हें मन [शरत्‌चंद्र शेणय, एर्नाकुळम]

एकलो जाणटो कवी अशें म्हणता; 'My mind to me a kingdom is.', आनी खरेंच जावन मनशाचें मन‌च मनश्याची राज्वटकी. हांगासर बरें आनी वायटाचेर तरक जाता, संवाद जाता, वारजीक जाता आनी उपरांत नीत जाता. मन‌च एक कोर्ट मनशाक. देकून मनीस अपणाक हेरां खयस करतात वा ना तें अमकां पडोन गेल्लें ना, देकून त्ये विशयांत आमी चडीत चिंतीत जांवची गरज ना म्हणता स्वामी विवेकानंद; 'Like me or hate me, both are in my favour, If you like me I am in your heart, if you hate me I am in your mind.'

बाब शरत‌चंद्र शेणय (एर्नाकुळम) केरळाचो नामणेचो कोंकणी कवी. साहीत अकाडेमी, टी.एम.ए.पै बूक पुरसकार असले प्रतिश्टीत पुरसकार जिकपी. ही कविता वाचून ह्या कवितेचो स्वाद भगुंक तुमकांच सोडतां.

[कविता] हें मन [शरत्‌चंद्र शेणय, एर्नाकुळम]

हें मन

मन हें धांवता गेल्ल्या दिसांच्या फाटल्यान

माका भोंवंडायता उडगासांच्या उद्यानान

उडगास हासयताय, उडगास रडयताय

उडगास खास हे सहज मित्रांच्या समान.

मन हें मग्न भोगून गेलेल्या अणभवांनी

शेणलेल्या, विसरांत पडलेल्या उतरांनी

खिणभर मुग्ध, साम्य नातलेल्या संतोषान

खिणभर तप्त, साम्य नातलेल्या शोकान.

भूतकालांतू घुकलून घाला माका मनान

जाय जाय म्हूण दिसपी जादूच्या जगान

ओंट पळयताय हासूंक, दोळे पळयतय रडूंक

ह्रदयांतर भरला हून हून अथ्रेकान.

हंगाच्यान थांगा आनी थंयचेय पेल्यान

मारता उडक्यो एक मर्कडा भाशेन

वेळ काळ चोयना, समय संदर्भ पळयना

भोंवता शीड शेणलेल्या व्हड्या भाशेन.

वर्तमान जागयता, भविष्य आपयता

अमोलीक रे मना दर एक खीण

व्यर्थ सारचें न्हय नेणतां शेणचें न्हय

खिणांनी विणली आसा ही जीण!

- शरत्‌चंद्र शेणय, एर्नाकुळम  [एपरील २०१८]

शरत‌चंद्र शेणय: एर्नाकुळम केरळाचो नामणेचो कोंकणी कवी. साहीत अकाडेमी, टी.एम.ए.पै बूक पुरसकार असले प्रतिश्टीत पुरसकार जिकपी. ’इदं न मम’ हांचो कविताजमो सवें सभार हेर बूक सयत संपादन करून पर्गट केल्यात.