ಕಾಜೂ ಬೀ [ವೆಂಕಟೇಶ್ ನಾಯಕ್]

ವ್ಹಾವ್! ಕಿತೆಂ ಹ್ಯಾ ಕವಿತೆಚಿ ಸಕತ್ ಪಳೆಯಾ, ವಯ್ಲೆಭಾರ್ ಪಳೆಲೆಂ ತರ್ ಏಕ್ ಕಾಜು ಆನಿ ಕಾಜುಚಿ ಭಿ, ಜಿ ಆಮಿ ಚಡ್ತಾವಾಂ ಲ್ಹಾನ್‌ಪಣಾರ್ ಕಿತ್ಲೆಶ್ಯೊ ಕಾಜು ಖಾವ್ನ್, ಭಿಯೊ ಘೆವ್ನ್ ಆಯಿಲ್ಲ್ಯಾಂವ್, ಆನಿ ಕಾಜು ತಶೆಂಚ್ ಕಾಜುಚ್ಯಾ ಭಿಯೆಚೆ ಕಿತ್ಲೆಶೆ ಖೆಳ್ ಖೆಳುನ್ ಆಯಿಲ್ಲ್ಯಾಂವ್, ಹಾಂಗಾಸರ್ ಕವಿತೆಂತ್ ತೆಂ ಭುರ್ಗ್ಯಾಪಣಾಲೆಂ ಸ್ವಪಣ್ ಜಿವಾಳ್ ಕರ್ತಾಶೆಂ ಭಗ್ತಾ. ಪುಣ್ ತಿತ್ಲೆಂಚ್ ನ್ಹಯ್, ಹಿ ಕವಿತಾ ಜಾಯ್ತೆಂ ಸಾಂಗುನ್ ವೆತಾ, ತಿಚ್ಚ್ ಎಕಾ ಕವಿತೆಚಿ ಸಕತ್ ಮ್ಹಣ್ಚ್ಯಾಕ್ ಗೊವಾಯ್ ದಿತಾ.

ಕಾಜು ಮ್ಹಳ್ಯಾರ್ ಫಾಲ್ಯಾಂ ಕುಸೊನ್ ವೆಚಿ ವಸ್ತ್, ಪುಣ್ ಭಿ ಮ್ಹಳ್ಯಾರ್ ಫಾಲೆಂ, ಆಮ್ಚೊ ಫುಡಾರ್, ಆಮ್ಚೆಂ ಮುಖ್ಲೆಂ ಜನಾಂಗ್. ಮನ್ಜಾತ್ ಆನಿ ಮನಿಸ್ ಹ್ಯಾ ದೊಗಾಂ ಮಧೆಂ ಆಸ್ಚೊ ಪ್ರಮುಕ್ ತಫಾವತ್‌ಚ್ ಜಾವ್ನಾಸಾ, ಮನಿಸ್ ವೈಚಾರಿಕ್ ಚಿಂತ್ಪಾಕ್ ನಿಯಾಳುಂಕ್ ಸಕ್ಚೊ ದೆಕುನ್ ಆಮ್ಚಿ ಕೂಡ್ ಫಾಲ್ಯಾಂ ಮಾತಿಯೆಂತ್ ಕುಸೊನ್ ವೆಚಿ ತರ್‌ಯೀ, ತಿ ಕುಸೊನ್ ವೆಚ್ಯಾಧಿಂ, ಅಪ್ಲೆಂ ಬರೆಂ ಮಾತ್ರ್, ಮುಖ್ಲ್ಯಾ ದಿಸಾಂನಿ, ಮುಖ್ಲ್ಯಾ ಪಿಳ್ಗೆಕ್ ಸೊಡುನ್ ವೆತಾ. ಕಾಜುಚಿ ಭಿ ಏಕ್ ಸಾಂಕೇತಿಕ್ ರೂಪ್ ದೀವ್ನ್ ಕವಿನ್ ಅಪುರ್ಭಾಯೆಚೆಂ ಚಿಂತಾಪ್ ಹಾಂಗಾಸರ್ ವ್ಹಾಳಮ್ವ್ಚೆಂ ದಿಸುನ್ ಯೆತಾ ದೆಕುನ್ ಹಿ ಕವಿತಾ ಪರತ್ ವಾಚುಂಕ್ ಕರ್ತಾ. ಅಖೇರಿಚ್ಯಾ ವಳಿಂನಿ ಕಾಂಯ್ ವೆವೆಗ್ಳ್ಯೊ ಕಾಣಿಯೊಂಚ್ ಸಾಂಗ್ಚ್ಯಾ ಹ್ಯಾ ಕವಿತೆಚೆರ್ ಅಪುರ್ಭಾಯೆಚೆಂ ವಿಶ್ಲೇಷಣ್ ಬರವ್ಯೆತಾ

