ನಿಸಣ್ ದಾಯ್ಜ್ [ಜೋನ್ಸನ್ ಡಿಕುನ್ಹಾ, ಅಜೆಕಾರ್]

[ಕವಿತಾ] ನಿಸಣ್ ದಾಯ್ಜ್ [ಜೋನ್ಸನ್ ಡಿಕುನ್ಹಾ, ಅಜೆಕಾರ್]

ನಿಸಣ್ ಏಕ್ ಇಮಾಜ್, ಸಾಂಕೇತಿಕ್ ಅರ್ಥಾನ್ ಜಯ್ತ್ ವಾ ಮುಕಾರ್ ಪಾವ್‌ಲ್ಲೆಂ ಚಿಂತಪ್. ಪುಣ್ ಮನಿಸ್ ಜಿತ್ಲೊ ಉಂಚಾಯೆಕ್ ವೆತಾ ತಿತ್ಲೊಚ್ ಎಕ್ಸುರೊ ಕಸೊ ಜಾತಾ ಮ್ಹಳ್ಳೆಂ ಅಮೂರ್ತ್ ಚಿಂತಪ್ ಹ್ಯಾ ಕವಿತೆಂತ್ ಆಸಾ.

ಮನಿಸ್ ಕೆದ್ನಾಂಯ್ ಅಪ್ಣಾಲಾಗಿಂಚ್ ಉಲಂವ್ಕ್, ವಿಚಾರ್ ಕರುಂಕ್ ಸಕ್ತಾ? ಆತ್ಮಾವಲೋಕನ್ ವಾ ಆತ್ಮ್ ವಿಮರ್ಸೊ ವಾ ಅಪ್ಣಾಚೆ ವಿಚಾರ್ ಕಿತ್ಲೆ ವಾಸ್ತವಿಕ್ ಮ್ಹಣೊನ್ ಅಪ್ಣಾಲಾಗಿಂ ವಿಚಾರ್ ಕರ್ಚಿ ಸಕತ್ ಜಾಯ್ತ್ಯಾಂಕ್ ನಾ. ಪುಣ್ ಹಾಂಗಾಸರ್ ಏಕ್ ಅಸಲಿಚ್ ಅಪುರ್ಭಾಯೆಚಿ ಕವಿತಾ ಪಯ್ಲೆಪಾವ್ಟಿಂ ಘೆವ್ನ್ ಆಯ್ಲಾ ಅಜೆಕಾರ್ ಫಿರ್ಗಜೆಚೊ, ವೃತ್ತೆನ್ ಶಿಕ್ಷಕ್ ಜಾವ್ನಾಸ್ಚೊ ಜೋನ್ಸನ್ ಡಿಕುನ್ಹಾ. ಜೋನ್ಸನ್ ಚಡ್ತಾವ್ ಜಾವ್ನ್ ಕನ್ನಡ ತಶೆಂಚ್ ಅಪ್ರೂಪಾಯೆನ್ ಇಂಗ್ಲಿಶಾಂತ್ ಬರಯ್ತಾ ದೆಕುನ್ ಹ್ಯಾ ಕವಿತೆಂತ್ ತಾಚ್ಯಾ ಚಿಂತ್ಪಾಚಿ ಗುಂಡಾಯ್ ಪಳೆತಾನಾ ತಾಚ್ಯಾ ಸಾಹಿತಿಕ್ ಸಮ್ಜೊಣೆಚಿ ತಾಂಕ್ ಗಮ್ತಾ. ಕೊಂಕಣಿ ಸಾಹಿತ್ಯಾಚ್ಯಾ ನದ್ರೆಂತ್ ಹೆಂ ಭರ್ವಶ್ಯಾಚೆಂಚ್.

[ಕವಿತಾ] ನಿಸಣ್ ದಾಯ್ಜ್ [ಜೋನ್ಸನ್ ಡಿಕುನ್ಹಾ, ಅಜೆಕಾರ್]

ನಿಸಣ್ ದಾಯ್ಜ್

ಆನಿಂ ಕಿತ್ಲೆಂ ಎಕ್ಸುರೆಂ ತೆಂ ಹಾಂವೆಂ, ಮ್ಹಜ್ಯಾಚ್ ಉಂಚ್ಲ್ಯಾ ನಿಸ್ಣೆರ್ ರಾಂವ್ಚೆಂ

ಉಂಚ್ಲ್ಯಾ ಪಾಂವ್ಡಾರ್ ಊಬ್ ಘೆವ್ನ್, ಅನಿಂ ಐಸ್ ಕ್ಯೂಬ್ – ಸ್ಕಾಚ್ ಖೂಬ್ ಸೆಂವ್ಚೆಂ

ರಾನ್ವಟ್-ಮಹಿಮಾಂ-ತರೀ, ಭಿತರ್-ಫೊಕಳ್ಪಣಾರ್ ಗರ್ಮೆನ್ ಜಳ್ಚೆಂ.

