ಮಾಯಾಗ್ ಜಾಲ್ಲ್ಯೊ ಕವಿತಾ [ಜೋನ್ ಸುಂಟಿಕೊಪ್ಪ]

[ಕವಿತಾ] ಮಾಯಾಗ್ ಜಾಲ್ಲ್ಯೊ ಕವಿತಾ [ಜೋನ್ ಸುಂಟಿಕೊಪ್ಪ]

ಜಶೆಂ ಅಭಿವ್ಯಕ್ತಿ ಸಯ್ತ್ ಏಕ್ ಪ್ರಕಾರಾರ್ ವಾ ಏಕ್ ಸ್ವರೂಪಾರ್ ಆಸಾನಾ, ತಶೆಂ ಬಂಡಾಯಾಕ್/ವಿದ್ರೋಹಾಕ್ ಸಯ್ತ್ ರೂಪ್ ನಾ ಮಾಪ್ ನಾ. ಕವಿತಾ ಮ್ಹಳ್ಯಾರ್ ಜಿವಿತಾಚೊ ಆವಾಜ್ ಉತ್ರಾಂನಿ ಅಭಿವ್ಯಕ್ತ್ ಕರ್ಚೆಂ ಮಾಧ್ಯಮ್. ಮನಿಸ್ ಮ್ಹಣ್ತಚ್ ಸುಕ್-ದೂಕ್, ಆಶಾ-ನಿರಾಶಾ, ಸುಕ್ತಿ-ಭರ್ತಿ ಸಾಮಾನ್ಯ್. ಪುಣ್ ಎಕ್ಲೊ ಸುಕ್ತೆಂತ್ ಆಸ್ತಾನಾ ಎಕ್ಲೊ ಭರ್ತೆಂತ್ ಆಸ್ಚೆಂ ಸಹಜ್. ಆನಿ ಭರ್ತೆಂತ್ ಆಸ್ಚಾನ್ ಸುಕ್ತೆಂತ್ ಆಸ್ಚ್ಯಾಕ್ ಕುಮ್ಕೆಚೊ ಹಾತ್ ದಿಂವ್ಚೊ ಮನ್ಶಾಧರ್ಮ್. ಆತಾಂ ಭರ್ತೆಂತ್ ಆಸ್ಚಾನ್ ಸುಕ್ತೆಂತ್ ಆಸ್ಚ್ಯಾಕ್ ಅಪ್ಲೊ ಕುಮ್ಕೆ ಹಾತ್ ಕಸೊಯ್ ದಿಲೊನಾ, ಶಿವಾಯ್ ತೊ ಸುಕ್ತೆಂತ್ ಮೊರೊಂದಿ ಮ್ಹಣುನ್ ಎಕ್ಲ್ಯಾಚ್ಯಾ ಅಸ್ಕತಾಯೆಚೊ ಫಾಯ್ದೊ ಜೊಡ್ಚೊ, ಪ್ರತ್ಯೇಕ್ ಜಾವ್ನ್ ಜೊ ಫಾಯ್ದೊ ಅಪ್ಣಾಕ್ ಉಂಚಾಯೆಕ್ ಪಾವಯ್ತಾ ಮ್ಹಳ್ಳ್ಯಾ ಆಬ್ಲೇಶಾಂತ್ ತರ್ ಹೆಂ ಮನ್ಶಾಧರ್ಮಾಚೆರ್ ಮಾಲ್ದಿಸಾಂವ್. ಕವಿತೆಂತ್ ವಿದ್ರೋಹಾಚೆಂ/ಬಂಡಾಯಾಚೆಂ ಉಗಮ್ ಜಾತಾ ಸಯ್ತ್ ತೆದ್ನಾಂಚ್.

ಜೋನ್ ಸುಂಟಿಕೊಪ್ಪಚ್ಯೊ ಕವಿತಾ ಎಕಾ ಥರಾಚ್ಯೊ ವಿದ್ರೋಹಾಚ್ಯೊ, ಪುಣ್ ಕೆದಿಂಚ್ ಆವಾಜ್ (ದಾಕವ್ಪ್) ಕರಿನಾಸ್ಚ್ಯೊ ದೆಕುನ್ ತಾಚೆಂ ಫುಡ್ಲದ್ ಕವಿತಾಪುಸ್ತಕ್ ’ಮೊನಿ ಬೋಬ್’ ಮ್ಹಾಕಾ ಮಾತ್ರ್ ನ್ಹಯ್, ಕವಿತಾ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂ ಖರೆಂಪಣಿಂ ಸಮ್ಜಲ್ಲ್ಯಾಂಕ್ ಹೆಂ ಪುಸ್ತಕ್ ಖಾಸ್ ಜಾಲಾಂ. ಜಿವಿತಾಚ್ಯಾ ಸುಕ್ತಿ-ಭರ್ತೆಂತ್, ಚಡ್ಣಿ-ಪಡ್ಣೆಂತ್ ಮೆತೆರ್ ಜಾವ್ನ್ ಕವಿತಾಶೆತಾಥಾವ್ನ್ ಕಾಂಯ್ ತೇಂಪ್ ಪಯ್ಸ್ ರಾವ್‌ಲ್ಲೊ ಹೊ ಆತಾಂ ಅಪ್ಲಿ ’ಮಾಯಾಗ್ ಜಾಲ್ಲಿ ಕವಿತಾ’ ಘೆವ್ನ್ ಆಯ್ಲಾ. ಕವಿತೆಚಿಂ ಎಕೇಕ್ ಉತ್ರಾಂ ಕವಿತ್ವಾಚೆಂ ಮುಳಾವೆಂ ಚಿಂತಪ್ ಕಸಲೆಂ ಮ್ಹಳ್ಳೆಂ ಭೋವ್ ಅಪುರ್ಭಾಯೆನ್ ಉತ್ರಾಯ್ತಾ.

