ನಿರ್ಜೀವ್ (- ಉರ್ಜಿತಾ ಭೊಬೆ)

[ಕವಿತಾ] ನಿರ್ಜೀವ್ (- ಉರ್ಜಿತಾ ಭೊಬೆ)

ದೊಳೆ ಆಸುನ್ ಪಳೆಂವ್ಕ್ ಸಕುನ್‌ಯೀ ದೀಶ್ಟ್ ನಾಸ್ಚ್ಯಾಂಕ್, ಕಾನ್ ಆಸುನ್ ಆಯ್ಕುಂಕ್ ಸಕುನ್‌ಯೀ ಕಸ್ಲೊಚ್ ಬದ್ಲಾಪ್ ಕರಿನಾಸ್ಚ್ಯಾಂಕ್, ಜೀವ್ ಆಸುನ್‌ಯೀ ಧರ್ತೆಕ್ ಭಾರ್ ಜಾವ್ನ್ ಜಿಯೆತೆಲ್ಯಾಂಕ್ ಜೀವ್ ಮ್ಹಣ್ಚೆಂ ವಾ ಜಿವೆಂ ಮೊಡೆಂ? ಹೆಂ ಚಿಂತಪ್ ಭೋವ್ ಅಪುರ್ಭಾಯೆನ್ ಉಟಯಿಲ್ಲೆಂ ಹ್ಯಾ ಕವಿತೆಂತ್ ದಿಸುನ್ ಯೆತಾ.

ಕವಿತಾ ಜೆದ್ನಾಂ ಮನ್ಶಾಚ್ಯಾ ದಳ್ದಿರ್ ಸವಯೆಂಚೆರ್ ಆರ್ಸೊ ಧರ್ತಾ ತೆದ್ನಾ ತ್ಯಾ ಕವಿತೆಚಿ ಎಕೆಕ್ ವ್ಹಳ್ ದಿವ್ಯಾಪರಿಂ ಉಜ್ವಾಡ್ ಫಾಂಕಯ್ತಾ. ಪುಣ್ ಸಂಸಾರ್ ಬದ್ಲುಂಕ್ ಆಶೆತೆಲೆ ಕೆದ್ನಾಂಚ್ ಸ್ವತಾ ಬದ್ಲಲ್ಲೆ ನಾಂತ್ ವಾ ತ್ಯಾ ದಿಶೆನ್ ಚಿಂತುಂಕ್ ಸಯ್ತ್ ವ್ಹಚಾನಾಂತ್. ಸಾಹಿತಿ ಮ್ಹಳ್ಯಾರ್ ಅಪ್ಣಾಚೆಂ ಕಾಮ್ ಫಕತ್ ಬರಂವ್ಚೆಂ ಆನಿ ಸಮಾಜೆನ್/ಹೆರಾಂನಿ ತೆಂ ಪಾಳ್ಚೆಂ ಮ್ಹಳ್ಳೆಂ ಚಿಂತಪ್ ಚಿಂತ್ಚೆಚ್ ಆಮ್ಚ್ಯಾ ಸಮಾಜೆಂತ್ ಭರುನ್ ಗೆಲ್ಯಾತ್ ಆಸ್ತಾಂ ಹ್ಯಾ ಕವಿತೆಚೆಂ ರುದಾನ್ ಕಿತ್ಲೆಶ್ಯಾಂಚ್ಯಾ ಕಾನಾರ್ ಪಡತ್? ಪಡ್ಲೆಂ ತರ್‌ಯೀ ಕಸಲೆಂ ಪರಿವರ‍್ತನ್ ಜಾಯ್ತ್ ಮ್ಹಳ್ಳೆಂ ಅಧುರೆಂ ಸವಾಲ್.

