ಘುಸ್ಪಲ್ಲೆಂ ಮನ್ (- ಮಾಯ್ರನ್ ಜೇಸನ್ ಬಾರೆಟ್ಟೊ)

ದರಿಯಾ ಪಳೆವಂಕ್ ದಿಸ್ತಾ ಘಾಮೆಲಾ

ಶಿಂವ್ರಾಯ್ಲ್ಲೆಂ ಉದಕ್ ಆಸುನ್ ಪರಿಯಾನ್

ದರಿಯಾ ಆಶೆವ್ನ್ ಉದ್ಕಾಕ್ ತಾನೆಲಾ

ಭಾಂಗಾರ್-ಶ್ರಿಂಗಾರ್ ನ್ಹೆಸುನ್ ಪಾಸುನ್

ಮನಿಸ್ ಸಗ್ಳಚ್ ಥರ್ಥರ್ಲಾ

ನಿಳ್ಯಾ ಮಳ್ಬಾರ್ ಚಕ್ಚಕ್ತಾತ್

ಕಿರ್ಣಾ ಬಿಟ್ಬಿಟ್ಯಾ ಸುರಿಯಾಚಿಂ

ಅಂತ್ರಾಳ್ ಲಕ್ಲಕ್ ಭಗುನ್ ಲೆಗಿತ್

ಭುಕೆಲಾ ಗಿರಾಸಂಕ್ ಕಿರ್ಣಾ ಉಜ್ವಾಡಾಚಿಂ

ಉಠಿಯೆಂತ್ ಹಾತ್ಯೆರಾಂ ಎಕ್ಠಾವ್ನ್ ಸಯ್ತ್

ಮನಾಂತ್ ಚಿತ್ನಾಂ ಭಿರಾಂತಿಚಿಂ

ಝಾಡಾಂಪೆಡಾಂ ಲಕ್ತಾತ್

ಜಳ್ಜಳಿತ್ ಬಳಿಶ್ಟ್ ವಾರ್ಯಾಚೆರ್

ಆಂಗ್ ಹಾಲನಾಂ ಮ್ಹಣ್ ಫುತ್ಫುತ್ತಾತ್

ಸುಕ್ಣಿಂ ಬಸುನ್ ಖಾನ್ಡ್ಯಾಂಚೆರ್

ಚುಲಿಚೆರ್ ಪೆಜೆಚೊ ನಿಸ್ ವತ್ತಾ

ಪುಣ್ ಜೆವ್ಣಾಚೊ ದುಬಾವ್ ಮನಾಚೆರ್

ಮಿರ್ಗ್ ಲಾಗ್ತಾನಾಂ ಕುಪಾಂ ಆಪ್ಟತಾತ್

ಸಡುನ್ ಘಸ್ಘಶಿತ್ ವ್ಹಾಳ್ ಉದ್ಕಾಚೆ

ಬೆಬೊ ಶಿಣ್ ಕರುನ್ ಬಡ್ಬಡ್ಟಾ

ಆಜುನ್ ಯೆನಾಂತ್ ಮ್ಹಣ್ ದಿಸ್ ಪಾವ್ಸಾಚೆ

ಸಂತಸಾಚ್ಯಾ ಪಾವ್ಲಾಂ ಕಣ್-ಕಣಿಂ

ಮನ್ ನಿಯಾಳ್ಟಾ ಕಶ್ಟ್ ಜಿವಿತಾಚೆ

ದುರ್ದವ್ಯಾ ಮನಿಸ್ ಸಗ್ಳಚ್ ಸಾನ್ಡ್ಲಾ

ಮನಾಕ್ ರೆವಡನ್ ವಾಯ್ಟಾಚ್ಯೊ ಸಾಂಕ್ಳಿಯೊ

ದೆವಾ ಆಸ್ಣ್ಯಾಚೊ ದಿವೊ ಪಾಲಯ್ಲಾ

ಕಾನಾಂತ್ ರಿಗವ್ನ್ ಖಬ್ರೊಕಾಣಿಯೊ

ಮನ್ಶಾಚೆಂ ಮನ್ ಘುಸ್ಪಲಾ

ಪಳೆವ್ನ್ ಘಡ್ಟಲಿಯೊ ಘಡ್ಣಿಯೊ

- ಮಾಯ್ರನ್ ಜೇಸನ್ ಬಾರೆಟ್ಟೊ. [ಜುಲಾಯ್, 2020]