ಮಿ ಟು (- ಸರಸ್ವತಿ ನಾಯ್ಕ್)

[ಕವಿತಾ] ಮಿ ಟು (- ಸರಸ್ವತಿ ನಾಯ್ಕ್)

’ಮಿ ಟು’ ದೋನ್ ಸಬ್ಧ್ ಫಕತ್ ದಾದ್ಲ್ಯಾಂಕ್ ಮಾತ್ ನ್ಹಯ್, ಮನ್ಶಾಕುಳಾಕ್‌ಚ್ ಲಜೆಕ್ ಘಾಲ್ಲೆ ಸಬ್ಧ್. ಸಮಾಜೆಂತ್ ಪ್ರತಿಶ್ಟಾ, ಮಾನ್-ಮರ್ಯಾದ್ ಮ್ಹಳ್ಳಿಂ ಮುಖೊಟಿಂ ನ್ಹೆಸುನ್ ಮಿರಂವ್ಚೆ ಕಿತ್ಲೆಶ್ಯಾಂಚಿಂ ಗುಪಿತ್ ಕರ್ತುವಾಂ ಹ್ಯಾ ಸಭ್ದಾಂನಿ ಲಿಪ್ಲ್ಯಾತ್? ದುಡು, ಬಳ್, ವಶೀಲಾಯ್ ಆಸ್ಲೆಲ್ಯಾಂನಿ ಕಾಯ್ದೆ ಕಾನುನ್ ಮೊಲಾಯ್ಲೆ ಪುಣ್ ಹಾಂಗಾ ಜೀಕ್ ಕೊಣಾಚಿ ಜಾಲಿ ಹಾರ್ ಕೊಣಚಿ ಜಾಲಿ ಮ್ಹಳ್ಳೆಂ ಗರ್ಜೆಚೆಂ. ಕೊಣ್‌ಯೀ ಜಿಕುಂದಿ ವಾ ಸಲ್ವುಂದಿ ಪುಣ್ ಖರೆಪಣಾನ್ ಸಲ್ವಣಿ ಜಾಲ್ಲಿಚ್ ಮನ್ಶಾಪಣಾಚಿ.

ಬಾಯ್ ಸರಸ್ವತಿ ನಾಯ್ಕ್ ಅಸ್ತುರೆಚ್ಯಾ ಸಂವೇದನಾಂಕ್ ಅಭಿವ್ಯಕ್ತ್ ಕರ್ಚಿ ಕವಿ. ತಿಚ್ಯಾ ಹ್ಯಾ ಕವಿತೆಂತ್ಲ್ಯಾ ತಾಳ್ಯಾಕ್ ಆನಿ ತ್ಯಾ ತಾಳ್ಯಾಪಾಟ್ಲ್ಯಾ ಕಾಣಿಯಾಂಕ್ ಸಮ್ಜುಂಕ್ ತುಕಾಚ್ ಸೊಡ್ತಾಂ.

[ಕವಿತಾ] ಮಿ ಟು (- ಸರಸ್ವತಿ  ನಾಯ್ಕ್)

ಮಿ ಟು

ಖಂಯ್ಚ್ಯಾಯ್ ಕೃತೀಚೊ

ನಿಷೆಧ್ ಕೌತುಕ್

ಜಾವ್ಚೊ ತ್ಯಾಚ್ ವಕ್ತಾರ್

ಅನ್ಯಾಯಾಚೆರ್ ಪ್ರತಿಹಲ್ಲೊ

ಜಾವ್ಚೊ ತ್ಯಾಚ್ ಖಿಣಾಕ್

ತರಚ್ ಫುಟ್ಟಾ ವಾಚಾ ಅನ್ಯಾಯಾಕ್

ಆಪ್ಲ್ಯಾ ಮನಾನ್

ಆಸ್ಲ್ಯಾ ಖೆರೀಜ್

ಕೊಣೂಚ್ ಆಪ್ಲ್ಯಾಕ್

ಹಾತ್ ಲಾಂವ್ ಶಕ್ನಾ

ಹಿ ಭಾವ್ನಾ ಜೆನ್ನಾ

ಬಾಯ್ಲ್ ಮನ್ಶೆಚ್ಯಾ

ಅಂತಕರ್ಣಾನ್ ಕರ್ತಲಿ ಪ್ರಭುತ್ವ್

ತೆನ್ನಾಚ್ ಲಾಗ್ತಲಿ

ತಿಚ್ಯಾ ಧರ್ಯಾಚಿ ಕಸೊಟಿ

ಆನಿ ತಿ ಜಾತ್ಲಿ

ಧಿರ್ವಾನ್ ತನಾನ್

ಆನಿ ಮನಾನ್

ಮಾಗೀರ್ ತಿಚಿ ಆಪ್ಲೀಚ್

ಪಾಖಾಂ ಆಸ್ತಲಿ

ಆನಿ ಮುಕ್ತ್ ಉಡ್ಪಾಕ್

ಆಸ್ತಲೆಂ ಉಕ್ತೆಂ ತಿಕಾ

ತಿಚೆಂ ಆಪ್ಲೆಂಚ್ ಮಳಬ್

- ಸರಸ್ವತಿ ನಾಯ್ಕ್. [ಜನೆರ್, 2020]