ಚಿಂತಾಪ್ ಮಾತ್ರ್ ಮ್ಹಜೆ ದ್ವಿಮಾನ್ ದೆಕುನ್

ತುಂ ಮ್ಹಾಕಾ ಫಕತ್, ಅಭಿಮಾನ್ ವಾ ಅಪಮಾನ್

ಆನಿಂ, ಹೆರ್ ಕಿತೇಂಯ್ ಮ್ಹಾಕಾ, ಝಳ್ಕಾನಾಂ ಸಮಾನ್.

ಕಿತೆಂಯ್ ಅಸುಂ ವಾ ನಾಂ-ಅಸುಂ, ಮ್ಹಜೆಂ ಸುಟಾನಾತ್ಲೆಂ ಧಾಂವಾಧಾಂವಾಪಣ್,

ಪಾತ್ಯೆಂವ್ ಕಶೆಂ ಆನಿಂ ಜೊಡುಂ ಆಪ್ಣಾಕ್, ಮೆಳೊಂಕ್ ನಾತ್ಲೆಂ ಬಾಂಧಾವ್ಪಣ್

ವ್ಹಯ್ ಹಾಂವ್ ಏಕ್ ಬಂಧಿ, ಮ್ಹಜ್ಯಾ ಉಂಚ್ಲ್ಯಾ ನಿಸ್ಣೆರ್...

ಹರ್ಯೆಕೀ ಮೊಸ್ರಾಳ್ ಮ್ಹಣುನ್ ದೆಖುಂ ಹಾಂವ್, ತಾಂಚ್ಯಾ ಭರಲ್ಲ್ಯಾ ಪೊಸ್ಕಟ್ಯಾರ್

ಹ್ಯಾ ಉಂಚ್ಲ್ಯಾ ರುಕಾ ತುದ್ಯೆರ್ ಥಾವ್ನ್, ಸುಟಯ್ನ್‌ಗಿ ಮ್ಹಾಕಾಚ್ ಹಾಂವ್

ವ್ಯಾಖ್ಯಾನಾಂ ಸರ್ವ್ ಜಸೊ ದಿತಾಂ ಜಾಂವ್, ಶೇಷ್ಟ್ ಪಣ್ ಮ್ಹಳ್ಳ್ಯಾಕುಡ್ಡ್ಯಾ ಮಟ್ಟಾಸಾರ್

ದೀಂವ್ಕ್ ಮ್ಹಜ್ಯಾ ಅಸ್ತಿತ್ವಾಕ್ ಅರ್ಥ್, ಹಾಂವ್ ಧಾಂವಾಧಾವುಂ...

ವಾ ಹೆರಾಂಕ್ ಸರಿ ಕರುಂ...

ಉನ್ನತ್ ವರ್ಗಾಕ್ ಬಾಂದುನ್ ಹಾಡುಂ

ಆನಿಂ ಆಗ್ಟ್ಯಾ೦-ಉಜ್ಯಾ ಭವಾರಿಂ ನಾಚುಂ?

ಮಿಕ್ವೊನ್ ಧಾರ್, ಕಾಮಾಂ ಕರ್ಶಿ, – ಖರೋಚ್ ಮೆಚ್ವನ್

ಪೂಣ್ ಜಾಲೊಂ ಮಾಯ್ಪಾಸಿ ದಯಾಳ್, ವಚುಂ ಹಾಂವ್ ಮಾಜ್ವೋನ್?

ಕೊನ್ಷ್ಯಾಕ್ ಶೆವ್ಟೊನ್ ವಚನ್ ಮ್ಹಳ್ಳ್ಯಾ ಭಿಯಾನ್ ಅನಿಂ ನಾಂ ಭರ್ವಶ್ಯಾನ್

ಅಸಾಂ ಆದಿಂ ಆನಿಂ ಅತಾಂಯ್ ಅಶೇಂಚ್ ಕಾವ್ಜೆವ್ನ್.

