ಕಾಳೊ-ಪಾಂಚ್ವೊ ಫಳೊ [ಗವ್ರಂಗ್ ಗೋಕುಲ್‌ದಾಸ್ ನಾಯ್ಕ್]

ಮನಿಸ್ ದೊತೊರ್ ಜಾಯ್ತ್, ಇಜ್ನೆರ್ ಜಾಯ್ತ್, ಕುಜ್ನೆರ್ ಜಾಯ್ತ್ ವಾ ಕಿತೆಂಯ್ ಜಾಯ್ತ್ ಪುಣ್ ಪಯ್ಲೊ ತೊ ಏಕ್ ಮನಿಸ್. ಆನಿ ಮನ್ಶಾಸಂಯ್ಬಾಪ್ರಕಾರ್ ಅಪ್ಣಾಕ್ ಬರೆಂ ಕೆಲ್ಲ್ಯಾ ಸರ್ವಾಂಕ್ ಉಪ್ಕಾರಿ ಚಿಂತಪ್ ಚಿಂತ್ಚೆಂ ಭೋವ್ ಗರ್ಜೆಚೆಂ. ಹೆಂಚ್ ಚಿಂತಪ್ ಪುಣ್ ವೆವೆಗಳ್ಯಾ ಸ್ಥರಾಚೆರ್ ಕೆಲ್ಲೆಂ ಚಿಂತಪ್ ಹಾಂಗಾಸರ್ ಪಾರ್ಕುವ್ಯೆತ್.

ಗೊಂಯ್ಚೊ ಉರ್ಭೆವಂತ್ ಕವಿ ಗವ್ರಂಗ್ ನಾಯ್ಕ್ ಆಯ್ಲೆವಾರ್ ಸರಾಗ್ ರಿತಿನ್ ಕವಿತಾ ಬರಯ್ತಾ. ಕವಿತೆಚೆಂಚ್ ಅಧ್ಯಯನ್ ಕರುನ್ ಆಸಾ ದೆಕುನ್ ಫುಡೆಂ ಹಾಚ್ಯಾಕೀ ಬರಿ ಕವಿತಾ ತೊ ಪಯ್ಣಾರಿಚೆರ್ ಘೆವ್ನ್ ಯೆತಲೊ ಮ್ಹಳ್ಳೊ ಭರ್ವಸೊ ಹಾಂವ್ ದವರ್ತಾಂ. ಹ್ಯಾ ಕವಿತೆಚಿ ಸೊಭಾಯ್ ಚಾಕುಂಕ್ ತುಕಾ ಉಲೊ ದಿತಾಂ.

[ಕವಿತಾ] ಕಾಳೊ-ಪಾಂಚ್ವೊ ಫಳೊ[ಗವ್ರಂಗ್ ಗೋಕುಲ್‌ದಾಸ್ ನಾಯ್ಕ್]

ಕಾಳೊ-ಪಾಂಚ್ವೊ ಫಳೊ

ಮುಳಾವ್ಯಾ ಶಾಳೆಂತ್

ಮ್ಹಾಕಾ ಭೆಟಿಲ್ಲೊ,

ವರ್ಗಕುಡೀಂತ್ ಹಾಂವೆಂ ತಾಕಾ

ಪಯ್ಲೆಚ್ ಫಾವ್ಟ್ ಪಳಯ್ಲ್ಲೊಂ,

ಅಸೊ ಮ್ಹಜೊ ಇಶ್ಟ್

ಕಾಳೊ-ಪಾಂಚ್ವೊ ಫಳೊ,

ಜಾಣೆಂ ಫುಲಯ್ಲೊ

ಜಿವಿತಾಂತ್ ಮ್ಹಜ್ಯಾ

ಶಿಕ್ಷಣಾಚೊ ನವೊ ಮಳೊ...

