ಹಾಂವ್ ವತ್ಕೀಚ್...... (- ಹರ್ಷಾ ಶೆಟ್ಯೆ)

[ಕವಿತಾ] ಹಾಂವ್ ವತ್ಕೀಚ್...... (- ಹರ್ಷಾ ಶೆಟ್ಯೆ)

ವೆಗ್ಳಾಚಾರಾಚೆಂ ದೂಕ್ ಜೆದ್ನಾಂ ದೋನ್ ಕಾಳ್ಜಾಂ ಕಶೆಂ ಭಗುಂಕ್ ಸಕ್ತಿತ್ ಮ್ಹಳ್ಳೆ ವಿಶ್ಯಾಚೆರ್ ವಿಣ್ಲಲಿ ಕವಿತಾ ಹಿ. ಪುಣ್ ಕವಿತೆಚಿಂ ಲ್ಹಾರಾಂ ಯಮುನಾ ನ್ಹಂಯ್‌ಚ್ಯಾ ತಡಿಕ್ ಆಪ್ಟುಂಚ್ಯಾ ಉದ್ಕಾಂತ್ ವೆಗ್ಳಾಚಾರಾಕ್ ಭಗ್‌ಲ್ಲಿಂ ದುಕಾಂ ಆಸುಂದಿ ಮ್ಹಳ್ಳೆಂ ಸವಾಲ್ ಉಭೆಂ ಆಸಾ ಮಾತ್ರ್ ನ್ಹಯ್, ಎಕಾ ದಿಸಾ ಅಪ್ಲ್ಯಾ ಪ್ರೇಮಿಚ್ಯಾ ವೆಗ್ಳಾಚಾರಾಚಿ ದೂಕ್ ವಿಸ್ರುಂಕ್ ತಾಜ್‌ಮಹಲ್ ಭಾಂದ್ಲೆಲ್ಯಾ ಶಾಜಹಾನಾಕ್ ಎಕಾ ತಾಗ್ಡೆಂತ್ ತುಕ್ಚೆಂ ಶರ್ಥ್‌ಯೀ ಆಸಾ.

ಬಾಯ್ ಹರ್ಶ ಶೆಟ್ಯೆ ಗೊಂಯ್ಚಿ ಏಕ್ ನಾಮ್ನೆಚಿ ಕವಿ, ಕಥಾಕಾರ್ ತಶೆಂಚ್ ಸಂಶೋಧಕ್. ರಾಶ್ಟ್ರೀಯ್ ಸಮ್ಮೇಳನಾಂನಿ ತಿಣೆಂ ವಾಂಟೊ ಘೆತ್ಲಾ ತಶೆಂಚ್ ಪ್ರಬಂಧಾಂ ಸಾದರ್ ಕೆಲ್ಯಾಂತ್. ಹಿಚ್ಯಾ ಹ್ಯ ಕವಿತೆಚೊ ಅಸ್ವಾದ್ ಚಾಕುಂಕ್ ತುಕಾಚ್ ಉಲೊ ದಿತಾಂ.

[ಕವಿತಾ] ಹಾಂವ್ ವತ್ಕೀಚ್...... (- ಹರ್ಷಾ ಶೆಟ್ಯೆ)

ಹಾಂವ್ ವತ್ಕೀಚ್......

