ಮ್ಹಜೆಂ ಮಾಜರ್ ಬುದ್ವಂತ್ ಜಾಲಾಂ [ಆರ್.ಎಸ್.ಭಾಸ್ಕರ್]

ವ್ಹಾ! ಇತಲೆಂಚ್ ಭಗಲೆಂ ಜೆದ್ನಾಂ ಹಿ ಕವಿತಾ ಪಯಲೆ ಪಾವಟಿಂ ವಾಚಲಿ ತೆದನಾಂ. ಕಿತೆಂ ಕವಿತಾ, ಕಿತೆಂ ವಿಚಾರ್? ಏಕ್ ಮಾಜಾರ್ ಅಪಲಿ ಸಂಯಬಿಕ್ ಸವಯೆಥಾವನ್ ಮುಕತ್ ಜಾವನ್ ಸುಧಾರತಾ; ಎಕಾ ಉಂದಿರಾಕ್ ಧರುನ್ ರಾವಲ್ಯಾರೀ ಕಿತೆಂಚ್ ಕರಿನಾ, ಚೊರುನ್ ಭಾಗಡೆ ಖಾಯನಾ, ಚೊರುನ್ ದೂದ್ ಪಿಯೆನಾ, ಸುಣೆ ಆನಿ ಕಾವಳ್ಯಾಚ್ಯಾ ಝಗಡ್ಯಾಂತ್ ಮಧೆಂ ಪಡಾನಾ... ಬುಧವಂತ್ ಜಾಲಾಂ...

ಸಾಂಕೇತಿಕ್ ಅರಥಾನ್ ಹಿ ಕವಿತಾ ಕಾಂಯ್ ಕಿತೆಂ ಕಾಣಯೊ ಸಾಂಗತಾತ್, ಶಿಕಯತಾತ್. ಒಲ್ತೇರಾಚ್ಯಾ ಬಗಲೆನ್ ಬಸತಾ ಆನಿ ಕವಿ ಜೆದನಾಂ ವಾಚತಾ ತೆದನಾಂ ತೆಂ ಮಾಜರ್ ಸಯತ್ ಆಯಕತಾ ಆನಿ ಸಮಜಣಿ ತ್ಯಾ ಮಜಾರಾಕ್ ಮೆಳತ ದೆಕುನ್ ಮಾಜರ್ ಬುಧವಂತ್ ಜಾಲಾಂ. ಆನಿ ಮನೀಸ್? ವಿಡಂಬನಾತಮಕ್ ರಿತಿನ್ ಹೆಂ ಮಾಜಾರ್, ಜಾಕಾ ಮನೀಸ್ ಜಾಲ್ಲೊ ’ಶನಿ’ ಮ್ಹಣತಾ, ಆತಾಂ ತೆಂಚ್ ಮಾಜಾರ್ ’ಮನೀಸ್’ ಮ್ಹಳ್ಳ್ಯಾಕ್ ಜೀವಿಕ್ ಶನಿ ಮ್ಹಣ್ ಭಗಾಶೆಂ ಕರತಾನಾ ಜಿಕತಾ ಕವಿತಾ.

ಕೇರಳಾಚೊ ನಾಮಣೆಚೊ ಕೊಂಕಣಿ ಕವಿ ಬಾಬ್ ಆರ್. ಎಸ್. ಭಾಸ್ಕರ್ ಹಾಂಗಾಸರ್ ಏಕ್ ಭೋವ್ ಅಪುರ್ಭಾಯೆಚಿ ಕವಿತಾ ಘೆವನ್ ಆಯಲಾ., ಆತಾಂ ಹ್ಯಾ ಕವಿತೆಚೊ ಸ್ವಾದ್ ಚಾಕುಂಕ್ ತುಮಕಾಂ ಆಪಯತಾಂ.

[ಕವಿತಾ] ಮ್ಹಜೆಂ ಮಾಜರ್ ಬುದ್ವಂತ್ ಜಾಲಾಂ [ಆರ್.ಎಸ್.ಭಾಸ್ಕರ್]