[ಕವಿತಾ] ಮಾಯಾಗ್ ಜಾಲ್ಲ್ಯೊ ಕವಿತಾ [ಜೋನ್ ಸುಂಟಿಕೊಪ್ಪ]

ಮಾಯಾಗ್ ಜಾಲ್ಲ್ಯೊ ಕವಿತಾ 

ಕಿತ್ಲೆಶ್ಯೊಗೀ ಮ್ಹಜೊ ಕವಿತಾ

ರಹಸ್ಯ್‌ಮಯ್ ಮಾಯಾಗ್ ಜಾಲ್ಯಾತ್?

ತ್ಯೊ ಪಾಶಾರ್ ಜಾಲ್ಲ್ಯಾ

ತ್ಯಾ ವಾಟಾಂನಿ

ಕಿತ್ಲೆಶೆ ಪಾವ್ಟಿಂ ಹಾಂವೆಂ

ಬೊಬಾಟುನ್ ಆಪಯಿಲ್ಲೆಂ ಆಸಾ?

ಮ್ಹಜ್ಯಾ ಎಕೆಕಾ ಬೊಬೆಕ್

ಕೊರ್ಟಾಂತ್ಲೆಂ ನೋಟಿಸ್ ಧಾಡ್ಲೆಂ!

ಬಾರೀಕ್ ಪರ್ಜಳೀಕ್ ಕವಿತಾ ಮ್ಹಜ್ಯೊ

ತೆದ್ನಾಂ ಹಾಂವ್ ತರ್ನಾಟೊ

ಆಂಗ್‌ಭರ್ ಕ್ರಾಂತಿ

ಘಟ್ ಪಾಂಗುರ್ಲೆಲಿ

ಪದಾಂ ಪದಾಂನಿ ಜಾಗೃತಿ ಭರುನ್

ಏಕ್ ಪಾವ್ಟಿಂ ವಾಚ್ಲ್ಯಾರ್

ಪರತ್ ಪರತ್ ವಾಚುಂಕ್ ಕರ್ಚಿಂ;

ಮಾಯಾಗ್ ಜಾಲ್ಲ್ಯಾ ಮ್ಹಜ್ಯಾ ಕವಿತೆಂವಿಶಿಂ

ಗಾಂವಾರ್ ಗಾಂವ್ ಗುಸುಗುಸು -

ಭಲತ್ಕಾರ್‌ಗೀ ಖುನ್‌ಗೀ?

ಖಂಯ್ಚರ್‌ಯೀ ಗವಾಯ್ ನಾ

ಮಾಯಾಗ್ ಜಾಲ್ಲ್ಯಾ ಮ್ಹಜ್ಯಾ ಕವಿತೆಂಚಿ

ಹಂಕಾರ್ ಬಾಹದೂರಿ ಚಿಂತುನ್ ಚಿಂತುನ್

ದುಕಾಂ ಗಳಯ್ತಾಂ...

ತೆಂ ಕಿತೆಂಯ್ ಜಾಂವ್

ಮ್ಹಜೆಭಿತರ್ಲ್ಯಾ ಕವಿತೆಂಕ್ ಮರಣ್ ನಾ!

ತ್ಯೊ ಶೆಳೆರ್ ಜಾವ್ನ್ ಜಾವ್ನ್ ಮಾಯಾಗ್ ಜಾಲ್ಲೆತಿತ್ಲ್ಯೊ

ಪರತ್ ಪರತ್ ಉದೆತಾತ್...

ಮ್ಹಜೆಭಿತರ್ ಕ್ರಾಂತಿ ಜಾವುನ್ ವ್ಹಾಳ್ತಾತ್

- ಜೋನ್ ಸುಂಟಿಕೊಪ್ಪ (ಅಗೋಸ್ತ್, 2025]