ಹಾಂವ್ ವತ್ಕೀಚ್

ಮ್ಹಜ್ಯಾ ವಿರ್ಹಾನ್ ಜಳೂನ್

ನಾಕಾ ಬಾಂದೂಂಕ್ ತುಂ ತಾಜ್ಮಹಾಲ್

ಯಾದೀಂನಿ ಆಕುಳಪಿಕೂಳ್

ಜಾಲೊಚ್ ಜಾಲ್ಯಾರ್

ದೊನ್ ದುಕಾಂ ಗಳಯ್

ಯಮುನೆಚ್ಯಾ ಉದ್ಕಾಂತ್

ಅನಾದಿ ಕಾಳಾಸಾವನ್

ಅಸ್ತುರೆಚ್ಯಾ ಮನಾಚೊ

ಘುಸ್ಮಟ್ ಸೊಂಸ್ಪಿ

ಯಮುನೆಚೊ ತಳ್

ಧವ್ಳೂನ್ ವಚೂಂದಿ

ತುಜ್ಯಾ ದೊನ್ ದುಕಾಂನಿ

ಧವೆಫುಲ್ಲ್ ಕಬ್ರೀಂತ್ ನ್ಹಿದಿಲ್ಲ್ಯಾ

ಮುಮ್ತಾಜಾಕಯ್ ಜಾಗ್ ಯೆವಂದಿ

ತಿಣೆಂಯ್ ಜೊಖೂಂದಿ

ಎಕೆಚ್ ತಾಗ್ಡೆಂತ್

ಶಾಹ್ಜಹಾನಾಚ್ಯಾ

ಸಂಗ್ಮರವರಿ ಶಿಲ್ಪಾ ವಾಂಗ್ಡಾ

ತುಜೀಂಯ್ ದೊನ್ ದುಕಾಂ

ಆನಿ ಅಜಾಪಾನ್ ಪಳೊವಂದಿ

ತಾಗ್ಡೆಚಿಂ ದೊನೂಯ್ ದಾಲಿಂ

ಎಕಾಚ್ ಮಾಪಾಚಿ ಜಾಲ್ಲಿಂ.........

- ಹರ್ಷಾ ಶೆಟ್ಯೆ. [ದಸೆಂಬ್ರ್, 2019]

ಹರ್ಷಾ ಶೆಟ್ಯೆ: ಗೊಂಯ್ಚಿ ನಾಮ್ನೆಚಿ ಕವಿ, ಕಥಾಕಾರ್ ಆನಿ ಬಾಳ್ ಸಾಹಿತ್‌ಕಾರ್. ’ಮ್ಹಜಿ ಮಾತಿ ಮ್ಹಜೆಂ ಮೊಳಬ್’ ಕವಿತಜಮ್ಯಾಸವೆಂ ಹೆರ್ 8 ಬೂಕ್ ಪರ್ಗಟ್ಲ್ಯಾತ್. ಅಖಿಲ್ ಭಾರತೀಯ್ ಕವಿ ಸಮ್ಮೆಳನಾಚೊ ಪುರ್ಸಕಾರ್ ಹಿಚ್ಯಾ ಕವಿತಾಜ್ಮ್ಯಕ್ ಲಾಭ್ಲಾ. ತಶೆಂಚ್ ಕೊಂಕ್ಣಿ ಭಾಶಾ ಮಂಡಳ್ ಗೊಂಯ್ ಥಾವ್ನ್, ಬಿಂಬ್ ಪುರ್ಸಕಾರ್, ಕೊಂಕ್ಣಿ ಭಾಶಾ ಪ್ರಚಾರ್ ಸಭಾಚೊ ಎನ್.ಎಮ್.ಸರ್ಸ್ವತಿ ಪುರ್ಸಕಾರ್ ಹಿಕಾ ಲಾಭ್ಲಾ. ಹಿಣೆಂ ಜಾನ್ಪದ್, ಗೊಂಯ್ಚಿ ಅಸ್ಮಿತಾಯ್, ಗೊಂಯ್ಚಿ ಆದ್ಲಿ ಖಾಣಾಂ,ಶೆವ್ಣಿಂ,ರಾನ್ಫುಂಲಾಂ,ಪೊರ್ಣ್ಯೊ ವಸ್ತು, ಹಾಂಚಿ ಮ್ಹಾಯ್ತಿ ಎಕ್ಠಾಂಯ್ ಕರ್ತಾ. ತಾಂಚೆರ್ ಲೆಖ್ ಬರಯ್ತಾ. ರಾಶ್ಟ್ರೀಯ್ ಕಾಮಾಸಾಳಾಂನಿ ಕವಿತಾ/ಪ್ರಬಂಧಾಂ ಸಾದರ್ ಕೆಲ್ಯಾಂತ್.