣಾಖಾತೀರ್ ಧಡ್ಪಡಣಾರಿ

ಪಯ್ಶಾ-ಅಡ್ಕ್ಯಾಚೊ ಅರ್ಥ್ ಹಿಶೆಬ್ ಜಾಣ್ಣಾರಿ

ವ್ಯವ್ಹಾರ್-ಗಿನ್ಯಾನ್ ಅಚೂಕ್ ತಕ್ಲೆಂತ್ ಘಾಲ್ಣಾರಿ

ವೈಶ್ಯ್ ಜಾತ್ ಆಪ್ಣಾಯಣಾರಿ ವ್ಯವ್ಹಾರಿ ಅಸ್ತುರಿ.

ಸಗ್ಲೆ ಧರ್ಮ್ ಆಂಗಾಂತ್ ಕೌಶ್ಲ್ಯಾನ್ ಬಾಣಯ್ಣಾರಿ

ಘರಾಕ್ ಆಪ್ಲ್ಯಾ ಇಂದ್ರಧನೂಭಶೆನ್ ರಂಗಯ್ಣಾರಿ

ಆಪ್ಲೊ ಸಂವ್ಸಾರ್ ಸರ್ಗಾಭಶೆನ್ ಮಾನ್ಣಾರಿ

ಸೊಂಶೀಕ್,ನಮ್ಳಾಯೆಚಿ, ಕುಶಲ್,ಚತೂರ್ ಅಸ್ತುರಿ.

- ಅನಘಾ ವಿ. ಕಾಮತ್. [ಎಪ್ರಿಲ್, 2023]

ಅನಘಾ ವಿ. ಕಾಮತ್: ವೃತ್ತೆನ್ ಶಿಕ್ಷಕಿ ಜಾವ್ನಾಸ್ಚಿ ಬಾಯ್ ಅನಘಾ ವಿ. ಕಾಮತ್ ಕೊಂಕಣಿ, ಮರಾಠಿ, ಹಿಂದಿ, ಇಂಗ್ಲಿಶ್ ಭಾಸೆಂನಿ ಬರಯ್ತಾ. ಕೊಂಕಣಿಚ್ಯಾ ವೆಗ್-ವೆಗಳ್ಯಾ ಸಂಸ್ಥ್ಯಾಂನಿ ಖೂಪ್ ವಾವ್ರ್ ಕರುನ್ ಆಸ್ಚಿ ಹಿ ಕೊಂಕಣಿ ಲೇಖಕ್ ಸಂಘಾಚಿ ಸಚಿವ್ ಜಾವ್ನಾಸಾ.