ಹುಶಾರ್ಗಾಯೆಚ್ಯಾ ಖುಸ್ತಾರ್, ಟ್ರಿಲಿಯನ್ ಜೊಡ್‍ಲ್ಲ್ಯಾ ಭರ್ಮಾರ್

ಖುಶಾಲ್ ಆತ್ಮೆ ಮ್ಹಾಕಾ ದಿಸ್ತಿತ್ ಮಾತ್ರ್, ಚುಕೋನ್ ಗೆಲ್ಲೆ ಲಾಚಾರ್.

ದೊಳ್ಯಾಂಕ್ ಸುಡ್ಸುಡಿತ್ ಪುಣ್ ಭಿತರ್ ಖಡ್ಕಡಿತ್, ಜಿವಾ-ಸಾರ್ ಚಿಂವ್ತಾತ್ ತಾಂಚೆ ಪರ್ಜಳ್ ಮಿಣ್ಮಿಣಿತ್.

ಸುಪರ್ ಡುಪರ್ ತೆ, ಲೊಳ್ಪಿ ಸರ್‌ಪಿ ವಿಕ್ರಾಪಿ ...

ಜಿಣ್ಯೆವಾಟ್ ಮೆಚ್ವೊನ್ ಪುಗಾರ್, ತೆಂ ಪಾಕಾಂ ನಾತ್ಲಲೆಂ ಡೊಂಕಾಂ ಪೀಲ್.

ದೆಕುನ್ ತೊ ಸಾಂಗ್ತಾ....

ಆಬ್ಳೆ ತುಮಿಂ ಕಷ್ಟತೆಲ್ಯಾನೊಂ

ಆನಿಂ ವಜನ್ ವಾವಯ್ತೆಲ್ಯಾನೊಂ... ತೊ ಆಪಯ್ತಾ

ಘೆನಾಸ್ತಾಂ ತುಜಿ ಆರ್ಹಾ ವರವ್ಣ್, ದಿತಲೊಂ ತುಕಾ ವಿಶೆವ್ ಖರೊ

ಆನಿಂ ಎಕಾ ಕುರ್ಪೆಭರ್-ನದ್ರೆನ್, ರಾವ್ತಾ ಥಂಯ್ಸರ್ ಸಮರ್ಥ್ ಖರೊ.

ನಾಂ ಹೆಂ, ಮೆಳಾನಾಂ ತುಕಾ ವಿಕ್ರಾಪಾಕ್ - ಬಗ್ಲೆ ದುಖಾನಾಂತ್

ವಾ ಖಂಚ್ಯಾಯ್ ಸುಪರ್ ಮಾಲಾಂತ್, ಥಂಯ್ ತುಮಿಂ ಹೆಂ ದೆಖಾನಾಂತ್.

ಫುಂಕ್ಯಾಕ್ ದಿತಾಂ ಅಪುಣ್ ಮ್ಹಣ್ತಾ, ಆನಿಂ ನೀಜ್‌ಚ್ ರಾವ್ತಾ ಥಂಯ್ ಸರ್...

ಆನಿಂ ಪರ್ಯಾಂತ್ ತೆದ್ನಾಂ, ವ್ಹಾಳೊನ್ ವೊಮ್ತತ್ ಸಂತೊಸ್ ಭರಾಸರ್.

- ಜೋನ್ಸನ್ ಡಿಕುನ್ಹಾ [ಒಕ್ಟೋಬರ್, 2025]

ಜೋನ್ಸನ್ ಡಿಕುನ್ಹಾ, ಅಜೆಕಾರ್: ವೃತ್ತೆನ್ ಶಿಕ್ಷಕ್ ಜಾವ್ನಾಸ್ಚೊ ಜೋನ್ಸನ್ ಚಡ್ ಜಾವ್ನ್ ಕನ್ನಡ ತಶೆಂಚ್ ಇಂಗ್ಲಿಶ್ ಭಾಸೆಂತ್ಲೆಂ ಸಾಹಿತ್ಯ್ ವಾಚ್ತಾ ತಶೆಂಚ್ ಅಪ್ರೂಪ್ ಬರಯ್ತಾ. ಪುಣ್ ಕೊಂಕಣಿ ಭಾಸೆಚಿ ಜಾಣ್ವಾಯ್ ಸಯ್ ಆಸಾ ದೆಕುನ್ ತಾಚೆಥಾವ್ನ್ ಕೊಂಕಣಿಚೊ ಬರೊ ಫುಡಾರ್ ಆಶೆವ್ಯೆತ್.