ಕಾಣಿ ಮ್ಹಜಿ (-ಕ್ಲೈವ್ ಸೋಜ್, ಬೊಳಿಯೆ)

[ಕವಿತಾ]  ಕಾಣಿ ಮ್ಹಜಿ (-ಕ್ಲೈವ್ ಸೋಜ್, ಬೊಳಿಯೆ)

ಆಜ್ ಆಮಿ ಅಸಲ್ಯಾ ಎಕಾ ಸಂಸಾರಾಂತ್ ಜಿಯೆವ್ನ್ ಆಸಾಂವ್ ಮ್ಹಳ್ಯಾರ್ ಮನಿಸ್ ಮ್ಹಳ್ಳೊ ಸರ್ವ್ ವಿಧ್ಯಾ ಆಪ್ಣಾವ್ನ್ ಮನ್ಜಾತಿಪರಿಂ ಜಿಯೆಂವ್ಕ್ ಲಾಗ್ಲಾ ದೆಕುನ್ ಆಜ್ ಫುಲ್ಚ್ಯಾಧಿಂ ಪಿಸುಡ್ನ್ ವೆಚಿ ಭಿರಾಂತ್ ಧೊಸುನ್ ಘೆತ್‌ಲ್ಲೊ ಬೊಂಗೊ ಸಯ್ತ್ ಅಪ್ಣಾನ್ ಫುಲುಂಕ್ ಜಯ್ ವಾ ನಕಾ ಮ್ಹಳ್ಳೆಂ ಚಿಂತುಂಕ್ ಲಾಗ್ಲಾ. ಪುಣ್ ಹೆಂ ಚಿಂತಪ್ ಸ್ವಾರ್ಥಿ ಚಿಂತಪ್ ನ್ಹಯ್ ಬಗರ್ ಕೊಣ್ ಮನಿಸ್ ಅಪ್ಲ್ಯಾ ಸ್ವಾರ್ಥಾಕ್ ಲಾಗುನ್ ಅಪ್ಣಾಕ್ ಕಶೆಂ ಆನಿ ಕೆದಾಳಾ ಗಳ್ಸುಂಕ್ ಪುರೊ ಮ್ಹಳ್ಳಿ ಕಾವ್ಜೆಣಿಚೆಂ ಚಿಂತಪ್.

ಕ್ಲೈವ್ ಸೋಜ್ ಬೊಳಿಯೆ ಆಯ್ಲೆವಾರ್ ಉದೆವ್ನ್ ಯೆಂವ್ಚೊ ಕೊಂಕಣಿ ಕವಿ. ಮನ್ಶಾಸಂವೇದನ್, ಸೂಕ್ಶ್ಮ್ ನದರ್ ತಾಚ್ಯಾ ಕವಿತೆಂನಿ ದಿಸ್ಚೆಂ ಕೊಂಕಣಿ ಕವಿತೆಚ್ಯ ಫುಡಾರಾಚ್ಯಾ ದಿಶೆನ್ ಸಂತೊಸಾಚೆಂಚ್. ಬಾಕಿಚೆಂ ವೊರಾಂವ್ಕ್ ವಾಚ್ಪ್ಯಾ ತುಕಾ ಸೊಡ್ತಾಂ.

[ಕವಿತಾ] ಕಾಣಿ ಮ್ಹಜಿ (-ಕ್ಲೈವ್ ಸೋಜ್, ಬೊಳಿಯೆ)

ಕಾಣಿ ಮ್ಹಜಿ

ಆರ್ಸೊ ತುಂ

ಸೊಭಾಯ್ ಚಡಂವ್ಕ್ ನಾಡ್ತಾಯ್..

ಪಳೇವ್ನ್ ಮ್ಹಾಕಾ ಮುಗ್ಧ್ ಹಾಸ್ತಾಯ್..

ಫುಲ್ ಹಾಂವ್

ನೆಟಂವ್ಚಿ ಆಶಾ ನಾ ಆಜ್...

ಸೊಭಾಯೆಚಿ ದಿಸ್ತಾ ಭಿರಾಂತ್,

ಮನ್ ತಾಂಚೆಂ ಚಾಳ್ವಾತ್.

ಜಾಯ್ತ್ ನಿಸ್ಕಳ್ ಪಾಲಾಂವಾಚೆರ್ ಖತ್...!!

ಭೊಂವರ್ ತೆ

ಮ್ಹೊಂವ್ ಚಾಕೊನ್ ಭೊಂವ್ಚೆ

ಮ್ಹನ್ಶಾ ರುಪಾಚೆ

ವಿಕ್ರತ್ ಮನಾಂಚೆ...!!

ಮಸ್ತಾಯ್ಕಿ ತುಂ..

ಮಾನ್ ಧಾಂಪ್ತಾಯ್

ಕಿತ್ಲೆಂ ನೆಸ್ಲ್ಯಾರಿ ಉಣೆಂಚ್ಚ್ ಜಾತಾಯ್..

ತಾಂಚಾ ವಾಂಕ್ಡ್ಯಾ ದಿಸ್ಟಿ ಥಾವ್ನ್

ಕಶೆಂ ಲಿಪಾಯ್ತಾಯ್..!?

ಫುಲ್ ಹಾಂವ್

ಲಾಳ್ ಗಳಂವ್ಚ್ಯಾ ದೊಳ್ಯಾನಿ ತಿಳ್ತಾತ್

ಖಂಯ್ಚಾನ್ ದಿಸ್ತಾ, ಸೊಧುನ್ ಆಸಾತ್!

ಭೊಂವರ್ ತೆ

ಫುಲಾಂ ಖಾತಿರಚ್ಚ್ ತೊಟಾಕ್ ಯೇಂವ್ಚೆ

ಸಾದ್ಯಾಪಣಾಂಚೊ ವೇಸ್ ಪಾಂಗರ್ನ್ ಭೊಂವ್ಚೆ!

ಪ್ರಾಯ್ ತುಂ

ಸಮ್ಜಣಿ ಚಡಯ್ತಾಯ್,

ಅನುಭವಾನ್ ಪಿಕಯ್ತಾಯ್!

ಫುಲ್ ಹಾಂವ್

ಫುಲೊಂಕ್ ದಿಸ್ತಾ ಭಿರಾಂತ್..

ಸಮ್ಜಾತೆಲಿಂ ಕೋಣ್ ಆಸಾತ್..!?

ಭೊಂವರ್ ತೆ

ಫುಲ್ಚಾ ಪಯ್ಲೆಂಚ್ಚ್ ಕಳೆ ಖುಂಟ್ಚೆ

ಪುರ್ತೆಂ ಉಜ್ವಾಡ್ಚಾ ಅದಿಂಚ್ಚ್,

ದೊರಾಕ್ ಚಡಾಂವ್ಚೆ...!!

- ಕ್ಲೈವ್ ಸೋಜ್, ಬೊಳಿಯೆ. [ದಸೆಂಬ್ರ್, 2019]