ಕವಿತಾकविताPoem

ಕೊಲ್ತಿ (- ಅತಿಶಾ ಸುರ್ಲೇಕರ್)

[ಕವಿತಾ] ಕೊಲ್ತಿ (- ಅತಿಶಾ ಸುರ್ಲೇಕರ್)

ಉಜ್ಯಾಚೆಂ ಕೊಲಿತ್ (ಕೊಲ್ತಿ) ಸಾಂಕೇತ್ ಕರುನ್ ಸಮಾಜೆಚ್ಯಾ ತಶೆಂಚ್ ಮನಶಾಚ್ಯಾ ಭಿತರ್ಲ್ಯಾ ಉಜ್ಯಾವಿಶಿಂ ಕವಿತೆಚ್ಯಾ ಉತ್ರಾಂನಿ ಪಿಂತ್ರಾವ್ಣಿ ಕೆಲ್ಲಿ ಹ್ಯಾ ಕವಿತೆಂತ್ ದಿಸುನ್ ಯೆತಾ. ಉಜೊ ಪಳೆನಾ; ಕೊಣಾಚೆಂ ಘರ್ ವಾ ಕೊಣಾಚಿ ರಾಂದಣ್ - ಫಕತ್ ಗೊಬೊರ್ ಕರ್ಚಿ ಶ್ಯಾಥಿ ಉಜ್ಯಾಚಿ. ಹಾಂಗಾಸರ್ ತಸ್ಲೊ ಉಜೊ ಸಯ್ತ್ ಏಕ್ ಘಡಿ ಉಲಯ್ತಾ ಆನಿ ಕವಿತೆಚ್ಯಾ ಸಕ್ತೆಚಿ ಗವಾಯ್ ದಿತಾ.

[ಕವಿತಾ] ಕೊಲ್ತಿ (- ಅತಿಶಾ ಸುರ್ಲೇಕರ್)

ಕೊಲ್ತಿ

ಭಗ್ಭಗಪಿ ಕೊಲ್ತಿ

ಧಗ್ಧಗೂನ್ ಸಾಂಗ್ತಾಲಿ

"ವಾಟ್ ದುಶ್ಕರ್ಮಿ "

ಕಿಟ್ ಉಮಾಳ್ಯಾಚಿ ಶಿಡ್ಶಿಡತಾಲಿ

ನಿರಂತರ್ ತಿ ಜಳ್ಫಳಟಾಲಿ...

ಆಲ್ತಡಚೊ ಧಗ್ ಪಳಯ್ತ್

ಪಲ್ತಡಿ ದೆಖ್ಲೆ ನಾ

ಕಾಳಾಚೊ ಹುಸ್ಕೊ ತೀಚೊ

ತರ್ನ್ಯಾ ಜೀವಾಕ್ ಕಳ್ಳೊ ನಾ...

ಕಾಳೊಖ್ ಬೆಣೀತ್

ಹುಸ್ಕ್ಯಾ ರಾಂನ್ ಖುಟೀತ್

ಕುವಾಡೆ ಸೊಡೀತ್

ಗೆಲೆ ವಾಟ್ ಸೊದೀತ್....

ಕುಕಾರೆ ಕೊಲ್ಯಾಂಚೆ ಆಯ್ಕಲೆ

ಹಾತ್ - ಪಾಂಯ್ ಥರ್ಥರಲೆ

ಅದ್ಮದಿ ದಿಪ್ಕಲೆ ತರೀಯ್,

ಕುವಾಡೆ ಅಡ್ಶೀತ್ ಕಾಳ್ಖಾಂತ್ ರಿಂಗ್ಲೆ

ಕಿಲಾಂಟ್ ಕಳವ್ಳ್ಯಾಚಿ ಘುಮ್ಲಿ

ವಾಸ್ನೆಚ್ಯಾ ಕಾಸಾದೊರಾಂನ್ ಘುರಿ ಘಾತ್ಲಿ

ಮೊಡ್ಲಿ ವಂಯ್ ತರ್ಣೆಂಪಣಾಚಿ

ಕುವಾಡ್ಯಾಚ್ಯಾ ಸೊದಾಂತ್

ಭಂಗ್ಲಿ ಜೀಣ್ ಸಾನ್ ಜೀವಾಚಿ ...

ನಿರಾಗಸ್ ಮನಾಕ್

ಸಮ್ಜಲಿ ನಾ ಕಾಣಿ ಕುವಾಡ್ಯಾಚಿ

ಕವ್ಳ್ಯಾ ಜೀವಾಕ್ ಪರತ್ ಎಕ್ದಾ

ಭೊಗ್ಚಿ ಪಡ್ಲಿ ಜೀಣ್ ತ್ಯಾ ಕೊಲ್ತೆಚಿ.....

ಜಬ್ರಿ ಲಾಶೆಂ ಪಳೊವ್ನ್

ಕಿಂವಾಟೊ ತೀಚೊ ಹೊಲ್ಮಲೊ

"ಹಾಂವೆ ಚೊಯ್ಲೆ ತ್ಯೊ

ಕಾಳ್ಖ್ಯೊ ರಾತಿಂ

ತುಜ್ಯಾ ಪದ್ರಾಕ್ ನಾಕಾ

ಹುಂಮಾಣಿಂ ನಶೆಚಿ

ಜಂಯ್ ಫಕ್ತ್ ಕವ್ಳಿ ಕಳಿ ಪಿಸುಡಟಾ

ಇಂಗಳ್ಯಾಂಚೆರ್ ಸಾರೀತ್ ರಾತಿ" ...

ಪಳೊವ್ನ್ ಹಿ ಪುನ್ರವೃತ್ತಿ

ತಿ ಧಗ್ಧಗಲಿ ಭಗ್ಭಗಲಿ

"ವಿಸ್ಕಾವನ್ ಸಾಂಗ್ಪಾಕ್ ಹಾಂವುಚ್ ಚುಕ್ಲಿ"

ಧೂಂವ್ರೆತ್ - ಧೂಂವ್ರೆತ್

ಅಸ್ಹಾಯ್ಯ್ ಜಾವ್ನ್

ಗೊಬ್ರಾನ್ ಬರ್ಸಲಿ ...

- ಅತಿಶಾ ಸುರ್ಲೀಕಾರ್. [ಜ್ಯೂನ್, 2020]