ಮಿಟ್… (- ಡೊಮಿನಿಕ್ ಅರಾವ್ಜೊ)

[ಕವಿತಾ] ಮಿಟ್… (- ಡೊಮಿನಿಕ್ ಅರಾವ್ಜೊ)

ಸರ್ವ್ ಖಾಣಾಕ್ ರೂಚ್ ದಿಂವ್ಚೆಂ ಮಿಟಾಕ್ ಪುಣ್ ಮಿಟಾಚೆಂ ಮೋಲ್ ಕಿತ್ಲೆಂ? ದೀಸ್ ಗೆಲ್ಲೆಪರಿಂಚ್ ಎಕೆಕ್‌ಚ್ ಬದಲ್ನ್ ವೆಚ್ಯಾ ಹ್ಯಾ ದಿಸಾಂನಿ ತೆಂಪಾದಿಂ ಮೋಲ್ ಆಸ್‌ಲ್ಲ್ಯಾಚೆಂ ಮೋಲ್ ದೆಂವ್ಲಾಂ. ಪುಣ್ ಮಿನತ್, ಆನಿ ತ್ರಾಸ್ ಉಣೆಂ ಜಾಂವ್ಕ್ ನಾಂತ್. ಹಿ ಕವಿತಾ ಭಾರೀಕಾಯೆನ್ ವಾಚ್ಲಿ ತರ್ ಹ್ಯಾ ಕವಿತೆಚ್ಯಾ ಎಕೆಕಾ ಕಡ್ವ್ಯಾಂನಿ ಎಕೇಕ್ ಕಾಣಿ ಆಸಾ, ಆನಿ ಕಶೆಂ ಮೊಲಾಂ ಆಟ್ ಆಣ್ಯಾಚಿಂ ಜಾಲ್ಯಾಂತ್ ಮ್ಹಳ್ಳೆಂ ಆಸಾ. ಪುಣ್ ಅಖೇರಿಕ್ ಹ್ಯಾ ಸರ್ವಾಂಕ್ ಮೋಲ್ ದೀಂವ್ಕ್ ಪಡ್ಚೆಂ ಫಳಾಕ್.

[ಕವಿತಾ] ಮಿಟ್… (- ಡೊಮಿನಿಕ್ ಅರಾವ್ಜೊ)

ಮಿಟ್…

ಸಮ್ದಿರಾಚ್ಯಾ ಪೊಟಾಂತ್ಲೆಂ

ಆಗರಾಚ್ಯಾ ತಳ್ಯಾಂತ್ಲೆಂ

ರಗ್ತಾಚೊ ಘಾಮ್ ಕರುನ್

ಕುನ್ಡ್ಗ್ಯಾಂನಿಂ ಪುಂಜಾಯ್ಲೆಂ

ಉದ್ಕಾಂತ್ ಪಿಗಳ್ಪಾಚೆಂ

ಉಜ್ಯಾಂತ್ ಜಳ್ಪಾಚೆಂ

ಹಿರ್ಯಾ ಸಾರ್ಕ್ಯಾ ಖಡ್ಯಾಂಚೆಂ

ಮೊಲ್ ತುಜೆಂ ಆಟ್ ಆಣ್ಯಾಚೆಂ

ಪಾವ್ಸಾಂತ್ ಭಿಜ್ಪಿ ಕರನ್ಡ್ಯಾಂತ್ಲೆಂ

ಚುಲಿ ಫಾಟ್ಲ್ಯಾ ಬುಡ್ಕುಲ್ಯಾಂತ್ಲೆಂ

ಜೆವ್ಣಾ ಮೆಜಾರ್ ಬಸುನ್

ಜಿಬೆರುಚ್ ಖೆಳ್ಪಾಚೆಂ

ಜೆವಣ್ ಜಿನ್ಸಾಂ ತರಿಂಚೆಂ

ಮೊಲ್ ಹಜಾರ್, ಲಾಖಾಂಚೆಂ

ಮಿಟ್ ಫಕತ್ ಆಟ್ ಆಣ್ಯಾಚೆಂ

ಸಾಂಗ್ ಜೆವ್ಣಾಕ್ ಕಿತ್ಯಾಕ್ ಘಾಲ್ಚೆಂ?

ನದಿ, ಖಾನ್ಡಿಂತ್ಲೆಂ

ದರ್ಯಾ, ಬೊಟಿ ರಾಂಪ್ಣಿಂತ್ಲೆಂ

ಜಿವ್ ರಿಸ್ಕೆರ್ ಘಾಲುನ್

ಜಾಳಾಂನಿಂ ಸಾಂಪ್ಡಾಯ್ಲಲೆಂ

ರುಪ್ಯಾ ಸಾರ್ಕ್ಯಾ ಆಂಗಾಚೆಂ

ಮೊಲ್ ಮೊಳ್ಬಾಕ್ ತೆಂಕ್ಪಾಚೆಂ

ಮಿಟ್ ಫಕತ್ ಆಟ್ ಆಣ್ಯಾಚೆಂ

ಸಾಂಗ್ ನುಸ್ತ್ಯಾಕ್ ಕಿತ್ಯಾಕ್ ಲಾಂವ್ಚೆಂ?

ಝಾಡ್ ಕುಳಾಗರಾಂತ್ಲೆಂ

ಫಳಾಂನಿಂ ಮಾತ್ಲೆಲೆಂ

ಝಾಡಾರ್ ಫಾತರ್ ಶೆವ್ಟುನ್

ಫಳ್ ಝಡಯ್ಲೆಂ

ಪಾತಳ್, ದಾಟ್ ಕಾತಿಚೆಂ

ಆಂಬೊಟ್, ಗಡ್ ಜಾಲ್ಯಾರುಯ್ ಚಿರ್ಚೆಂ

ಮಿಟ್ ಫಕತ್ ಆಟ್ ಆಣ್ಯಾಚೆಂ

ಸಾಂಗ್ ಫಳಾನ್ ಕಿತ್ಯಾಕ್ ಭರ್ಚೆಂ?

- ಡೊಮಿನಿಕ್ ಅರಾವ್ಜೊ. [ಆಗೊಸ್ತ್, 2020]