ಕವಿತಾकविताPoem

ಕಾಣಿ ಕುಡ್ಡೆ ಭಯ್ಣೀಚಿ (- ಅವಿನಾಶ್ ಕುಂಕಳಕಾರ್)

[ಕವಿತಾ] ಕಾಣಿ ಕುಡ್ಡೆ ಭಯ್ಣೀಚಿ (- ಅವಿನಾಶ್ ಕುಂಕಳಕಾರ್)

ಕವಿತಾ ಮ್ಹಳ್ಯಾರ್ ಥೊಡ್ಯಾಚ್ ಉತ್ರಾಂನಿ ಖೂಪ್ ಅರ್ಥ್ ಸಾಂಗ್ಚಿ ಕಲಾ. ಪುಣ್ ಕವಿತೆಂತ್ ಕಥಾ ಸಾಂಗ್ಚಿ ಕಲಾ ಕಾಂಯ್ ಥೊಡೆ ವಾಚ್ಪಿ ಖಾಯ್ಸ್ ಕರ್ತಾತ್. ಹಾಂಗಾಸರ್ ತಸಲಿಚ್ ಏಕ್ ಕಾಣಿ ಆಸಾ ಎಕಾ ಕುಡ್ಡ್ಯಾ ಭಯ್ಣಿಚಿ. ಕಥಾರುಪಾಚಿ ಹಿ ಕವಿತಾ ಜಾಲ್ಲ್ಯಾನ್ ವಾಚ್ಪಿಚ್ ಸಮ್ಜುಂಚ್ಯಾಂಕ್ ದುಭಾವ್ ನಾ.

[ಕವಿತಾ] ಕಾಣಿ ಕುಡ್ಡೆ ಭಯ್ಣೀಚಿ (- ಅವಿನಾಶ್ ಕುಂಕಳಕಾರ್)

ಕಾಣಿ ಕುಡ್ಡೆ ಭಯ್ಣೀಚಿ

ಸಾತ್ ಭಾವಾಂಚಿ ಎಕ್ ಭಯ್ಣ್

ನಾಂವ್ ತಿಚೆಂ ಭಾವ್ನಾ...

ಸಾತ್ ಭಾವ್ ಆಸೂನಯ್

ತಿಚ್ಯಾ ಸುಖಾ ದುಖ್ಖಾನ್ ಪಾವ್ನಾ.

ದುಖ್ಖ್ ಸೊಸ್ತಾಲಿ ಎಕ್ಟಿ ಎಕ್ಸೂರಿ

ಇಂದ್ರಧನು ವರಿ ಸಾತ್ ಭಾವ್ ಆಸೂನಯ್

ಬೆರಂಗ್ ಜಗ್ಣೆ ಜಗ್ತಾಲಿ

ಸಾತೂಯ್ ಭಾವಾಂಚಿ ಸೆವಾ ಕರೀತ್

ದಿಸಾ ದಿಸಾಕ್ ಮರ್ತಾಲಿ.

ರಾತ್ ವಾ ದೀಸ್ ಎಕ್ ಸಮಾನ್

ಕಾಳೆ ಕಿಟ್ಟ್ ಜಗ್ಣೆ ಆಸ್ಲೆಂ

ಭಾವಾಂಚೊ ಸಂವ್ಸಾರ್ ಜಾವ್ಚೊ ಬರೊ

ಹೆಚ್ ದೆವಾಕಡೆನ್ ಮಾಗ್ಣೆ ಆಸ್ಲೆಂ.

ಕುಡ್ಡೆ ಭಯ್ಣೀಕ್ ಹೊ ಸಂವ್ಸಾರ್ ಪಳೊವ್ಕ್

ಆಪ್ಲೆಂ ಸ್ವತಾಚೆಂ ದೊಳೆ ನಾಸ್ಲೆಂ

ಪೂಣ್ ಸಾತೂಯ್ ಭಾವ್ ಸಾಮ್ಕೆ ಸ್ವಾರ್ತಿ

ದೊಳೆ ಆಸೂನ್ ಕುಡ್ಡೆ ಆಸ್ಲೆಂ.

ತಿಚೆಂ ಕುಡ್ಡೆಪಣ್ ಭಾವಾಂಕ್ ಜಡ್ ಜಾಲ್ಲೆಂ

ತಿ ಆಪ್ಲಿ ಭಯ್ಣ್ ಮ್ಹೂಣ್ ಸಾಂಗ್ಪಾಕ್

ತಾಂಕಾಂ ಲಜ್ ದಿಸ್ತಾಲಿ...

ಪೂಣ್ ಆಪೂಣ್ ಚೌದಾ ದೊಳ್ಯಾಂನಿ ಪಳಯ್ತಾ

ಹೆ ಖೊಟೆ ಆಶೆನ್ ತಿ ಜಗ್ತಾಲಿಂ.

ಸಾತೂಯ್ ಭಾವ್ ಕಟ್ ರಚೂನ್ ಎಕ್ ದೀಸ್

ಕುಡ್ಡೆ ಭಯ್ಣೀಚೊ ಜೀವ್ ಘೆತಾ

ಜಲ್ಮಾ ಉಪ್ರಾತ್ ಆನಿ ಮರ್ಣಾ ನಂತರ್

ಮನ್ಶಾಕ್ ಮ್ಹಜೀಚ್ ಘರಜ್ ಪಡ್ಟಲಿ

ಅಸೊ ಮರ್ತನಾ ತಿ ಶಾಪ್ ದಿತಾ.

ದುಸ್ರ್ಯಾ ಜಲ್ಮಾಕ್ ಬಾಂಬು ಜಾವ್ನ್

ಕುಡ್ಡಿ ಭಯ್ಣ್ ಜಲ್ಮಾಕ್ ಯೆತಾ

ಭುರ್ಗ್ಯಾಚ್ಯಾ ಜಲ್ಮಾ ಉಪ್ರಾತ್

ತಾಕಾ ಸುಪಾಂತ್ ದವ್ರಪಾಚಿ ರಿತ್ ಆಸಾ

ಮರ್ಣಾ ನಂತರ್ ಮನ್ಶಾಕ್

ಬಾಂಬೂಚಿ ನಿಸಣ್ ಫಾವೊ ಜಾತಾ.

- ಅವಿನಾಶ್ ಕುಂಕಳಕಾರ್. [ನವೆಂಬ್ರ್, 2020]