हांव वतकीच...... [- हर्षा शेटये]

म्हज्या विरहान जळून

नाका बांदूंक तूं ताजमहाल

यादींनी आकुळपिकूळ

जालोच जाल्यार

दोन दुकां गळय

यमुनेच्या उदकांत

अनादी काळासावन

अस्तुरेच्या मनाचो

घुस्मट सोंसपी

यमुनेचो तळ

धवळून वचूंदी

तुज्या दोन दुकांनी

धवेफुल्ल कबरींत न्हिदिल्ल्या

मुमताजाकय जाग येवंदी

तिणेंय जोखूंदी

एकेच तागडेंत

शाहजहानाच्या

संगमरवरी शिल्पा वांगडा

तुजींय दोन दुकां

आनी अजापान पळोवंदी

तागडेचीं दोनूय दालीं

एकाच मापाची जाल्लीं.........

- हर्षा शेटये. [दसेंबर, २०१९९]

हर्षा शेटये: गोंयची नाम्नेची कवी, कथाकार आनी बाळ साहीत‌कार. ’म्हजी माती म्हजें मोळब’ कवितजम्यासवें हेर ८ बूक पर्गटल्यात. अखील भारतीय कवी सम्मेळनाचो पुरसकार हिच्या कविताजम्यक लाभला. तशेंच कोंकणी भाशा मंडळ गोंय थावन, बिंब पुरसकार, कोंकणी भाशा प्रचार सभाचो एन.एम.सरस्वती पुरसकार हिका लाभला. हिणें जानपद, गोंयची अस्मिताय, गोंयची आदली खाणां,शेवणीं,रानफुंलां,पोरण्यो वस्तु, हांची म्हायती एकठांय करता. तांचेर लेख बरयता. राश्ट्रीय कामासाळांनी कविता/प्रबंधां सादर केल्यांत.