ವೃತ್ತೆನ್ ಪ್ರಾಧ್ಯಾಪಕ್ ಜಾವ್ನಾಸ್ಚೊ ವೆಂಕಟೇಶ್ ನಾಯಕ್ ಮ್ಹಾಕಾ ಹೆಚ್ಚ್ ಚಿಂತ್ಪಾಕ್ ಲಾಗುನ್ ಭೋವ್ ಖಾಯ್ಸ್, ಬರ್ಪಾನ್ ಕಿತ್ಲೊ ಗುಂಡಾಯೆಚೊಕಿ, ಸಂಯ್ಬಾನ್ ಸಯ್ತ್ ತಿತ್ಲೊಚ್ ಖಾಲ್ತೊ ಆನಿ ಸಮ್ಜಣೆಚೊ ಮ್ಹಣ್ ಹಾಂವೆಂ ಪಾರ್ಕಿಲ್ಲೊ ಕವಿ. ಕೊಂಕಣಿ ಫುಡಾರಾಂತ್ ಅಸಲ್ಯಾ ಕವಿಂಚೊ ಸಂಖೊ ಚಡುನ್ ಯೆಂವ್ಚೊ ಪಳೆತಾನಾ ಖರೆಂಚ್ ಮ್ಹಜ್ಯಾ ಕಾಳ್ಜಾಂತ್ ಹಜಾರ್ ಮೊರಾಂನಿ ಸಂತೊಸಾನ್ ನಾಚ್‌ಲ್ಲೆಪರಿಂ ಜಾತಾ.

[ಕವಿತಾ] ಕಾಜೂ ಬೀ [ವೆಂಕಟೇಶ್ ನಾಯಕ್]

ಕಾಜೂ ಬೀ

ಶಾಳೇಕ ಮೆಳಚೆ ರಜಾ

ಗಾಂವಾಕ ಗೆಲ್ಯಾರೀಯ ಆಶಿಲೆ

ಪ್ರಶ್ನೇ ಪ್ರತಿಕೇಕ ಉತ್ತರ ಬರೋವಚೆ ಸಜಾ

ಹಾಜೆ ಮಧೇಂತ ಹಿತಲಾಂತ ಭೋಂವಚಾಕ ಮಜಾ

ಖಾವಚಾಕ ಶೋಧೂನ ವಚೆ ರೂಕ ತೇ ಕಾಜಾ

ಹಳದೂವೋ ಆನೀ ತಾಂಬಡೋ ಕಾಜೂ

ಭೀ ಕಶೀ ಮ್ಹಳ್ಯಾರಿ

ಶ್ರೀಲಂಕಾ ಆಸಾ ಭಾರತಾಚೆ ಬಾಜೂ

ಖಾವನು ವೆಂಚೂನ ಹಾಡಚೆ ಕಾಜೂಭೀ

ಮೊಲಾಧಿಕ ಹೇ ಮಾರಗ ಭೀ

ಗರ್ವ ಪಾವಲೆ ತೇ ರೂಕಾರ ಪಿಕತನಾ

ಆನೀ ಲೋಕಾನ ಭೀ ವೆಂಚೂನ ವರತನಾ

ಥೋಡೆ ಮ್ಹಾಂತಾರೆ ಜಾವನು ಜಡಲೆ

ಮೋಲನಾಶಿ ಮಾತೀಂತ ಪಡಲೆ

ವೆಂಚೂನ ವೆಲೆ, ಸೊಲ್ಲಾವನು ಕಾಡಲೆ

ಮೊಲ್ಲಾಕ ವಿಕಲೆ, ಖಾಂವನು ತೇ ಸರಲೆ

ಶಾಳ ಸುರವಾತೇಕ ಪಾವಸ ತೇ ಆಯಲೆ

ಮಾತೀಂತ ಮೆಳೇಲೇಂಕ ಆಂಕ್ರಿ ತೇ ಪುಟಲೆ

ಕಾಲಚಕ್ರಾಂತ ಸಕ್ಕಡಾಂಕ ಮೋಲ ಯೆತಾ

ಮೊಲಾಕ ವಿಕೀಲೋಯ ಸರಚೆ ಆಸಾ

ನೆಲಾರ ಪಡಲೇಲೋಯ ಉಟಾವಚೆ ಆಸಾ

ಫಕತ ಎಕ ಪಾವಸ ಜಾವಕಾ ಜಾತಾ

- ವೆಂಕಟೇಶ್ ನಾಯಕ್ [ಅಗೊಸ್ತ್ 2018]

ವೆಂಕಟೇಶ್ ನಾಯಕ್, ಮಡಂತ್ಯಾರ್: ವೃತ್ತೆನ್ ಪ್ರಾಧ್ಯಪಕ್ ಜಾವ್ನ್ ವಾವ್ರ್ ಕರ್ಚೊ ವೆಂಕಟೇಶ ನಾಯಕ್, ಕೊಂಕ್ಣಿ ಸಾಹಿತ್ಯಾಂತ್ ಕಾಣ್ಯೆಗಾರ್/ಕವಿ ಜಾವ್ನ್ ವ್ಹಳ್ಕೆಚೊ ತರ್‌ಯೀ, ಏಕ್ ಸಂವೇದನ್‌ಶೀಲ್ ಚಿಂತ್ಪಾಚೊ ಕವಿ, ಕವಿತಾ ತಾಚಿ ಪಯ್ಲಿ ಆಸಕ್ತ್. ಕೊಂಕ್ಣೆಚ್ಯಾ ಫುಡಾರಾಂತ್ ಏಕ್ ಭರ್ವಶ್ಯಾಚೊ ಕವಿ ಜಾವ್ನ್ ಉದೆತಲೊ ಮ್ಹಳ್ಳೊ ಮ್ಹಜೊ ಆಶಾವಾದ್. ಹಾಚಿ ಏಕ್ ಕವಿತಾ ’ಸುಕ್ತಿ ಭರ್ತಿ’ ವಿಶ್ಲೇಷಣಾಂಚ್ಯಾ ಬುಕಾಂತ್ ಪರ್ಗಟ್ಲ್ಯಾ