ಮ್ಹಜೆಂ ಮಾಜರ್ ಬುದ್ವಂತ್ ಜಾಲಾ

ಮ್ಹಜೆಂ ಮಾಜರ್ ಆಸಾ ನ್ಹಯ್

ಆತಾಂ ಬುದ್ವಂತ್ ಜಾಲಾ

ಜಲ್ಮ್ ಸಭಾವಾಂತ್ಚ್ಯಾನ್

ಆತಾಂ ತೆಂ ಬದ್ಲಾ

ಆದೀಂಚೆ ವರಿ ತೆಂ ಆತಾಂ

ಹುಂದ್ರಾ ಫಾಟ್ಲ್ಯಾನ್ ಘಾಂವ್ ಘೆನಾ

ಹುಂದೀರ್ ಯೆವ್ನ್ ಮುಖಾರ್ ರಾವ್ಲೊ ತರೀಯ್

ತೆಂ ಆಂಗಾರ್ ಹಾತ್ ಘಾಲ್ನಾ

ದೊಳೆ ಧಾಪೂನ್ ದೂದ್ ಪಿವ್ಪಾಚಿ

ಸಂವ್ಯ್ ತಾಣೆಂ ಸೊಡ್ಲ್ಯಾ

ಆತಾಂ ತೆಂ ದೊಳೆ ಉಕ್ತೆಚ್ ದವ್ರೂನ್

ದೂದ್ ಪಿವ್ನು ಸರೆಯ್ತಾ

ಧಾಂಪೂನ್ ದವ್ರ್ಲ್ಯಾ ಕುಳ್ಯಾಂತ್ ಸಾವ್ನ್

ಆತಾಂ ತೆಂ ಬಾಗ್ಡೊ ಚೊರೂನ್ ಘೆನಾ

ಬಾಗ್ಡ್ಯಾ ಕುಟುಕೊ ಬಸೀಂತ್ ದವ್ರನ್ ದಿತ್ನಾ

ಮಾತ್ ತೆಂ ಕಾಡೂನ್ ಖಾತಾ

ಸುಣ್ಯಾಚೆಂ ಕಾವ್ಳ್ಯಾಚೆಂ ಝಗ್ಡ್ಯಾಂತ್

ಆತಾಂ ತೆಂ ವಾಂಟೆಕ್ ಪಾವಂಕಚ್ ನಾ

ಚಾನ್ನೆಚ್ಯೊ ಆವಾಜ್ ಲೆಗೀತ್

ತಾಜೆಂ ಲಕ್ಷ್ ಒಡೂಂಕ್ ಪಾವ್ನಾ

ನುಸ್ತೆಕಾನ್ನ್ ಆಖ್ಡ್ಯಾಂತ್ ಯೆತಾ

ವ್ಹಡ್ ವ್ಹಡಾನ್ ಉಲ್ಲೊ ಮಾರ್ತಾ

ಮ್ಹೊಣ್ ತೆಂ ಆತಾಂ ಧಾವ್ನ್ ಪಾವ್ನಾ

ಬಸಿಲ್ಲೆಕಡೆಚ್ಯಾನ್ ತೆಂ ಹಾಲ್ತನಾ ದಿಸ್ನಾ

ಮಿನ್ನುಬಾಯ್ ತಾಕಾ ಯೊ ಮ್ಹಣ್ಟಾ

ಇಲ್ಲೆ ವೆಳಾ ಖೆಳ್ಯಾ ಮ್ಹಣ್ಟಾ

ತೆಂ ಪೂಣ್ ಜಾಪೂಚ್ ದಿನಾ

ತಾಕಾ ವೆಳ್ ನಾ ನ್ಹಿ

ಆದಿಂ ಮಂದಿ ಹಾಗೂಂಕ್ ಮುತೂಂಕ್

ತೆಂ ಭಾಯ್ರ್ ದಾವ್ತಾ ಹೆಂ ಖರೆಂ

ಉರಿಲ್ಲೊ ವೆಳ್ ಮ್ಹಜ್ಯಾ ಒಲ್ತೆರಾಕಡೆಂ ಬಸ್ತಾ

ಆನಿ ಹಾಂವ್ ವಾಚ್ತನಾ ತೆಂ ಆಯ್ಕೂಂನ್ ಘೆತಾ

ಕಿತ್ಯಾಕ್ ಜಾಣ್ ?

ತೆಂ ಆತಾಂ ಬುದ್ವಂತ್ ಜಾಲಾ

- ಆರ್.ಎಸ್.ಭಾಸ್ಕರ್  [ಎಪ್ರಿಲ್ 2018]

ಆರ್.ಭಾಸ್ಕರ್ ಶೆಟ್ಟಿ: ಕೇರಳಾಚೆ ನಾಮಣೆಚೆ ಕೊಂಕಣಿ ಕವಿ. ಅಕ್ಶರಾಂ (1992), ಅಕ್ಷತಾಂ (1997), ಪಂಚಯ್ತನಾ (1998), ಗುರುಚರಣಿ (2000), ಚಿನು ಮಿನು ಚಾನೊ, ಯುಗಪರಿವಾರ್ತನಂಚೊ ಯಾತ್ರಿ (2014) ಹಾಂಚೆ ಪರ್ಗಟ್‌ಲ್ಲೆ ಕವಿತಾಜಮೆ. ತಾರಾಬಾಯಿ ವಿಷ್ಣು ಮ್ಹಾಪ್ಶೆಂಕಾರ್ ವೈಷ್ಯ ಭಾರತಿ ಪುರಸ್ಕಾರ್ (1996), ಕೊಂಕಣಿ ಭಾಶಾ ಪ್ರಚಾರ್ ಸಭಾ ಪುರಸ್ಕಾರ್ (1994) ಹಾಂಕಾಂ ಯೆದೊಳ್ ಮೆಳ್‌ಲ್ಲೆ ಪುರಸ್ಕಾರ್.