ಮ‌ನ್ಶಾತ‌ಡಿರ್ (- ಜೈಸನ್ ಸಿಕ್ವೇರಾ)

[ಕವಿತಾ] ಮ‌ನ್ಶಾತ‌ಡಿರ್ (- ಜೈಸನ್ ಸಿಕ್ವೇರಾ)

ಕಾಯ್ದೆ ಕಾನುನಾಂಕ್ ಆಮ್ಚ್ಯಾ ದೇಶಾಂತ್ ಬೊರ್ಗೊಳ್ ನಾ - ಬೊರ್ಗೊಳ್ ಆಸ್ಚೊ ನಯ್ತಿಕತೆಚೊ.

ದೇವಿ-ದೇವತಾಂಕ್ ಆಮ್ಚ್ಯಾ ದೇಶಾಂತ್ ಬೊರ್ಗೊಳ್ ನಾ - ಬೊರ್ಗೊಳ್ ಆಸ್ಚೊ ಮನ್ಶಾಪಣಾಚೊ.

ಮಂದಿರ್-ಮಸ್ಜಿದ್-ಇಗರ್ಜಾಂಕ್ ಆಮ್ಚ್ಯಾ ದೇಶಾಂತ್ ಬೊರ್ಗೊಳ್ ನಾ - ಬೊರ್ಗೊಳ್ ಆಸ್ಚೊ ನಿತಿಚೊ.

ದೆಕುನ್ ಆಜ್ ಸಮಾಜೆಂತ್ ಧರ್ಮಾಚ್ಯಾ ನಾಂವಾನ್, ಜಾತಿಚ್ಯಾ ನಾಂವಾನ್ ಜಾಂವ್, ಭಾಸೆಚ್ಯಾ ನಾಂವಾನ್ ಜಾಂವ್ ಕೊಣಾಯ್ಕ್‌ಯೀ ಸೊಲುಂಕ್ ಜಾತಾ. ಜೆದ್ನಾಂ ಮನ್ಶಾಪಣಾಚೆರ್ ಅಸಲೊ ಜುಲುಮ್ ಚಲ್ತಾ ತೆದ್ನಾಂ ಪಯ್ಲೊ ಘಾಯೆಲ್ಲೊಚ್ ಕವಿ. ಆನಿ ಹೆಂ ಸಮ್ಜುಂಕ್ ಹಿ ಕವಿತಾ ಗವಾಯ್ ದೀತ್.

[ಕವಿತಾ] ಮ‌ನ್ಶಾತ‌ಡಿರ್ (- ಜೈಸನ್ ಸಿಕ್ವೇರಾ)

ಮ‌ನ್ಶಾತ‌ಡಿರ್  

ಹೊ ಆವಾಜ್ ವಿಪ್ರೀತ್ ಜಾಲೊ!

ಹ್ಯಾ ದ‌ರ್ಯಾಚಿ ಕಿರಿ ಕಿರಿ

ಲ್ಹಾರಾಂಚಿ ಜ‌ಬ‌ರ್ದ‌ಸ್ತಿ

ಪಿಶೆಂ ಲಾಗ್ಲಾಂ ಕಾಂಯ್ ಹಾಂಕಾಂ?

ಏಕ್ ಜಾತ್ ಸ‌ತ‌ಯ್ತಾತ್

ಸಕಾಳ್ ಥಾವ್ನ್ ಸಾಂಜ್ ಮ್ಹ‌ಣಾಸ‌ರ್

ದರ್ಯಾಚ್ಯೊ ಆರಾಬಾಯೊ ತ‌ರ್

ಲ್ಹಾರಾಂಕ್ ಖ‌ರಿಮ‌ಸ್ತ್.

ಹಾಂಚೆ ಕ‌ರ್ಕ‌ರೆ ಸೊಸುನ್'ಚ್

ಬುಡೊನ್ ವೆತಾ ಸುರ್ಯೊ

ಆನಿ ಹೆ ಚಾಪ್ಕಾಚೆ ರೂಕ್

ಕಾಂಟೆ ಕಾಂಟೆ ಕಾಂಠಾಳೊಚ್ ಯೆತಾ

ಹಾಂಚ್ಯೆ ಮೆಳಿಂತ್.

ದ‌ರ್ಯಾ ತ‌ಡಿರ್ ಬ‌ಸೊನ್ ಆದಿಂ

ಪ‌ದಾಂ ಕ‌ವಿತಾ ಘ‌ಡ್ತಾಲೆ ಖಂಯ್

ಹಾಸ್ಯಾಸ್ಪ‌ದ್!

ಹ್ಯಾ ಆವಾಜಾಂತ್ ಪ‌ದಾಂ?

ಎಕಾ ಲೆಕಾರ್ ಬ‌ರೆಂಚ್ ಜಾಲೆಂ

ಪುರ್ವ‌ಜ್ ರಾಯಾನ್ ಹಾಂಚೊ ಸಂಹಾರ್ ಕೆಲ್ಲೊ

ರಾಯಾ ವಿರೋಧ್ ಹೆರೆಜಿ ಉಚಾರ್ತಾಲೆ

ಸುಟ್ಕೆಚ್ಯಾ ಅಮ‌ಲಾರ್ ಆಸ್ಲ‌ಲೆ ಬೆಬ್ದೆ ಖಂಯ್ಚೆ!

- ಜೈಸನ್ ಸಿಕ್ವೇರಾ. [ಸಪ್ಟೆಂಬರ್, 2020]