ಮ್ಹಜೊ ಅವ್ತಾರ್ ಸೊಂಪ್ತಲೊ (- ಮನೋಜ್ ನರೇಂದ್ರ ಕಾಮತ್)

[ಕವಿತಾ] ಮ್ಹಜೊ ಅವ್ತಾರ್ ಸೊಂಪ್ತಲೊ (- ಮನೋಜ್ ನರೇಂದ್ರ ಕಾಮತ್)

ಮನೀಸ್ ಹ್ಯಾ ಸಂಸಾರಾಂತ್ ಅಪ್ಲ್ಯಾ ಜಿಣ್ಯೆ ಆವ್ದೆಂತ್ ಸಭಾರ್ ರಿತಿಚೊ ಪಾತ್ರ್ ಖೆಳತಾ. ಸಾಂಗಪಾಕ್, ದಾಕವ್ಪಾಕ್, ತಶೆಂಚ್ ಹೆರ್. ಹ್ಯಾ ಪಾತ್ರಾಂಕ್ ತೊ ಖೆಳುನ್ ಗೆಲ್ಲೆಪರಿಂಚ್ ಅಪ್ಲೆಂ ಆವ್ಕ್ ಸಂಪಯ್ತಾ. ಪುಣ್ ಹಿಂ ಚಿಂತನಾಂ ಕಿತ್ಲೆಶ್ಯಾಂಕ್ ಮನಾಂತ್ ಅಯಿಲ್ಲಿಂ ಆಸಾತ್? ಹೆಂ ಅಧುರೆಂ ಪ್ರಶ್ನ್.

[ಕವಿತಾ] ಮ್ಹಜೊ ಅವ್ತಾರ್ ಸೊಂಪ್ತಲೊ (- ಮನೋಜ್ ನರೇಂದ್ರ ಕಾಮತ್)

ಮ್ಹಜೊ ಅವ್ತಾರ್ ಸೊಂಪ್ತಲೊ

ಎಕ್ ಅವ್ತಾರೂಚ್

ತೊ ಸೊಂಪ್ತಲೊಚ್ ಕೆನ್ನಾತರಿ

ಸೊಪುಂಕೂಚ್ ಜಾಯ್!

