ಕವಿತಾकविताPoem

म्हाकाय जियेंवक दिया... (- वल्ली क्वाड्रस)

[कविता] म्हाकाय जियेंवक दिया... (- वल्ली क्वाड्रस)

मनीस दिसानदीस वर्चुवल संसारांत जियेंव्क लागला. दीस गेल्लेपरिंच मनशापण मन्शाथाव्न पयस वचोंक लाग्लां. पूण ह्या दाकव्पाची जिणी जियेतेल्या मनशांथाव्न मनशापणाचें मुळावें तत्व अपॆक्शा करचीं अजून जियेंव्चिं ह्या संसारांत आसात जाल्ल्यान ’म्हाकाय जियेंव्क दिया’ उलो, परत परत काळजाक खोंकता आनी आमिं पाळुंक जाय आस्ची जवाभ्दारी पाळिनास्ताना ऎक निरदोशी जीव गेल्ल्याचो गुन्यांवकारी उलो अंतर मनांत गाजता.

ही फकत एक कविता न्हय. अंतर मनाच्या दाराक जागंवची एक ल्हान बॊब. मनशापणाक लजेर घालचीं, परत परत घडचीं असलीं घडितां कांय ’हाद्‍सा’ म्हणोन आमी पिलातापरिं हात धुव्न मजॆन जियेंव्क लागताना, ऎक घडी आमचेभितर तिळचें प्रॆतन करची गरज आसा म्हळ्ळें सम्जोन घेंवचें.

[कविता] म्हाकाय जियेंवक दिया... (- वल्ली क्वाड्रस)

म्हाकाय जियेंवक दिया...

रातिच्या मध्यानेर शाराच्या खंदकांत

पडलो एक सत्ताविस वार्सांचो तरनाटो

मजती खातिर हाक बॊब मारुंक लागलो

आमी आसल्यांव वेवस्ता आस्ली

उलंव्क लागलीं जणां, फोनां

पूण न्हय हात

पळेंव्क लाग्ले दोळे

पुण न्हय काळजां

राजकीय फुडारी वा ताच्या कुटमाचो तर

मोळोब पिंजुन धरती चिरून

मजतेक उदेतीं मीडिया

सोडवणेक नवी वेवस्ताच उदेती

पुण तो फकत ऎक सादो नागरीक

उजवाड फांकयित राकोन रावलो

मनीस ’अजून मनशापणान जियेता’

अश्या भरवश्यान तो आसलो

कोण तरी राकण भडवो येंवची

वाट पळेयित रावलो

मोबाय्लाच्या केमरां समोर

वेवस्तेच्या मोन्या जवाभ्दारे समोर

बुडोन मेलो

’म्हाकाय जियेंव्क दिया..’

ताणें परत परत उलो दिलो

आमी ताका आयकलें

आनी ताका मोरोंक दिलें

आज तो... फाल्यां हो...

आनी पोरवां, आनी पोरवांच्या पोरवां

तुं आनी हांव.......

(१७ जनेर २०२६ रातिं नॊयडांत एका उदकाच्या खंदकांत कारासवें सकला पडोन मेल्ल्या युवराज मेह्ताच्या मोरणाचेर विणलली कविता)

- वल्ली क्वाड्रस. [फेबरेर, २०२६]
वल्ली क्वाड्रस: च्यार मुखां (२००२), कट‌पुतळी (२००४), दर्भारांतली पिंर्गोण (२००६), बजार (२०१७), भितर‍्लो कवी (२०२०) नांवाचे पांच कविताजमे. कवितापाठ (२००५), दर‍्याक उदक (२००६), काळोक नातलो गांव (२००७), मुगदनातलीं गितां (२०१६), सुक्ती भर्ती (२०१८) म्हळ्ळे पांच कविता विशलेषणाचीं पुसतकां तशेंच कवितेचीं सभार संकलनां तशेंच डिजिटल पुसतकां संपादन करून पर्गटल्यांत. कर्नाटक कोंकणी साहित्य अकाडेमिचे पुरसकार, कविता ट्रसटाचो मथायस कुटमाचो पुरस्कार(२०१८), तशेंच विश्व कोंकणी केंद्राचो विमला वी. पै. पुरस्कार(२०२२) हाका लाभला.