ಮಾಂಯ್ ಆನಿ ಮಾತಾ (- ಡೊಮಿನಿಕ್ ಅರಾವ್ಜೊ)

[ಕವಿತಾ] ಮಾಂಯ್ ಆನಿ ಮಾತಾ (- ಡೊಮಿನಿಕ್ ಅರಾವ್ಜೊ)

ಆವಯ್ ವ ಮಾಂಯ್ ಮ್ಹಳ್ಳೊ ಸಬ್ಧ್‌ಚ್ ಅಗಾಧ್ ಗುಂಡಾಯೆಚೊ ಏಕ್ ಸಾಗೊರ್. ಹ್ಯಾ ಗುಂಡಾಯೆಕ್ ಮಾಪ್‌ಲ್ಲಿಂ ನಾಂತ್, ಹ್ಯಾ ಸಾಗೊರಾಚ್ಯಾ ತಡಿಕ್ ಮೆಜ್‌ಲ್ಲಿಂ ನಾಂತ್. ಪುಣ್ ಏಕ್ ಆವಯ್ ಹ್ಯಾ ಧರ್ತೆಚೆರ್ ಅಪ್ಲೆಂ ಕಾಮ್ ಕರುನ್‌ಚ್ ವೆತಾ, ಕೆದಿಂಚ್ ಕೊಣಾಥಾವ್ನ್, ಕಿತೆಂಚ್ ಮಾಗಿನಾ. ಹಿ ಆವಯ್ ಕೊಣ್ ಮ್ಹಳ್ಳೆಂ ಸಮ್ಜುಂಕ್ ತ್ರಾಸ್ ನಾಕಾತ್.

[ಕವಿತಾ] ಮಾಂಯ್ ಆನಿ ಮಾತಾ (- ಡೊಮಿನಿಕ್ ಅರಾವ್ಜೊ)

ಮಾಂಯ್ ಆನಿ ಮಾತಾ

ಅಸ್ತುರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

ಅಸ್ತುರಿಯೆಚ್ಯಾ ಗರ್ಭಾಂತ್

ಭುರ್ಗೆಂ ಜಲ್ಮತಾ

ಧರ್ತರಿಯೆಚ್ಯಾ ಪಟಾಂತ್

ಝಾಡಾಚಿ ರಂಪಿ ಕಿರ್ಲತಾ

ಅಸ್ತುರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

ಭುರ್ಗ್ಯಾಕ್ ಛಾತಿಯೆಚ್ಯಾ

ದುದಾಂತ್ ಶಿಂಪ್ತಾ

ಝಾಡಾಂ ಮಾತಿಯೆಚೆ

ಅಲ್ಸಾಣಿನ್ ಫಾಂಕಾರ್ತಾ

ಅಸ್ತರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

ವಾತಿ ಪರಿಂ ಜಳನ್

ಭುರ್ಗ್ಯಾಕ್ ವಾಡಯ್ತಾ

ಝಾಡಾಂ ವತಾನ್ ಕಡನ್

ಜಿಣೆಕ್ ಸಾವ್ಳಿ ದಿತಾ

ಅಸ್ತುರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

ಮಿಠಾಚಿ ಕಣಿ ಜಾವ್ನ್

ಸಗ್ಳ್ಯಾಂಚೊ ಸುವಾದ್ ಜಾತಾ

ಫಳಾಂಚಿ ತಳಿಂ ಜಾವ್ನ್

ಜಿಣೆಚಿ ಭುಕ್ ಮಾರ್ತಾ

ಅಸ್ತುರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

ಜೊ ಹಾತ್ ಪಾಳ್ಣೆಂ ಧಲಯ್ತಾ

ತೊ ಹಾತ್ ಸಂವ್ಸಾರ್ ಚಲಯ್ತಾ

ನಿಸರ್ಗಾಚ್ಯಾ ರುಪಾಂತ್

ಪ್ರಿಥ್ವೆಚೊ ಸಾಂಬಾಳ್ ಕರ್ತಾ

ಅಸ್ತುರಿ ಮ್ಹಜಿ ಮಾಂಯ್

ಧರ್ತರಿ ಮ್ಹಜಿ ಮಾತಾ

- ಡೊಮಿನಿಕ್ ಅರಾವ್ಜೊ. [ಜುಲಾಯ್, 2020]