ಕುರ್ಕೂಟ್ [ವೃಶಾಲಿ ಕೆಳೆಕಾರ್,ಪೀರವ್ಳ್, ಗೊಂಯ್]

ಕುರ್ಕೂಟ್ (ಕಂತ್ರಾಳ್) ಮ್ಹಳ್ಳೆ ಸಂಕೀರ್ಣ್ ಇಮಾಜೆಂತ್ ಮನಿಸ್ ದಾದ್ಲೊ ಆನಿ ಬಾಯ್ಲ್ ಮ್ಹಳ್ಳ್ಯಾ ದೋನ್ ಪ್ರಕಾರಾಚ್ಯಾ ಮನ್ಶಾಕ್ ಭಾಂದುನ್ ಘಾಲ್ತಾ, ಫಿಚಾರ್ ಕರ್ತಾ. ದಾದ್ಲೊ ಉಗ್ತೊ ಭಂವುಂಕ್ ಸಕ್ತಾ, ಜಾಯ್ ತೆಂ ಕರುಂಕ್ ಸಕ್ತಾ ಪುಣ್ ತೆಂಚ್ ಏಕ್ ಬಾಯ್ಲ್ ಫಕತ್ ಘರ್ಚೊ ಗಸ್ಟೊ ಕಾಡ್ಚೆಂ ಯಂತ್ರ್ ಜಾವ್ನ್ ಕೆಲಾಂ. ದೆಕೂನ್ ಬಾಟ್ಲೆಚಿ ಗುಡ್ದಿ, ಕುಕ್ಕರಾಚಿ ಶಿಟಿ ಸಕ್ಕಡ್ ತಿಚೆಲಾಗಿಂ ಸಂವಾದ್ ಕರ್ತಾನಾ ಖರಿಚ್ ಜಾವ್ನ್ ಕವಿತಾ ಉದೆತಾ. ಆಮ್ಚ್ಯಾ ದೇಶಾಂತ್ ನ್ಹಂಯಾಂಕ್ ದೇವತೆಂಚೆಂ ನಾಂವ್ ದಿಲಾಂ ಪುಣ್ ಆಮ್ಚ್ಯಾ ಕಿತ್ಲೆಶ್ಯಾ ಘರಾಂನಿ ಸ್ತ್ರೀಯಾಂಕ್ ಮಾನ್ ಆಸಾ? ಕಿತ್ಲೆಶ್ಯಾ ಘರಾಂನಿ, ಸಮಾಜೆಂತ್ ಸ್ತ್ರೀ ಆಜ್ ಪಾಸೊನ್ ಕಟ್‌ಪುತ್ಳಿ ಜಶಿ ಜಿಯೆವ್ನ್ ನಾ? ಹಿಂ ಸವಾಲಾಂ ಆಮಿ ಆಮ್ಕಾಂಚ್ ಕರ್ಚಿಂ.

ಬಾಯ್ ವೃಶಾಲಿ ಹಿಂದಿ, ಮರಾಠಿ, ಇಂಗ್ಲಿಶ್ ತಶೆಂಚ್ ಕೊಂಕಣಿ ಭಾಶೆಂನಿ ಕವಿತಾ ಬರಯ್ತಾ. ಸಾದೊ ವಿಶಯ್ ಘೆವ್ನ್ ಆಯ್ಲ್ಯಾ ತರ್‌ಯೀ ಕವಿತೆಂತ್ ಜಿವ್ಸಾಣ್ ಆಸ್ಚಿ ಪಾರ್ಕುಂಕ್ ತುಕಾಚ್ ಸೊಡ್ತಾಂ

[ಕವಿತಾ] ಕುರ್ಕೂಟ್ [ವೃಶಾಲಿ ಕೆಳೆಕಾರ್,ಪೀರವ್ಳ್, ಗೊಂಯ್]

ಕುರ್ಕೂಟ್

ಸಂಸಾರಾಚೆಂ ಮರ್ಮ್,

ಸದಾಂಚೆಚ್ ನಿತ್ಯಕರ್ಮ್

ಬಾಟ್ಲೆಚಿ ಗುಡ್ಡಿ

ಕುಕ್ಕರಾಚಿ ಶಿಟಿ

ಜೆವ್ಣಾಚೆಂ ಟಿಫೀನ್

ಆನಿ ವೊಶಿಂಗ್ ಮಶೀನ್.

ಘರ್‌ಕಾಮ್‌ಯೀ ಕರ್ಚೆಂ ಆನಿ

ಆಫಿಸ್‌ಕಾಮ್ ತರ್ ಸದಾಚೆಂ.

ಸಗ್ಳೆಂ ತಿ ಕರ್ತಾ

ಮನ್ ಮಾರೂನ್ ಜಗ್ತಾ.

ದಿಸ್ತಾ ತಿಕಾಯ್

ಭೌವ್ಪಾಕ್ ವಚೂಂಕ್ ಜಾಯ್.

ಹೊಟೆಲಾನ್ ವಚ್ಚೆಂ

ನವೆ ಪದಾರ್ಥ್ ಚಾಖ್ಚೆ

ಮನ್ಸೊಕ್ತ್ ಜಗ್ಚೆಂ

ತಾಜೆಂ ಟವ್ಟವೀತ್ ಜಾವ್ಚೆಂ.

ಆಡಾಯ್ತಾ ತಿಕಾ

ಕುರ್ಕೂಟಾಚಿ ಚೌಕಟ್.

ವನ್ಟಿವೆಲಿ ಚೌಕಟ್ ಮೊಡುಂಕ್

ಶಿಮ್-ಮ್ಹೆರ್ ಹುಪೂಂಕ್

ಮನ್ಸೊಕ್ತ್ ಜಗುಂಕ್

ಜಾಯ್ ತೆಂ ಕರುಂಕ್

ತಿಕಾ ನಾ ಮುಭಾ

ತೆನ್ನಾ ತಿ ಘರ್ಚಿ ಸೊಭಾ.

ಕರ್ತಾ ತಿಜಿ ಫರ್ಫಟ್

ಸಮಾಜಾಚೆಂ ಕುರ್ಕೂಟ್.

- ವೃಶಾಲಿ ಕೆಳೆಕಾರ್, ಪೀರವ್ಳ್, ಗೊಂಯ್ [ಜುಲಾಯ್ 2018]

ವೃಶಾಲಿ ಕೆಳೆಕಾರ್, ಪೀರವ್ಳ್, ಗೊಂಯ್: ಇಂಗ್ಲಿಶಾಂತ್ ಎಮ್.ಎ. ದುಸ್ರ್ಯಾ ವರ್ಸಾಚೆಂ ಶಿಕಪ್ ಜೊಡುನ್ ಆಸ್ಚಿ ಬಾಯ್ ವೃಶಾಲಿ ವಿಪುಲ್ ಕೆಳೆಕರ್ ಗೊಂಯಾಂತ್ ವಸ್ತಿ ಕರ್ತಾ. ಇಂಗ್ಲಿಶ್, ಕೊಂಕಣಿ, ಮರಾಠಿ ತಶೆಂಚ್ ಹಿಂದಿ ಭಾಸೆಂನಿ ಕವಿತಾ ಬರಯ್ತಾ. ಕೊಂಕ್ಣಿ ಕವಿಗೋಶ್ಟಿಂನಿ ಉರ್ಭೆನ್ ಭಾಗ್ ಘೆಂವ್ಚಿ ಹಿ ಎಕಾ ಇಸ್ಕೊಲಾಂತ್ ಇಂಗ್ಲಿಶ್ ಭಾಸ್ ಶಿಕಯ್ತಾ.