[ಕವಿತಾ] ನಿರ್ಜೀವ್  (- ಉರ್ಜಿತಾ ಭೊಬೆ)

ನಿರ್ಜೀವ್  

ತಾಕಾ ದೊಳೆ ನಾಸ್ತಾತ್

ಬರೊ ಕೊಣ್ ವಾಯ್ಟ್ ಕೊಣ್ ಪಾರ್ಖುಪಾಕ್

ಆಪ್ಲೊ ಪರ್ಕಿ ವಳ್ಖುಪಾಕ್

ಮ್ಹಣೂನಚ್ ಕಾಯ್ ಆಮಿ ತಾಕಾ ನಿರ್ಜೀವ್ ಮ್ಹಣ್ಟಾತ್?

ಮಳ್ಬಾಚೆಂ, ಝಾಡಾಂಪೆಡಾಂಚೆಂ, ದೊಂಗ್ರಾಂಚೆಂ ರೂಪ್ ಘೆತಾ.

ಪೂಣ್ ಮನ್ಶಾ ಪ್ರಮಾಣ್ ಬದ್ಲಪಾಕ್ ತಾಕಾ ರಂಗ್ ನಾಸ್ತಾ.

ಮ್ಹಣ್ ಜಾಯ್ತ್ ಘಡ್ಯೆ

ಹಾತಯ್ ನಾಸ್ತಾತ್ ತಾಕಾ

ಜಾಯ್ ತೆಂ ಸ್ವೀಕಾರಪಾಕ್

ನಾಕಾ ತೆಂ ನ್ಹಯ್ಕಾರಪಾಕ್

ಮ್ಹಣೂನ್ ಕಾಯ್?

ತುಜ್ಯಾ ಪೊಶಾಂತ್ ಪಾವ್ಲೆಂ

ತುಜೆಂ ಜಾವ್ನ್ ರಾವ್ಲೆಂ

ಆಡಾಯ್ನಾ ಜಾಲ್ಯಾರ್

ನಿಖಳ್ ನಿರಂತರ್ ವ್ಹಾಂವ್ಲೆಂ

ತೆಂ ಜಾತ್ ಪಾತ್ ನಕ್ಳೊ

ತೆಂ ನೆಣಾ ಮ್ಹಜೆಂ ತುಜೆಂ

ತೆಂ ಜಾಣಾ ಫಕತ್

ವ್ಹಾಂವ್ಪಾಕ್

ತಾಕಾ ಲಾಗ್ನಾ ದೀಸ್ ಆನಿ ರಾತ್

ತೆಂ ಪಳಯ್ನಾ ದೀಕ್ ಆನಿ ವಾಟ್

ತೆಂ ವ್ಹಾಂವ್ತಾ

ಖಂಯ್ ಪಾವ್ಪಾಚಿ ನಾಸ್ತನಾ ಸಾಸ್ಣಾಯ್

ಮ್ಹಣೂನ್ ಕಾಯ್?

ತೆಂ ವ್ಹಾಂವ್ತಾ, ವ್ಹಾಂವ್ತಚ್ ಆಸ್ತಾ

ಹಾಕಾ ಲಾಗೂನ್ ತಾಕಾ ಲಾಗೂನ್

ಮ್ಹಾಕಾ ಲಾಗೂನ್ ತುಕಾ ಲಾಗೂನ್

ತೆಂ ಸಗ್ಳ್ಯಾಂಚೆಂ ಜೀವ್ನ್ ಜಾತಾ

ತೆಂ ಸಗ್ಳ್ಯಾಂಕ್ ಜೀವ್ನ್ ದಿತಾ

ಪೂಣ್ ಸ್ವತಾಃ ಮಾತ್ ಜಗ್ನಾ

ಮ್ಹಣೂನಚ್ ಘಡ್ಯೆ

ತಾಜೆಂ ನಾಂವ್ ಜೀವ್ನ್ ಆಸೂನ್ ಲೆಗೀತ್

ತಾಕಾ ಆಮಿ ಮ್ಹಣ್ಟಾತ್ ನಿರ್ಜೀವ್.

- ಉರ್ಜಿತಾ ಭೊಬೆ. [ಅಗೊಸ್ತ್, 2020]