ಕಾಳ್ಯಾಕೀಟ್ಟ್ ಆಂಗಾರ್ ತಾಚ್ಯಾ

ಅಕ್ಷರಾಂಚಿಂ ತಿಂ ವಿಂಗಡ್ ವಿಂಗಡ್ ರುಪಾಂ,

ಫುಡಾರಾಚ್ಯಾ ಮಳ್ಬಾಂತಲಿಂ ರಂಗ್-ಬಿರಂಗಿ ಹಿಂ ಕುಪಾಂ,

ಚಿತ್ರಕಲೆಂತಲಿಂ ತಿಂ ಮಳ್ಬಾಂತ್ ಉಡ್ಪಿ ಸವ್ಣಿಂ,

ತ್ಯಾಚ್ ಫಳ್ಯಾರ್ ಘಡಯ್ಲ್ಲಿ ಮಾಸ್ತರಾನ್

ಇತಿಹಾಸಾಂತಲಿ ತಿ ಪೊರ್ಣಿ ಅಶಿ ಕಾಣಿ…

ಬೊವಾಳ್ ಕರ್ತಾ ಮ್ಹೂಣ್

ಮಾಸ್ತರಾ ಬಶೆನ್ ಕೆನ್ನಾಚ್ ತಾಪ್ಲೊನಾ,

ಶಾಣೊ ಫಳೊ ತೊ ಆಮ್ಚೊ

ತಾಚೆರ್ ಬರಯ್ ಬರಯ್ ಬರಯ್ಲೆಂ

ಪೂಣ್ ತೊ ಕೆನ್ನಾಚ್ ಬೆಜಾರಲೊನಾ…

ಸಣ್ ಆಸುಂ ಪರಬ್

ತೆಂಕಾ ಶಾಳೆಂತ್ಲ್ಯಾನ್

ಭಾಯ್ರ್ ಸರೂಂಕ್ ಗಾವ್ಲೆಂಚನಾ,

ರಾತ್ ಆಸುಂ ದೀಸ್

ನ್ಹಿದೂಂಕ್ ಲೆಗೀತ್ ತಾಕಾ

ಕೆನ್ನಾ ಬಾಬ್ಡ್ಯಾಕ್ ಮೆಳ್ಳೆಂಚನಾ…

ಶಿಕೂನ್ ವ್ಹಡ್ ಜಾಲ್ಲ್ಯಾ ದರೆಕ್ಲ್ಯಾನ್

ಫಳ್ಯಾಚ್ಯಾ ರಿಣಾಂತ್ ಜರೂರ್ ರಾವ್ಚೆಂ

ತ್ಯಾಗ್ ಆನಿ ಸಮ್ರ್ಪಣ್ ಮ್ಹಳ್ಯಾರ್ ಕಿತೆಂ

ತೆಂ ನಿರ್ಜೀವ್ ಫಳ್ಯಾಕಡಸೂನ್ ಶಿಕ್ಚೆಂ…

ಕಾಳ್ಯಾ ಕಾಳ್ಯಾ ಫಳ್ಯಾ

ಪಾಂಚ್ವೊ ತುಂ ಕೆನ್ನಾ ಜಾಲೊ

ತೆಂ ಆಮ್ಕಾಂ ಕಳ್ಳೆಂಚನಾ,

ರಂಗ್ ಆಕಾರ್ ಬದ್ಲಲೊ ತರಿ

ಸೆವಾನಿವೃತ್ತ್ ತುಂ ಕೆನ್ನಾ ಜಾಲೊಚನಾ…

ಕಾಳ್ಯಾ-ಪಾಂಚ್ವ್ಯಾ ಫಳ್ಯಾ

ತುವೆಂ ವಿಸವ್ ಘೆವ್ಚಿ

ವೆಳ್ ಆತಾಂ ಆಯ್ಲ್ಯಾ,

ಕಾರಣ್, ವರ್ಗಕುಡೀಂತ್ ತಾಂಣಿ

ಇ-ಸ್ಕ್ರೀನ್ ಆತಾಂ ಬಸಯ್ಲ್ಯಾ,

ಪೂಣ್, ಕಿತ್ಲೀಂಯ್ ಯಂತ್ರಾಂ ಯೆವಂದಿ,

ಹುಶಾರ್ ಜಾವ್ಚೆ ಖಾತೀರ್

ಕಿತ್ಲೆಂಯ್ ಸ್ಮಾರ್ಟ್ ಕ್ಲಾಸ್ರೂಮ್ ತಾಂಣಿ ಘಡೊವಂದಿ,

ತುಜ್ಯಾಸಯತ್ ಕೆಲ್ಲಿ ಸುರ್ವಾತ್

ಕಾಳ್ಜಾಂತ್ ಸದಾಂಚ್ ಉರ್ತಲಿ,

‘ಕಾಳ್ಯಾ-ಪಾಂಚ್ವ್ಯಾ ಫಳ್ಯಾ’

ತುಜ್ಯಾಚ್ ಪ್ರೆರ್ಣೆನ್

ಆಮಿ ಭುರ್ಗಿಂ ಶೈಕ್ಷಣೀಕ್ ಮಳಾರ್

ಫುಲ್ತಲಿಂ ಆನಿ ಫಳ್ಟಲಿಂ…

- ಗವ್ರಂಗ್ ಗೋಕುಲ್‌ದಾಸ್ ನಾಯ್ಕ್ [ಮಾಯ್, 2019]

ಗವ್ರಂಗ್ ಗೋಕುಲ್‌ದಾಸ್ ನಾಯ್ಕ್: ಗೊಂಯ್ಚಾ ವಿಧ್ಯಾಲಯಾಂತ್ ಕೊಂಕಣಿಚೆಂ ಪದ್ಯುತ್ತರಾಚೆಂ ಶಿಕಪ್ ಜೊಡುನ್ ಆಸ್ಚೊ ತರ್ನೊ ಕವಿ ಗವ್ರಂಗ್ ಆಯ್ಲೆವಾರ್ ಸರಾಗ್ ರಿತಿನ್ ಕವಿತಾ ಬರಯ್ತಾ. ಭಾಂಗಾರ್‌ಭುಂಯ್‌ಚೆರ್ ಹಾಚ್ಯೊ ಸಭಾರ್ ಕವಿತಾ ಪರ್ಗಟ್ಲ್ಯಾತ್. ಸಭಾರ್ ಕವಿಗೋಶ್ಟಿಂನಿ ಹಾಣೆಂ ಕವಿತಾಸಾದರ್ ಕೆಲ್ಯಾಂತ್.