ಕಾಳ್ಯಾ ಪಯ್ಶಾಚ್ಯಾ ಆರೊಪಾಂತ್ [ ಅಮೇಯ್ ನಾಯ್ಕ್, ಗೊಂಯ್]

ಜೆದ್ನಾ ಆಸಾ ದುಡು, ತೆದ್ನಾ ಆಸ್ತಲೆಂ ಸಕ್ಕಡ್; ದೇಶ್‌ಪ್ರೇಮ್, ದೇವ್-ಧರ್ಮ್, ಭಾಸ್-ಜಾತ್. ಆನಿ ಜೆದ್ನಾ ಕಾಳೊ ದುಡು ಕಾಮ್ ಕರುಂಕ್ ಲಾಗ್ತಾನಾ ಕಸಲಿಂ ಮಾರೆಕಾರ್ ಘಡಿತಾಂ ಘಡುಂಕ್ ಜಾತಾತ್ ಅನಿ ಕಶಿಂ ಹಿಂ ಘಡಿತಾಂ ಸಮಾಜೆಕ್ ಪಿಡ್ಡ್ಯಾರ್ ಕರುಂಕ್ ಸಕ್ತಾತ್ ಮ್ಹಳ್ಳೆವಿಶಿಂ ಸವಿಸ್ತಾರ್ ರಿತಿಚೊ ಆಟೊವ್ ಕೆಲ್ಲೊ ಹ್ಯಾ ಕವಿತೆಂತ್ ದಿಸುನ್ ಯೆತಾ.

ಬಾಬ್ ಅಮೇಯ್ ನಾಯ್ಕ್ ಏಕ್ ತರ್ನಾಟೊ ಕವಿ ಪುಣ್ ತಾಚಿ ನದರ್ ಜಾಣ್ತಿ, ಗುಂಡಾಯೆಚಿ ತಶೆಂಚ್ ಪ್ರಭುದ್ದ್. ದೆಕುನ್ ಹಿ ಕವಿತಾ ಫಕತ್ ಎಕಾ ಕವಿತೆಚ್ಯಾ ಮೆರೆರ್ ಉರಾನಾ. ಬಗಾರ್ ಸಮಾಜೆಚ್ಯಾ ವೆವೆಗ್ಳ್ಯಾ ಕುಶಿಂಚೆರ್ ಆರ್ಸೊ ಧರ್ತಾ ಆನಿ ಕವಿತಾರಸಿಕಾಂಕ್ ನವೆಂಚ್ ಅಮಾಲ್ ದಿತಾ ಮ್ಹಣ್ಚ್ಯಾಕ್ ಗವಾಯ್ ಜಾಂವ್ಕ್ ತುಕಾಚ್ ಸೊಡ್ತಾಂ.

[ಕವಿತಾ] ಕಾಳ್ಯಾ ಪಯ್ಶಾಚ್ಯಾ ಆರೊಪಾಂತ್ [ಅಮೇಯ್ ನಾಯ್ಕ್, ಗೊಂಯ್]

ಕಾಳ್ಯಾ ಪಯ್ಶಾಚ್ಯಾ ಆರೊಪಾಂತ್

ಕಾಳ್ಯಾ ಪಯ್ಶಾಚ್ಯಾ ಆರೊಪಾಂತ್

ಕಿತ್ಲ್ಯೊಶೊಚ್ ನೊಟಿ

ಭೊಗ್ತಾತ್ ಜಲ್ಮಠೆಪ್,

ದುಬಾವೀತ್ ಮ್ಹಣ್

'ರಿಜರ್ವ್ ಬೆಂಕೆಚ್ಯಾ' ಬಂದ್ಖಣೀತ್...

ಹ್ಯಾ ಚಳವ್ಳೀಂತ್

ಗಾಂಧೀಯ್

ಆಪ್ಖೊಶೆಯನ್ ಜಾಲೊ ಮೆತೆರ್

ತೆಣೆಂ ಸೊಡ್ಲೊ ಜಾಗೊ

ಬದ್ಲ್ಲಿ ದೀಶಾ

ಆನಿ ತೊಣಾವ್ಯಲೊ

ರಂಗೂಯ್.

ನಿವ್ಳಟಲೊ ಆತಂಕವಾದ್

ದೆಶಾವ್ಯಲೊ ಭಾರ್

ಭ್ರಷ್ಟಾಚಾರ್... ಸಾರ್ಕೆಂ

ಉಮೆದಿ ನಾರೆಂ,

ದೀತಾಲೆಂ ಪ್ರೊತ್ಸಾಹಾತ್

ಪೊನ್ನ್ಯಾ ನೊಟೀಂಕ್

ಬಲೀದಾನ್ ದೀವಂಕ್.

ಚಳವ್ಳ್ ಸೊಪ್ತೊಕೂಚ್

ಭಾಂಗ್ರಾಂಚ್ಯಾ ತಿಜೊರೀತ್ ರಾವ್ಪಿ

ಪೊನ್ನ್ಯಾಂ ನೊಟೀಂಕೂಯ್,

ಮೆಳ್ಪಾಕ್ ಲಾಗ್ಲಿ ವಾಗ್ಣೂಕ್

ಅಛೂತಾಂವರಿ.

ನವ್ಯೊ ನೊಟಿ

ಜಲ್ಮಾಕ್ ಯೆತಾಂಚ್ ಜಾಲ್ಯೊ

ಕುಪೊಶೀತ್.

ಮನಾಂತ್ ನಾಸ್ತನಾಯ್ ತೆಂಕಾ

ರಾವ್ಚೆಂ ಪಡ್ಲೆಂ ಆಶ್ರೀತ್ ಮ್ಹಣ್

ಭಾಂಡವ್ಲಶಾಹೀಚ್ಯಾ ದಬಾವಾಂತ್...

ಧರ್ಮ್ ಪರಿವರ್ತನ್ ಕೊರೂನ್

ಕಾಳ್ಯಾ ಪಯ್ಶಾನ್ ಘೆತ್ಲೊ

ಭಾಯ್ಲ್ಯಾ ಬೆಂಕಾನಿ ರಾಜಾಶ್ರಯ್

ಯುಧ್ದ್ ಪಾತ್ಳೆರ್ ಜಾಲೊ ಪ್ರಯತ್ನ್

ತೆಂಚ್ಯಾ ಘರ್ ವಾಪಸೀ ಖಾತೀರ್.

ತೊ ಖಯೂಯ್ ಪಾವೊ

ತೊ ಖಯೂಯ್ ರಾವೊ

ತೆಕಾ ನಾ ಭಯ್.

ವಿಚಾರೀಲ್ಲ್ಯಾ ಪ್ರಸ್ನಾಂಕ್

ಕೆಲ್ಲ್ಯಾ ಆರೊಪಾಂಕ್

ತೆಜೊ ಎಕೂಚ್ ಜವಾಂಬ್...

ಭಾರತ್ ಮಾತಾ ಕಿ ಜಯ್

ಭಾರತ್ ಮಾತಾ ಕಿ ಜಯ್

- ಅಮೇಯ್ ನಾಯ್ಕ್, ಗೊಂಯ್ [ಮಾಯ್, 2019]