ನವೊ ಅವ್ತಾರ್ ಘೆವ್ಪಾಖಾತೀರ್

ಎಕ್ ನವಿ ಸುರ್ವಾತ್ ಕರ್ಪಾಖಾತೀರ್

ಆಡಾಂಗಿ ಮಸ್ತೆಪಣ್ ಜಾಲೆಂ

ಬಾಳ್ಪಣಾ ಖೆಳ್ ಜಾಲೆ

ಇಶ್ಟಾಗತಿ ಮೆಳ್ ಜಾವ್ನ್

ಮಾಯೆಚೆ ಸುಮೆಳ್ ಜಾಲೆ

ಶಿಕ್ಷಾ ಜಾಲಿ, ತೊಖ್ಣಾಯ್ ಜಾಲಿ

ರಾಖಣ್ ಜಾಲಿ, ರಾಖೂನ್ ಜಾಲೆಂ

ಜಾಣ್ಟೆ ಪಿಳ್ಗೆಕ್

ಸಾಂಬಾಳೂನ್ ಜಾಲೆಂ

ತರ್ಣಾಟೆ ಪಿಳ್ಗೆಕ್

ವಾಟ್ ದಾಖೊವ್ನ್ ಜಾಲೆಂ

ಶಿಕಪ್ ಪುರಾಯ್ ಕರೂನ್ ಜಾಲೆಂ

ಹೆರಾಂಕೂಯ್ ಶಿಕೊವ್ನ್ ಜಾಲೆಂ

ಭುರ್ಗ್ಯಾಂಕ್ ವಾಡೊವ್ನ್ ಜಾಲೆಂ

ತಾಂಕಾಂ ಫುಡಾರಾಚಿ ವಾಟ್

ದಾಖೊವ್ನ್ ಜಾಲೆಂ

ಆಪ್ಲೆ ಭಾಶೆನ್

ಜಿಯೆವ್ನ್ ಜಾಲೆಂ

ದುಸ್ರ್ಯಾಂಭಶೆನೂಯ್

ಜಿಯೆವ್ನ್ ಜಾಲೆಂ

ಆತಾಂ ಮೆಕ್ಳೊಂ ಜಾವಂಕ್ ಜಾಯ್

ನವಿ ವಾಟ್ ರೆಖೂಂಕ್ ಜಾಯ್

ದೂಖ್ ಜಾಲೆಂ, ಸುಖೂಯ್ ಜಾಲೆಂ

ರೂಚ್ ಘೆವ್ನ್ ಅರುಚೂಯ್ ಜಾಲೆಂ

ಘರಾಬೊ ಜಾಲೊ

ಸಮಾಜ್ ಜಾಲೊ

ಎಕ್ಟೆಪಣ್ ಜಾಲೆಂ

ಸಮ್ಜಿಕಾಯ್ ಜಾಲಿ

ವಾದ್ ಆನಿ ವಿವಾದ್ ಜಾಲೆ

ಜಿಣೆಚೆ ಸಗ್ಳೆ ಸಾದ್ ಜಾಲೆ

ಪಾನಾಂ ಝಡ್ಲಿಂ, ನವಿಂ ಆಯ್ಲಿಂ

ಪರ್ತೂನ್ ತಿ ಝಡ್ಟಲಿಂ

ಜಿಣೆಚೆ ರುತು ಬದ್ಲಲೆ

ಕಾಳೊಖ್ ಜಾಲೊ, ಉಜ್ವಾಡ್ ಜಾಲೊ

ಹಾರ್ ಜಾಲಿ, ಜೈತ್ ಜಾಲೆಂ

ಅವ್ಮಾನ್ ಜಾಲೊ, ಮಾನ್ ಜಾಲೊ

ತರ್ನಾಟೆಂಪಣ್ ಜಾಣ್ಟೆಂ ಜಾಲೆಂ

ಮೊಗ್, ವಿರಹ್ ಸಪನ್ ಜಾಲೆಂ

ರೌದ್ರ್ ರೂಪ್ ಶಾಂತ್ ಜಾಲೆಂ

ನಾದ್ ವಾಜೂನ್ ಮೊನೊ ಜಾಲೊ

ಸಾದ್ ತುಜೊ ಶೆಣೂನ್ ಗೆಲೊ

ಕಾರಣ್ ಜಾಲೆಂ, ರಾಜ್ಕಾರಣ್ ಜಾಲೆಂ

ರಾಸ್ಲಿಲೆಚೆ ಉಗ್ಡಾಸ್ ಜಾಲೆ

ತತ್ವಗಿನ್ಯಾನ್ ಜಾಲೆಂ, ವಿದ್ನ್ಯಾನ್ ಜಾಲೆಂ

ಧರ್ಮ್ ಆನಿ ಅಧರ್ಮ್ ಜಾಲೊ

ಸಂಘರ್ಶ್, ದ್ವಂದ್, ಸಮೊಪಚಾರ್ ಜಾಲೊ

ರಾಜಾ- ಪ್ರಜಾ, ಉಪಾದೆಸ್ ಜಾಲೊ

ಸತ್ತೆಚೊ ಸೊಸ್ ಜಾಲೊ

ಸ್ವಾರ್ಥ್ ಆನಿ ಪರ್ಮಾರ್ಥ್ ಜಾಲೊ

ಮೊಖ್ ಆನಿ ಶೊಕ್ ಜಾಲೊ

ಕ್ರೌರ್ಯ್ ಆನಿ ಭಾವ್ಕಿ ಜಾಲಿ

ಬುಟ್ಟಿ ಯೆವ್ನ್ ವ್ದಾರ್ಕಾ

ಶಾಪೀತ್ ಗುಡುಪ್ಪ್ ಜಾತ್ಲಿ!

ಆಯ್ಜ್ ಜೀವ್ ಶಾಂತ್ ಜಾವ್ನ್

ರಾಂನಾಂತ್ಲ್ಯಾ ಹರ್ಣಾ ಆಂಗಾರ್

ಜರಾಚೊ ಬಾಣ್ ಪಾಂಯಾಕ್ ಭೆದೂನ್

ಅವ್ತಾರ್ ಮ್ಹಜೊ ಸೊಂಪ್ತಲೊ

ಅವ್ತಾರ್ ಮ್ಹಜೊ ಸೊಂಪ್ತಲೊ

- ಮನೋಜ್ ನರೇಂದ್ರ ಕಾಮತ್. [ಮಾಯ್, 2020]